Esi nzo Z’akristu, Nukala ‘Nwakubama’

“Se nukubama kweno: e kuma kadi, muna ntangwa ilembi yindulwa ikwiz’o Mwan’a muntu.”—LUKA 12:40.

1, 2. Ekuma tufwete lemvokela lulukisu lwa Yesu lwa kala ‘wakubama’?

‘VAVA Mwan’a muntu kekwizila muna nkembo andi’ mu ‘vambanisa’ wantu, adieyi dikubwila kumosi y’esi nzo aku? (Mat. 25:31, 32) Wau vo ediadi divangama muna ntangwa ina tulembi yindula, diambote twalemvokela lulukisu lwa Yesu lwa kala ‘wakubama.’—Luka 12:40.

² Elongi diviokele diasongele una konso muntu muna nzo kalenda sadisila esi nzo awonso mu kwamanana yingila muna mwanda vava kelungisanga e mbebe andi una ufwene. Yambula twabadika mpila zakaka tulenda sadisila esi nzo mu sikila muna mwanda.

Kala ye Disu “dia Kumosi”

3, 4. (a) Nkia diambu bafwete venga esi nzo z’Akristu? (b) O kala ye disu “dia kumosi” aweyi disongele?

³ Muna kala wakubama muna ngiz’a Kristu, esi nzo bafwete keba kimana balembi vukumunwa yo yambula kuyivana muna mambu ma nsambil’aludi. Bafwete venganga  mambu malenda kubavukumuna. Wau vo luzolo kwa kala ye mavwa mayingi luvukumunanga esi nzo zayingi, badika dina Yesu kavova mu kuma kia kala ye “disu dia kumosi.” (Tanga Matai 6:22, 23.) Nze una mini kisilanga ntemo muna mayendelo meto yo kutusadisa twalembi bwa, mana tumonanga muna “meso ma ntima” mieto malenda temesa nzila zeto yo kutusadisa mu lembi tá esakuba.—Ef. 1:18.

⁴ Muna toma mona, e disu difwete kala diambote yo sia sungididi muna lekwa kina ditalanga. Diau adimosi ye meso ma ntima. O kala ye disu dia kumosi disongele vo sia sungididi mu lekwa kimosi kaka. Vana fulu kia kuyivana muna mavwa yo tokana kwayingi mu kuma kia lungisa nsatu za nitu za esi nzo, tusianga sungididi kieto muna mambu ma mwanda. (Mat. 6:33) Ediadi disongele vo tufwete yangalelanga ina tuna yau yo sia salu kia Nzambi va fulu kiantete muna zingu kieto.—Ayib. 13:5.

5. Aweyi dumbelele kimosi kasongela vo “disu” diandi mu salu kia Nzambi diasiang’e sungididi?

⁵ Vava wana belongwanga kala ye disu dia kumosi, nluta miambote ditwasanga. Badika e nona kia dumbelele kimosi kuna Etiópia. Wau vo ngangu zayingi kakala zau kuna sikola, wavewa elau dia tanga sikola zampwena. Kansi, katambulwila tanga sikola zazi ko, kadi wasianga sungididi kiandi muna salu kia Yave. Ke vavioka kolo ko, wavewa elau dia salu kiadi kumfuta 4.200 za dólar konso ngonde. Nzimbu zayingi avo zitezaneso ye zina zafutwanga wantu kuna nsi au. Kansi, e “disu” dia dumbelele kiaki mu salu kia mviti a nzila diasiang’e sungididi. Ke diavava ko vo kateka yuvula mase mandi muna bembola elau dia salu kiaki. Mase mandi aweyi bamona vava bawá dina mwan’au kavanga? Bayangalala kikilu yo kunsanisina muna nzengo kabaka.

6, 7. Nkia vonza kivavanga vo ‘twatoma kuyitala’?

⁶ Muna Matai 6:22, 23, Yesu walukisa mu kuma ki’eloko. Yesu waswaswanesa disu “dia kumosi” ye ‘disu diambi.’ O nkwa ‘disu diambi,’ nkw’eloko ye kimpala. (Mat. 6:23) O Yave aweyi kebadikilanga e fu ki’eloko? Muna Nkand’a Nzambi tutanganga vo: “Vo i zumba, yo nsafu wawonso, y’eloko, ke mayikwa nkutu ko vovo nwina.”—Ef. 5:3.

