Yuvu Y’atangi

Aweyi tufwete bakulwila e mambu mena muna nsangu za salu kia mvu amvimba?

Konso mvu, tuvingilanga e nsangu za salu kieto zivaikiswanga muna Anuário. Tukalanga ye kiese kia tanga mu kuma kia salu kisalanga nkangu a Yave mu nz’amvimba kia samuna nsangu za Kintinu kia Nzambi yo longa akaka oma ma Kintinu kiaki. Kansi, muna toma bakula e nsas’a nsangu zazi, divavanga vo twazaya e nsas’a mvovo misadilwanga ye ntalu zina mo. Tubadika eyaka nona.

Ano de serviço (mvu wa salu). O mvu wau uyantikanga muna ngonde ya Setemba yamuna ngonde ya Agositu ya mvu ulanda. Muna Anuário mu kwizanga ye nsangu za mvu waviokele. Kasikil’owu, muna Anuário 2011, muna ye nsangu za mvu wa salu tuka kina kia 1 Setemba, 2009 yakuna kia 31 Agositu, 2010.

Auge de publicadores ye média de publicadores (wokela kw’ateleki ye tezo ki’ateleki). “Ateleki” i Mbangi zawonso za Yave zavubwa kumosi y’awana ke bavubilu ko bayifwanisa mu kala ateleki a Kintinu. “Auge de publicadores” i lutangu lwa ngonde ina yasunda ateleki muna mvu wa salu. Ezak’e ntangwa, muna lutangu lwalu musiwanga mpe e nsangu z’awana ke batangwa ko muna ngonde yaviokele. Ateleki akaka balenda tangwa nkumbu miole. Kansi, ateleki ana bevilakananga o vana e nsangu zau za salu ke besiwanga ko mu lutangu lwalu. Ediadi disonganga o mfunu wa vana e nsangu za salu kia umbangi vava ngonde ifokokanga. “Média de publicadores” i lutangu lw’ateleki ana bevananga e nsangu zau za salu kia umbangi konso ngonde.

Total de horas. E Anuário 2011 isonganga vo Mbangi za Yave vioka ola 1.600.000.000 bavanga muna salu kia umbangi. Kansi, lutangu lwalu ke lwa ola zawonso ko tuviokesanga muna salu kia Yave. Kasikil’owu, lutangu lwalu ke luyikanga ko e ntangwa ina akuluntu beviokesanga muna salu kia vungula ekambi, ngatu e ntangwa tuviokesanga muna tukutakanu, longoka Nkand’a Nzambi yo badika mana tulongokanga.

Nzimbu. Muna mvu wa salu wa 2010, Mbangi za Yave basadila tezo kia 155.000.000 ma nzimbu za dólar mu lungisa nsatu za aviti a nzila a espesiale, misionario, y’akengi a zunga muna salu kiau. Kansi, lutangu lwalu ke luyikanga ko e nzimbu zasadilwa mu nieteka nkanda misasilanga Nkand’a Nzambi, ngatu zina zisadilwanga mu lungisa nsatu za vioka 20.000 ma mpangi z’akala ye z’akento besalanga salu kia mvevo kuna Betele mu nz’amvimba.

Lutangu lw’awana bedianga mbolo muna Luyindulu. I lutangu lwa mpangi zavubwa ana bedianga mbolo yo nua vinyo muna Luyindulu mu nza yawonso. Nga lutangu lwalu lusonganga vo i lutangu lwasikididi lwa mpangi zakuswa bena ova ntoto? Ve. Akaka ngindu zabendomoka bekalanga zau za kwenda kun’ezulu mu kuma kia mana balongwanga muna mabundu yovo mu kuma kia kimbevo kia ntu. Muna kuma kiaki, ke dilendakana ko dia zaya lutangu lwasikididi lw’Akristu akuswa bena ova ntoto. Ke tuna mpe yo mfunu wa zaya lutangu lwau ko. E Buka kia Selo Yambuta ke bena ye nkanda ko una besonekanga nkumbu z’awana bedianga mbolo yo nua vinyo muna Luyindulu. *

Edi kaka tuzeye i dia sia vo akaka muna “ntaudi za Nzambi” zakuswa muna mwanda bekala ova ntoto vava mpasi zayingi ziyantika. (Lus. 7:1-3) Ekolo bakinu ova ntoto, Akristu akuswa besalanga kwayingi muna salu kia samun’e nsangu zambote yo longa wantu. E nsangu za salu kia mvu amvimba zikutusonganga e salu kisalanga nkangu a Yave mu nza yawonso, kina vo i salu kisundidi o mfunu muna lusansu lwa wantu.

[Mvovo Vana Yand’a lukaya]