Yuvu Y’atangi

Adieyi mfwete vanga avo kiuvu ngina kiau mu kuma kia diambu ntangidi muna Nkand’a Nzambi yovo vava ivavanga luludiku mu diambu dia mono kibeni?

E sono kia Ngana 2:1-5 kikutuwondelelanga ‘twakwamanana vava’ umbakuzi nze una tuvavilanga “tusalu twaswekama.” Ediadi disonganga vo tufwete siang’e ngolo za vavulula e mvutu za yuvu yeto mu kuma kia Nkand’a Nzambi ye mambu ma yeto kibeni. Aweyi tulenda wo vangila?

Muna nkanda Beneficie-se da Escola do Ministério Teocrático, lukaya lwa 33 yamuna lukaya lwa 38 muna y’elongi dina ye ntu a diambu: “Como Fazer Pesquisas” (Aweyi Olenda Vavulwila Mambu). Disonganga una tulenda sololwela e mvutu za yuvu yeto muna sadila nkanda kevaikisanga “ntaudi akwikizi yo lulungalalu.” (Mat. 24:45) O lukaya lwa 36 lusasilanga mpila olenda sadila Índice das Publicações da Torre de Vigia. E Índice yayi yavambana mu kunku yole. Vena ye kunku kia fimpila mambu ye kunku kia fimpila e sono. Ediadi disadisanga mu solola konso diambu ovavanga, kiakala mvovo miasina yovo sono ya Nkand’a Nzambi. Olenda mpe solola ndandani za mambu olenda vavulula. Kala ye luzindalalu mu vavulula e mvutu za diambu ozolele zaya yovo luludiku ovwidi o mfunu. Sungamena vo “tusalu twaswekama” ovavanga, ngolo ye ntangwa divavanga muna to solola.

Kieleka, vena ye mambu ye sono yakaka ke yasasilwa ko muna nkanda mieto. Ezak’e ntangwa e nkanda mieto milenda yika e sono kina ovavang’o zaya, kansi nanga ke mivene mvutu za kiuvu kiaku ko. Vena mpe ye tusansu twa Nkand’a Nzambi ke tuyikanga mawonso ko. Muna kuma kiaki, tulenda kala ye kiuvu mu kuma kia tusansu twatu. Ka tufwete vava ko vo twasolola e mvutu za konso kiuvu vana vau. Muna kuma kiaki, avo ka tusolwele ko e mvutu za kiuvu muna nkanda mieto, tufwete venga e fu kia banzikilanga e mvutu ngatu tantana mu mambu ‘mefidisanga mpaka, ke mu sadis’esansu dia Nzambi muna lukwikilu ko.’ (1 Tim. 1:4; 2 Tim. 2:23; Tito 3:9) Kana nkutu evula dia nsi eto yovo mavula makaka mu nza ke bena ye nswa wa fimpa ko yo vana e mvutu za yuvu ke yisasilwanga ko muna nkanda mieto. Tufwete yangalala wau vo Nkand’a Nzambi ukutuvananga luludiku tuvwidi o mfunu muna zingu kieto kiawonso. O mambu mana ke tubakulanga ko mekutuvananga elau dia songa vo lukwikilu lweto muna Nzambi ye muna Diambu diandi lwakumama.—Tala lukaya lwa 185 yakuna lukaya lwa 187 lwa nkanda Finama Yave.

Adieyi tuvova kele vo vangidi mawonso olenda muna vavulula diambu dikutokanesanga kansi kusolwele luludiku ko yovo mvutu ovwidi mfunu? Olenda vava lusadisu kwa mpangi wazikuka, olenda kala mosi mun’akuluntu a nkutakani eno. Bena yo zayi wafwana wa Nkand’a Nzambi ye muna mambu makaka mu zingu kia Kikristu. Avo luludiku ovavanga mu kuma kia nzengo ozolele baka, akuluntu balenda kusadisa wau vo lukufi bezingilanga yo ngeye ye batomene kuzaya kumosi ye diambu dibwididi. Kuyambudi samba kwa Yave ko yo yika e diambu dikutokanesanga, unlomba kasingika e ngindu zaku muna lusadisu lwa mwand’andi avelela ‘kadi o Yave ovananga ngangu . . . ye umbakuzi.’—Nga. 2:6; Luka 11:13.