Kuvilakana Mpangi Zaku Ko

JAROSŁAW yo nkaz’andi Beata, * bavova vo: “Mu mvu kumi, twayivana emvimba muna kinkita yo kituka se amvwama. Kana una vo mu ludi twasansukila, twavambuka Yave ye ke twakala diaka ye ngolo za vutuka ko.”

Mpangi akaka una ye nkumbu Marek, osungamenanga vo: “Muna kuma kia nsobani zavangamanga kuna Polônia muna mambu ma luyalu, yakatulwanga muna salu nkumbu miayingi. Ediadi diankendelekanga kikilu. Wonga yakala wau wa yantika salu kia mono kibeni, kadi kiakala ye ndekwa zayingi ko za vanga kinkita. Kansi, yayantika salu kimosi, yabanza vo kilenda kunsadisa mu lungisa e nsatu za esi nzo ame lembi sia kimwanda kiame mu vonza. Kuna kwalanda, yabakula vo nzengo zambi yabaka.”

Mu nza ina vo e mpasi za zingu yo kondwa e salu mu wokela kaka zina, wantu ayingi bedimbulanga e vuvu yo kubafila mu baka nzengo zambi. Mpangi zayingi betambulwilanga sala yamu ola ke za salu ko, sadila mu fulu yayingi yovo yantika salu ya yau kibeni kana una vo ke batomene zaya salu kiaki ko. Bebanzanga vo o vwa nzimbu zayingi disadisa esi nzo zau, ye ke disia ngwizani au yo Yave mu vonza ko. Kansi,  mambu ma kinsalukisa yo kuluka kwa nzimbu kulenda vunzanesa makani mambote. Muna kuna kiaki, akaka bebwanga muna ntambu w’eloko vava besianga salu yau va fulu kiantete ke mu mambu ma mwanda ko.—Kim. 9:11, 12.

Mpangi zayingi z’akala ye z’akento bekuyivananga emvimba muna mambu ma nza yo lembi kala diaka ye ntangwa y’elongi dia yau kibeni, kwenda mu tukutakanu yovo muna salu kia umbangi. Ediadi dikubayoyesanga muna mwanda yo fwasa ngwizani au yo Yave. Bebembolanga mpe lekwa kiakaka kiamfunu, i sia vo, ngwizani au y’awana ‘bena yau lukwikilu lumosi.’ (Ngal. 6:10) Akaka malembe-malembe bevambukanga ye mpangi zau Akristu. Diambote twatoma fimpa diambu diadi.

Dina Tufwete Vanga mu Kuma kia Mpangi Zeto

Tuvwidi malau mayingi ma songa zola kwa mpangi zeto z’akala ye z’akento. (Roma 13:8) Muna nkutakani eno, nanga omonanga ‘asukami bevavanga lusadisu.’ (Yobi 29:12) Akaka bakondelo ina bavwidi o mfunu muna zingu kia lumbu ke lumbu. Yoane wa ntumwa okutusungamesanga elau dilenda kututwasila. Wavova vo: “Vo i ndiona una yo vwa kwa nza, kamona mbunzi andi okondelo, kankangil’o ntima, nkia nkala kukala omu yandi o zola kwa Nzambi?”—1 Yoa. 3:17.

Nanga okalanga yo ntim’amvevo muna sadisa akaka. Kansi, o zola kweto muna mpangi ke kufwete songelwa kaka muna kubavana ina bakondelo ko. Akaka nanga bevavanga lusadisu mu kuma kia kinsona yovo lukendalalu. Balenda kuyibadikila vo ke bafwana ko mu sadila Yave. Nanga benwananga ye mpasi za mayela yovo fwilwa azolw’au. Imosi muna mpila tulenda kubasadisila i kubawinikinanga yo mokena yau. Muna mpila yayi tulenda kubasadisa mu sunda lukendalalu yo siamisa e ngwizani au yo Yave. (1 Tes. 5:14) Nkumbu miayingi ediadi disiamisanga o zola kweto ye mpangi zeto.

Musungula akuluntu muna nkutakani, yau bafwete vitang’o ntu muna songang’e ngemba yo tamba matu vava akaka bevovanga, kala yo umbakuzi yo vana elongi dia Nkand’a Nzambi kuna zola kwawonso. (Mav. 20:28) Muna mpila yayi akuluntu betangininanga Paulu wa ntumwa, ona watoma zolanga mpangi zandi z’akala ye z’akento.—1 Tes. 2:7, 8.

Kansi, kele vo Nkristu uyivambwidi y’ekambi, nga olenda diaka sadisa mpangi zandi? Kana nkutu akuluntu balenda bwa muna ntambu wa vava kala ye mavwa mayingi. Adieyi dilenda vangama kele vo Nkristu obwidi mu ntambu wau?

