Ekuma Tufwete Fidilwa kwa Mwand’a Nzambi?
Ekuma Tufwete Fidilwa kwa Mwand’a Nzambi?
‘Nge u Nzambi ame: O mwand’aku wambote, yambula wamfila.’ —NKU. 143:10.
1. Sasila una ngolo zilembi moneka zilenda fidila muntu.
NGA wasadila kala bússola mu zaya e nzila? E bússola i lekwa kiakete kilenda sadisa muntu mu zaya e nzila kafwete landa. Ikalanga ye ntumbu ifilanga ntu kuna node. Vena ye ngolo zilembi monekanga ziyikilwanga vo magnetismo, zifilanga e ntumbu yayi. Se vioka mvu miayingi, wantu besadilanga e bússola kimana yabasonganga e nzila bafwete landa ekolo bekangalanga muna makanga yovo muna kalunga.
2, 3. (a) Nkia ngolo kasadila o Yave se vioka mvu miayingi? (b) Aweyi tuzayidi vo ngolo za Nzambi zilenda kutufila o unu?
2 Vena ye ngolo zakaka zilembi monekanga zilenda kutufila mu mpila yambote. Nkia ngolo zazi? O nkand’Etuku ukutuzayisanga dina Yave kavanga se vioka mvu miayingi. Tutanganga vo: “Muna lubantiku o Nzambi wasem’ezulu ye nza.” Tuzeye wo vo ngolo ezi zisundidi kasadila mu sema lekwa yawonso, kadi Nkand’a Nzambi ukudikilanga vo: “O mwand’a Nzambi wabutamen’o maza.” (Etu. 1:1, 2) Nkia ngolo kasadila o Nzambi? Mwand’andi avelela, una vo i ngolo zandi. Tuvutulanga matondo kwa Yave wau kasadila mwand’andi mu kutuvana moyo yo vanga lekwa yawonso.—Yobi 33:4; Nku. 104:30.
3 Tuzeye wo vo Yave ngolo zandi kasadila muna kutuvanga, kansi e ngolo zazi nga zilenda vanga diambu diakaka muna zingu kieto? O Mwan’a Nzambi wavovesa alongoki andi vo ediadi dilenda vangama. Wavova vo: ‘O mwanda . . . ukunufila muna ludi kiawonso.’ (Yoa. 16:13) Nki i mwanda wau? Ekuma tufwete yambulwila vo watufila?
Nki i Mwand’avelela?
4, 5. (a) Awana bekwikilanga mun’elongi dia Nzambi mu ntatu nkia ngindu zabendomoka bekalanga zau mu kuma kia mwand’avelela? (b) Nki i mwand’avelela?
4 Akaka muna wantu omokenanga yau muna salu kia umbangi nanga ngindu zabendomoka bekalanga zau mu kuma kia mwand’avelela. Awana bekwikilanga mun’elongi dia Nzambi mu ntatu bebanzanga vo mwand’avelela muntu nze Nzambi w’Ese. (1 Kor. 8:6) Kansi, elongi dia Nzambi mu ntatu ke dina ngwizani ko ye Nkand’a Nzambi.
5 Ozevo, nki i mwand’avelela? Muna Nkand’a Nzambi, e mvovo wa Kiyibere ruʹach wasekolwa vo “mwanda” mun’Etuku 1:2, usekolwanga mpe vo “tembwa” muna sono yakaka yovo mu mvovo miyikanga ngolo zilembi moneka. (Tezanesa ye Etuku 3:8; 8:1.) Nze una e tembwa kilembi monekanga kansi kina yo nkuma, o mwand’a Nzambi mpe ke umonekanga ko, kansi tumonanga mana uvanganga. Mwand’avelela i ngolo za Nzambi ezi zikumikanga wantu yovo lekwa mu lungisa luzolo lwandi. Nga diampasi mu kwikila vo ngolo zazi kwa Nzambi wa Mpungu-ngolo zitukanga? Ve!—Tanga Yesaya 40:12, 13.
6. O Davidi adieyi kalomba kwa Yave?
6 Nga Yave wakinu sadila mwand’andi muna kutufila? Wasia nsilu kwa Davidi wa ntozi a nkunga vo: “Ikulonga yo kusonga nzil’okwenda.” (Nku. 32:8) Nga i diau kazola Davidi vo kafilwa kwa Nzambi? Elo, kadi wasamba kwa Yave vo: ‘Undonga yavanga luzolo luaku kadi nge u Nzambi ame: O mwand’aku wambote, yambula wamfila.’ (Nku. 143:10) Yeto mpe tufwete kalanga y’etima dia filwa kwa mwand’a Nzambi. Ekuma? Yambula twabadika kuma yá.
