Esi nzo Z’akristu, ‘Nuyingila’

“Mbula twayingila yo lembi kolwa.”—1 TES. 5:6.

1, 2. Adieyi divavwanga kwa esi nzo muna kwamanana yingila muna mwanda?

MUNA kuma kia “lumbu kia Yave, kianene yo umbubu,” Paulu wa ntumwa wasonekena Akristu esi Tesalonika vo: “Abunzi, ke nuna ku tombe ko, ovo nuluakilwa kwa lumbu kina nze mwivi: yeno awonso nu wan’a ntemo, nu wan’a ntangw’a mwini: oyeto ke twa fuku ko, ngatu tombe.” Paulu wakudikila vo: “Dianu vo, ke tuleki ko, nze akaka, mbula twayingila yo lembi kolwa.”—Yoe. 2:31; 1 Tes. 5:4-6.

² Elongi dia Paulu kwa esi Tesalonika diamfunu kikilu, musungula kw’Akristu bezinganga mu lumbu ya “mbaninu.” (Dan. 12:4) Ekolo e mbaninu a nza yayi yambi ifinamanga, Satana ovavanga vukumuna asambidi ayingi akieleka kimana bayambula sadila Nzambi. Muna kuma kiaki, diangangu twalemvokela lulukisu lwa Paulu lwa yingila muna mwanda. Muna kwamanana yingila, diamfunu konso muntu muna nzo z’Akristu kalungisa kiyekwa kavewa kwa Yave nze una wasonama muna Nkand’a Nzambi. Adieyi akala, akento ye aleke balenda vanga mu sadisa esi nzo zau mu ‘yingila’?

Akala, Nutanginin’o “Mvungudi Ambote”

3. Nze una wasonama muna 1 Timoteo 5:8, adieyi divavwanga kwa yakala muna lungisa kiyekwa kiandi kia kala ntu muna nzo?

³ Muna Nkand’a Nzambi tutanganga vo: “O ntu a nkento, i’yakala.” (1 Kor. 11:3) Adieyi divavwanga kwa yakala mu lungisa kiyekwa kiandi kia kala ntu muna nzo? Nkand’a Nzambi uyikanga dimosi muna mambu mevavwanga oku vo: “Ovo vena y’on’olembi yundul’akw’andi, musungul’awana bena muna nzo andi, ovakwidi o lukwikilu o nkalu, oviokele mundembi-kwikil’o bi.” (1 Tim. 5:8) O yakala kafwete lungisanga nsatu za nitu za esi nzo andi. Kansi, muna sadisa esi nzo bakwamanana yingila muna mwanda, mayingi kafwete vanga ke vava kaka nzimbu ko mu dikila esi nzo. Kafwete mpe kumika kimwanda kia esi nzo andi muna sadisanga awonso muna nzo basiamisa ngwizani au yo Nzambi. (Nga. 24:3, 4) Aweyi kalenda wo vangila?

4. Adieyi dilenda sadisa yakala mu kumika kimwanda kia esi nzo andi?

⁴ Wau vo “o yakala i ntu a nkaz’andi, nze Kristu i ntu a dibundu,” yakala diasompa kafwete fimpa yo tanginina e mpila Yesu kekadilanga e kintu muna nkutakani. (Ef. 5:23) Badika una Yesu kayikila e ngwizani kakala yau y’alandi andi. (Tanga Yoane 10:14, 15.) Adieyi dilenda sadisa yakala mu kumika kimwanda kia esi nzo andi? E nsabi i yayi: Longoka mana Yesu kavova yo vanga nze “mvungudi ambote,” yo ‘landa e ntambi zandi.’—1 Pet. 2:21.

5. O Mvungudi Ambote nkia zayi kena wau mu kuma kia nkutakani?

⁵ E ngwizani vana vena mvungudi ye mameme mandi, mu zayana ye vuvu itukanga. O mvungudi ozeye mawonso mu kuma kia mameme mandi, e mameme mpe mazeye o mvungudi au yo kumbund’e vuvu. Mesungamenanga yo lemvokela e nding’andi. Yesu wavova vo: “Omame nzeye mo, omame mpe manzeye.” O zayi kena wau mu kuma kia nkutakani ke mpasi zayi kaka ko. O  mvovo wa Kingerekia wasekolwa vo “nzeye,” usonganga vo “toma zaya dimosi dimosi muna mameme.” Elo, o Mvungudi Ambote ozayanga mameme mandi mawonso. Ozayanga e nsatu, lutovoko ye nkuma wa konso meme. Ka vena diambu ko mu kuma kia mameme mandi dina Yesu wa Mbandu eto kalembi zaya. Mameme mpe batomene zaya mvungudi au yo bund’e vuvu muna mpila kekubafidilanga.

