“Nuvungul’ekambi dia Nzambi Dina Vovo Nwina”
“Nuvungul’ekambi dia Nzambi Dina Vovo Nwina”
“Nuvungul’ekambi dia Nzambi dina vovo nwina, nukenga dio, ke mu kwikwa ko, kuna zolela kaka.”—1 PET. 5:2.
1. Nkia mpasi banwananga zau Akristu vava Petelo kasoneka nkand’andi wantete?
UNA Nero kayantikidi bangika Akristu ko kuna Roma, Petelo wa ntumwa wasoneka nkand’andi wantete. Wasoneka wo y’ekani dia kumika lukwikilu lwa mpangi zandi. Nkadi Ampemba, ‘wavemanga’ mu vava vempola Akristu. Muna telamena Nkadi Ampemba, diavavanga vo Akristu bakala ‘balungalala’ yo ‘sakalela koko kwankuma kwa Nzambi.’ (1 Pet. 5:6, 8) Diavavanga mpe vo bakala yo ungudi. Bafwete venga e fu kia ‘tatikaziana yo diasaziana,’ kadi ediadi diadi kubafila mu ‘vempoziana.’—Ngal. 5:15.
2, 3. Nani tunwananga yandi? Adieyi tubadika mun’elongi diadi ye dina dilanda?
2 Mpasi zau amosi tunwananga zau o unu. O Nkadi Ampemba ovavanga elau dia kutuvempola. (Lus. 12:12) Ke kolo ko, kikwiza e ‘mpasi zayingi zina ke zakala ko, tuka kuna lubantiku lwa nza.’ (Mat. 24:21) Nze una diavavila vo Akristu a tandu kiantete bavenga e fu kia tantana, yeto mpe tufwete vanga diau adimosi. Muna lenda wo vanga, ezak’e ntangwa tufwete vavanga lusadisu lw’awana bazikuka muna mwanda.
3 Yambula twabadika una akuluntu balenda wokesela luyangalalu lwau mun’elau bavewa dia vungula ‘ekambi dia Nzambi.’ (1 Pet. 5:2) I bosi, tuzaya e mpila yambote ya lungisila e salu kia vungula ekambi. Mun’elongi dilanda, tufimpa una mpangi muna nkutakani balenda ‘tondela awana befuntukanga yo siwa kiyekwa’ ki’ekambi. (1 Tes. 5:12) O badika malongi mama dikutusadisa mu telamena mbeni antete, yo sungamena vo yandi tunwananga yandi.—Ef. 6:12.
Nuvungula Ekambi dia Nzambi
4, 5. Aweyi akuluntu bafwete badikilanga ekambi? Yik’e nona.
4 Petelo wakasakesa akuluntu vana vena Akristu a tandu kiantete mu toma lunga-lunga ekambi basilwa kiyekwa. (Tanga 1 Petelo 5:1, 2.) Kana una vo wabadikilwanga nze elunzi muna nkutakani, Petelo kakomekena akuluntu ko nze vika sia vo yandi osundidi e wisa. Kansi, wabawondelela nze akuluntu akw’andi. (Ngal. 2:9) Nze Petelo, e Buka kia Selo Yambuta bewondelelanga akuluntu kimana basia ngolo za lungisa kiyekwa kiampwena bavewa kia vungula ekambi dia Nzambi.
5 Petelo wa ntumwa wasoneka vo akuluntu bafwete ‘vungula ekambi dia Nzambi.’ Bafwete sungamena vo Yave yo Yesu Kristu bavwidi ekambi diadi. Akuluntu befundiswa muna mpila belunga-lunganga mameme ma Nzambi. Yindula vo nkundi aku ulombele walunga-lunga wan’andi ekolo yandi kekwenda mu nkangalu. Nga kutoma kubalunga-lunga ko yo kubadikila? Avo mosi muna yau obakamene kimbevo, nga kuvava ko vo kawukwa mu mpila yambote? Diau adimosi, akuluntu muna nkutakani bena ye kiyekwa kia ‘vungula dibundu dia Nzambi, dina kasumbila muna menga ma Mwan’andi.’ (Mav. 20:28) Bafwete sungamenanga vo konso meme mu menga mantalu ma Kristu Yesu kasumbilwa. Wau vo mbebe bena yau vana ndose a Nzambi, akuluntu bafwete dikila, tanina ye lunga-lunga ekambi.