Ke Twafwana ko mu Kuyifila
7, 8. Ekuma ke tulendi kuyifidila ko? (b) Yik’e nona kisonganga e kuma tufwete fidilwa kwa Nzambi mu nza yayi yambi.
7 E kuma kiantete tufwete yambulwila vo mwand’a Nzambi watufila i kia sia vo ke tuna ye ngangu za kuyifila ko. E mvovo “fila” usonganga vo “songa muntu e nzila kafwete landa.” Kansi, Yave ka tuvanga ye ngangu za kuyifila ko, musungula wau vo tu wantu alembi lunga. Yeremiya wa ngunza wasoneka vo: “E Yave, nzeye wo vo e nzil’a muntu ke ina muna yandi ko: ngatu singikila ntambi zandi o munduti-a-nzila.” (Yer. 10:23) Ekuma? O Nzambi okutuzayisanga e kuma muna Yeremiya. Yave wavova vo: “O ntima usundidi mawonso o tekama, wayela kikilu: nani ozeye wo?”—Yer. 17:9; Mat. 15:19.
8 Yindula vo muntu okangalanga ku zunga kia vonza kina katomene zaya ko, nze muna makanga. Nga ke dia uzowa ko dia kangala yandi mosi, kondwa kwa mfidi ambote ngatu bússola? Avo muntu kazeye dina kafwete vanga ko mu fulu kiaki kiampasi ye kazeye nzila ko kafwete landa, olenda sia zingu kiandi mu vonza. Diau adimosi, o muntu oyindulanga vo olenda kuyifila yandi kibeni mu nza yayi yambi lembi yambula vo Nzambi kansonga e nzila yambote, zingu kiandi kesianga mu vonza. Edi kaka dilenda kutusadisa mu sunda nza yayi i samba kwa Yave nze Davidi ona walomba vo: “E ntambi zame zasikila muna nzila zaku, e tambi yame ke yanikuka ko.” (Nku. 17:5; 23:3) Aweyi tulenda fidilwa kwa Nzambi?
9. Nze una usonganga e fwaniswa muna lukaya lwa 17, aweyi mwand’a Nzambi ulenda kutufidila?
9 Avo tu alembami yo bund’e vuvu muna Yave, okutuvana mwand’andi avelela kimana watufila. Aweyi mwanda wau ulenda kutusadisila? Yesu wavovesa alongoki andi vo: “O nsadisi, wa mwand’avelela, ona otuminwa kwa Se muna nkumbu ame, yandi okunulonga mawonsono, yo kunususwila mawonso mana inuvovese.” (Yoa. 14:26) Vava tulongokanga Nkand’a Nzambi kumosi ye malongi ma Kristu, mwand’avelela uwokesanga umbakuzi weto wa ngangu za Yave kimana twanlemvokela. (1 Kor. 2:10) Vana ntandu, vava diambu dia kinsalukisa dikutubwilanga muna zingu, mwand’a Nzambi ukutusadisa mu zaya dina tufwete vanga. Ukutusadisa mu sungamena nkanikinu mia Nkand’a Nzambi mina twalongoka kala yo zaya una tulenda mio sadila mu bak’e nzengo zambote.
Yesu Wafilwanga kwa Mwand’a Nzambi
10, 11. O Yesu adieyi kavingilanga vo mwand’avelela wavanga muna yandi? Aweyi mwand’avelela wansadisila?
10 E kuma kiezole tufwete yambulwila vo mwand’avelela watufila i kia sia vo Nzambi wasadila wo muna fila Mwan’andi. Una kayizidi ko ova ntoto, Mwan’amosi a Nzambi wazaya ungunza owu: “O mwand’a Yave ukunyitalelela, o mwand’a ngangu yo mbakula, o mwand’a ndongesela yo nkuma, o mwand’a zayi yo vumi wa Yave.” (Yes. 11:2) Yindula una Yesu kamona vava katambulanga lusadisu lwa mwand’a Nzambi ekolo kawanananga ye mambu mampasi ova ntoto!
