Eyingidilu Diampa mu Kingelezo Kialeboka

TUNA ye kiese kia sunzula Eyingidilu diantete mu Kingelezo kialeboka. Tuzolele teza Eyingidilu diadi mu kolo kia mvu mosi. Avo tumwene vo dia lusadisu dikala, ozevo tukwamanana dio vaikisa. Eyingidilu diadi diyantika twikwa muna nkutakani kumosi y’Eyingidilu ditwikwanga konso ngonde.

Diamfunu kikilu vo awonso batoma bakulanga mambu tulongokanga mun’Eyingidilu konso lumingu. I wau kikilu, kadi Elongi di’Eyingidilu i mpila yantete ina “ntaudi akwikizi yo lulungalalu” kelongelanga nkangu a Nzambi o unu. (Mat. 24:45) Kansi, ekuma Eyingidilu mu Kingelezo kialeboka divwidilu o mfunu?

Mpangi zeto zayingi mu nz’amvimba bekwendanga mu tukutakanu muna ndinga Kingelezo. Kansi, nkumbu miayingi ke betoma bakulanga ko Kingelezo kiasadilwa mun’Eyingidilu. Vena ye kuma yayingi. Kasikil’owu, nsi zayingi za África, Ásia ye kuna Pacífico Sul, bevovanga Kingelezo. Mpangi zeto muna fulu yayi Kingelezo besadilanga muna tukutakanu ye muna salu kia umbangi, kansi kuna nzo ndinga zakaka bevovanga. Vana ntandu, e Kingelezo kivovwanga mu nsi zazi kilenda swaswana ye Kingelezo kisadilwanga mun’Eyingidilu betambulanga. Akaka muna mpangi zeto yaluka bayaluka mu nsi zina vo tukutakanu mu Kingelezo kaka tuvangamenanga. Diampasi dikalanga kwa yau mu bakula malongi m’Eyingidilu wau vo Kingelezo ke nding’au ya kingutukila ko. Aleke akaka bena vo Kingelezo bevovanga, ezak’e ntangwa ke betoma bakulanga ko malongi m’Eyingidilu. Eyingidilu muna Kingelezo kialeboka disadisa mpangi zeto mu nz’amvimba mu bak’e nluta mun’Elongi di’Eyingidilu.

Kana una vo Kingelezo kina mun’Eyingidilu diadi kialeboka ke mu diaka Eyingidilu ko, mau mole malongi mafwanana mena mo mabongelo muna Nkand’a Nzambi. Yinkanda yole yayi ikala ye lutangu lumosi lwa tini, yuvu, fwaniswa ye yuvu ya lufimpu. Ediadi disongele vo konso muntu lenda sola Eyingidilu kesadila vava kikala Elongi di’Eyingidilu. Muna zaya e nswaswani ya mvovo misadilu muna yinkanda yole yayi, tala nona kina va yanda kibongelo muna tini kia 2 ki’elongi diantete dia longoka dina mun’Eyingidilu diadi.

Tuna ye vuvu vo Eyingidilu mu Kingelezo kialeboka disadisa ayingi muna mpangi zeto kumosi y’aleke, mu kubika Elongi di’Eyingidilu konso lumingu. Yave ozolanga “wana-ngudi” awonso. Muna kuma kiaki, tuvutulanga matondo kwa Yave muna sadila “ntaudi akwikizi yo lulungalalu” mu kutuvana madia ma mwanda tuvwidi o mfunu muna ntangw’andi.—1 Pet. 2:17.

Buka kia Selo Yambuta ya Mbangi za Yave