6. O yakala aweyi kalenda tanginina Mvungudi ambote?

⁶ Muna kadila kintu nze Kristu, o yakala kafwete longoka kuyibadikila nze mvungudi, awana bena kuna nsi a wisa kiandi nze mameme. Kafwete vanga e ngolo za toma zaya esi nzo andi. Nga o yakala olenda kala yo zayi wau? Elo, kele vo otoma mokenanga y’esi nzo andi, tamba o matu vava besonganga e ngindu zau, vita o ntu muna salu ya nzo yo baka nzengo zambote muna mambu nze Nsambila ya Esi Nzo, kwenda muna tukutakanu, salu kia umbangi ye nsaka. Vava yakala una vo Nkristu ketoma zayanga dina Nkand’a Nzambi kevovanga yo toma zaya esi nzo andi, ke dikala diampasi ko kwa esi nzo mu bund’e vuvu muna wisa kiandi. Okala mpe ye kiese kia mona vo esi nzo andi bayikana muna nsambil’aludi.

7, 8. O yakala aweyi kalenda tanginina Mvungudi Ambote mu kuma kia songa zola kw’awana bena kuna nsi a wisa kiandi?

⁷ O mvungudi ambote ozolanga mpe mameme mandi. Vava tutanganga e Nsangu Zambote mu kuma kia zingu ye salu kia Yesu, e ntima mieto miyangalalanga mu kuma kia zola Yesu kasonga kw’alongoki andi. ‘Wayekola moyo andi mu kuma kia mameme.’ Yakala kafwete tanginina Yesu muna songa zola kw’awana bena kuna nsi a wisa kiandi. Vana fulu kia bangika nkaz’andi, o yakala on’ozolele vwa edienga dia Nzambi kafwete kwamanana kunzola ‘waun’o Kristu kazolela dibundu.’ (Ef. 5:25) Kafwete zitisanga o nkaz’andi muna sadilanga e mvovo mia ngemba.—1 Pet. 3:7.

⁸ Muna longa o wana, o se kafwete tatidila nkanikinu mia Nzambi. Kansi, kafwete songanga mpe zola kwa wan’andi. Tumbu yovo elongi difwete vaninwa kuna zola. Ntangwa yayingi divavanga kw’aleke akaka mu bakula dina belongwanga. Muna kuma kiaki, o se kafwete songanga luzindalalu. Vava akala belandanga e mbandu a Yesu una ufwene, besikidisanga kiese yo luvuvamu muna nzo. Esi nzo zau bekala yo luvuvamu nze luna kayika o ntozi a nkunga.—Tanga Nkunga 23:1-6.

9. Nze Noa, akazi Akristu nkia mbebe bena yau? Nki kilenda kubasadisa mu lungisa yo?

⁹ O Noa mu lumbu yambaninu ya nza ya tandu kiandi kazinga. Kansi, Yave ‘wamvuluza yo wantu nsambwadi akaka, vava katwas’e kizalu ova nz’a akwa luvezo.’ (2 Pet. 2:5) Noa wakala ye mbebe ya sadisa esi nzo andi kimana bavuluka muna Kizalu. Akristu bena vo ntu muna nzo, bavwidi mbebe ya sadisa esi nzo zau mu vuluka kuna mbaninu a tandu kiaki. (Mat. 24:37) Diamfunu kikilu balongokanga e mbandu a “mvungudi ambote” yo sia e ngolo za kuntanginina.

Akento, ‘Nuvangamesa Esi nzo Zeno’

10. O sakalela nkaz’andi aweyi disongele kwa nkento?

¹⁰ Paulu wa ntumwa wasoneka vo: “Akento nusakalel’akazi eno, nze kuna kwa Mfumu.” (Ef. 5:22) E mvovo miami ke mikululanga zitu w’akento ko. Vitila kavanga Eva wa nkento antete, Nzambi aludi wavova vo: “Ke diambote ko vo o yakala kakala yandi amosi; ikumvangila nsadisi wa nkw’andi.” (Etu. 2:18) O kala “nsadisi” i sia vo, yikama nkaz’andi ekolo kelungisanga e mbebe andi muna nzo, diambu dia zitu kikilu.