⁷ Diasazu mu mona e fu ki’eloko muna wantu akaka. Kansi, dilenda kala diampasi mu zaya vo yeto kibeni fu kiaki tuna kiau. Muna kuma kiaki, dia ngangu dia lemvokela lulukisu lwa Yesu vo: “Nutoma tala, nukeng’eloko diawonso.” (Luka 12:15) Ediadi divavanga vo twayifimpa yeto kibeni mu zaya kana nkia makani tuna mau muna ntima. Esi nzo z’Akristu bafwete toma badika e ntangwa ye nzimbu befwasanga muna nsaka yo sumba lekwa.

8. Ekuma tufwete ‘toma tadila’ vitila twasumba konso lekwa?

⁸ Vitila twasumba konso lekwa, mayingi tufwete badika ke zaya kaka ko kana vo tuna ye nzimbu zafwana mu sumba kio yovo ve. Tufwete kiyuvula yuvu eyi: ‘Nga isadila lekwa kiaki yo lenda kio lunga-lunga? Kolo kwa kivava mu longoka una kisadilwanga?’ Aleke, ke nufwete kwikilanga mawonso ko mevovanga amwangi a nsangu bevavanga kunufila mu sumba mvwatu ye lekwa yakaka yantalu. Nufwete kalanga ye volo. Nufwete yindulanga mpe kana vo e lekwa nuzolele sumba kisadisa esi zeno mu kala wakubama muna ngiz’a Mwan’a muntu. Nusia e vuvu muna nsilu owu wa Yave: “Kikuyambula nkutu ko, ngatu kusisa nkutu.”—Ayib. 13:5.

Nukala Y’etima dia Salu ya Mwanda

9. O kala y’etima dia salu ya mwanda nkia nluta dilenda twasa kwa esi nzo?

⁹ E mpila yakaka esi nzo balenda siamisina  lukwikilu lwau yo sadisa awonso muna nzo mu sikila muna mwanda i kalanga y’etima dia salu ya mwanda yo lungisa etima diadi. O vanga wo disadisa esi nzo mu zaya e tezo kia mana belungisanga muna salu kia Yave yo kubasadisa mpe mu sikidisa oma masundidi o mfunu muna zingu kiau.—Tanga Filipi 1:10.

10, 11. Nkia salu ya mwanda isalanga esi nzo eno? Nkia makani ma mwanda ozolele lungisa kuna sentu?

¹⁰ Kana nkutu o sala salu ina muna tezo kieno dilenda twasa nluta kwa esi nzo awonso. Kasikil’owu, nulenda kala y’ekani dia fimpanga e sono kia lumbu. E mvutu zivananga esi nzo zilenda sadisa mase mu bakula e tezo kia lunungunuku lwau lwa mwanda. O tanganga Nkand’a Nzambi kumosi y’esi nzo divananga wana elau dia zaya toma tanga yo bakula oma mena muna Nkand’a Nzambi. (Nku. 1:1, 2) Nga ke tufwete kalanga y’ekani dia tomesa e sambu yeto ko? O yima e fu ya mbongo a mwanda dilenda kala ekani diambote. (Ngal. 5:22, 23) Adieyi tuvova mu kuma kia vavanga e mpila tulenda songela nkenda kw’awana tumokenanga yau muna salu kia umbangi? Kele vo esi nzo basidi e ngolo za vanga wo, dilenda sadisa wana mu longoka songa e nkenda yo kala y’etima dia sala nze aviti a nzila a ngonde ke ngonde yovo misionario.

¹¹ Ekuma nulembi fimpila salu nulenda sala yeno awonso muna nzo? Nga esi nzo aku balenda kuyisila ekani dia sala kwayingi muna salu kia umbangi? Nga nulenda sia ngolo za sunda wonga wa sila umbangi muna telefone, muna nzila yovo muna fulu ya tekela? Adieyi tuvova mu  kuma kia kwenda sadila mu fulu yivavanga ateleki ayingi a Kintinu? Nga mosi muna nzo eno olenda longoka ndinga yakaka kimana kasila umbangi kwa wantu a nsi zakaka?

