Tambula Mwand’a Nzambi, ke wa nza ko

“Ke tutambwidi mwand’a nza ko, o mwanda una wa Nzambi kaka; twazay’oma twavaninwa kuna mvevo kwa Nzambi.” —1 KOR. 2:12.

1, 2. (a) Mu nkia mpila Akristu akieleka benwaninanga e vita? (b) Nkia yuvu tubadika?

AKRISTU akieleka vita benwananga. Mbeni eto nkwa nkuma, mpuki ye nzodi a vita. Ovwidi nwaninwa kiangolo kesadilanga muna vukumuna wantu ayingi. Kansi, ke tufwete kala ye wonga ko, ngatu kuyimwena vo ke tulendi sunda vita yayi ko. (Yes. 41:10) Yeto mpe tuvwidi nwaninwa kilutidi ngolo kikututaninanga.

² E vit’eto ke ya nitu ko, ya mwanda. E mbeni eto i Satana wa Nkadi Ampemba, e nwaninwa kiantete kesadilanga i “mwand’a nza.” (1 Kor. 2:12) Mwand’a Nzambi i nwaninwa tusadilanga muna kuyitanina muna ntambu miandi. Muna sunda vita yayi yo kwamanana kala ye ngwizani ambote yo Nzambi, tufwete lombanga mwand’a Nzambi yo songa fu ya mbongo a mwanda wau muna zingu kieto. (Ngal. 5:22, 23) Nki i mwand’a nza? Aweyi ufidilanga wantu? Aweyi tulenda zayila kana vo mwand’a nza ukutufilanga yovo ve? Adieyi tulenda longoka muna mbandu a Yesu mu kuma kia tambula mwand’a Nzambi yo sia mwand’a nza e kitantu?

Ekuma Mwand’a Nza Uvukumwinanga Wantu Ayingi?

3. Nki i mwand’a nza?

³ E mwand’a nza kwa Satana wa ‘nyadi a nza yayi’ utukanga. Mwanda wau ke una ngwizani ko ye mwand’avelela a Nzambi. (Yoa. 12:31; 14:30; 1 Yoa. 5:19) Uyalanga fu ye makani ma wantu yo kubafila mu vanga oma mambi. Mwanda wau ufilanga wantu mu telamena luzolo lwa Nzambi ye makani mandi.

4, 5. Mwanda kesayanesanga Satana aweyi uvukumwinanga wantu ayingi?

⁴ Mwanda kesayanesanga Satana aweyi uvukumwinanga wantu ayingi? Entete, Satana wavuna Eva muna mpatu a Edene. Wankwikidisa vo o bembol’e wisa kia Nzambi ditomesa e zingu kiandi. (Etu. 3:13) Ekwe luvunu kavova! (Yoa. 8:44) I bosi, wasadila nkento mu vukumuna Adami kakolamena Yave. Muna kuma kia nsola kavanga Adami, wantu awonso basumuka. Ekiaki i kuma kifilanga wantu mu landa mwand’a ukolami wa Satana.—Tanga Efeso 2:1-3.

⁵ Satana wavukumuna mpe ulolo wa mbasi, ana bakituka se nkwiya. (Lus. 12:3, 4) Mbasi zazi bayantika kolamena Nzambi vitila Kizalu muna lumbu ya Noa. Bakwikila vo zingu  kiambote bekala kiau kele vo bayambwidi e fulu kiau kun’ezulu yo kwiza ova ntoto mu vanga mana ke bafwana vanga ko. (Yuda 6) Muna lusadisu lwa nkwiya, mina muna nza ya kimwanda, Satana o “otungianisang’e nza yawonso.” (Lus. 12:9) Diankenda kikilu vo wantu ayingi ke bezayanga wo ko vo mu wisa kia nkwiya bena.—2 Kor. 4:4.

Nga Mwand’a Nza Ukufilanga?

