Yuvu Y’atangi

Nga tulenda zaya ye sikididi kiawonso e ola ina Yesu kakomwa vana nti?

E kiuvu kiaki kiyuvulwanga mu kuma kia nswaswani ilenda moneka vana vena lusansu lwa lufwa lwa Yesu lwasoneka Maku ye luna lwa Yoane wa ntumwa. Maku wavova vo: ‘Se ola yetatu, [makesa] bankomene vana nti ampasi.’ (Maku 15:25) Kansi, o Yoane wasoneka vo Pilato wayekola Yesu kw’Ayuda mu “tezo kia ola esambanu” kimana bankoma vana nti. (Yoa. 19:14-16) Awana belongokanga oma Nkand’a Nzambi nsasa za mpila mu mpila bevananga muna teza kiesesa nswaswani yayi. Kansi, muna Nkand’a Nzambi ke muna ye nsangu zayingi ko zilenda kutusadisa mu bakula nswaswani vana vena tusansu tole twatu. Kana una vo i wau, o zaya una wantu batangilanga e ola kuna nz’ankulu dilenda kutusadisa.

Muna Tandu kiantete, Ayuda bavambulanga e lumbu mu ola 12, tuka muna mpaik’a ntangwa. (Yoa. 11:9) ‘E ola yetatu’ yayantikanga muna ola yenana yamuna ola yevwa muna mene. E ‘ola yesambanu’ yayantikanga muna ola kumi ye mosi yakuna masika. Kansi, muna mvu e ntangwa mu ola zaswaswana yavaikanga yo dimuka. Muna kuma kiaki, o lambuka kwa lumbu kwaswaswananga mun’owu wa nsungi. Vana ntandu, o wantu ntangwa batalanga muna zaya e ola. I kuma vo, e ola ke yakalanga yasikididi ko. Sono ya Kingerekia ya Kikristu iyikanga mambu mavangama muna ola yetatu, yesambanu yovo yevwa, nkumbu miayingi muna songa vo muna tezo kia ola yayina. (Mat. 20:3, 5; Mav. 10:3, 9, 30) E ola zasikididi nze “ola ina yansambwadi,” zayikwanga kaka kele vo mfunu kikilu dina muna lusansu.—Yoa. 4:52.

Ngwizani ina vana vena e nkanda miyikanga lusansu lwa Yesu mu kuma kia ntangwa yavangamanga mambu muna lumbu yansuka ya zingu kia Yesu ova ntoto. E nkanda yá miami misonganga vo ambuta za nganga ye mbuta za nkangu bavwand’e mfulu vava kwakia, i bosi banata Yesu kwa Pontio Pilato wa nyadi a Roma. (Mat. 27:1; Maku 15:1; Luka 22:66; Yoa. 18:28) Matai, Maku ye Luka basoneka vo tuka muna ola ina yesambanu, vava Yesu kakala vana nti, e tombe kiabukama e nsi yawonso yamuna ola ina yevwa.—Mat. 27:45, 46; Maku 15:33, 34; Luka 23:44.

E diambu diamfunu difwete sungamenwa mu kuma kia ola ina Yesu kakomwa vana nti i diadi: Vitila bakoma o muntu vana nti, entete wazwabulwanga yovo wandwa. Ezak’e ntangwa, wantu bafwanga ekolo bawandwanga. Mu kuma kia Yesu, nanga mpasi zayingi kikilu kamweswa kadi diavava vo muntu akaka kanata nti ampasi una Yesu kateka nata yandi kibeni. (Luka 23:26; Yoa. 19:17) Avo wantu wandwa bateka bawandwanga vitila bakomwa vana nti, nanga kolo kiayingi kiavioka yavana Yesu kakomwa vana nti ampasi. Muna kuma kiaki, mun’owu wa ntangwa ina bamona e diambu, wantu aswaswana balenda yika ola yaswaswana ina Yesu kakomwa.

Yoane wa ntumwa wasoneka lusansu lwandi vioka mvu miayingi vava asoneki akaka a nsangu zambote basoneka tusansu twau. Ediadi disonganga vo wazaya e nsangu zina akaka basoneka. Kieleka vo e ola ina Yoane kayika ilenda moneka vo yaswaswana ye ola kayika Maku. Kansi, ediadi disonganga e ziku vo Yoane kavutukila soneka lusansu lwa Maku ko. Kiakala Yoane yovo Maku Nzambi wabavumunwina. Kana una vo Nkand’a Nzambi ke uyikanga mayingi ko malenda kutusadisa mu zay’e nswaswani, tulenda bund’e vuvu muna nkanda miami mia lusansu lwa Yesu.