Tukumikwanga mu Zizidila Konso Mpasi
Tukumikwanga mu Zizidila Konso Mpasi
“Nlenda vanga mawonso muna ndion’okunkùmikanga.”—FILI. 4:13.
1. Ekuma nkangu a Yave benwaninanga ye mpasi za mpila mu mpila?
NKANGU a Yave mpasi za mpila mu mpila benwananga zau. Mpasi zakaka muna kiwuntu kieto kialembi lunga zitukanga yovo mu tandu kiaki tuzingilanga. Zakaka mu kuma kia kimbeni vana vena awana besadilanga Nzambi y’awana ke bekunsadilanga ko. (Etu. 3:15) Tuka kuna nz’ankulu, Nzambi osadisanga selo yandi yakwikizi mu zizidila lubangamu mu kuma kia nsambila, umpukumuni w’akundi ye mpasi za mpila mu mpila. O mwand’andi avelela ulenda kutusadisa mu vanga diau adimosi.
Lubangamu mu Kuma kia Nsambila
2. Adieyi i kani dia lubangamu mu kuma kia nsambila? Nkia mpila lulenda kwizila?
2 O lubangamu mu kuma kia nsambila, i mpasi yovo kitantu kisiwanga o wantu mu kuma kia lukwikilu lwau. Ekani dia lubangamu lwalu i vava fwasa yovo kulula lukwikilu lwa minkwikizi. Lubangamu mu mpila zayingi lukwizilanga, lulenda kala lwasweki yovo lwazayakana. Nkand’a Nzambi utezanesanga e ntonta za Satana ye mpila ina e nkosi ye nioka bebakilanga bulu.—Tanga Nkunga 91:13.
3. Nze nkosi ye nioka, nkia ntambu kesadilanga Satana?
3 Nze nkosi, Satana lenda vava kutubaka muna sadila lubangamu, kutusia mu pelezo yovo soka nsiku mia luyalu misimanga e salu kia nkangu a Yave. (Nku. 94:20) E Anuário iyikanga lusansu lwa Mbangi za Yave omu lumbu yeto, isonganga una Satana kesadilanga ndekwa zazi. Ezak’e ntangwa, mfumu za mabundu yovo ayadi ana bezolanga kuyisana, befilanga wantu mu bangika nkangu a Nzambi muna zunga yayingi. Akete beyambulanga sadila Yave mu kuma kia lubangamu. Nze nioka, Nkadi Ampemba osadilanga mpe ntambu miaswekama mu vava yivisa e ngindu za nkangu a Nzambi yo kubavengomona bayambula vanga luzolo lwandi. Osadilanga ntambu miami mu vava yoyesa yovo fwasa lukwikilu lweto. Kansi, muna lusadisu lwa mwand’avelela a Nzambi tulenda sunda e ntambu miami.
4, 5. Ayeyi i mpila yambote tulenda zizidila lubangamu? Ekuma? Yik’e nona.
4 O tokana kwayingi mu kuma kia dina dilenda bwa kuna sentu ke mpila yambote ko tulenda kubamena mu zizidila lubangamu. Ke tuzeye ko dina dilenda kutubwila kuna sentu, muna kuma kiaki, o tokana mu kuma kia diambu ke diavangamene ko ke ditwasanga nluta ko. Kansi, vena ye diambu tulenda vanga. Edi diasadisa ayingi mun’awana bazizidila lubangamu, i badikanga e nona ya selo ya Yave yakwikizi yasonama muna Nkand’a Nzambi kumosi ye malongi ye mbandu a Yesu. Ediadi diabasadisa mu siamisa zola kwau muna Yave. O zola kwaku mpe kwabasadisa mu zizidila konso mpasi zababwila.
5 Badika nona ya mpangi zole z’akento kuna Malaui. Muna kubakomekena basumba cartão político, bawandwa kwa ulolo wa wantu, bavulwa mvwatu yo vumiswa vo belekwa mu ngolo. Babavuna vo ampangi zawonso kuna Betele basumbidi kala e cartão zau. Adieyi bavova ampangi zazi z’akento? Bavova vo: “Oyeto Yave wa Nzambi kaka tusadilanga. Muna kuma kiaki, kele vo ampangi kun’evula basumbidi cartão, ediadi ke disoba nzengo zeto ko. Kana nkutu vo vondwa tuvondwa.” Vava bavan’e mvutu zazi, babayambula.
6, 7. Yave aweyi kekumikinanga selo yandi mu zizidila lubangamu?