6. Mu nkia mpila kaka mwand’a nza ulenda kutuvukumwina?

⁶ Ndonga ke bezayanga ko una Satana kevukumwinanga wantu, kansi Akristu akieleka belongokanga muna Nkand’a Nzambi e ndekwa kesadilanga. (2 Kor. 2:11) Kansi, mwand’a nza ke ulendi kutuvukumuna ko, nanga vo yeto kibeni tuyambwidi vo ediadi diavangama. Yambula twabadika yuvu yá ilenda kutusadisa mu zaya kana vo mwand’a Nzambi ukutufilanga yovo mwand’a nza.

7. Satana nki kesadilanga mu vava kutuvambula yo Yave?

⁷ E nsaka isolanga adieyi zisonganga mu kuma kiame? (Tanga Yakobo 3:14-18.) Satana ovavanga kutuvambula yo Nzambi muna kutufila mu zola umpumbulu. Nkadi Ampemba ozeye wo vo Yave omenganga ndiona ozolanga umpumbulu. (Nku. 11:5) Muna kuma kiaki, Satana ovavanga sikamesa zolela yeto ya nitu muna sadila nkanda, filme, miziki ye video game zakaka zifilanga wantu mu sakanena mavangu ma zumba yo umpumbulu. Kana una vo tuzolanga oma mansongi, Satana otoma yangalalanga vava ntim’eto uzolanga mpe oma mambi kenungununanga.—Nku. 97:10.

8, 9. Nkia yuvu tufwete kiyuvula mu kuma kia nsaka?

⁸ Kuna diak’e sambu, mwand’a Nzambi ufilanga awana betambulanga wo mu kala avelela, akwa luvuvamu ye nkenda. Tufwete kiyuvula: ‘E nsaka isolanga, nga zikunsadisanga mu kala ye fu yambote?’ E ngangu za ntandu, zakondwa “kuvùnina.” Awana befilwanga kwa mwand’a Nzambi, ke belonganga mfinangani zau velela ye luvuvamu ko ekolo yau kibeni betalanga mavangu mansoki ye zumba mu televizau kuna sweki.

⁹ Yave ovavanga vo twasambila kaka yandi. Kansi, Satana ovavanga vo yandi mpe kasambilwa nze una kalomba kwa Yesu. (Luka 4:7, 8) Tulenda kiyuvula: ‘E nsaka isolanga, nga zilenda kunsadisa mu sambila kaka Nzambi? E nsaka isolanga, nga dikitulanga dio se diampasi yovo diasazu mu zizidila e mwand’a nza? Nga vena ye mambu mfwete soba muna nsola ivanga kuna sentu?’

10, 11. (a) Nkia fu mwand’a nza kenungununanga mu kuma kia mavwa? (b) Diambu dia Nzambi diavumunwinwa dikutukasakesanga mu kala ye nkia fu?

¹⁰ Aweyi ibadikilanga mavwa? (Tanga Luka 18:24-30.) Mwand’a nza ufilanga wantu mu kala “y’eketo dia meso” muna nungununa e fu ki’eloko ye luzolo lwa vwama. (1 Yoa. 2:16) Kuna kwa wantu ayingi, ke diambi kwandi ko dia kala ye luzolo lwa vwama. (1 Tim. 6:9, 10) O mwanda wau ulenda kutukwikidisa vo o kala ye mavwa mayingi luvuvamu lwakwele mvu ditwasanga. (Nga. 18:11) Kansi, avo tuyambwidi vo zola mu kuma kia mavwa kwavioka o zola kweto muna Nzambi, o Satana okutusunda. Tufwete kiyuvula: ‘Nga isadilanga zingu kiame mu vava mavwa ye nkembo?’

