Una Tulenda Kadila Akwa Unsongi mu nza Yayi Yakondwa Unsongi

NZE tembwa tufulumunanga, e fu kia kondwa unsongi kiasayana mu fulu yawonso. Wantu bevunanga, kudikila ntalu muna lekwa betekanga, yiya, lembi zola futa mfuka yo vuna akaka muna mambu ma kinkita. Wau vo tuzinganga vamosi yo wantu a mpila yayi, nkumbu miayingi tuwanananga ye mambu malenda tonta unsongi weto. Aweyi tulenda vengela e fu kia kondwa unsongi? Yambula twabadika mambu tatu malenda kutusadisa mu vanga wo. Vumi wa Yave, kala ye ntona zambote yo yangalela eyi tuna yau.

Vumi wa Yave

Yesaya wa ngunza wasoneka vo: “O Yave i mfundisi eto, o Yave i nkau eto, o Yave i ntinu eto.” (Yes. 33:22) O zaya e wisa kia Yave dikutufila mu kumvumina. O vumi wau ukutusadisa mu venga e fu kia kondwa unsongi. Muna Ngana 16:6 tutanganga vo: “Muna vumi wa Yave i muvengelwa mbi.” O vumi wau ke wonga wa tumbwa kwa Nzambi ko, kansi wonga wa kendeleka S’eto ezulu, ona otokanenanga e wete dieto.—1 Pet. 3:12.

E mambu mebwanga muna zingu mesonganga e nluta mia kala yo vumi. Ricardo yo nkaz’andi Fernanda, bakatula nkama nsambwadi za dólar muna nzimbu zau balundilanga muna banco. * Fernanda wasia e nzimbu zazi muna nkutu andi lembi zo tanga. Bayenda futa mfuka, kansi vava balwaka kuna nzo, basivika mu mona vo e nzimbu zina bakatula kuna banco zakinu kaka muna nkutu a Fernanda. Bavova vo: “O nsadi a banco nanga nzimbu kalutakese.” Entete, bavava lunda e nzimbu zazi wau vo mfuka zakaka bakala zau. Ricardo wavova vo: “Twasamba kwa Yave katuvana ngolo za kwenda vutula nzimbu zazi. Etima dieto dia kunyangidika nze una uvovanga sono kia Ngana 27:11 diatufila mu kwenda zo vutula.”

Ntona Zalongwa kwa Nkand’a Nzambi

Tulenda longa e ntona zeto muna longokanga Nkand’a Nzambi yo sia e ngolo za sadila mana tulongokanga. Muna mpila yayi, ‘e diambu dia Nzambi dina vo diamoyo ye nkuma,’ ke dikota kaka mu ngindu zeto ko, kansi ye muna ntima mieto mpe. Ediadi dikutufila “mu kala nkal’ambote (yovo akwa unsongi) muna mambu mawonso.”—Ayib. 4:12; 13:18.

Badika e nona kia João. Wayikotesa mu mfuka ya mafunda tanu ma nzimbu za dólar. I bosi, wayenda zingila ku zunga kiakaka lembi futa nzimbu zangani. Vioka mvu nana, João walongoka e ludi, e ntona zandi zalongwa kwa Nkand’a Nzambi zamfila mu vava mfumu a kompani dina diansompeka e nzimbu kiamana kafuta e mfuka yayi. Wau vo João nkento yo wana yá kasansanga ye kafutwanga nzimbu zayingi ko, o mvwa nzimbu wamvovesa vo kafutanga ndambu-ndambu konso ngonde.

Tuyangalelanga eyi Tuna Yau

Paulu wa ntumwa wasoneka vo: “O vumina-Nzambi yo luyangalalu i ndandu kikilu. . . . Wau tuna yo dia yo vwata, tuyangalela ko.” (1 Tim. 6:6-8) O lemvokela elongi diadi dilenda kutusadisa mu venga e fu ki’eloko, yinkita yalembi songa yovo vava vwama mu nzaki. (Nga. 28:20) O lemvokela elongi dia Paulu dikutusadisa mpe mu sia mambu ma  Kintinu kia Nzambi va fulu kiantete, yo kala ye ziku vo olungisa e nsatu zeto.—Mat. 6:25-34.