Tovoka mu Kuma kia Mpasi za Zingu

Nze una uvovelo kala, o funtuka kwayingi mu vava lungisa nsatu za esi nzo zeto, ntelamw’a moyo ditwasanga ye dilenda vunzanesa  e ngindu zeto muna mambu ma mwanda. (Mat. 13:22) Marek, ona tuyikidi kala, wavova vo: “Vava kinkita kiame kiabwa, yabaka e nzengo za kwenda ku nsi a kinzenza mu vava salu kifutanga nzimbu zayingi. Muna nkumbu antete, ngonde tatu yavanga, i bosi yayenda diaka mu ngonde tatu. Yavanga wo nkumbu miayingi, mu tutu yavutukanga kuna nsi ame. Ediadi mpasi zayingi diatwasa kwa nkaz’ame una vo mundembi-kwikila.”

E nzengo zazi ke zatwasa kaka mpasi mu zingu kia esi nzo ko. Marek wakudikila vo: “Vana ntandu a sala ola zayingi vana mbangazi a mwini, yasalanga kumosi y’akwa nsoki, ana bavavanga bunduna akaka. Nze yimpumbulu bakala. Ediadi diankendelekanga kikilu yo kuyimwena nze muntu wakondwa mfunu. Wau vo kiakala diaka ye ntangwa ko ya kuyilunga-lunga mono kibeni, yayantika katikisa kana vo yafwana mu sadisa akaka.”

E mfwilu miatwasa e nzengo za Marek mifwete kutufila mu toma kuyifimpa. Kana una vo kwenda mu nsi za kinzenza dilenda sadisa muntu mu kala ye nzimbu zafwana, dilenda mpe twasa mpasi zakaka. Kasikil’owu, nga ke difwasa kimwanda kia esi nzo eto ko? Kele vo twele sadila ku nsi akaka, nga ke dikutuvambula ko ye nkutakani? Nga tukala diaka y’elau dia sadisa mpangi zeto?—1 Tim. 3:2-5.

Kansi nze una tuzeye, ke divavanga ko vo muntu kasisa nsi andi muna kuyivana emvimba muna salu ya nitu. Badika nona kia Jarosław yo Beata. Wavova vo: “Mawonso malembe-malembe mayantikila. Wau vo ke kolo ko twasompana, twavava fulu kiambote kia tekela madia. Vava twamona vo nzimbu ziwokele, twayantika teka lekwa yayingi. Ke twakala diaka ye ntangwa yayingi ko. Muna kuma kiaki, twayantika kondwa muna tukutakanu. Ke vavioka kolo ko, yayambula e salu kia mviti a nzila ye kia selo kia salu. Wau vo nzimbu zayingi twabakanga, twaziula nzo yampwena ya tekela yo bund’e kinkita yo mundembi-kwikila mosi. I bosi, yayantika kwenda mu nsi zakaka mu vanga kinkita yo wantu bena ye nzimbu zayingi. Kiakalanga diaka ye ntangwa yayingi ko ya vwanda kuna nzo. E ngwizani yo nkaz’ame yo mwan’eto ankento ke yakala diaka yambote ko. Kuna kwalanda, twayivana emvimba muna kinkita yo yambula sadila Yave. Wau vo twayambula e nkutakani, ke twayindulanga diaka mpangi zeto ko.”

Adieyi tulenda longoka muna nona kiaki? Etima dia kala ye mavwa mayingi dilenda yivisa ngindu za Nkristu yo kumfila mu vidisa “mvwatu miandi,” i sia vo, kwikizi kiandi. (Lus. 16:15) Dilenda kutuvambula y’ampangi ana twasadisanga.

Toma Kuyifimpa

Nanga tulenda yindula vo: ‘Ediadi ke dilendi kumbwila ko.’ Kansi, diambote yeto awonso twatoma kuyifimpa mu zaya dina tuvwidi o mfunu muna zingu. Paulu wasoneka vo: “Ke tuvitikidi vo ma ko, ova nza, ngatu lenda vo katula ma; kansi wau tuna yo dia yo vwata, tuyangalela ko.” (1 Tim. 6:7, 8) Elo, e zingu kia wantu kilenda kala kiaswaswana muna konso nsi. Zingu kibadikilwanga vo kia usukami muna nsi zakaka, kilenda badikilwa vo kiambote muna nsi zayingi.

Kiakala nkia mpila zingu tuna kiau, tubadika e mvovo emi mia Paulu: “Vo i awana bazolele o vwama, muna umpukumuni bekota, y’esokolo, yo maketo mayingi mazowa, yo vanga mpasi, mana mesinkisanga wantu muna lubukumuku yo lufwasu.” (1 Tim. 6:9) O ntambu waswekama ukalanga. Ulekwanga mu baka bulu kuna kinsalukisa. Aweyi tulenda vengela ‘maketo mevanganga mpasi’?

