Nga Osungamenanga?

Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• Nkia mambu tatu malenda kutusadisa mu venga e fu kia kondwa unsongi?

(1) Kala ye vumi wa Nzambi. (1 Pet. 3:12) (2) Kala ye ntona zalongwa kwa Nkand’a Nzambi. (3) Sia e ngolo za yangalela ina tuna yau.—15/4, lukaya lwa 6-7.

• Aweyi tuzayidi wo vo o sadila Nzambi yo zitu wawonso ke disongele ko vo ke tufwete kala ye mpwa ya muntu olembi sevanga ko yovo sakana?

Tulenda badika mbandu a Yesu. Wayangalelanga o dia kumosi y’akaka. Tuzeye wo vo kakala ye mpwa ya muntu olembi sevanga ko. Akaka, kana nkutu yingyana-ngyana, ke bakalanga yo wonga ko wa kumfinama.—15/4, lukaya lwa 10.

• Nki i “lubakanisu” luyikwanga muna Yobi 33:24? Aweyi lwatwasila nluta kwa Yobi?

O mvovo “lubakanisu” usadilwanga muna sono kiaki una ye nsasa vo “fukila.” Kuna kwa Yobi, e lubakanisu lwalu nanga i kimenga kia bulu kavananga, kina Nzambi kadi tonda mu fuka yovo yambulwila esumu dia Yobi. Yave watonda kimenga kia lubakanisu kiavewa mu kuma kia Yobi, yo wayambula vo kiafuka esumu diandi yo ziula nzila kimana Nzambi kansambula yo kunsenda. (Yobi 1:5; 42:12-17)—Yuli-Setemba, lukaya lwa 11.

• Ayeyi i nsas’a nti a olive uyikwanga muna nkanda Roma kapu kia 11?

Nti a olive usunzulanga yîkwa yakaka ya mbongo a Abarayama, i sia vo, Isaele ya mwanda. Yave una nze mianzi ye Yesu nze vindi dia nti a olive. Vava ayingi muna Ayuda a kingutukila babembola Yesu, Esi Zula ana bakituka akwikizi badikwa muna nti a olive, yo lungisa lutangu lwawonso lwa yikwa yakaka ya mbongo a Abarayama.—15/5, lukaya lwa 22-25.

• Aweyi tuzayidi wo vo Bilungi ke fulu kia tiya ko kibangikilwanga wantu?

Evangu dia yoka o wantu vana tiya diangemi kwa Yave. (Yer. 7:31) Vana ntandu, e ngindu za sia vo amafwa bebangikwanga vana tiya ke zina ngwizani ko ye fu ya Nzambi a zola kumosi ye dina Nkand’a Nzambi kelonganga vo amafwa “ke bazeye diambu ko.” (Kim. 9:5, 10)—Yuli-Setemba, lukaya lwa 15.

• Yave aweyi kebadikilanga awana “babudik’e ntima” yo ‘kendalala’? (Nku. 34:18)

Nze una ese dianzodi kesimbilanga yo fiaulwisa mwan’andi wakendalala, Yave ofinamanga asambidi andi ana bekazanga kwa yandi mu vava lusadisu. Una yo luzolo lwa kubafiaulwisa yo lembeka e ntima miau miabudika yo kubavevola muna nkenda. Olenda kubavana e ngangu ye nkuma bavwidi o mfunu mu zizidila konso mpasi balenda wanana zau. (2 Kor. 4:7; Yak. 1:5)—Yuli-Setemba, lukaya lwa 23.

• Nga mbongo a Yesu wa muntu alunga i yakituka se ndambu a lukûlu?

Ve. Kana una vo Yesu i nto a mazunda ye mazunda ma wantu alunga, e mbongo yayi ke ndambu a lukûlu ko. O moyo alunga wa Yesu i wakala betela ye una wa Adami. (1 Tim. 2:6)—15/6, lukaya lwa 13.

• Akristu aweyi balenda songela vo belemvokelanga luludiku lwasonama muna sono kia Mavangu 20:29, 30?

Ke betambulanga alongi aluvunu ko muna nzo zau. (Roma 16:17; 2 Yoa. 9-11) Akristu bevenganga tanga e nkanda besonekanga avengomoki, wá malongi mau muna televizau yo tanga mo muna Internete.—15/7, lukaya lwa 15-16.

• Nze una usonganga lusansu lwasonama muna Luka 10:40-42, adieyi i kani diantete dia kala vamosi y’ampangi zeto?

Tukalanga vamosi y’ampangi zeto za mwanda, ke mu kubavana ngatu tambula madia ma nitu ko, kansi mu kubakaulwila lukau lwa mwanda yo fiaulwisa muntu yo nkw’andi. (Roma 1:11, 12) O kala vamosi y’ampangi zeto dikutufiaulwisanga kana nkutu vo ke vakedi madia mayingi ko.—Yuli-Setemba, lukaya lwa 29, 30.