Kansi, mu kuma kia “luvuki lua umvwama” katufwete vezanga ko e vonza kia kala y’eloko. (Mat. 13:22) Badika dina diabwila Akani. Kamona vava Aneyisaele basauka Nkoko a Yodani mu mpila yesivi. Kana una vo i wau, eloko diamfila mu yiya palata ye wolo ye mvwatu antalu muna lekwa yasanzwa muna mbanz’a Yeriko. Evangu diadi diantwasila lufwa. (Yos. 7:1, 20-26) Ke diesivi ko vo vioka tandu yayingi, Yesu walukisa vo: “Nutoma tala, nukeng’eloko diawonso.”—Luka 12:15.

Kala Nkwa Unsongi Kuna Salu

Owau yambula twabadika maka mambu malenda tonta etima dieto dia kwamanana kala akwa unsongi muna mambu mawonso. O kala nkwa unsongi kuna salu divavanga vo ‘twalembi yiya,’ kana nkutu vo ndonga bevanganga wo. (Tito 2:9, 10) Jurandir, osadilanga muna kompani dimosi dia luyalu, ludi kavovanga vava kazayisanga e nsangu za nzimbu kasadilanga muna nkangalu wa salu. Kansi, akw’andi a salu bakudikilanga e nzimbu zina ke basadidi ko. Bavanganga wo kadi o mfumu au wayambulanga vo asadi bavuna. O mfumu ndioyo watumba nkutu Jurandir wau kavovanga e ludi yo yambula kumfila muna nkangalu mia salu. Kansi, kuna kwalanda, vava kiafimpwa e mpila isadilwanga nzimbu muna kompani diadi, Jurandir wasanisinwa mu kuma kia unsongi wandi yo vewa kiyekwa muna kompani.

André, wasadilanga mu nzo ya tekela lekwa, wavoveswa kwa mfumu andi vo kakudikilanga e ntalu muna nzimbu kalombanga kw’asumbi. O mpangi eto wasamba kwa Yave kimana kamvana unkabu wa lemvokela nkanikinu mia Nkand’a Nzambi. (Nku. 145:18-20) Wamokena mpe yo mfumu andi a salu mu kunsasila ekuma kazolele vangila ko dina kamvovesa, kansi ke diatwasa nluta ko. Muna kuma kiaki, André wabaka e nzengo za katuka muna salu, kana una vo nzimbu zayingi kafutwanga. Kansi, vioka mvu mosi, o mfumu andi wambokela kavutuka kuna salu, yo kunsia o nsilu vo ke kunlomba diaka ko vo kakudikila e ntalu. André wasolwa se mfumu kuna salu.

Futang’e Mfuka

Paulu wa ntumwa wavovesa Akristu vo: “Ke nudia muntu mfuka ko, nangu zolana kaka.” (Roma 13:8) Tulenda vava e vakuba mu lembi futa e mfuka yo yindula vo ona watusompeka zo nzimbu zayingi kena zau, kavwidi nzimbu zazi mfunu ko. Kansi, Nkand’a  Nzambi ukutulukisanga vo: “E kimpumbulu kisompa, yandi kavutula.”—Nku. 37:21.

Adieyi tufwete vanga kele vo ‘mambu ma kinsalukisa’ matubwididi oma malenda kutufila mu lembi futa kina batusompeka? (Kim. 9:11) Francisco, wasompa tezo kia mafunda nsambwadi ma nzimbu za dólar kwa Alfredo kimana kafuta mfuka kakala yau. Kansi, wau vo kinkita kavanganga ke kiasikila ko, Francisco kalenda futa mfuka ko muna lumbu bawizana. Wabak’e nzengo za kwenda mokena yo Alfredo mu kuma kia diambu diadi. Alfredo watambulwila vo kafutanga e nzimbu zazi ndambu-ndambu.

