Nga Otoma Yangalelanga Diambu dia Nzambi?

LORRAINE wavova vo: “Vava yayantika e nkubika ya tanga Nkand’a Nzambi lumbu yawonso, diampasi diakala. Wau vo kiatoma bakulanga ko mana yatanganga, nkumbu miayingi kialendanga sia sungididi ko.”

Ndonga bevovanga vo vava bayantik’o tanga Nkand’a Nzambi ke bayangalelanga wo ko. Kansi, bazindalala kadi bazaya wo vo o tanga Nkand’a Nzambi diambu diambote dia vanga. Marc wavova vo: “Diasazu mu yambula sia sungididi vava tutanganga Nkand’a Nzambi yovo vava tukalanga y’elongi dia yeto kibeni. Ediadi diavavanga vo yasamba kwayingi yo sia e ngolo kimana yakala ye nkubika ya tanga Nkand’a Nzambi lumbu yawonso.”

Adieyi olenda vanga muna yangalela Diambu dia Nzambi? Aweyi olenda kadila ye kiese vava otanganga dio? Badika mambu malende.

Kala Y’ekani ye Ndekwa

Yantikila e nkubika ya tanga Nkand’a Nzambi muna sambu yo sikidisa e ngindu zaku. Lomba kwa Yave kasadisa kimana wakala y’etima dia longoka Diambu diandi. Unlomba kaziula ngindu ye ntim’aku kimana watoma zaya e ngangu zandi. (Nku. 119:34) Avo kuvangidi wo ko, elongi dia Nkand’a Nzambi ke dikala diasikila ko, olenda mpe yoya. Lynn wavova vo: “Ezak’e ntangwa mu nzaki-nzaki itangilanga yo lembi sia sungididi muna maka mambu mamfunu. Nkumbu miayingi, kitoma bakulanga ko oma masina itanganga. Kansi, isambanga kimana yakala ye volo. Ediadi dikunsadisanga mu lembi vunzanesa e ngindu.”

Zaya o mfunu wa mambu otanganga. Sungamena vo muna vwa moyo, divavanga vo wabakula yo sadila e malongi ma Nkand’a Nzambi. Muna kuma kiaki, siang’e ngolo za solola mambu mamfunu yo sadila mo. Chris wavova vo: “Ivavanga mana malenda kunsadisa mu zaya e ngindu ye makani mambi mena muna ntim’ame. Dia lukasakeso mu mona una malongi mena muna Nkand’a Nzambi ye muna nkanda mieto mekunsadisilanga, kana una vo awana basoneka mo ke banzeye ko.”

Kala ye makani masikila. Vavanga longoka diambu diampa muna wantu beyikwanga muna Nkand’a Nzambi. Olenda solola mambu mayingi mamfunu mu kuma kiau muna vavulula muna nkanda Estudo Perspicaz das Escrituras yovo muna Índice das Publicações da Torre de Vigia. Avo otomene zaya lusansu lw’akala y’akento beyikwanga muna Nkand’a Nzambi yo bakula vo wantu kikilu, ana bakala ye ngindu nze ngeye, olenda baka nluta miayingi muna mbandu au.

Longoka ndekwa zampa za sasila e sono ya Nkand’a Nzambi. (Mav. 17:2, 3) Sophia, ekani diadi kekalanga diau vava kelongokanga. Wavova vo: “Ekani diame i longoka ndekwa zampa za longa wantu muna salu kia umbangi ye mu ola zakaka, kimana yatoma sasila e ludi kia Nkand’a Nzambi mu mvovo mia mono kibeni. Eyingidilu sadilwa kiambote kitoma kunsadisanga mu vanga wo.”—2 Tim. 2:15.

Badikila mana otanganga muna Nkand’a Nzambi nze mau omonanga. Muna Ayibere 4:12 tutanganga vo: “E diambu dia Nzambi diamoyo.” Vava otanganga Nkand’a Nzambi,  yambula vo e mvovo mia Nzambi miakala miamoyo muna ngindu zaku muna yindulanga una wantu beyikwanga muna Nkand’a Nzambi bamonanga. Teza wá dina bawanga yo yindula dina bayindulanga. Tezanesa dina diababwila ye mana mekubwilanga muna zingu. Longoka diambu mu dina bavanga. Muna mpila yayi, o umbakuzi waku uwokela yo sungamena tusansu twa Nkand’a Nzambi.

Vaula ntangwa yafwana mu toma bakula sono yampasi ye nsasa iveno. Vaulanga ntangwa vava olongokanga. Olenda solola mambu mamfunu mevava vo wavavulula. Vavanga zaya nsas’a mvovo miampasi. Kele vo e nsekola osadilanga ina ye mvovo vana yanda lukaya yovo referências cruzadas, fimpanga zo. Avo otomene bakula mana olongokanga yo sadila mo, otoma yangalela e Diambu dia Nzambi. Muna mpila yayi, ovova nze ntozi a nkunga: “O mabika maku [Yave] mpwidi mo yakwele mvu; kadi mau i luyangidiku lua ntim’ame.”—Nku. 119:111.