6. Nkia mbebe bakala yau avungudi kuna nz’ankulu?
6 Yindula e mbebe bakala yau avungudi kuna nz’ankulu. Muna vungula ekambi, bazizidilanga mbangazi muna ntangwa mwini ye kiozi muna fuku. (Etu. 31:40) Basianga zingu kiau muna vonza mu kuma kia mameme. Davidi ona wakala mvungudi muna kileke, wavuluza ekambi diandi muna bulu ya futa, nze nkosi ye use. Kiaki i kuma Davidi kavovela vo “imbakidi muna nzevo, inwende, imvondele.” (1 Sam. 17:34, 35) Ekwe unkabu kasonga! Mu vonza kikilu kakala kia diwa kwa bulu kia futa. Kana una vo i wau, wavanga wawonso kalenda mu tanina mameme.
7. Aweyi akuluntu balenda tanina mameme vana moko ma Nkadi Ampemba?
7 O unu, akuluntu bafwete kala alungaladi mu kuma kia Nkadi Ampemba una nze nkosi. Unkabu divavanga mu katula mameme vana moko ma Nkadi Ampemba. Muna simba e bulu kia futa muna nzevo, akuluntu balenda tanina mameme. Balenda lukisa ampangi ana bekuyisianga mu vonza kia bwa muna ntambu mia Satana. (Tanga Yuda 22, 23.) Kansi, akuluntu ke balendi wo vanga ko kondwa lusadisu lwa Yave. Besonganga walakazi kwa meme dilwele, kunkanga tende vana mputa yo sadila Diambu dia Nzambi dina nze mazi ma nguka.
8. Akweyi akuluntu befilanga mameme? Ekuma?
8 O mvungudi ofilanga mpe ekambi vana fulu kina ye titi yambote ye maza. Diau adimosi, akuluntu befilanga ekambi muna nkutakani yo kubakasakesa bakalanga muna tukutakanu kimana mameme matoma dianga yo tambula “madia muna ntangw’andi.” (Mat. 24:45) Dilenda vava vo akuluntu bavaula ntangwa mu sadisa awana bena ye kimbevo kia mwanda kimana batambula madia mena muna Diambu dia Nzambi. Ememe diavila nanga osianga ngolo kimana kavutuka mun’ekambi. Vana fulu kia vumisa mpangi, akuluntu bekunsasilanga e nkanikinu mia Nkand’a Nzambi yo kunsonga una kalenda mio sadila muna zingu kiandi.
9, 10. Akuluntu aweyi balenda sadisila ana bena ye kimbevo muna mwanda?
9 Vava oyelanga, nkia mpila dotolo ovavanga? Nga ovavanga ndiona okuyuvulanga mu nzaki-nzaki yo kuzayisa e nlongo ofwete nua yo bokela mbevo akaka? Ovo ovava dotolo ona otoma kutamba o matu, kusasila kimbevo una kiau yo kusonga e mpila nlongo olenda nua?
10 Diau adimosi mpe, akuluntu balenda tamba o matu kwa ndiona una ye kimbevo kia mwanda yo kunsadisa kimana e mputa yasasuka muna ‘kunkusa o mazi muna nkumbu a Yave.’ (Tanga Yakobo 5:14, 15.) Nze bâmi kuna Ngiladi, Diambu dia Nzambi dilenda wuka e mbevo. (Yer. 8:22; Yez. 34:16) O sadila nkanikinu mia Nkand’a Nzambi, milenda sadisa ndiona una ye kimbevo kia mwanda mu vutukila sadila Yave una ufwene. Elo, akuluntu mayingi balenda vanga vava betambang’o matu kwa mpangi una watovoka yo samba yandi entwadi.
Ke mu Komenwa ko, Kuna Zolela Kaka
11. Nki kifilanga akuluntu mu vungula ekambi?
11 Petelo wasungamesa ambuta dina bafwete vanga ye dina ke bafwete vanga ko vava bevungulanga ekambi. Akuluntu bafwete vungula ekambi dia Nzambi, “ke mu komenwa ko, kuna zolela kaka.” Adieyi difilanga akuluntu mu sadila mpangi zau muna zola kwawonso? Nki kiafila Petelo mu vungula yo dikila mameme ma Yesu? I zola kwandi muna Mfumu. (Yoa. 21:15-17) Muna kuma kia zola, akuluntu ‘ke bezinganga diaka mu kuma kiau ko, kansi mu kuma kia ndiona wabafwila.’ (2 Kor. 5:14, 15) O zola kwaku kumosi yo zola kwau muna Nzambi ye muna mpangi zau, kufilanga akuluntu mu vungula ekambi, yo sadila e ngolo, mavwa ye ntangw’au mu kuma kia mameme. (Mat. 22:37-39) Ke bekuyivananga ko mu kuma kia komekenwa, kansi muna zola kwawonso.
