“Nkengi Ambote ye Nkundi Anzolwa”
“Nkengi Ambote ye Nkundi Anzolwa”
JOHN (JACK) BARR, ona wakedi mosi muna Buka kia Selo Yambuta ya Mbangi za Yave, wafokwele zingu kiandi ova ntoto kina kia Sabala kia 4 Desemba, 2010, mu mene. Wafwidi ye kimbuta kia mvu 97. Ozayakene kwa wantu vo “nkengi ambote ye nkundi anzolwa.”
Mpangi Barr, ku mbanza Aberdeen, Escócia, kawutukila. Yandi wansuka muna wana atatu. Mase mandi Akristu akuswa bakala. Mpangi Barr wasungamenanga ye kiese kiawonso e mvu miantete mia zingu kiandi; wavutulanga matondo muna mbandu ambote kasongwa kwa se yo ngudi andi.
Vava kakala nleke, diampasi diakala kwa mpangi Barr mu mokena ye nzenza. Kansi, wasia ngolo mu sunda diambu diadi. Lumbu kimosi muna mvu wa 1927, kia Lumingu mu masika, wavovesa s’andi vo wakubama kakala mu kwenda yandi muna salu kia sila umbangi mu nzo ye nzo. Lwalu i lubantiku lwa mvu miayingi kasadila Yave. Yamu lumbu kia lufwa lwandi, mpangi Barr wasalanga yo vema kwawonso muna salu kia samuna nsangu zambote.
Vava kiabwa sumbula kina kiamana vonda ngudi andi, mpangi Barr wayantika yindula ekani dia zingu. Muna mvu wa 1929, wayekola zingu kiandi kwa Yave yo vubwa muna mvu wa 1934. I bosi muna mvu wa 1939, wayenda sadila kuna Betele ya Londres, Inglaterra. I wau kayantikila salu kia ntangwa ke ntangwa yo viokesa mvu 71 mu salu kiaki.
Kina kia 29 kia Oktoba, 1960, mpangi Barr wakota muna ngwizani ina kayikilanga vo “nzolani isundidi o mfunu,” vava kasompana yo Mildred Willett, ona wasala mvu miayingi nze mviti a nzila ye misionario. Mpangi Barr yo nkaz’andi batoma zayakana mu kuma kia mbandu ambote yo vema basonganga. Basikila ye kwikizi yavana nkaz’andi Mildred kafokola zingu kiandi ova ntoto muna ngonde ya Oktoba ya mvu wa 2004. Tuka basompanena, mpangi Barr yo nkaz’andi bakala ye fu kia tanga Nkand’a Nzambi entwadi lumbu yawonso.
Kw’awana banzaya, besinga sungamena e nkumbu a John Barr vo muntu ona wavananga akaka luludiku lwambote, nkwa unleka, nkwa walakazi, ona wakala ye zayi wafwana wa Nkand’a Nzambi. Nkwa fululu kakala muna salu, nkengi ambote ye nkundi anzolwa. E nkomena zandi, malongi kafilanga ye sambu yandi yasonganga vo watoma zolanga e ludi ye wakala ye ngwizani ambote yo Yave.
Kana una vo mpangi Barr utusisidi, tuyangalele wau vo otambwidi nsendo andi wa moyo ulembi fwa, nsambu zina kavingilanga ye katoma vovelanga. Wavanga wawonso muna tambula nsendo wau.—1 Kor. 15:53, 54. *
[Mvovo Vana Yand’a lukaya]
^ tini. 8 Muna zaya mayingi mu kuma kia lusansu lwa mpangi John E. Barr, tala mun’Eyingidilu dia 1 Yuli, 1987, lukaya lwa 26-31, mu Kimputu.