Venga e fu kia longoka mu nzaki-nzaki. Kalanga ye tezo muna ntangwa ovaulanga ya kala y’elongi dia ngeye kibeni. Kufwete viokesanga ntangwa yayingi ko yamu tezo kia lembi kala ye ntangwa yafwana ya kubika malongi mevewa kuna nkutakani. Raquel wavova vo: “Wau vo ezak’e ntangwa kikalanga ye ngindu zavuvama ko, diampasi dikalanga mu sia sungididi. Muna kuma kiaki, ivavanga kaka longoka mambu makete. Ediadi dikunsadisanga mu sia sungididi mun’elongi yo kuntwasila nluta.” Chris wavova vo: “Vava ilongokanga mu nzaki-nzaki, ntona zame zikuntokanesanga wau vo kilundanga mambu mayingi ko. Mana ilongokanga ke mekotanga mu ntima ko.” Muna kuma kiaki, venga fu kia longoka mu nzaki-nzaki.

Kala y’etima dia longoka Diambu dia Nzambi. Petelo wa ntumwa wavova vo: “Nze nsedia, nutomb’e kimvumina kiamwanda, kina kiakondwa umpuki, nwavangamena kio yamuna luvuluku.” (1 Pet. 2:2) Ke divavanga ko vo nsedia kayima e nsatu za kimvumina. Diambu dia kingutukila. Kansi, Nkand’a Nzambi usonganga vo yeto tufwete yima e fu kia longoka Diambu dia Nzambi. Avo oyantikidi tanga kana nkutu vo kapu kimosi kaka, etima dia longoka kwiza dikwiza. Dina wamwenanga vo diampasi, dikituka se diambu diakiese.

Badikanga sono ya Nkand’a Nzambi. O badika mana otanganga nluta miayingi ditwasanga. Ediadi dikusadisa mu toma dedakesa mambu ma mwanda mana olongokele. Ke vevioka kolo ko, ovwa umbakuzi wa mwanda  una vo evwa diantalu kikilu.—Nku. 19:14; Nga. 3:3.

Kufwasa Ntangwa Ko

Ngolo divavanga mu kala ye nkubika yambote ya longoka. Kansi, e nsambu ditwasa ke zilendi tezaneswa ko. Umbakuzi waku wa Nkand’a Nzambi uwokela. (Ayib. 5:12-14) O zayi ye ngangu ovwa muna Nkand’a Nzambi zikutwasila kiese ye luvuvamu. E ngangu zina muna Diambu diavumunwinwa kwa Nzambi i “nti a moyo” kw’awana besimbinina yo sadila zo.—Nga. 3:13-18.

O longoka Diambu dia Nzambi ye sungididi kiawonso dilenda kuvana ntim’a mbakuzi. (Nga. 15:14) Ediadi dikusadisa mu vana akaka elongi dibongelo muna Nkand’a Nzambi. Avo oyambwidi vo e nzengo zaku zakal’e ngwizani ye mana otanganga muna Nkand’a Nzambi ye muna nkanda mia “ntaudi akwikizi yo lulungalalu,” ovwa luvuvamu lutukanga muna Diambu dia Yave. (Mat. 24:45) E kiese kiaku kiwokela, e Diambu dia Yave difila mavangu maku. Vana ntandu, mawonso ovanganga mena ngwizani ye luzolo lwa Nzambi mesikila.—Nku. 1:2, 3.

O ntima wazala ye zola muna Nzambi ukufila mu zayisa lukwikilu lwaku kw’akaka. Ediadi mpe dilenda kutwasila nsambu zayingi. Sophia, osianga ngolo za sungamena yo sadila sono yaswaswana ya Nkand’a Nzambi mu simba ntima mi’awana kesilanga umbangi yo tomesa salu kiandi kia umbangi yo kitula kio kiakiese. Wavova vo: “Diakiese dikalanga dia mona una wantu beyangalelanga malongi ma Nkand’a Nzambi.”

E nsambu zisundidi tulenda vwa muna yangalela Diambu dia Nzambi i kala ye ngwizani ambote yo Yave. O longoka Nkand’a Nzambi dikusadisa mu zaya e nsiku mia Nzambi yo yangalela zola kwandi, fu kiandi kia vanina kuna mvevo ye unsongi wandi. Ediadi i diambu disundidi o mfunu olenda vanga yo kutwasila nsambu zayingi. Kalanga ye sungididi kia longoka Diambu dia Nzambi. Kuviokesa ntangwa yankatu ko.—Nku. 19:7-11.

[Babu/​Mafoto zina muna lukaya lwa 5]

EKANI YE NDEKWA ZA TANGA DIAMBU DIA NZAMBI

▪ Yantikila e nkubika ya tanga Nkand’a Nzambi muna sambu yo sikidisa e ngindu zaku.

▪ Zaya o mfunu wa mambu otanganga.

▪ Kala ye makani masikila.

▪ Longoka ndekwa zampa za sasila e sono ya Nkand’a Nzambi.

▪ Badikila mana otanganga muna Nkand’a Nzambi nze mau omonanga.

▪ Vaula ntangwa yafwana mu toma bakula sono yampasi ye nsasa iveno.

▪ Venga e fu kia longoka mu nzaki-nzaki.

▪ Kala y’etima dia longoka Diambu dia Nzambi.

▪ Badikanga sono ya Nkand’a Nzambi.

[Foto ina muna lukaya lwa 4]

Vava otanganga lusansu lwa Nkand’a Nzambi, badikila mana otanganga nze mau mabwididi