12. Adieyi mase balenda vanga mu sadisa esi nzo zau mu nungunuka muna mwanda?

¹² Wau vo u se, vavanga o zaya dina nufwete singika mu nungunuka muna mwanda. I bosi, sikidisa dina nulenda vanga mu lungisa ekani diadi. Nufwete kala ye tezo muna makani nukuyisilanga. Nusolanga salu nulenda lungisa mun’owu wa zingu ye ngangu zeno. (Nga. 13:12) Ntangwa divavanga mu lungisa makani nukuyisila. Muna kuma kiaki, e ntangwa nuviokesanga muna tala televizau nulenda yo sadila muna salu ya mwanda. (Ef. 5:15, 16) Nufwete sianga ngolo za lungisa makani nwayisila muna nzo eno. (Ngal. 6:9) Avo esi nzo basidi etima muna salu ya mwanda, lunungunuku lwau ‘lumoneka kw’awonso.’—1 Tim. 4:15.

Nusikidisa Fuku wa Nsambila ya Esi Nzo

13. Nkia nsobani yavangwa muna nkubika ya tukutakanu? Nkia yuvu tufwete kiyuvula?

¹³ Diambu diamfunu dilenda sadisa esi nzo mu kala ‘wakubama’ muna ngiz’a Mwan’a muntu i nsobani yavangwa muna nkubika za tukutakanu yayantika kina kia 1 kia ngonde a Yanuali, 2009. Lukutakanu lwayikilwanga vo Elongi dia Nkanda dia Nkutakani lwavangamanga mu lumbu kiakaka lwasobwa yo siwa lumbu kimosi ye Sikola ya Salu kia Kimfumu yo Lukutakanu lwa Salu. E nsobani yayi yavangwa mu vana esi nzo z’Akristu e ntangwa ya kumika kimwanda kiau muna vaulanga fuku wa nsambila ya esi nzo konso lumingu. Wau vo se kolo kiayingi kiavioka tuka e nsobani yayi yavangamena, tulenda kiyuvula: ‘Nga isadilanga ntangwa yayi muna kalanga ye fuku wa Nsambila ya Esi Nzo yovo kala y’elongi dia mono kibeni? Nga ilungisanga ekani diasikidisilwa nkubika yayi?’

14. (a) Adieyi i kani diantete dia kala ye fuku wa Nsambila ya Esi Nzo yovo y’elongi dia ngeye kibeni? (b) O vaula fuku umosi mu longoka ekuma dinina o mfunu?

¹⁴ Ekani dia kala ye fuku wa Nsambila ya Esi Nzo yovo y’elongi dia yeto kibeni, i siamisa ngwizani eto yo Nzambi. (Yak. 4:8) Vava tuvaulanga e ntangwa ya longoka Nkand’a Nzambi lumbu yawonso yo wokesa zayi weto muna Mvangi eto, e ngwizani eto yo yandi iwokelanga. Avo tutomene finama Yave, tukala mpe y’etima dia kunzola muna ‘nsi a ntim’eto yawonso, yo muna fulumwinu kieto kiawonso yo muna nyindu eto wawonso, yo mun’efuka dieto diawonso.’ (Maku 12:30) Tukala y’etima dia lemvokela Nzambi yo kuntanginina. (Ef. 5:1) Muna kuma kiaki, o kala ye fuku wa Nsambila ya Esi Nzo i nsabi mu sadisa esi nzo eto awonso mu ‘yingila’ muna mwanda ekolo tuvingilanga e ‘mpasi zayingi.’ (Mat. 24:21) Mfunu kikilu dina muna vuluka.

15. O fuku wa Nsambila ya Esi Nzo nkia nluta ilenda twasa kwa esi nzo?

¹⁵ Ekani diakaka dia Nsambila ya Esi Nzo i sadisa esi nzo mu finama muntu yo nkw’andi. O kala vamosi mu badika mambu ma mwanda konso lumingu kikundi disiamisanga. Ekwe kikundi kikalanga vana vena nkento yo yakala vava bekalanga ye kiese kia longoka Nkand’a Nzambi entwadi. (Tanga Kimpovi 4:12.) Vava mase yo wana belongokanga vamosi beyikakeswanga muna zola kuna vo i “kangwa kia zikuka.”—Kol. 3:14.

