Yuvu Y’atangi

Ekuma Mose kafungila wan’a Arone makasi, Elaza ye Itama, vava kiafwa mpangi zau Nadabi yo Abiu? Mose aweyi kafokolwela makasi mandi?​—Fuka 10:16-20.

Vava kiasikidiswa salu ki’anganga muna saba, ke vavioka kolo ko Yave wavonda wan’a Arone, Nadabi yo Abiu, kadi basunzula tiya tuna ke bakanikinwa ko. (Fuka 10:1, 2) Mose wakanikina wan’a Arone ana basala yo moyo vo ka badidi mpangi zau ko ana bafwa. I bosi, Mose wafungila Elaza yo Itama makasi wau vo ke badia ko e nkombo yakelwa lukau lw’esumu. (Fuka 9:3) Ekuma Mose kafungila makasi?

O Yave muna nsiku kavana kwa Mose wakanikina vo nganga ona otambika lukau lw’esumu, kafwete dia tini kia lukau lwalu vana yanzala kia saba kia wananina. Ediadi diasonganga vo nganga watonda lembeka esumu di’awana bavana kimenga. Kansi, kele vo ndambu a menga ikoteso muna Fulu Kiavauka, muna suku diantete dia fulu kiavauka, lukau ke lwadiwanga ko, lwabomonwanga vana tiya.—Fuka 6:24-26, 30.

Vava kiavioka sumbula kiaki, Mose wavava zaya kana vo mawonso mavangamena mun’owu wa nsiku mia Yave. Vava kamona vo nkombo y’esumu yabomonwa vana tiya, wafunga makasi yo yuvula Elaza yo Itama ekuma balembi dila e tini kia lukau lwalu nze una wakanikinwa, wau vo menga mandi ke masunzulwa ko vana ndose a Yave vana Fulu Kiavauka.—Fuka 10:17, 18.

Arone wavana e mvutu za kiuvu kia Mose, kadi anganga ana basala ye moyo yandi wabakanikina dina bavanga. Muna kuma kia wan’andi wole bafwa, Arone nanga wakatikisa kana vo anganga badi kala ye ntona zambote kele vo badidi e tini kia lukau lw’esumu muna lumbu kiakina. Nanga wayindula vo kele vo badidi kimenga kiaki, ke diadi yangidika Yave ko, kana una vo ke bakala ye kuma ko mun’esumu dia Nadabi yo Abiu.—Fuka 10:19.

Arone nanga wayindula vo muna lumbu kiantete kina esi nzo andi basala e salu kia kinganga, bavanga wawonso kimana bayangidika Nzambi, kana nkutu muna mambu makete. Kansi, Nadabi yo Abiu bafunzula e nkumbu a Yave, muna kuma kiaki makasi ma Nzambi mabafusukila. Arone nanga wayindula vo wau vo ekanda diandi di’anganga diasumuka, ke bafwana dia kimenga kiaki kiavauka ko.

Mose nanga watonda e mvutu za mpangi andi, kadi e sono kiyikanga vo: “O Mose owidi wo, otondele wo.” (Fuka 10:20) Ka lukatikisu ko, Yave watonda mpe e mvutu za Arone.