11. O nkento angangu aweyi ‘kevangamesenanga esi nzo andi’?

 ¹¹ O nkento angangu osalanga muna wete dia esi nzo andi. (Tanga Ngana 14:1.) Nswaswani yo nkento ezowa, ona olembi zitisanga e wisa kia nkaz’andi, o nkento angangu otoma zitisanga o nkaz’andi. Vana fulu kia kala ye fu kia kolama yo kuyitumina, eki kitoma monekanga mu nza yayi, o nkento angangu osakalelanga nkaz’andi. (Ef. 2:2) O nkento ezowa ke katikisanga ko mu vova e mbi a nkaz’andi, kansi o nkento angangu ovanganga mawonso kimana o wana ye wantu akaka bazitisanga nkaz’andi. O nkento a mpila yayi ke telamenanga kintu kia nkaz’andi ko muna tantana yandi ngatu kunyidimina. Vena mpe ye diambu dia lunga-lunga nzimbu. O nkento ezowa nanga ofwasanga e nzimbu za esi nzo. O nkento una vo nsadisi ke fwasanga nzimbu ko. Osalanga entwadi yo nkaz’andi muna mambu ma nzimbu. Ovangilanga e mambu muna ngangu yo lembi fwasa e nzimbu. Ke komekenanga nkaz’andi ko mu sala yamu ola zina vo ke za salu ko.

12. O nkento adieyi kalenda vanga muna sadisa esi nzo andi mu ‘yingila’?

¹² O nkento angangu osadisanga esi nzo andi mu ‘yingila’ muna yikamang’o nkaz’andi mu longa o wana oma ma Yave. (Nga. 1:8) Oyikamanga e nkubika ya Nsambila ya Esi Nzo. Oyikamanga mpe nkaz’andi vava kelonganga yo ludik’o wana. Nkento ndioyo waswaswana kikilu yo nkento ezowa ona omwesanga wan’andi e mpasi muna nitu ye muna mwanda.

13. Ekuma dinina o mfunu kwa nkento mu yikama nkaz’andi muna salu kia Nzambi?

¹³ O nkento una vo nsadisi aweyi kemonanga vava nkaz’andi kevewanga kiyekwa kia salu muna nkutakani y’Akristu? Kieleka, kiese kekalanga kiau. Kiakala vo nkaz’andi selo kia salu, nkuluntu yovo mu buka kia Comissão de Ligação Hospitalar kesadilanga yovo mu Comissão Regional de Construção, okalanga ye kiese mu kuma kia kiyekwa kia nkaz’andi. Ngolo divavanga muna yikama nkaz’andi muna mvovo ye mavangu. Kansi, ozeye wo vo e ngolo kevanganga o nkaz’andi mu yikama e salu kia Nzambi disadisanga esi nzo awonso mu yingila muna mwanda.

14. (a) Adieyi dilenda kala diampasi kwa nkento? Aweyi kalenda dio sundila? (b) O nkento aweyi kalenda twasila kiese kwa esi nzo awonso?

¹⁴ Dilenda kala diampasi kwa nkento mu sakalela kintu kia yakala avo nzengo kabakidi ke zinyangidikidi ko. Kana una vo i wau, osonganga “ntim’anleka, yo lembama” yo sala yandi entwadi kimana e nzengo kabakidi zasikila. (1 Pet. 3:4) Nkento ambote olandanga e mbandu y’akento a nz’ankulu ana  bavuminanga Nzambi nze Sara, Rutu, Abingaile yo Maria wa ngudi a Yesu. (1 Pet. 3:5, 6) Otangininanga mpe akento anunu a lumbu yeto ana bena vo “akwa vumi.” (Tito 2:3, 4) Muna songanga o zola yo zitu kwa nkaz’andi, o nkento angangu osiamisanga longo lwau yo twasa e kiese kwa esi nzo awonso. E nzo andi ikalanga se fulu kia kiese ye luvuvamu. Kuna kwa yakala una vo Nkristu, o nkento olungisanga e kiyekwa kiandi, wantalu kikilu.—Nga. 18:22.

Aleke, ‘Nusiang’o Meso Muna Lekwa Ilembi Moneka’

15. Yeno aleke, adieyi nulenda vanga mu sadisa mase meno kimana esi nzo eno bakwamanana ‘yingila’?

¹⁵ Yeno aleke, adieyi nulenda vanga mu sadisa mase meno kimana esi nzo eno bakwamanana ‘yingila’ muna mwanda? Badika nsendo kanusila o Yave. Nanga tuka muna kisedia kieno, o mase meno bekunusonganga e fwaniswa isongangaa una ukala e zingu muna Paradiso. Ekolo nunungunukanga muna ntela, besadilanga Nkand’a Nzambi ye nkanda mieto mu kunusadisa nwazaya una ukala e zingu kiakwele mvu muna nz’ampa. Nusianga e sungididi muna salu kia Yave yo sadila e zingu kieno mu mpila ilenda kunusadisa mu ‘yingila.’

16, 17. Adieyi dilenda sadisa aleke mu sunda o nkul’a moyo?

