Ovwidi Kuma mu Kala ye Kiese

LEKWA yawonso kavanga Yave, tuka muna lekwa yakete-kete yamoyo yamuna buka yanene ya ntetembwa, yatoma kubikwa. Ediadi ke diesivi ko, kadi o Mvangi ‘ke Nzambi a mavwanga ko.’ (1 Kor. 14:33) E mpila ina Nzambi kakubikila o nkangu andi mu kunsambila y’esivi mpe. Badika dina Yave kevanganga. Wayikakesa muna nkubika mosi ulolo wa vangwa yangangu, i sia vo, wantu ye mbasi, bena yo nswa wa kuyisolela, besalanga entwadi muna nsambil’avelela. Diambu diesivi kikilu!

Kuna Isaele yankulu, e nkubik’a Nzambi ova ntoto yasunzulwanga kwa Yerusaleme, muna mwakala e tempelo a Yave. I muna mpe kazingilanga o ntinu ona kasola. Mosi mun’Aneyisaele bakala muna kinkole kuna Babele wasonga luyangalalu lwandi mu kuma kia mbanza yayi yavauka oku vo: “O lubini luame lulamina muna lulakala, ovo kikuyindula ko; ovo kiluta sia Yerusaleme etima, ke mu mbut’a kiese ko.”—Nku. 137:6.

Ongeye mpe nga i wau omonanga mu kuma kia nkubik’a Nzambi o unu? Nga oyangalelanga e nkubika yayi lutila lekwa yakaka? Nga wan’aku bazeye lusansu lwa nkubik’a Nzambi ova ntoto ye mpila isadilanga? Nga beyangalelanga kala muna kintwadi kia wan’angudi kia Mbangi za Yave omu nza yawonso? (1 Pet. 2:17) Nga olenda sadila tuludiku tulende muna fuku wa Nsambila ya Esi Nzo mu wokesa luyangalalu lwa esi nzo aku muna nkubik’a Yave?

Sungamena e “Lumbu ya Nz’ankulu”

Konso mvu, Aneyisaele balungananga mu kembela nkinzi a Nduta. Vava kiasikidiswa nkinzi wau, Mose wavovesa o nkangu vo: “Vava kekuyuvul’o mwan’aku kuna ntu, oku vo, aweyi dina diadi? umvutula vo, muna nkum’a koko i katuvaikisil’o Yave muna Engipito, muna uwayi.” (Luv. 13:14) Aneyisaele ke bafwete vilakana ko mana Yave kavanga mu kuma kiau. Kieleka, mase mayingi ma Aneyisaele balemvokela nkanikinu a Mose. Muna mbandu zalanda, Nyisaele mosi wasamba vo: “E Nzambi, twawa kio muna matu, o mase meto matuzingwila kio, e salu wasala muna lumbu yau, muna lumbu ya nz’ankulu.”—Nku. 44:1.

Kuna kwa nleke o unu, lusansu lwa Mbangi za Yave lwa mvu 100 miviokele lulenda moneka nze “lumbu ya nz’ankulu.” Aweyi olenda sadisila wan’aku mu sungamena lusansu lwalu? Mase mayingi besadilanga nkanda Testemunhas de Jeová—Proclamadores do Reino de Deus, Anuário, lusansu lwa zingu kia mpangi luvaikiswanga mun’Eyingidilu ye Despertai!, yovo mu nsangu zakaka za salu kia kimfumu kumosi ye DVD yampa iyikanga oma ma nkangu a Nzambi mu lumbu yeto. Vídeo zisonganga una mpangi zeto babangikilwa kuna União Soviética yo muna luyalu lwa Nazi kuna Alemanha, zilonganga esi nzo o mfunu wa bund’e vuvu muna Yave muna ntangw’ampasi. Olenda sadila malongi mama muna fuku wa Nsambila ya Esi Nzo. Ediadi dilenda kumika lukwikilu lwa wan’aku vava kwikizi kiau kitontwanga.