16. Yika e nluta babaka mpangi tatu z’akento muna vaula fuku wa longoka Nkand’a Nzambi.

¹⁶ Badika e nluta babaka mpangi tatu z’akento muna vaula fuku wa longoka  Nkand’a Nzambi. Kana una vo ke yitu ko, ampangi zazi zina vo akento ansona mu mbanza mosi bazingilanga ye akundi bakala tuka mvu miayingi. Wau vo etima dia kalanga vamosi bakala diau yo sadila e ntangwa yayi mu badika mambu ma mwanda ke mu yangalela kaka kikundi ko, babaka e nzengo za vaula fuku wa kutakana yo longoka Nkand’a Nzambi. Bayantika longoka nkanda ‘Dê Testemunho Cabal’ sobre o Reino de Deus. Mosi muna yau wavova vo: “Tutoma yangalelanga e ntangwa yayi ya longoka, kadi nkumbu miayingi tulongokanga vioka ola mosi. Tuyindulanga una wakala e zingu kia mpangi zeto muna tandu kiantete yo badika dina twadi vanga kele vo diambu dia mpila yayina ditubwididi. I bosi, tusianga ngolo za sadila mana tulongokele. Ediadi diwokesanga kiese kieto muna salu kia umbangi ye kia kitula wantu s’alongoki.” Vana ntandu a kubakumika muna mwanda, e nkubika yayi isadisanga akundi awaya atatu muna finama muntu yo nkw’andi. Bavova vo: “Tutoma yangalelanga kikilu e nkubika yayi.”

17. Nkia mambu malenda sadisa mu kala yo fuku wambote wa Nsambila ya Esi Nzo?

¹⁷ Adieyi tuvova mu kuma kieno? Nga nubakanga nluta muna fuku nwavaula mu kuma kia nsambila ya esi nzo yovo w’elongi dia yeno kibeni? Avo mu tutu kaka nulongokanga, e nkubika yayi ke yilungisa ekani yasikidisilwa ko. Konso muntu muna nzo kafwete kalanga wakubama mu longoka muna ntangwa yasikidiswa. Ke nufwete yambula ko vo mambu makete-kete mavunzanesa o fuku una nwavaula. Vana ntandu, nufwete solanga malongi mana malenda sadisa esi nzo muna zingu kiau kia lumbu ke lumbu. Adieyi nulenda vanga mu kitula e ntangwa ya longoka se ntangwa yakiese? Sadila ndekwa zambote za longa yo kitula e ntangwa yayi se ntangwa ya luvuvamu.—Yak. 3:18. *

‘Nuyingila’ yo Kala ‘Wakubama’

18, 19. Adieyi ofwete vanga kumosi y’esi nzo aku wau nuzeye vo e ngiz’a Mwan’a muntu ifinamene?

¹⁸ O wokela kwa mpasi mu lumbu yeto kusonganga e ziku vo tuka muna mvu wa 1914, mu lumbu yambaninu ya nza ya Satana tuzingilanga. E Armangedo ifinamene. Ke kolo ko, o Mwan’a muntu okwiza twasa mfundis’a Yave muna yimpumbulu. (Nku. 37:10; Nga. 2:21, 22) O zaya e diambu diadi nga ke difwete kulukisa ko kumosi y’esi nzo aku?

¹⁹ Nga olemvokelanga lulukisu lwa Yesu lwa kala ye disu “dia kumosi”? Ekolo wantu a nza yayi bevavanga mavwa, etunda ye kimfumu, nga esi nzo aku besianga etima muna mambu ma mwanda? Nga nukalanga ye nkubika ya fuku wa Nsambila ya Esi Nzo yovo y’elongi dia ngeye kibeni? Nga nulungisanga ekani dia nkubika yayi? Nze una twalongokele mun’elongi diaviokele, nga olungisanga e mbebe aku yasikidiswa muna Nkand’a Nzambi nze yakala, nkento yovo mwana yo sadisa esi nzo awonso mu kwamanana ‘yingila’? (1 Tes. 5:6) Avo i wau, ‘wakubama’ okala muna ngiz’a Mwan’a muntu.

[Mvovo Vana Yand’a lukaya]

Adieyi Olongokele?

• Sasila una esi nzo z’Akristu balenda kadila ‘bakubama’ mu . . .

kala ye disu “dia kumosi.”

kala y’etima dia salu ya mwanda.

sikidisa fuku wa Nsambila ya Esi Nzo.

[Yuvu ya Longoka]

[Foto ina muna lukaya lwa 13]

O kala ye disu “dia kumosi” dilenda kutusadisa mu lembi vukumunwa kwa mambu ma nza