O zaya mana tufwete sia va fulu kiantete dilenda kutusadisa mu kala ye ntangwa yafwana ya sadila Yave yo kala y’elongi dia yeto kibeni. O longoka yo samba kulenda sadisa Nkristu mu kala ‘wakubama muna salu yawonso yambote’ yo sadisa akaka.—2 Tim. 2:15; 3:17.

Mu mvu miayingi, akuluntu anzodi mayingi bavanga mu kasakesa Jarosław. Ediadi  diamfila mu baka nzengo zampasi. Wavova vo: “Lumbu kimosi vava twamokenanga, akuluntu bayika nona kia Nkand’a Nzambi kia toko dia mvwama ona wazola zinga yakwele mvu, kansi kazola yambula mavwa mandi ko. I bosi kuna ndekwa zawonso, basonga dina ndenda longoka muna nona kiaki. Ediadi diansadisa mu bakula dina mfwete singika.”—Nga. 11:28; Maku 10:17-22.

Jarosław watoma fimpa zingu kiandi yo bak’e nzengo za lembi kuyivana diaka muna yinkita yampwena-mpwena. Una vavioka mvu miole, yandi y’esi nzo andi bavutulwisa e ngwizani au yo Yave. Owau, osalanga se nkuluntu. Jarosław wavova vo: “Vava ampangi bekuyivananga muna kinkita yamu tezo kia veza mambu ma mwanda, isadilanga nona kiame mu kubasonga ekuma dinina dia uzowa dia vanga kikundi ye mindembi-kwikila. Diampasi dikalanga mu venga kinkita kia nzimbu zayingi yo lembi kuyivana muna mavangu malembi songa.”—2 Kor. 6:14.

Marek mpe wabaka elongi mu mpila yampasi. Kana una vo e salu kabaka muna nsi ya kinzenza nzimbu zayingi kiafutanga yo sadisa esi nzo andi mu kala ye zingu kiambote, e ngwizani andi yo Nzambi kumosi ye mpangi zandi yakuluka. Kuna kwalanda, wasikidisa mana kafwete sia va fulu kiantete. Wavova vo: “Mu mvu miayingi, e zingu kiame kiafwanana y’eki kia Baruki kuna nz’ankulu, ona ‘wavavanga mambu manene.’ I bosi, yasamba kwa Yave yo kunsonga mana mantokanesanga. Owau, ikalanga ye tezo yo sia mambu ma mwanda va fulu kiantete.” (Yer. 45:1-5) Owau, Marek osianga ngolo za vava “salu kiambote” kia kala nkuluntu muna nkutakani.—1 Tim. 3:1.

Marek una y’elongi kevananga kw’awana bena y’etima dia kwenda mu nsi za kinzenza mu vava salu kifutanga nzimbu zayingi: “Avo muntu wele ku nsi a kinzenza, diasazu dia bwa muna ntambu mia nza yayi yambi. O lembi toma zaya e ndinga dikakidilanga e mbokena y’akaka. Olenda vutuka ye nzimbu zayingi, kansi olenda mpe vutuka ye kimbevo kia mwanda kilenda dia ntangwa yayingi muna sasuka.”

O kala ye tezo vana vena salu ya nitu ye kiyekwa tuna kiau kia sadisa mpangi zeto, dilenda kutusadisa mu yangidika Yave. Tulenda songa mbandu ambote ilenda kasakesa akaka mu baka nzengo zambote. Awana benwananga ye mpasi lusadisu bevavanga, songw’e ngemba ye mbandu ambote ya mpangi zau z’akala ye z’akento. Akuluntu muna nkutakani ye mpangi zakaka zazikuka balenda sadisa akw’au minkwikizi mu kala ye tezo yo lembi yoyeswa kwa mpasi za zingu.—Ayib. 13:7.

Elo, ka tufwete vilakananga mpangi zeto ko mu kuma kia salu yeto ya kinitu. (Fili. 1:10) Kansi, yambula twakala ‘amvwama kuna kwa Nzambi’ ekolo tusianga mambu ma Kintinu va fulu kiantete muna zingu kieto.—Luka 12:21.

[Mvovo Vana Yand’a lukaya]

[Mafoto zina muna lukaya lwa 21]

Nga salu kiaku kikusimbanga mu lembi kwenda mu tukutakanu?

[Mafoto zina muna lukaya lwa 23]

Nga osadilanga malau ovwanga mu sadisa mpangi zaku z’akala ye z’akento?