6 Paulu wa ntumwa wayika vo Akristu kuna Tesalonika batambulwil’e diambu dia ludi “muna mpasi zayingi,” kansi ‘muna kiese kia mwand’avelela.’ (1 Tes. 1:6) Kieleka, Akristu ayingi ana bezizidilanga lubangamu tuka kuna nz’ankulu yamu lumbu yeto, bevovanga vo vava bakala mu mpasi, luvuvamu lwa ntima bakala lwau, luna vo kimosi muna fu ya mbongo a mwand’avelela a Nzambi. (Ngal. 5:22) Luvuvamu lwalu lwabasadisa mu lunga-lunga e ntima ye ngindu zau. Kieleka, Yave osadilanga nkum’andi mu kumika selo yandi muna zizidila e mpasi yo kala ye ngangu vava bebwilanga konso ntonta. *
7 O wantu besivikanga muna nzengo zibakanga nkangu a Nzambi za sikila ye kwikizi kana nkutu vava bebangikwanga. Mbangi za Yave bavwidi nkuma usundidi owu wa wantu. Petelo wa ntumwa okutusikidisanga vo: “Ovo nusembelwa muna nkumbu a Kristu, nu akwa nsambu; e kuma kadi, o mwand’a nkembo yo mwand’a Nzambi win’omo yeno.” (1 Pet. 4:14) Wau vo tubangikwanga mu kuma kia tatidila nkanikinu miansongi, ediadi disonganga vo tuna y’edienga dia Nzambi. (Mat. 5:10-12; Yoa. 15:20) Ekwe kiese tuna kiau mu zaya vo Yave okutusambulanga!
Tusadiswanga mu Zizidila Umpukumuni W’akundi
8. (a) Nki kiasadisa Yosua ye Kalebe mu zizidila umpukumuni w’akundi? (b) Adieyi tulenda longoka muna nona kia Yosua ye Kalebe?
8 Umpukumuni w’akundi imosi muna ntonta betoma nwananga zau Akristu. Kansi, wau vo mwand’a Yave usundidi ngolo ke mu mwand’a nza ko, tulenda sunda awana bekututiangunanga, ana bevovanga luvunu mu kuma kieto yovo ana bekutukomekenanga mu landa nkanikinu miau. Kasikil’owu, nki kiasadisa Yosua ye Kalebe mu lembi tambulwila ngindu z’alangi kumi ana bafilwa mu kwenda langa e nsi a Kenani? Mwand’avelela wabafila mu kala ye ngindu zaswaswana.—Tanga Ntalu 13:30; 14:6-10, 24.
9. Ekuma Akristu bafwete kadilanga baswaswana y’akaka?
9 Diau adimosi mpe, mwand’avelela wakumika antumwa mu lemvokela Nzambi ke mu mfumu za dibundu ko, kana una vo batoma zitiswanga kw’akaka. (Mav. 4:21, 31; 5:29, 32) Muna venga e ntantani, wantu ayingi bezolanga vanga dina akaka bevanganga. Kansi, nkumbu miayingi Akristu akieleka bezindalalanga vanga dina bazeye vo diambote. Muna kuma kiaki, tuvutulanga matondo muna nkuma kekutuvananga Nzambi. Ka tufwete monanga wonga ko wakala nswaswani y’akaka. (2 Tim. 1:7) Yambula twafimpa diambu dimosi ke tufwete yambula ko vo diatubwisa muna umpukumuni w’akundi.
10. Nkia diambu benwananga diau Akristu akaka?
10 Aleke akaka ke bezayanga ko dina bafwete vanga kele vo nkundi au uyivene mun’evangu dikululanga nsiku a Nkand’a Nzambi. Beyindulanga vo o zayisa esumu dia nkundi au kw’akuluntu kimana kasadiswa muna mwanda i kondwa e ziku kwa nkundi. O nsumuki nanga lenda lomba kw’akundi andi kasweka esumu diandi. Dialudi vo, ediadi ke dibwilanga kaka aleke ko. Dilenda kala mpe diampasi kw’ambuta mu zayisa esumu dia nkundi yovo yitu kw’akuluntu muna nkutakani. Kansi, aweyi Akristu akieleka balenda vanga muna ntonta za mpila yayi?
11, 12. Adieyi ofwete vanga kele vo mpangi muna nkutakani uvovese vo walembi sengomona esumu kavangidi? Ekuma?