¹¹ Kuna diak’esambu, Diambu dia Nzambi diavumunwinwa dikutukasakesanga mu kala ye tezo mu kuma kia nzimbu yo sala mu lungisa e nsatu za yeto kibeni ye za esi nzo eto. (1 Tim. 5:8) Mwand’a Nzambi usadisanga awana betambulanga wo mu tanginina e fu kia Yave kia vanina kuna mvevo. Wantu awaya bazayakene nze avani, ke atambudi kaka ko. Bevwang’o wantu o mfunu ke mu mavwa ko. Vava dikalanga o mfunu, bekayananga kina bena kiau y’akaka. (Nga. 3:27, 28) Ke beyambulanga ko vo mavwa makala va fulu kiantete ke mu salu kia Nzambi ko.

12, 13. Nswaswani ye mwand’a nza, o mwand’a Nzambi aweyi ulenda kutusadisila mu kala ye fu yambote?

 ¹² Nkia mwanda ufilanga e fu ye mavangu mame? (Tanga Kolosai 3:8-10, 13.) Mwand’a nza unungununanga mavangu ma nitu. (Ngal. 5:19-21) Vava mambu mawonso mekalanga mambote, diampasi mu zaya kana nkia mwanda ukutufilanga. Kansi kele vo tubwidilu diambu, nze vava mpangi ayakala yovo akento una vo Nkristu utuvezele, utufungisi makasi ye kutuvanga diambu diambi, i ntangwa tuzayanga kana nkia mwanda ukutufilanga. Vana ntandu, vava tukalanga yeto mosi muna nzo, i ntangwa tusonganga kana vo mwand’avelela ukutufilanga yovo mwand’a nza. Diamfunu konso muntu kayifimpa. Ukiyuvula: ‘Mu ngonde sambanu ziviokele, nga e fu yame yasongele vo Kristu itangininanga yovo yavutukidi diaka e fu yame yambi?’

¹³ Mwand’a Nzambi ulenda kutusadisa mu ‘katula uwuntu wankulu ye mpanga zandi’ yo ‘vwata uwuntu wampa.’ Ediadi dikutusadisa mu songa zola ye ngemba kw’akaka. Tukala mpe ye fu kia loloka muntu yo nkw’andi kana nkutu vo muntu obakidi nkw’andi diambu. Avo nkw’eto utuvangidi vilwa, tuvenga fu kia landa kunda ye “ndudi yawonso, yo makasi, y’ekudi, ye miangu, yo kumbaziana.” Kansi, tuvanga ngolo muna songa “walakazi.”—Ef. 4:31, 32.

14. Wantu ayingi mu nza aweyi bebadikilanga Diambu dia Nzambi?

¹⁴ Nga izitisanga e nsiku mia nkal’ambote mina muna Nkand’a Nzambi? (Tanga Ngana 3:5, 6.) Mwand’a nza usonganga fu kia kolamena Diambu dia Nzambi. Awana befilwanga kwa mwanda wau bevezanga dina ke beyangalelanga ko muna Nkand’a Nzambi, kansi betambulwilanga tusansu ye ndongota za wantu. (2 Tim. 4:3, 4) Akaka bevezanga mawonso mena muna Nkand’a Nzambi. Wantu awaya bekatikisanga o mfunu a Nkand’a Nzambi y’etuku diandi. Bekitukanga akwa ngangu vana meso ma yau kibeni. Bevezanga nkanikinu mia Nkand’a Nzambi mu kuma kia zumba, yakala olekanga yo yakala yo vonda longo. Belonganga “bi vo wete, yo wete vo bi.” (Yes. 5:20) Nga tusambukilanga mwanda wau? Nga tubundang’e vuvu muna ngangu za wantu kumosi ye ngindu za yeto kibeni vava tukalanga muna mpasi? Nga tusiang’e ngolo mu lunda luludiku lwa Nkand’a Nzambi?