Venga Fu kia Vunginika Akaka

Badika e mbandu ambi ya Anania yo Safira, esi nkutakani y’Akristu muna tandu kiantete. Bateka e mpatu au yo twasa ndambu a nzimbu kw’antumwa yo kubavovesa vo i nzimbu zawonso zina batekela e mpatu. Bazola vunginika akaka mu moneka vo avani amvevo. Kansi, Petelo wa ntumwa muna lusadisu lwa mwand’avelel’a Nzambi wasengomona luvunu lwau, o Yave wabavonda.—Mav. 5:1-11.

Nswaswani yo Anania yo Safira, asoneki a Nkand’a Nzambi akwa ziku ye unsongi bakala. Ye ziku kiawonso, Mose wayika fu kasonga kia kondwa volo, eki kiamfila mu lembi kota muna Nsi a Nsilu. (Nta. 20:7-13) Diau adimosi mpe yo Yona, kasweka ko vilwa kavanga vitila kenda sila umbangi kwa esi Nineve ye vava kamanisa. Kansi, wasoneka vilwa wandi.—Yona 1:1-3; 4:1-3.

Kieleka, unkabu divavanga mu vova e ludi, kana nkutu vo mfwilu ditwasa, nze una usonganga dina diabwila Nathalia una ye mvu 14, kuna sikola. Vava katala muna papela ya lufimpu wamona vo nlongi watonda e mvutu kasoneka muna papela, kansi ke zakala za ludi ko. Kana una vo wazaya wo vo o zayisa diambu diadi dilenda kunkakidila mu lembi vioka e kalasi, Nathalia kakala ye lukatikisu ko mu zayisa dio kwa nlongi andi. Wavova vo: “Mase mame mekundonganga vo, muna yangidika Yave, mfwete kala nkwa unsongi. E ntona zame zadi kuntokanesa kele vo kizayisi dio ko kwa nlongi ame.” O nlongi wasanisina Nathalia mu kuma kia unsongi wandi.

Kala Nkwa Unsongi Nkembo Ditwasanga kwa Nzambi

Giselle, dumbelele kia mvu 17, wasolola nkutu a natina e nkanda yakala ye 35 dia nzimbu za dólar. Wamokena y’afidi a sikola kimana bavutula e nkutu yayi kwa ndiona ovwidi yo. Vioka ngonde mosi, o landi kia mfidi a sikola watanga nkanda vana vakala wan’a kalasi awonso yo sanisina Giselle mu kuma kia unsongi wandi ye mase mandi ana bekunlonganga oma ma Nzambi. E ‘mavangu mandi mambote’ matwasa nkembo kwa Yave.—Mat. 5:14-16.

Ngolo divavanga mu kala akwa unsongi ekolo tuzinganga vamosi yo wantu bena vo ‘akwa kuzola, minzola-nzimbu, akwa lusanu, akwa lulendo, minkondwa-ziku.’ (2 Tim. 3:2) Kansi, o vumi wa Yave kumosi ye ntona zalongwa kwa Nkand’a Nzambi yo yangalela eyi tuna yau dikutusadisanga mu kala akwa unsongi mu nza yayi yakondwa unsongi. Ediadi dikutusadisa mpe mu kala ye ngwizani ambote yo Yave, ona una vo “wansongi, unsongi i kazolele.”—Nku. 11:7.

[Mvovo Vana Yand’a lukaya]

[Mafoto zina muna lukaya lwa 7]

O vumi wa Yave ukutusadisanga mu kala akwa unsongi

[Foto ina muna lukaya lwa 8]

O unsongi weto nkembo utwasanga kwa Yave