Tulanda Kristu wa Mfidi Ambote

AWANA belandanga ayadi a nza, nkumbu miayingi bekendalalanga. Kansi, ediadi diaswaswana y’awana belemvokelanga mfil’a Kristu. Yesu wavova vo: “Nwiz’oku ngina, yeno awonso nufuntukanga yo bimuka yo mazitu, ikunuvundisa. Nuvwata vangu kiame, nwalongwa kwa mono; kadi i nlembami yo ntim’anleka: nwasolola vundu kia mioyo mieno.” (Mat. 11:28, 29) E mfil’a Yesu kiese itwasanga. Ovwanga asukami y’awana bebangikwanga o mfunu, okubavovesanga ba vwata vangu kiandi. Kansi, adieyi divavwanga muna landa e mfil’a Yesu?

Petelo wa ntumwa wasoneka vo: “Kristu wanumwen’e mpasi, wanusisil’e mbandu, nwalanda muna ntambi zandi.” (1 Pet. 2:21) O landa e ntambi za Yesu nkia mfunu dina kwa yeto? Yindula vo ndonga nwina nusaukanga ndimba wasiwa lekwa yamvodi (mina), kansi mosi kaka ozeye e nzila yambote nufwete landa. Nga kulanda ntambi zandi ko, yo teza sia tambi yaku muna mayendelo mandi? Diau adimosi mpe, muna kala yo luvuvamu kuna sentu, divavanga vo twalanda e mbandu a Yesu muna zingu kieto. Ediadi divavanga vo twanwilanga yo kunlemvokela yo sakalela ana bekunsunzulanga.

Toma Wanga yo Lemvoka

Kuna mfoko Elongi diandi vana Mongo, Yesu wavova vo: “Konso on’owidi mambu mame mama, yo vanganga mo, otezaniswa yo nlungaladi a muntu, ona watunga nzo andi vana nsenzele: e mvula zanoka, e nkuka zakwiza, e tembwa yavekomoka, yakwiza wandama muna nzo yayina; ke yasidi bwa ko: kadi yakubikilu vana nsenzele.”—Mat. 7:24, 25.

Yesu wayikila muntu ona owanga yo lemvokela e mvovo miandi vo “nlungaladi.” Nga tusonganga vo tuzitisanga yo yangalela e mbandu a Kristu muna kunlemvokelanga ye nsi a ntima wawonso? Nga tukalanga ye fu kia sola kaka lemvokela emiaka nkanikinu mia Yesu mina tumonanga vo ke miampasi ko? Yesu wavova vo: ‘Lumbu yawonso mvangang’oma meyangidikanga Nzambi.’ (Yoa. 8:29) Yambula twavanga e ngolo za tanginina mbandu yayi.

Muna tandu kiantete, antumwa basisa mbandu ambote ya sakalela e mfil’a Kristu. Lumbu kimosi Petelo wavovesa Yesu vo: “Oyeto tuyambwidi yawonso, twakulanda.” (Maku 10:28) Kieleka, antumwa babadikilanga e mfil’a Yesu vo diambu diamfunu kikilu, kadi basisa e lekwa yau yawonso kimana banlanda.—Mat. 4:18-22.

Tusakalelanga ana Besunzulanga Kristu

Una kiafinamanga lufwa lwandi, Yesu wayika mpila yakaka tulenda landila mfil’andi. Wavova vo: “On’otambul’ona ntuma, i mono ketambula.” (Yoa. 13:20) Kieleka, Yesu wayikila akuswa ana bekunsunzulanga vo “abunzi” andi. (Mat. 25:40) Vava Yesu kafuluka yo tomboka kun’ezulu, “abunzi” andi basolwa mu sala vana fulu kiandi, nze akunzi “muna diambu dia Kristu” yo bokela akaka kimana babakana yo Yave wa Nzambi. (2 Kor. 5:18-20) Tusonganga vo tuzitisanga e mfil’a Kristu vava tusakalelanga “abunzi” andi.

 Diambote twafimpanga una tubadikilanga tuludiku twa Nkand’a Nzambi tuvewanga muna nkanda mieto. Vava tulongokanga Nkand’a Nzambi yo kwenda muna tukutakanu, tusungameswanga e mvovo mia Kristu. (2 Pet. 3:1, 2) Tusonganga luyangalalu lweto muna madia mama ma mwanda muna dianga mo ntangwa zawonso. Adieyi tufwete vanga kele vo luludiku lumosi luvutukilu? Kasikil’owu, e Diambu dia Nzambi dikasakesanga Akristu mu sompela ‘kaka muna Mfumu.’ (1 Kor. 7:39) Se vioka mvu miayingi, malongi mama metoma vaikiswanga mun’Eyingidilu. Abunzi a Kristu besonganga zola kwau mu kuma kia ngwizani eto yo Yave muna vaikisanga malongi mama ye tuludiku twakaka twavumunwinwa. O sia e sungididi muna tuludiku twatu i mpila tulenda songela vo tulandanga Yesu Kristu wa Mfidi eto ambote.

Muna Ngana 4:18 tutanganga vo: “E ngyend’a nsongi nze ntemo ankezimi, ukwenda nungunang’aka yamu ntangw’anlungu.” Elo, e mfil’a Yesu mu nungunuka ina, ke ina yaningama ko. E mpila yakaka tulenda sadila entwadi y’abunzi a Kristu i muna kalanga yo nyindu asikila muna konso diambu dilenda singikwa muna umbakuzi weto mu kuma kia ludi kia nkand’a Nzambi vava divaikiswanga kwa “ntaudi akwikizi yo lulungalalu.”—Mat. 24:45.

Tusonganga mpe lemvo weto kw’abunzi a Kristu vava tusalanga entwadi y’akengi ana basolwa muna nkutakani y’Akristu. Paulu wa ntumwa wavova vo: ‘Nulemvokel’awana ben’e wisa vovo nwina, yo kubasakalela: kadi beyingidilanga muna diambu dia mioyo mieno.’ (Ayib. 13:17) Kasikil’owu, o nkuluntu olenda kutukasakesa muna kutusonga o mfunu wa kala ye fuku wa Nsambila ya Esi Nzo yovo kutuvana luludiku mu kuma kia maka mambu ma salu kieto kia umbangi. Nkengi a zunga olenda kutusadisa muna kutuvana luludiku lwa Nkand’a Nzambi mu kuma kia zingu kieto kia Kikristu. Vava tusadilanga luludiku lwalu tusonganga vo tulandanga Yesu nze Mfidi eto.

Diankenda kikilu vo e nza ke ina yo mfidi ambote ko. Kansi, dialukasakeso mu landa Kristu wa mfidi anzodi. Muna kuma kiaki, yambula twalemvokela Mfidi eto yo sakalela awana kesadilanga o unu.

[Mafoto zina muna lukaya lwa 27]

Nga otambulwilanga elongi dia Nkand’a Nzambi dia lembi sompana ye mundembi-kwikila?