12. Yamu nkia tezo kayivanina o Paulu mu kuma kia mpangi?
12 Yamu nkia tezo akuluntu bafwete kuyivanina? Muna lunga-lunga mameme, akuluntu betangininanga Paulu wa ntumwa, nze una yandi katanginina Yesu. (1 Kor. 11:1) Muna kuma kia zola kwandi muna mpangi za esi Tesalonika, Paulu y’akundi andi a salu bakala ye kiese kia kubakawulwila ‘ke nsangu zambote za Nzambi kaka ko, kansi ye mioyo miau mpe.’ Vava bavanganga wo, bakitukanga akwa walakazi, “nze ndezi iwonzakene wan’andi.” (1 Tes. 2:7, 8) Paulu wabakulanga una ngudi kemonanga mu kuma kia wan’andi. Ovanganga wawonso muna wete diau, nze sikama muna fuku mu kubadikila.
13. Nkia tezo bafwete kalanga kiau akuluntu?
13 Akuluntu bafwete kalanga ye tezo vana vena kiyekwa kiau kia vungula mameme ye kia lunga-lunga esi nzo zau. (1 Tim. 5:8) E ntangwa ina akuluntu beviokesanga y’ampangi muna nkutakani i ntangwa yambote balenda kala y’esi nzo zau. Imosi muna mpila balenda kadila ye tezo mu lungisa kiyekwa kiau kuna nkutakani ye kuna nzo, i bokelanga akaka muna fuku wa Nsambila ya Esi Nzo. Se vioka mvu miayingi, Masanao una vo nkuluntu kuna Japão, obokelanga ampumpa y’aleke bena vo mase mau ke Mbangi za Yave ko, mu kala yau entwadi mun’elongi diau dia esi nzo. Kuna kwalanda, akaka mun’awana kasadisa bakituka s’akuluntu yo tanginina e mbandu ambote a Masanao.
Nuvenga Ndandu Zalembi Songa—Nuvungula Ekambi Muna Mvevo a Ntima
14, 15. Ekuma akuluntu bafwete vengela e fu kia vava “ndandu zalembi songa”? Aweyi balenda tanginina Paulu muna diambu diadi?
14 Petelo wakasakesa mpe akuluntu mu vungula ekambi, “ke mu ndandu zalembi songa ko, muna mvevo a ntima kaka.” E salu besalanga akuluntu ntangwa yayingi kivavanga, kansi ke bevingilanga ko vo bafutwa nzimbu. Petelo walukisa ambuta akw’andi mu kuma kia vonza kia vungula ekambi “mu ndandu zalembi songa.” E vonza kiaki kimonekanga muna mpila zingu bena kiau mfumu za mabundu ma “Babele Anene,” ekolo wantu ayingi bezinganga zingu kia usukami. (Lus. 18:2, 3) Akuluntu o unu, kuma kiasikila bena kiau mu venga e fu kiaki.
15 Paulu wasisa mbandu ambote kw’akuluntu Akristu. Kana una vo ntumwa kakala ye wafwana kala ‘ezitu’ kuna kw’Akristu muna Tesalonika,’ Paulu ‘kadianga madia mangani e ngovo ko.’ Kansi, ‘wasalanga yo funtuka fuku yo mwini.’ (2 Tes. 3:8) Akuluntu ayingi o unu, kumosi y’akengi a zunga, mbandu ambote besonganga mu kuma kia diambu diadi. Kana una vo betondanga lusadisu lwa mpangi zau Akristu, ke besianga ‘zitu’ kwa muntu ko.—1 Tes. 2:9.
16. O vungula ekambi kuna “mvevo a ntima” aweyi disongele?
16 Akuluntu bevungulanga ekambi kuna “mvevo a ntima.” E ziku kia diambu diadi kimonekanga muna ngolo bevanganga mu sadisa ekambi. Kansi, ediadi ke disongele ko vo bekomekenanga ekambi mu sadila Yave; ngatu fila ampangi mu sadila Nzambi y’ekani dia sunda akaka. (Ngal. 5:26) Akuluntu bazeye wo vo konso mpangi waswaswana y’akaka. Bezolanga sadisa mpangi zau mu sadila Yave ye kiese kiawonso.