15. Vana fulu kia bunda e vuvu muna ngangu za yeto kibeni, adieyi tufwete vanga?

¹⁵ Mwand’a Nzambi ukutufilanga mu zitisa Nkand’a Nzambi. Nze ntozi a nkunga, tubadikilanga diambu dia Nzambi nze mini kia tambi yeto, yo ntemo eyendelo dieto. (Nku. 119:105) Vana fulu kia bunda vuvu muna ngangu za yeto kibeni, tubunda e vuvu muna Diambu dia Nzambi kimana diatusadisa mu swaswanesa o wete yo bi. Ke tulongoka kaka  zitisa Nkand’a Nzambi ko, kansi tuzola mpe nsiku mia Nzambi.—Nku. 119:97.

Dina Tulenda Longoka Muna Mbandu a Yesu

16. Adieyi divavwanga mu kala yo “nyindu a Kristu”?

¹⁶ Muna vwa mwand’a Nzambi tufwete kala yo “nyindu a Kristu.” (1 Kor. 2:16) O kala yo ‘nyindu mosi mun’owu wa Kristu Yesu’ divavanga vo twazaya e ngindu ye mavangu mandi yo kuntanginina. (Roma 15:5; 1 Pet. 2:21) Yambula twabadika e mpila tulenda wo vangila.

17, 18. (a) Adieyi tulenda longoka muna mbandu a Yesu mu kuma kia sambu? (b) Ekuma tufwete ‘lombelanga’?

¹⁷ Lomba mwand’a Nzambi muna sambu. Una kabwidilu mu mpasi ko, Yesu walombanga mwand’a Nzambi kimana wansadisa. (Luka 22:40, 41) Yeto mpe tufwete lombanga mwand’avelel’a Nzambi muna sambu. Kuna mvevo wawonso, Yave ovananga mwand’avelela kwa ndiona okunlombanga wo ye lukwikilu. (Luka 11:13) Yesu wavova vo: “Nulomba, ozevo nuvewa; nuvava, ozevo nusolola; nudoda, ozevo nuziulwilwa, kadi konso on’olomba, otambula; on’ovava, osolola; on’ododa, oziulwilwa.”—Mat. 7:7, 8.

¹⁸ Vava tuvavanga lusadisu lwa mwand’a Yave, ke tufwete yambula wo lomba ko. Dilenda vava vo twalombanga wo nkumbu miayingi muna sambu. Ezak’e ntangwa, muna vana e mvutu za sambu yau, Yave oyambulanga vo o wantu balombanga nkumbu miayingi mu songa vo mfunu kikilu bavwidi wo ye songa lukwikilu lwau. *

19. Adieyi kavanganga Yesu lumbu yawonso? Ekuma tufwete kuntanginina?

¹⁹ Lemvokela Yave muna mawonso. E lumbu yawonso, Yesu wavanganga mana mayangidikanga S’andi. Vakala ye ntangwa ina Yesu kakala ye ngindu zaswaswana ye luzolo lwa S’andi. Kansi, ye vuvu kiawonso wavova kwa S’andi vo: “Luzolo luame ke luau ko, oluaku aka luavangama.” (Luka 22:42) Ukiyuvula: ‘Nga ilemvokelanga Nzambi kana nkutu vava dikalanga diampasi mu vanga wo?’ O lemvokela Nzambi diambu diamfunu muna zingu kieto. Tufwete kunlemvokela kadi yandi i Mvangi eto, yandi i nto a zingu kieto, yandi mpe okutulunga-lunganga. (Nku. 95:6, 7) Ke vena lekwa ko tulenda vingisa vana fulu kia lemvo. Avo ke tulemvokele ko, ke tulendi tondakana ko kwa Nzambi.