11 Badika diambu edi. Yindula vo mpangi Alex, una vo nleke, ozeye wo vo Steve wa nkundi andi muna nkutakani fu kia tala mavangu ma zumba kena kiau. Alex ovovese Steve vo otokananga kwayingi mu kuma kia dina kevanganga. Kansi, Steve kesianga sungididi ko muna mvovo miandi. Vava Alex kamvovesa vo kazayisa e diambu diadi kw’akuluntu, Steve wavutula vo kele vo yau awole akundi akieleka, Alex kafwete dio zayisa ko kw’akuluntu. Nga Alex kafwete lunda mbumba mu lembi bembolwa kwa nkundi andi? Nanga olenda kala ye wonga kana vo akuluntu betambulwila e mvovo miandi kele vo Steve ovakwidi nkalu. Kansi, e diambu diadi dilenda wokela kele vo Alex kazayisi dio ko kw’akuluntu. Ediadi dilenda fila Steve mu vidisa e ngwizani andi yo Yave. Alex kafwete sungamena vo “o wonga wa wantu utwas’enekwa: On’obunda Yave e vuvu, ovulukidi.” (Nga. 29:25) Adieyi Alex kafwete vanga? Nanga olenda bokela diaka Steve yo kunsonga e mbi andi. O vanga wo unkabu divava. Dilenda kala vo mu nkumbu wau, Steve otambulwila mokena mu kuma kia diambu diandi. Alex kafwete kasakesa diaka Steve mu zayisa e diambu diadi kw’akuluntu yo kumvovesa vo kele vo kavangidi wo ko mu nzaki, ozevo Alex okubazayisa dio.—Fuka 5:1.
12 Avo ovangidi wo, nkundi aku nanga ke yangalela ko e ngolo ovangidi mu kunsadisa. Kansi, kuna kulanda obakula vo mu wete diandi ovangidi wo. Avo nsumuki otambulwidi lusadisu, olenda kuvutula matondo mu kuma kia unkabu ye kwikizi kiaku. Kuna diak’esambu, avo ufungidi makasi, nga ediadi disonga vo nkundi ambote kwa ngeye? O yangidika Yave wa Nkundi eto anene, i diambu disundidi o mfunu tufwete vanga. Vava tusianga Yave va fulu kiantete, ana bekunzolanga bekutuzitisa mu kuma kia kwikizi kieto yo kituka se akundi eto akieleka. Ka tufwete yambula ko vo Nkadi Ampemba kakota muna nkutakani y’Akristu. Avo tuvangidi wo, mwand’avelela a Yave tukendeleka. Kansi, tuzingila e ngwizani ye mwanda wau vava tusiang’e ngolo kimana nkutakani y’Akristu yakala yavelela.—Ef. 4:27, 30.
Tukumikwanga mu Zizidila Mpasi za Mpila mu Mpila
13. Nkia mpasi benwananga zau o nkangu a Yave? Ekuma mambu mama mevangamenanga?
13 Mambu mayingi metwasanga e mpasi—kondwa nzimbu, katulwa mu salu, sumbula, lufwa lwa nzolw’eto, mayela ye makaka mpe. Wau vo mu “lumbu yambaninu” tuzingilanga, yeto awonso tulenda wanana ye mpasi za mpila mu mpila. (2 Tim. 3:1) Avo ediadi dilwakidi, diamfunu walembi dimbula e vuvu. Mwand’avelela ulenda kutukumika mu zizidila konso mpasi.
14. Nki kiakumika Yobi muna zizidila mpasi?
14 Yobi mpasi zayingi kabwilwa. Wavidisa mavwa mandi, wana, akundi yo bakama kimbevo kiampasi. O nkaz’andi wayambula bund’e vuvu muna Yave. (Yobi 1:13-19; 2:7-9) Kansi, Yobi watambula lufiaulwisu lwakieleka kwa Eleyu. Yave ye Eleyu bavovesa Yobi vo: “Dingalala, wabakula masivi ma Nzambi.” (Yobi 37:14) Nki kiasadisa Yobi mu zizidila mpasi? Nki kilenda kutusadisa mu zizidila mpasi? Edi dilenda kutusadisa i sungamena yo badika e mpila zayingi zina Yave kasadila mwand’andi avelela yo songa nkum’andi. (Yobi 38:1-41; 42:1, 2) Nanga tulenda sungamena e ntangwa ina twamon’e ziku kia lusadisu lwa Nzambi muna yeto. Otokanenanga konso muntu mu yeto.
15. Nki kiakumika Paulu wa ntumwa mu zizidila e mpasi?
15 Paulu wa ntumwa wazizidila mpasi zayingi mu kuma kia lukwikilu lwandi. (2 Kor. 11:23-28) Nki kiansadisa mu kala ye ngindu zasikila muna kolo kiaki kiampasi? Wasambanga yo bund’e vuvu muna Yave. Muna kolo kiaki kiampasi kiafokokela muna lufwa lwandi, Paulu wasoneka vo: “O Mfumu untelamène, unkumikini mpe; o nteleko watoma lungidiswa kwa mono, azula awonso bawa: yakutiswa mpe muna nua nkosi.” (2 Tim. 4:17) Muna kuma kia mana mambwila, Paulu wasonekena mpangi zandi minkwikizi vo ke ‘batelamenwa uma moyo ko.’—Tanga Filipi 4:6, 7, 13.