Ke mu Boselela Ekambi ko, Kansi Nukala se Mbandu
17, 18. (a) Ekuma diakadila diampasi kw’antumwa mu bakula elongi dia Yesu mu kuma kia lulembamu? (b) Nkia diambu yeto mpe tulenda nwana diau o unu?
17 Nze una tulongokele kala, akuluntu bafwete sungamenanga vo ekambi bevungulanga dia Nzambi, ke dia yau kibeni ko. Bevanganga mawonso mu lembi ‘boselela awana bena s’evwa dia Nzambi.’ (Tanga 1 Petelo 5:3.) Ezak’e ntangwa, ntumwa za Yesu bayimanga makani mambi. Kimfumu bavavanga nze ayadi a nza.—Tanga Maku 10:42-45.
18 O unu, ampangi ana ‘bevavanga ukengi’ bafwete kuyifimpa mu zaya ekuma bevavilanga kiyekwa kiaki. (1 Tim. 3:1) Awana bena vo akuluntu o unu, bafwete kiyuvula ye ziku kiawonso kana vo mu kuma kia kala ye wisa yovo etunda i bevavilanga e kiyekwa kiaki nze una wavanga ntumwa zakaka. Wau vo diampasi diakala kwa antumwa, diamfunu kw’akuluntu mu sia e ngolo za venga e fu kia nza kia vava kala ye wisa vana vena akaka.
19. Akuluntu adieyi bafwete sungamena vava betaninanga ekambi?
19 Dialudi vo, vena ye ntangwa ina akuluntu bafwete sadila e wisa kiau, nze vava betaninanga ekambi muna “mevwa mansita.” (Mav. 20:28-30) Paulu wavovesa Tito mu kwamanana “wondelela, yo tumba kuna wisa kiawonso.” (Tito 2:15) Kansi, kana nkutu vava belonganga yovo tumba awana bevanganga vilwa, akuluntu bezitisanga ndiona obwidi mu ngyelele. Bazeye wo vo o wondelela i diambu disundidi o mfunu muna simba ntim’a muntu mu vutuka muna nzil’ansongi ke mu tumba kaka e mbi andi ko.
20. Aweyi akuluntu balenda tanginina e mbandu ambote kasisa Yesu?
20 E mbandu ambote kasonga Kristu ifilanga akuluntu mu zola ekambi. (Yoa. 13:12-15) E ntima mieto miyangalalanga vava tutanganga e mpila kalongela alongoki andi mu salu kia samuna nsangu zambote yo kitula wantu s’alongoki. E fu kiandi kia lulembamu kiasimba ntima mia alongoki andi, kubafila mu songa ‘lusakalalu lua ntima, yo badikila akaka vo basundidi.’ (Fili. 2:3) Diau adimosi mpe, akuluntu o unu betangininanga mbandu a Yesu yo kala se “mbandu z’ekambi.”
21. Nkia nsendo balenda tambula akuluntu kuna sentu?
21 Petelo wafokola lulukisu lwandi kw’akuluntu muna yika e nsilu wa kusentu. (Tanga 1 Petelo 5:4.) Akengi bena vo akuswa ‘betambul’e kolow’a nkembo, ina ilembi vempoka’ kumosi ye Kristu kun’ezulu. Akuluntu bena muna buka kia “mameme makaka,” bekala y’elau dia vungula ekambi dia Nzambi ova ntoto muna luyalu lwa “Mvungudi ambuta.” (Yoa. 10:16) Elongi dilanda disasila una ampangi muna nkutakani balenda sadisila awana basolwa mu vita o ntu.
Yuvu ya Lufimpu
• Ekuma Petelo kalukisila akw’andi akuluntu mu vungula ekambi dia Nzambi dina muna wisa kiau?
• Akuluntu aweyi balenda sadisila ana bena ye kimbevo kia mwanda?
• Adieyi difilanga akuluntu mu vungula ekambi dia Nzambi?
[Yuvu ya Longoka]
[Foto ina muna lukaya lwa 21]
Nze avungudi kuna nz’ankulu, akuluntu o unu bafwete tanina “mameme” mena muna wisa kiau
