Nga Okalanga ye Kiese kia Vanina Kuna Mvevo?

AKRISTU a tandu kiantete kuna Filipi bazayakana mu kuma kia fu kiau kia vanina kuna mvevo mu yikama nsambil’aludi. Muna nkanda kabasonekena, Paulu wa ntumwa wavova vo: “Mfiaukilanga Nzambi ame, muna luyindulu luawonso oko nwina, e ntangwa zawonso, muna ndodokela zame zawonso muna diambu dia yeno awonso ndodokelanga kuna kiese, muna untwadi weno wa nsangu zambote tuka muna lumbu kiantete yamu unu.” (Fili. 1:3-5) Paulu wasungamena e lumbu kina Ludia y’esi nzo andi bavubwa yo kundodokela kumosi y’akundi andi salu vo bakota muna nzo andi.—Mav. 16:14, 15.

I bosi, ekolo kakala y’ampangi muna mbanz’a Tesalonika yakala tezo kia 160 ma kilometa, ampangi muna nkutakani yampa ina yasikidiswa kuna Filipi, nkumbu miole batwika lusadisu kwa Paulu. (Fili. 4: 15, 16) Ke vavioka mvu miayingi ko, esi Filipi ye mpangi zakaka kuna Makedonia ana bakala mu mpasi yo ‘usukami wayingi,’ bawá nsangu mu kuma kia mpasi zamweswanga Akristu kuna Yerusaleme ye bazola kubasadisa. Paulu wasia umbangi vo bavana kina “kiviokele ndend’au.” Wasoneka vo: ‘Batudodokèle ndodokela zayingi kimana bakala y’elau dia vanina kuna mvevo.’—2 Kor. 8:1-4; Roma 15:26.

Vioka tezo kia mvu kumi, esi Filipi ana bavita kituka Akristu, fu kiaki mpe bakala kiau. Vava bawá vo Paulu mu pelezo kakala kuna Roma, batwika Epaferodito mu nkangalu wa tezo kia kilometa 1.287 muna nzila za ntoto ye nzadi kimana kenda vana lusadisu kwa Paulu. Kieleka, esi Filipi bazola sadisa Paulu kimana kakwamanana kumika ampangi yo sila umbangi, ekolo kakala muna pelezo.—Fili. 1:12-14; 2:25-30; 4:18.

O unu, Akristu akieleka bebadikilanga dio s’elau diampwena dia yikama e salu kia samun’e nsangu zambote yo kitula wantu s’alongoki. (Mat. 28:19, 20) Benungununanga salu kia Kintinu muna sadilanga ntangwa, ngolo ye mavwa mau. E babu kin’o va yanda kisonganga ezak’e mpila olenda yikamena e salu kia umbangi.

[Babu ina muna lukaya lwa 22]

VAVA NTIM’ETO UKUTUFILANGA MU VANA KINA TULENDA

Akete kaka muna Mbangi za Yave bena ye mavwa mayingi, kansi ulolo bemonanga e mpasi za kondwa e nzimbu. Kansi, avo se vana lukau lwamvevo mu nungununa salu kia Kintinu, kana nkutu lwakete, kufwete banza ko vo ka luna mfunu ko. Vava Yesu kamona nkento anson’ansukami watuba mbiya zole muna lundilwa kia nzimbu muna tempelo, kamveza ko. Kansi, wavova vo: “Kieleka inusamunwini vo, o nkento ndioyu anson’ansukami otubidi ntuba iviokele awonso; kadi awowo muna nsavu au i batubìdi muna mwina tukau: vo i yandi, muna usukami wandi i katubìdi vumu kiandi kiawonso.” (Luka 21:1-4) Kanele vo lukau lwandi lwakete lwakala, wavana kina kalenda.

Muna lenda vana lukau, konso muntu, konso nzo yovo konso nkutakani, divavanga vo bateka kubama. Vava Akristu a esi Korinto bazola sadisa mpangi zau bakala mu mpasi kuna Yuda, Paulu wa ntumwa wabavana luludiku lwamfunu luna bafwete landa. Wasoneka vo: ‘Vo i diambu dia ngonzekel’aveledi, wauna yakanikina mabundu ma Ngalatia, oyeno mpe i nuvanga una. Muna lumbu kiantete kia lumingu, konso muntu muna nzo andi, kafwete kilundila, muna mbaku andi, ke vakala ngonzekela vava ikwiza.’—1 Kor. 16:1, 2.

Nze una muntu kelundilanga nzimbu mu kuma kia diambu dilenda bwa ku kinsalukisa, i una mpe konso Mbangi a Yave yovo konso nzo yovo nkutakani balenda lundanga konso kina balenda mu vana lukau mu nungununa nsambil’aludi. Muna kuma kiaki, e nkutakani zawonso konso ntangwa zivananga tukau mu nungununa salu kia Kintinu. Bevanganga wo muna teka kubama yo wizana una bafwete wo vangila. Akwa ntima miamvevo ana beyangalelanga nsangu zambote, bevananga mpe tukau twau mu yikama e salu kiaki kisalwanga mu nza yawonso. Tukau twatu twamvevo tuwokesanga luyangalalu ye kiese kiau mu zaya vo bevananga kina balenda.

Evula difilanga e nkand’a matondo mu zayisa vo lukau lwau lutambukidi.

Tukau twawonso tufilwanga kuna Vula, tuyangalelwanga yo sadilwa mu salu kia samun’e nsangu zambote za Kintinu kia Nzambi. Kasikil’owu, tukau twatu tusadilwanga mu kubika e nzo ye salu kia misionario muna nsi zayingi. Tusadilwanga mpe mu lunga-lunga yovo sumba sadilwa inietekanga e nkanda ye má yakaka. Tukau twatu tusadisanga mpe akengi a zunga ye a mvivu mu kingula nkutakani z’Akristu mu nza yawonso yo kubakasakesa muna mwanda. (Roma 1:11, 12) Akaka mpe bena mu salu kia ntangwa ke ntangwa bebakanga filusadisu mu tukau twatu. Akristu antete ana bayikama nsambil’aludi batambula nsambu, kadi bakembelela Yave muna mavwa mau. Ekwe nsambu bakala zau! Yeto mpe nsambu zayingi tuvwa avo tuyikama e salu kia Kintinu mu mpila yayi. Muna kuma kiaki, yambula twakala yo nyindu ambote vava ntim’eto ukutufilanga mu vana konso kina tulenda.

[Mvovo mia Fwaniswa mina muna lukaya lwa 23]

Konso muntu, konso nzo yovo konso nkutakani izolele vana lukau, lenda lo fila kuna Associação das Testemunhas de Jeová, Rua Talatona n.o1—Luanda Sul Caixa Postal 6877 Luanda-Angola