11 E mvovo mia Yave mialungana. E nsangu kasoneka Luka zikutuzayisanga dina diavangama vava Yesu kavubwa: “O Yesu wazala yo mwand’avelela, wavutuka tuka kuna Yodani, kanatwa kuna makanga kwa mwanda muna lumbu makumaya.” (Luka 4:1) Ekolo kafionkononanga yo samba yo badika, Yave nanga wamvana luludiku yo kunkubika mu kuma kia mana mekumbwila. O mwand’a Nzambi wafilanga ngindu ye ntim’andi yo kunsadisa mu baka nzengo zambote. Muna kuma kiaki, Yesu wazayanga dina kafwete vanga muna konso diambu diambwilanga yo vanga dina S’andi kazola vo kavanga.
12. Ekuma dinina diamfunu dia lombanga vo mwand’a Nzambi watufila?
12 Wau kazaya o mfunu wa mwand’avelela muna zingu kiandi, Yesu wakasakesa alongoki andi balombanga mwand’avelela muna sambu yo yambula vo wabafila. (Tanga Luka 11:9-13.) Ekuma dinina diamfunu dia lombanga vo mwand’a Nzambi watufila? E kuma kadi o mwanda wau ulenda soba ngindu zeto yo kutusadisa twakala yo nyindu a Kristu. (Roma 12:2; 1 Kor. 2:16) Vava tuyambulanga vo mwand’a Nzambi watufila muna zingu kieto, tulenda kala yo nyindu nze wa Kristu yo tanginina mbandu andi.—1 Pet. 2:21.
Mwand’a nza Ulenda Kutuvukumuna
13. Nki i mwand’a nza? Nkia mambu ufilanga wantu mu vanga?
13 E kuma kiatatu tufwete yambulwila vo mwand’a Nzambi watufila, i kia sia vo, kondwa mwanda wau, tulenda vukumunwa kwa mwand’a nza una ufilanga wantu ayingi o unu. O mwand’a nza i wisa kifilanga wantu mu vanga oma ke mena ngwizani ko ye fu ya mbongo a mwand’avelela owu ukutufilanga. Vana fulu kia sadisa wantu bakala yo nyindu a Kristu, mwand’a nza ufilanga wantu bayindula yo vanga nze una kevanganga o nyadi a nza yayi. (Tanga Efeso 2:1-3; Tito 3:3.) Avo muntu oyambwidi vo mwand’a nza wamfila yo kuyivana muna mavangu ma nitu, fwilu miayingi dikuntwasila. O muntu ndioyo kalendi vwa Kintinu kia Nzambi ko.—Ngal. 5:19-21.
14, 15. Aweyi tulenda zizidila mwand’a nza?
14 Yave watuvana dina tuvwidi o mfunu muna zizidila mwand’a nza. Paulu wa ntumwa wavova vo: “Nukumamena kaka muna Mfumu, yo muna nkum’efuka diandi . . . nwavw’owu nukandamena muna lumbu kiambi.” (Ef. 6:10, 13) Muna mwand’andi, Yave okutuvananga nkuma mu zizidila e ngolo za Satana za vava kutuvukumuna. (Lus. 12:9) Wau vo mwanda wau ngolo wina, ke tulendi wo venga emvimba ko. Kansi, tulenda wo zizidila. Wau vo mwand’avelela usundidi e ngolo, ulenda kutusadisa.
15 Kuna kw’awana babembola e ludi muna tandu kiantete, Petelo wa ntumwa wavova vo: “Wau bayambul’e nzil’ansongi batungiana.” (2 Pet. 2:15) Tufwete vutula matondo wau vo “ke tutambwidi mwand’a nza ko, o mwanda una wa Nzambi kaka”! (1 Kor. 2:12) Avo tuyambula vo mwand’avelela watufila yo sadila nkubika kevanganga mu kutusadisa twasiamisa ngwizani eto yo yandi, tulenda vanga oma mambote yo zizidila mwand’a nza yayi yambi.—Ngal. 5:16.
Mwand’avelela Mbongo Ambote Uyimanga
16. Nkia fu tulenda yima muna lusadisu lwa mwand’avelela?
16 E kuma kiayá tufwete yambulwila vo mwand’a Nzambi watufila, i kia sia vo, mwanda wau mbongo ambote uyimanga mun’awana beyambulanga vo wabafila. (Tanga Ngalatia 5:22, 23.) Ka lukatikisu ko vo yeto awonso tuzolele kala akwa zola, akwa kiese yovo akwa luvuvamu. Yeto awonso tuzolanga kala akwa nlandu a lutantu, akwa walakazi ye ngemba. Diambote kikilu dikala kele vo yeto awonso tusonganga lukwikilu lwasikila, lulembamu ye volo. O mwand’a Nzambi ukutusadisanga mu yima fu yambote ilenda twasa nluta kwa yitu yeto ye kwa mpangi muna nkutakani. Ngolo divavanga muna yima fu yayi. Kadi, ke vena ye tezo ko kina tulenda vova vo tuyimini e fu yawonso ya mbongo a mwanda ina tuvwanga o mfunu.