Kansi, aleke ke betoma zolanga tanga tusansu ko. Muna kuma kiaki, sadisa wan’aku bayangalela tanga tusansu twatu. Kasikil’owu, olenda lomba kwa mwana kasola e nsi ina kayangalele, kavavulula lusansu lwa nsi yayi yo zayisa mana kalongokele kw’akaka muna nzo.  Muna nkutakani eno, mulenda kala ye mpangi besadilanga Yave se mvu miayingi, ana nulenda bokela muna fuku weno wa nsambila ya esi nzo. Mwan’eno ankento olenda kubayuvula kimana banuzayisa mana bazeye. Olenda lomba kwa wan’aku babandula muna papela mambu mavangama muna nkubik’a Nzambi, nze salu kia tunga vula, lukutakanu lwa nsi zayingi yovo mpila yasadilwanga e fonógrafo muna salu kia umbangi kia nzo ye nzo.

Zaya una ‘Konso Kikwa Kisadilanga’

Paulu wa ntumwa watezanesa e nkutakani y’Akristu ye “to kiawonso kiafwaninikinwa yo yikakeselwa muna mpambwil’a yikilwa yawonso, mun’owu wa mfunka, muna kiandi tezo, ya kîkwakîkwa yawonso, kivongeselang’e to yamuna kuvangamesa muna zola.” (Ef. 4:16) O zaya una e nitu a muntu isadilanga dilenda wokesa luyangalalu yo zitu weto mu kuma kia Mvangi eto. Diau adimosi mpe, vava tufimpanga una e nkutakani mu nza yawonso zisadilanga, tusivikanga mu kuma kia “ngangu za mpila mu mpila za Nzambi.”—Ef. 3:10.

Yave osonganga una usadilanga e nkubik’andi kumosi y’eyi y’ezulu. Kasikil’owu, okutuvovesanga vo entete wasonga e mona-meso kwa Yesu Kristu, ona ‘watwika kio, kasongela kio muna mbasi zandi kwa ntaudi andi Yoane; ona wasila umbangi.’ (Lus. 1:1, 2) Wau vo Nzambi osonganga una usadilanga e nkubik’andi eyi ilembi monekanga, ozolele vo twabakula una ‘konso kikwa kisadilanga’ ova ntoto.

Muna bong’e nona, kele vo nkengi a zunga okingula e nkutakani eno, ekuma nulembi badikila y’esi nzo aku e salu ye nsambu betambulanga akengi a zunga muna salu kiau? Nkia lusadisu bekutuvananga? E yuvu yakaka nulenda badika i yayi: Ekuma dinina o mfunu dia vana e nsangu za salu kia umbangi? Akweyi kutukanga e nzimbu zisadilwanga muna nkubik’a Nzambi? E Buka kia Selo Yambuta aweyi kisadilanga? Aweyi bekubikilanga madia ma mwanda?

Vava tubakulanga una nkangu a Yave wakubikilwa, tuvwanga nluta mu mpila tatu: O luyangalalu lweto mu kuma ki’awana besalanga muna wete dieto luwokelanga. (1 Tes. 5:12, 13) Dikutufilanga mu yikama e nkubika za nkutakani. (Mav. 16:4, 5) Vana ntandu, e vuvu kieto mun’awana bevitang’o ntu kiwokelanga vava tumonanga una besadilanga Nkand’a Nzambi mu baka e nzengo ye nkubika bevanganga.—Ayib. 13:7.

“Nwaviokela Muna Tumbu Twandi”

“Nuziete Zione, nwazunga yo, nwatanga nzo zandi zezulu, nusia taninwa yandi e ntona, nwaviokela muna tumbu twandi; nwavw’owu nuzingula wo kwa mbandu ilenda.” (Nku. 48:12, 13) Ntozi a nkunga wavovesa Aneyisaele benda kuna Yerusaleme batoma yo tala. Nga olenda yindula e moko yakiese bamokenanga Aneyisaele ana bayendanga kuna mbanz’avauka muna nkinzi miavangamanga konso mvu yo mona e tempelo? Ka lukatikisu ko vo ediadi diabafilanga mu ‘zingula wo kwa mbandu ilanda.’

