“Owau i Mvanguki Kansi ke Yakwele mvu ko!”

Lusansu lwa Sara Van Der Monde

Wantu nkumbu miayingi bekumpovesanga vo: “E Sara, ongeye ndose akiese kaka okalanga yau. Ekuma okadilanga ye kiese lumbu yawonso?” Ikubavovesanga vo vuvu kiasikila ngina kiau. E vuvu kiaki kilenda yikilwa mu mvovo emi: “Owau i mvanguki kansi ke yakwele mvu ko!”

M U MVU wa 1974 yawutuka kuna Paris, França. E ngutuk’ame yampasi yakala, i bosi yasoloka ye kimbevo kia tomfo (paralesia cerebral). Kialendanga nikuna yikwa yame ya nitu ko, ekiaki i kuma e mvovo miame ke miatoma wakanenanga ko. Yabakama mpe kimbevo kia niangi ye diasazu diakala mu bakama konso kimbevo.

Vava yakala ye kimbuta kia mvu miole, twayaluka yo kwenda kuna Austrália, muna mbanza Melbourne. Mvu miole miavioka, ese diame wavambana yo ngw’ame yo kutubembola. Owau i nkumbu antete yamona o mfunu a finama Nzambi. Wau vo ngw’ame Mbangi a Yave, wandatanga kuna tukutakanu tw’Akristu ntangwa zawonso, kuna yalongokela vo Nzambi okumvwanga o mfunu yo toma kunzola. O zayi wau ye nzola ina kanzolelenge o ngw’ame, yansadisa mu kala wavuvama, kana una vo ese diame watubembola.

O ngw’ame mpe wandonga una mfwete sambilanga kwa Yave. Owau, imonanga vo diasazu mu samba ke mu vova ko. Vava isambanga, ke divavanga ko vo yavaikisa mvovo, kansi ivovanga muna nsi a ntima. Wau vo e mvovo miame ke mitoma wakananga ko, dia lufiaulwisu mu zaya vo Yave obakulanga mawonso ilombanga muna sambu, diakala muna sambu kia nsi a ntima yovo vava yibabatanga o vova.—Nku. 65:2.

Zizidila e Mpasi

Vava yalungisa kimbuta kia mvu tanu, kimbevo kiame kiawokela. Muna lenda kangala, yasiwa sengwa muna malu. Kansi, vana fulu kia kangala una ufwene, zakama kaka yazakamanga. Vava yalungisa kimbuta kia mvu 11, kialendanga diaka diata ko. Kuna kwalanda, kondwa kwa lusadisu lwa masini ma kura kialendanga leka ko ngatu sikama vana mfulu yo manta mun’ekalu dia avanguki edi yadiatisilanga muna moko.

Muna vova e ziku, ezak’e ntangwa ntantu imonanga mu kuma kia uvanguki wame. Kansi, vana vau isungamenanga diambu tutoma vovanga muna nzo eto: “Kutokananga ko mu kuma kia dina kulendi vanga ko. Tokanena kaka dina lenda vanga.” Ediadi ditoma kunsadisanga mu kangalela muna mvalu, muna  nzaza, muna nlungu, kwenda mu fulu ya nsaka kumosi y’akundi yo diatisa ekalu muna fulu yavuvama. Wau vo ngina ye umbangu wayingi, itoma vanganga fwaniswa, tunga nlele, ngoto, bandula mvwatu (bordar) yo wumba salanganu ya tûma.

Muna kuma kia uvanguki wame, akaka beyindulanga vo kilendi kuyibakila nzengo ko za sadila Nzambi. Vava yalungisa kimbuta kia mvu 18, nlongi ame kuna sikola wampovesa vo yavaika muna nzo a ngw’ame kimana yalembi kota muna dibundu diandi. Wayivana nkutu muna kunsadisa mu solola e nzo. Kansi, yamvovesa ye ziku kiawonso vo kilendi bembola lukwikilu lwame ko. Isinga vaika muna nzo a ngw’ame vava ikuyimwena vo yafwana kuyilunga-lunga.

Ke vavioka kolo ko vava yamokena ye nlongi ame, yavubwa se Mbangi a Yave. Vioka mvu miole, yayaluka yo kwenda zingila mu nzo yakete. Owau, ngina ye kiese, kadi itambulanga lusadisu ivwanga o mfunu yo lungisa etima diame dia zinga mono mosi.

Diambu Dina Kiavingilanga Ko

Mu mvu miayingi, izizidilanga mambu mayingi metontanga lukwikilu lwame. Lumbu kimosi yasivika kikilu vava nkw’ame wa mvanguki kuna sikola kandomba vo twasompana. Kuna lubantiku yayangalala. Nze una bemonanga dumbelele yayingi, mono mpe ngina y’etima dia sompa. Kansi, wau vo yeto awole tu avanguki ka disongele ko vo tukala ye longo lwakiese. Vana ntandu, etoko diodio ke tuna ye lukwikilu lumosi ko. Mana tukwikilanga, salu ina tuyangalelanga ye makani meto maswaswana kikilu. Muna kuma kiaki, aweyi tuzingila entwadi? Yabaka mpe e nzengo za lemvokela nkanikinu a Nzambi wa sompana kaka ye selo kia Yave. (1 Kor. 7:39) Muna kuma kiaki, yamokena ye toko diodio kuna luzitu lwawonso vo kilendi tambulwila ndomb’andi ko.

Yamu wau, ikwikilanga vo nzengo zambote yabaka. Ngina ye vuvu kiasikila vo isinga zingila mu kiese muna nz’ampa kasia nsilu o Nzambi. (Nku. 145:16; 2 Pet. 3:13) Muna kuma kiaki, ngina y’ekani dia kwamanana ye kwikizi muna Yave yo yangalela e zingu kiame owau.

Ivingilanga y’etima diawonso e lumbu isinga yambula ekalu diame dia mvanguki yo zaula nze mvudi. I bosi, isinga boka vo: “Mvanguki yakala, kansi owau se ngina ye mavimpi malunga yakwele mvu!”