Nga Osungamenanga?

Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• Nkia ‘lekwa eyi itombwanga’ kwa zula yawonso? (Kan. 2:7)

E lekwa yayi i wantu ana besambilanga Yave muna zola kwawonso kana una vo asumuki. (Nga. 27:11) O wantu awaya i “lekwa itombwanga” ana bekunkembelanga. Yave mpe oyangalelanga o vumi yo vema besonganga muna salu kiandi.—Abidi-Yuni, lukaya lwa 11.

• Adieyi diakitula Daniele se “muntu otomene zolwa” vana ndose a Yave? (Dan. 10:11, 19)

Daniele nlongoki ambote a Nkand’a Nzambi kakala. (Dan. 9:2) Wakalanga ye fu kia samba. (Dan. 2:17, 18) Kembelela e nkumbu a Yave i diambu katoma tokanenanga. (Dan. 2:20, 28; 9:19)—Abidi-Yuni, lukaya lwa 12-13.

• Akristu akieleka nga bebadikilanga e nkumbu a Nzambi nze mpandu?

Wantu akaka bebadikilanga lekwa yovo sinsu nze mpandu yovo mpungu zilenda kubatanina muna nkisi. Kansi, nkangu a Nzambi ke bebadikilanga nkumbu andi nze mpandu ko. Bekwikilanga muna Yave yo vanga luzolo lwandi. Muna mpila yayi betininanga muna nkumbu andi. (Sef. 3:12, 13)—15/1, lukaya lwa 5-6.

• Mase aweyi balenda sadisila wan’au mu bak’e nzengo mu kuma kia nkal’ambote?

Mase bafwete kiesesanga kwa wana e nkanikinu mina belemvokelanga. Bafwete kubalonganga e ludi kiawonso mu kuma kia vukana. Bafwete mpe kubasadisa mu bakula e mfwilu mia kulula e nsiku mia nkal’ambote mia Yave.—Abidi-Yuni, lukaya lwa 19-20.

• Ekuma Yave kabembolwela Saulu wa Ntinu?

Saulu wafwana vingila ngunz’a Nzambi mu tambika kimenga, kansi o ntinu wakolama yo tambika kimenga yandi kibeni. Kuna kwalanda, wakolamena nkanikinu wa fwasa atantu au.—15/2, lukaya lwa 22-23.

• Aweyi tulenda songela vo umpumbulu tumenganga?

Muna venganga bundunwa kwa malavu mankolwa, lembi kuyisia mu mavangu ma mpandu yo lemvokela lulukisu lwa Yesu mu kuma kia mavangu ma zumba. Kasikil’owu, tufwete venganga tanga yovo tala mavangu ma zumba ye ngindu zalembi songa zilenda twasa evangu diadi. (Mat. 5:27, 28) Tufwete venganga mpe vanga kikundi y’awana bavaikiswa muna nkutakani.—15/2, lukaya lwa 29-32.

• Nkia nkanikinu mia Nkand’a Nzambi milenda kutusadisa mu zaya luzolo lwa Yave mu kuma kia tá mpanza? (Ef. 5:17)

Vana meso ma Nzambi, o bunda e vuvu mun’elau diau adimosi kwandi yo sambila teke. (Yes. 65:11) Yave olukisanga asambidi andi mu lembi lokokela lekwa kiangani. (Luv. 20:17; Roma 7:7) E selo ya Nzambi besadilanga e nzimbu kuna unsongi. (Ef. 4:28; 2 Tes. 3:10, 12)—Abidi-Yuni, lukaya lwa 22-23.

• O Yeremiya aweyi kakadila nze nti “ukuninu vana ndambu a maza, on’oyalanges’e mianzi”? (Yer. 17:7, 8)

Yeremiya kayambula yima bundu ko; ngatu yoyeswa kw’awana bamvezanga. Kansi, watatidila Nto a maza ma moyo yo lemvokela mawonso kavoveswanga kwa Nzambi.—15/3, lukaya lwa 14.

• Adieyi tulenda longoka mu kuma kia Yave muna mvovo mia Yobi mina muna Yobi 14:13-15?

Yave muna nkenda zandi otoma finamanga awana beyekekanga mioyo miau muna moko mandi yo yambula vo kabawumba yo kubakitula se nkangu wazolakana vana meso mandi.—Abidi-Yuni, lukaya lwa 31.

• Samuele wa ngunza aweyi ‘kavangila edi diansongi’? (Ayib. 11:32, 33)

Samuele wasadisa o nkangu mu vanga edi diambote ye diansongi vana meso ma Nzambi. Nluta miayingi kabaka kadi wabundang’e vuvu muna Yave kuna luzindalalu lwawonso, yo kwamanana muna salu kiandi kana una vo wanwananga ye mambu mayingi mampasi.—Abidi-Yuni, lukaya lwa 27.