16, 17. Yik’e nona kisonganga una Yave kekumikinanga nkangu andi mu zizidila e mpasi o unu.
16 Roxana wa mviti a nzila, mosi mun’awana bamona una Yave kesadisilanga nkangu andi. Vava kalomba nswa kwa mfumu andi a salu kimana kenda ku lukutakanu lwa mvivu, wafunga kikilu makasi yo kumvovesa vo mu salu kekatulwa kele vo wele. Kana una vo i wau, Roxana wayenda kuna lukutakanu yo samba kimana kalembi katulwa mu salu. Vava kasamba, o ntim’andi wavuvama. Muna lumbu kialandila lukutakanu, o mfumu andi wankatula kikilu mu salu. Roxana watokana kwayingi kadi, kana una vo nzimbu zakete kafutwanga, e salu kiaki kiansadisanga mu lungisa e nsatu za esi nzo andi. Wasamba diaka yo sungamena vo, wau vo Nzambi olungisi nsatu zandi za mwanda kuna lukutakanu, olungisa mpe nsatu zandi za nitu. Vava kavutukanga kuna nzo, Roxana wamona fulu kiasonama vo “asadi bevavwanga” ana batomene zaya sadila masini ma tungila e nlele. Wakisonekesa muna salu kiaki. O mfumu a salu wabakula vo Roxana kazeye salu kiaki ko, kana una vo i wau, wankotesa mu salu yo yantika futwa nzimbu lutila nkutu zina kafutwanga kuna salu kiantete. Roxana wamona vo e sambu kiandi kivaninu e mvutu. Kansi, e nsambu zisundidi katambula i za sila umbangi kw’akundi andi ayingi a salu. Atanu muna yau, kumosi ye mfumu andi a salu, batambulwila e ludi yo vubwa.
17 Ezak’e ntangwa, dilenda moneka vo e sambu yeto ke ivaninwanga mvutu ko muna ntangwa yovo mpila ina tuzolele. Avo i wau, tukala ye ziku vo vena ye kuma kiasikila. Yave ozeye e kuma kiaki. Kansi kuna kwa yeto, valenda vioka kolo kiandá muna bakula e kuma kiaki. Tulenda kala ye ziku kia diambu edi: Nzambi ke vilakananga selo yandi yakwikizi ko.—Ayib. 6:10.
Tukumikwanga mu Sunda Mpasi ye Ntonta
18, 19. (a) Ekuma tulenda mwena e mpasi yo tontwa? (b) Aweyi olenda zizidila e mpasi?
18 Nkangu a Yave ke besivikanga ko vava bewanananga ye ntonta, lukendalalu, lubangamu ye umpukumuni w’akundi. E nza ikutusaulanga. (Yoa. 15:17-19) Kansi, mwand’avelela ulenda kutusadisa mu sunda konso mpasi zilenda kutubwila muna salu kia Nzambi. Yave ke yambula ko vo twatontwa ntontwa ina ke tulendi zizidila ko. (1 Kor. 10:13) Kesinga kutuyambula ko, ngatu kutusisa nkutu. (Ayib. 13:5) O lemvokela Diambu Diandi diavumunwinwa, dilenda kutukumika yo kututanina. Vana ntandu, mwand’a Nzambi ulenda fila akw’eto minkwikizi mu kutusadisa vava tuvwanga lusadisu o mfunu.
19 Yambula yeto awonso twakwamanana lomba mwand’avelela muna sambu yo longokanga Nkand’a Nzambi. Yambula ‘twakumikinw’o nkuma wawonso, mun’owu w’efuka dia nkembo [a Nzambi], yamuna luzindalalu luawonso, yo nlandu a lutantu kuna kiese.’—Kol. 1:11.
[Mvovo Vana Yand’a lukaya]
^ tini. 6 Muna bong’e nona, tala mun’Eyingidilu dia 1 kia Mayu, 2001, lukaya lwa 16, mu Kimputu ye muna Despertai! ya kia 8 kia Fevelelo, 1993, lukaya lwa 21 ye 22.
Nkia Mvutu Ovana?
• Aweyi olenda kubamena mu sunda lubangamu?
• Adieyi ofwete vanga kele vo muntu uvovese walembi sengomona esumu kavangidi?
• Nkia vuvu olenda kala kiau vava onwananga ye mpasi za mpila mu mpila?
[Yuvu ya Longoka]
[Foto ina muna lukaya lwa 28]
Adieyi tulenda longoka muna nona kia Yosua ye Kalebe?
[Foto ina muna lukaya lwa 29]
Aweyi olenda sadisila nkundi osumukini?
