Yuvu Y’atangi

Nga dilendakana dia yika lutangu lwasikididi lwa ungunza wa Masia wasonama muna Sono ya Kiyibere?

Avo tulongokele ye sungididi kiawonso e Sono ya Kiyibere, tulenda solola ungunza wayingi walungana muna Yesu Kristu. Ungunza wau wayika luvila kewutukila Masia, e ntangwa kekwiza, mana kevanga, e mpasi kemweswa ye fulu kiandi mun’ekani dia Yave wa Nzambi. Ungunza wau usonganga e sinsu ikutusadisanga mu zaya vo Yesu i Masia. Kansi, tufwete keba mu lembi yika ye sikididi kiawonso lutangu lwa ungunza wa Masia una muna Sono ya Kiyibere.

Wantu ngindu zaswaswana bekalanga zau mu kuma kia ungunza ubadikilwanga vo Masia uyikanga. Muna nkand’andi (The Life and Times of Jesus the Messiah), Alfred Edersheim wavova vo e sono yankulu ya kirabini iyikanga sono 456 ya Kiyibere ina yabadikilwanga vo ungunza wa Masia, kana una vo yayingi muna sono yayi ke iyikanga Masia ko. Lufimpu lwa sono 456 yayi lufilanga akaka mu katikisa kana vo wayingi muna ungunza wau Yesu Kristu kikilu wayika. Kasikil’owu, Edersheim wavova vo Ayuda babadikilanga e sono kia Etuku 8:11 vo ungunza wa Masia. Bevovanga vo “lukaya lwa olive lwatwaswa kwa yembe kuna Mongo a Masia lwabongelwa.” O nsoneki ndioyo wayika diaka e sono kia Luvaiku 12:42. Wasonga vo Ayuda ke batoma bakulanga sono kiaki ko. Wasoneka vo: “Nze una Mose katukila muna makanga, Masia mpe ku Roma katuka.” Akwa ngangu ayingi ye wantu akaka diampasi bemwenanga dio dia wizanesa sono yole yayi ye nsasa zazi zaluvunu muna Yesu Kristu.

Kana nkutu tusidi sungididi muna ungunza walungana muna Yesu Kristu, diampasi dikala mu kala ye ngindu zimosi mu kuma kia lutangu lwasikididi lwa ungunza wau. Tubong’e nona kia kapu kia 53 kia nkand’a Yesaya, kiyikanga ungunza wayingi mu kuma kia Masia. Muna Yesaya 53:2-7 tutanganga vo: “Kena ya mpwa ko ngatu zitu . . . Kavezwa yo yambulwa kwa wantu . . . Kanata mayela meto . . . Katompolwa muna kuma kia makuzuka meto . . . nze mwan’ememe wafilwa kun’evondelo . . . diabutama.” Nga e mvovo miawonso muna Yesaya kapu kia 53 mifwete badikilwa nze ungunza umosi wa Masia yovo ungunza waswaswana?

Badika mpe e sono kia Yesaya 11:1, muna tutanganga vo: “Muvaika nsungu muna nti a Yisai, e ntombo a mianzi miandi iyima mbongo.” Muna tini kia 10, tuwananga diaka ungunza wau, mu mvovo mina betela. Nga tufwete badikila sono yole yayi nze ungunza waswaswana yovo ungunza umosi wavutukilwa? E mvutu mu kuma kia Yesaya kapu kia 53 ye Yesaya kapu kia 11 zilenda soba ngindu zeto mu kuma kia lutangu lwa ungunza wa Masia.

Muna kuma kiaki, diambote twalembi tokananga kwayingi mu kuma kia zaya lutangu lwawonso lwa ungunza wa Masia una muna Sono ya Kiyibere. E nkubik’a Yave ivaikisanga nkanda miyikanga ungunza wayingi mu kuma kia Yesu ye una walunganena. * Tulenda sadila malongi mama mun’elongi dia yeto kibeni yovo dia esi nzo ye muna salu kia umbangi. Malongi mama malenda kumika lukwikilu lweto vo mawonso kevovanga o Yave melungananga. Vana ntandu, ulolo wa ungunza mu kuma kia Masia, kiakala nkia lutangu, ukutusonganga e ziku vo Yesu i Kristu yovo Masia.

[Mvovo Vana Yand’a lukaya]