17. Adieyi tufwete vanga muna yima e fu ya mbongo a mwanda?
17 Diangangu twayifimpa mu zaya kana vo e mvovo ye mavangu meto mesonganga vo mwand’avelela ukutufilanga ye tuyimanga mbongo a mwanda wau. (2 Kor. 13:5a; Ngal. 5:25) Avo tumwene vo vena ye fu ya mbongo a mwanda ikondelo muna yeto, tufwete sia ngolo za yambula vo mwand’avelela watusadisa twayima fu yayi. Tulenda wo vanga muna longokanga fu kimosi kimosi muna sadilanga Nkand’a Nzambi kumosi ye nkanda mieto. Muna mpila yayi tulenda bakula una tulenda songela e fu ya mbongo a mwanda muna zingu kieto kia lumbu ke lumbu yo sia ngolo za yima fu yayi. * Ekolo tumonanga e nluta miambote mitwasanga mwand’a Nzambi muna zingu kieto ye muna mpangi zeto z’Akristu, tubakulanga e kuma tufwete fidilwa kwa mwanda wau.
Nga Oyambulanga vo Mwand’a Nzambi Wafila?
18. Adieyi tulenda longoka muna mbandu a Yesu muna yambula vo mwand’a Nzambi wamfila?
18 Vava Nzambi kasema lekwa yawonso, Yesu wakala se “mbuta mbangu.” Muna kuma kiaki, wazaya mawonso mu kuma kia ngolo za ntoto, ezi zisadisanga wantu mu sadila bússola. (Nga. 8:30; Yoa. 1:3) Kansi, Nkand’a Nzambi ke uvovanga ko vo Yesu wasadila ngolo zazi kimana zafila zingu kiandi vava kakala ova ntoto. O Nkand’a Nzambi usonganga vo mwand’a Nzambi wasalanga muna zingu kia Yesu ekolo kakala ova ntoto nze muntu. Watambulwilanga vo mwanda wau wamfila. Vava mwanda wamfilanga mu vanga diambu, walandanga e mfil’a mwanda yo vanga dio. (Maku 1:12, 13; Luka 4:14) Nga oyambulanga vo mwand’a Nzambi wafila nze una Yesu kavanga?
19. Adieyi tufwete vanga kimana mwand’avelela watufila?
19 O unu, mwand’a Nzambi wakinu fila awana betambulwilanga vo wabafila. Aweyi olenda yambulwila vo wafila muna nzila yambote? Ofwete sambanga kwa Yave lumbu yawonso kimana kavana mwand’andi yo kusadisa watambulwila mfil’a mwanda wau. (Tanga Efeso 3:14-16.) Ofwete sianga ngolo za zingila ngwizani ye sambu yaku muna longokanga Nkand’a Nzambi, owu wavumunwinwa kwa Nzambi muna mwand’andi. (2 Tim. 3:16, 17) Lemvokelanga malongi mangangu mena mo yo tambulwila e mfil’a mwand’avelela. Songa lukwikilu muna ngangu za Yave za kufila mu nzila yambote mu nza yayi yambi.
[Mvovo Vana Yand’a lukaya]
^ tini. 17 Muna zaya mayingi mu kuma kia fu yawonso ya mbongo a mwanda, tala muna Índices das Publicações da Torre de Vigia, muna ntu mia mambu “Fruto do espírito de Deus” ye “Lista por aspecto.”
Nga Otomene Bakula?
• O mwand’avelela aweyi ulenda fidila zingu kieto?
• Yika kuma yá tufwete yambulwila vo mwand’a Nzambi watufila?
• Aweyi tulenda yambulwila vo mwand’avelela watufila mu nzila yambote?
[Yuvu ya Longoka]
[Foto ina muna lukaya lwa 15]
Mwand’a Nzambi wafilanga zingu kia Yesu
[Foto ina muna lukaya lwa 17]
Mwand’a Nzambi ufilanga ngindu ye ntima miau