¹⁶ Badika e mvovo mia Paulu wa ntumwa muna 1 Korinto 9:24. (Tanga.) Nukala y’ekani dia sunda o nkul’a moyo. Nusola e mpila zingu kisinga kunutwasila o nsendo a moyo a mvu ya mvu. O luzolo lwa kala ye mavwa mayingi luvukumunanga akaka mu lembi sia o meso muna nsendo. Ediadi dia uzowa kikilu. O kuyivana muna vava mavwa mayingi ke ditwasanga kiese kiakieleka ko. E lekwa eyi isumbwanga muna nzimbu ya kolo kia ndwelo. Muna kuma kiaki, yeno aleke, nusiang’o meso muna ‘lekwa ilembi moneka.’ Ekuma? Kadi “ina ilembi moneka, ya mvu ya mvu.”—2 Kor. 4:18.

¹⁷ Kimosi muna ‘lekwa ilembi monekanga’ i nsambu za Kintinu. Sadila e zingu kiaku mu mpila ina lenda vwila e nsambu zazi. E kiese kiakieleka kitukanga muna sadila zingu kiaku muna salu kia Yave. O sadila Nzambi aludi divananga elau dia lungisa mana olenda vanga owau ye kuna sentu. * O kala ye tezo mu mana olenda vanga muna salu kia Nzambi dilenda kusadisa mu kwamanana sadila Nzambi y’ekani dia vwa nsendo a moyo a mvu ya mvu.—1 Yoa. 2:17.

18, 19. Aleke aweyi balenda zayila vo bakitula e ludi se mpil’au ya zingu?

¹⁸ Aleke, e diambu diantete nufwete vanga mu diatila muna nzil’a moyo, i kitula e ludi se mpil’eno ya zingu. Nga i wau ovanganga? Ukiyuvula: ‘Nga izolanga mambu ma mwanda, yovo muna sala e salu kia Nzambi divavanga vo mase mame bateka kunkomekena? Nga isonganga e fu iyangidikanga Nzambi? Nga isianga e ngolo za kwamanana sala e salu ya nsambil’aludi, nze samba, longoka, kwenda mu lukutakanu ye sala e salu kia umbangi? Nga ifinamanga Nzambi muna siamisanga e ngwizani ame yo yandi?—Yak. 4:8.

 ¹⁹ Badika e mbandu a Mose. Kana una vo mu nsi a kinzenza kasansukila, wasola yikilwa vo selo kia Yave ke mu yikilwa ko vo mwan’a mwan’ankento a Faro. (Tanga Ayibere 11:24-27.) Aleke Akristu, yeno mpe nufwete sola sadila Yave ye kwikizi kiawonso. Avo nuvanga wo, nukala ye kiese kiakieleka, zingu kiambote owau ye vuvu kia vwa “moyo wina vo moyo kikilu.”—1 Tim. 6:19.

20. Muna nkul’a moyo, nani otambula o nsendo?

²⁰ Muna nsaka za nz’ankulu, mosi kaka wasundanga o nkula. Kansi, ke diau ko divangamanga muna nkul’a moyo. I luzolo lwa Nzambi vo ‘wantu a mpila zawonso bavuluzwa, yo luaka muna visa kia zay’e ludi.’ (1 Tim. 2:3, 4) Ayingi basunda kala vitila ngeye. Ndonga mpe belundumukanga yaku entwadi. (Ayib. 12:1, 2) Awonso ana bezindalala betambula o nsendo. Muna kuma kiaki, kala y’ekani dia sunda.

21. Adieyi tubadika mun’elongi dilanda?

²¹ ‘E lumbu kia Yave, kina kianene yo umbubu,’ kwiza kikilu kikwiza. (Mal. 4:5) E lumbu kiaki ke kifwete lwakila esi nzo z’Akristu ku kinsalukisa ko. Diamfunu konso muntu muna nzo kalungisa e mbebe andi yasikidiswa muna Nkand’a Nzambi. Adieyi diaka olenda vanga mu kwamanana yingila muna mwanda yo siamisa e ngwizani aku yo Nzambi? Elongi dilanda disonga mambu matatu malenda sadisa esi nzo mu sikila muna mwanda.

[Mvovo Vana Yand’a lukaya]

Adieyi Olongokele?

• Ekuma dinina o mfunu kwa esi nzo z’Akristu mu ‘yingila’?

• O yakala aweyi kalenda tanginina Mvungudi Ambote?

• O nkento angangu adieyi kalenda vanga mu sadisa nkaz’andi?

• Aleke aweyi balenda sadisila esi nzo zau mu yingila muna mwanda?

[Yuvu ya Longoka]

[Foto ina muna lukaya lwa 9]

O nkento olungisanga e kiyekwa kiandi, wantalu kikilu kwa yakala una vo Nkristu