Badika e nona kia ntinu a nkento a Saba, ona wakatikisanga e nsangu kawanga mu kuma kia nene wa luyalu lwa Solomo ye ngangu zandi. Nki kiankwikidisa vo mana kawá maludi? Wavova vo: ‘Kiakwikila mo ko mambu mama yavana ngizidi, o meso mame mamwene mo.’ (2 Tus. 9:6) Elo, mana tumonanga muna ‘meso ma yeto kibeni’ malenda kota kikilu muna ntima mieto.

Aweyi olenda sadisila wan’aku mu mona o wete wa nkubik’a Yave muna ‘meso ma yau kibeni’? Avo vena ye vula dia Mbangi za Yave muna nsi eno, nusia e ngolo mu kwenda dio kingula. Kasikil’owu, Mandy yo Bethany, basansukila ku mbanza ina tezo kia 1.500 za kilometa ye Betele ya nsi au. Kana una vo i wau, mase mau bavanganga nkubika mu kwenda yo kingula, musungula vava wan’au banungunukanga e ntela. Bavova vo: “Vitila twenda kingula Betele, twabanzanga vo fulu kia mambu  mangolo, ambuta kaka bafwete ko sadila. Kansi, twamona aleke basalanga kwayingi yo yangalela salu basalanga. Twabakula vo e nkubik’a Yave ke zunga kiakete kaka ko kina twazingilanga. Konso ntangwa twakingulanga Betele, e ngwizani eto yo Yave yawokelanga yo kutukasakesa mu kwamanana kunsadila.” O toma mona yovo zaya e nkubik’a Nzambi diafila Mandy yo Bethany mu kota mu salu kia mviti a nzila. Babokelwa nkutu mu kwenda sadila kuna Betele mu fikolo.

Vena ye mpila yakaka tulenda ‘mwena’ e nkubik’a Yave, ina ke yakala ko muna Isaele yankulu. Mu lumbu yeto, nkangu a Nzambi betambulanga vídeo ye DVD zisonganga mambu mayingi ma nkubik’a Nzambi, nze Testemunhas de Jeová—Organizadas para Pregar as Boas Novas, Até os Confins da Terra, Nossa Associação Inteira de Irmãos ye Unidos pelo Ensino Divino. Vava ongeye y’esi nzo aku numonanga e salu ki’awana besadilanga kuna Betele, awana bekuyivananga kuna mvevo mu sadisa ana bebwilwanga sumbula, misionario ye mpangi bekubikanga tukutakanu twa mvivu, luyangalalu lweno mu kuma kia kintwadi kia wan’angudi omu nza yawonso luwokelanga.

E nkutakani zawonso za nkangu a Nzambi salu kiamfunu zisalanga muna samuna e nsangu zambote yo sadisa Akristu muna zunga yau. Muna kuma kiaki, vaulanga e ntangwa kumosi y’esi nzo aku mu sungamena ‘kintwadi kia wana-ngudi ova nza.’ Ediadi dikunusadisa mu ‘sikila muna lukwikilu’ yo lembi vilakana vo ovwidi kuma mu kala ye kiese.—1 Pet. 5:9.

 [Babu/​Foto ina muna lukaya lwa 18]

Nkubik’a Nzambi Diambu Diambote Muna Longoka

Tuvwidi salanganu yayingi ilenda kutusadisa mu longoka mayingi mu kuma kia lusansu lwa nkubik’a Yave ye mpila isadilanga. E yuvu ilende ilenda kusadisa mu yantika:

☞ E salu ki’akengi a zunga mu lumbu yeto, aweyi kiayantikila?—Testemunhas de Jeová—Proclamadores do Reino de Deus, lukaya lwa 222-227.

☞ Nkia diambu diamfunu diavangama muna “Lumbu Ki’aleke” muna Lukutakanu lwa mvu wa 1941?—Testemunhas de Jeová—Proclamadores do Reino de Deus, lukaya lwa 86, 88.

☞ Buka kia Selo Yambuta aweyi bebakilanga e nzengo?—‘Dê Testemunho Cabal’ sobre o Reino de Deus, lukaya lwa 108-114.