20. Adieyi Yesu kavanganga muna zingu kiandi kiawonso? Aweyi tulenda kuntanginina?

²⁰ Toma zaya Nkand’a Nzambi. Vava lukwikilu lwandi lwatontwanga kwa Satana, Yesu wayikanga e sono ya Nkand’a Nzambi. (Luka 4:1-13) Vava afidi a nsambila bamfidisang’e mpaka, Yesu wasadilanga Diambu dia Nzambi muna kubavunisa. (Mat. 15:3-6) Muna zingu kiandi kiawonso, Yesu wakalanga y’etima dia zaya nsiku a Nzambi yo lunganisa wo. (Mat. 5:17) Yeto mpe tufwete zadisanga ngindu zeto ye Diambu dia Nzambi edi dikumikanga lukwikilu lweto. (Fili. 4:8, 9) O kala ye ntangwa y’elongi dia esi nzo yovo dia yeto kibeni dilenda kala diampasi kw’akaka muna yeto. Vana fulu kia vava e ntangwa, tufwete vaulanga e ntangwa.—Ef. 5:15-17.

21. Nkia nkubika ilenda kutusadisa mu toma zaya Diambu dia Nzambi yo wokesa umbakuzi weto?

²¹ O “ntaudi akwikizi yo lulungalalu” wasikidisa o Fuku wa Nsambila ya Esi Nzo mu kutusadisa twakala ye ntangwa y’elongi dia yeto  kibeni yovo dia esi nzo. (Mat. 24:45) Nga otoma sadilanga e nkubika yayi? Muna kusadisa wakala yo nyindu a Kristu, nga lenda fimpanga ezak’e ntangwa dina Yesu kalonga mu kuma kia diambu ozolele zaya? Nga olenda sadila Índice das Publicações da Torre de Vigia muna vava mambu ozolele zaya. Kasikil’owu, tuka mvu wa 2008 yakuna 2010, mun’Eyingidilu dia nkangu mwavaika malongi mena yo ntu a diambu “Adieyi Tulongokele mu Kuma kia Yesu.” Olenda sadila malongi mama mun’elongi dia ngeye kibeni. Tuka muna mvu wa 2006, Despertai! yavaikisanga elongi dina yo ntu a diambu mu Kimputu vo “Qual É a Sua Resposta?” Elongi diadi diavaikiswa y’ekani dia kusadisa mu wokesa umbakuzi waku wa Diambu dia Nzambi. Ekuma olembi badikilanga mambu mama muna Nsambila ya Esi Nzo?

Tulenda Sund’e Nza

22, 23. Adieyi tufwete vanga muna sund’e nza?

²² Muna filwa kwa mwand’a Nzambi, tufwete sia mwand’a nza e kitantu. O nkuma mu venga mwanda wau ke ukwizanga wau mosi ko, ngolo zayingi divavanga. (Yuda 3) Kansi, tulenda sunda. Yesu wavovesa alongoki andi vo: “Ova nza numona mpasi: kansi nuyangalala, mono nsundidi nza.”—Yoa. 16:33.

²³ Yeto mpe tulenda sund’e nza kele vo tusidi mwand’andi kitantu yo vanga mawonso tulenda mu tambula mwand’a Nzambi. Kieleka, “ovo o Nzambi wina yeto, nani okutusi’e kitantu?” (Roma 8:31) Avo tutambwidi mwand’a Nzambi yo landa luludiku lwa mwanda wau nze una wasonama muna Nkand’a Nzambi, tukala ye kiese yo luvuvamu ye vuvu kia moyo a mvu ya mvu muna nz’ampa eyi ifinamene.

[Mvovo Vana Yand’a lukaya]

Nga Osungamene?

• Ekuma mwand’a nza uvukumwinanga wantu ayingi?

• Nkia yuvu yá tufwete kiyuvula?

• Nkia mambu tatu tulongokele muna mbandu a Yesu mu kuma kia tambula mwand’a Nzambi?

[Yuvu ya Longoka]

[Foto ina muna lukaya lwa 8]

E mbasi zakaka aweyi zakitukila se nkwiya?

[Foto ina muna lukaya lwa 10]

Satana osadilanga mwand’a nza mu fila wantu, kansi tulenda venga vukumunwa kwa mwanda wau