Tala e Nkumbu Muna Londe

Nga wawá kala e fulu kina ye nkumbu a St. Moritz? E fulu kiaki kina muna Londe lwa Engadine, kuna Suíça, kitomene zayakana ova nza. Kansi, St. Moritz i fulu kituntanga wantu ayingi mu kingula londe lwalu luna vana yand’a mongo una kuna este ya Suíça, lukufi ye Itália. Muna londe lwalu i mwina mpe e Parque Nacional ya Suíça, fulu kiambote kina ye ulolo wa nti ye bulu ikembelelanga Yave wa Mvangi Anene. (Nku. 148:7-10) Vena mpe ye fu kiankulu kiayantika muna tandu kia 17 kikembelelanga Yave.

Vena ye diambu dilenda kusivikisa muna nzo zayingi za londe lwalu. Olenda solola nkumbu a Nzambi yasonama muna nzo, musungula muna mielo. Muna tandu yavioka, wantu bakala ye fu kia viengesa e yaka ya mbazi a nzo zau ye masono, muna sadila  e tinta yovo etadi. Olenda mona masono mama muna nzo zina kun’evata dia Bever. Masono mama meyikanga vo: “Mvu wa 1715. Yave i lubantiku, Yave i nsuka. Lekwa yawonso Nzambi wavanga yo, ke vena lekwa ko kialembi vangwa kwa yandi.” Kieleka, e nkumbu a Nzambi nkumbu miole yasonama muna sinsu kiaki kiankulu.

Olenda mona mpe masono mankulu mun’evata dia Madulain. Masono mama meyikanga vo: “Nkunga 127. Kele vo Yave katungi nzo ko, atungi e nkatu bafuntukina yo. Lucius Rumedius. Muna mvu wa 1654.”

E nkumbu a Nzambi aweyi yasayanena muna mavata ma londe lwalu? Muna tandu ya Reforma, Nkand’a Nzambi wavaikiswa mu ndinga Romanche, ndinga yatuka muna ndinga Latim yavovwanga kuna Engadine. Wau i nkand’antete wasekolwa muna ndinga yayi. Mu kuma kia mana batanganga muna Diambu dia Nzambi, wantu ayingi vava basonekanga e nkumbu zau muna yaka ya nzo zau, basonekanga mpe e sono ya Nkand’a Nzambi iyikanga e nkumbu a Nzambi.

Tuka muna tandu kiasonekwa masono mama muna nzo zazi yamu wau, masono mama mezayisanga e nkumbu a Yave yo kunkembelela. Anzenza kumosi y’awana bezingilanga muna londe lwalu bebokelwanga mu longoka mayingi mu kuma kia Yave wa Nzambi, muna kingulanga nzo akaka yasonekwa e nkumbu yayi, i sia vo, Eseka dia Kintinu dia Mbangi za Yave kuna Bever.

[Avwe a Foto muna lukaya lwa 7]

© Stähli Rolf A/age fotostock