Ediadi Eyingidilu dia Longoka Kikilu!

WINIKINA MU

Ediadi Eyingidilu dia Longoka Kikilu!

Tusobele mambu makaka mun’Eyingidilu dia longoka kimana watoma yangalelanga longoka ludi kia Diambu dia Yave.—Nku. 1:2; 119:97.

Mvu yá miviokele kala tuka twavambulwila Eyingidilu dia nkangu ye dia longoka. Eyingidilu dia longoka divaikiswanga mu kuma kia Mbangi za Yave y’alongoki a Nkand’a Nzambi ana benungunukanga.

Muna kuma kia Eyingidilu dia longoka mpangi mosi osadilanga Yave se mvu miayingi wavova vo: “Yatoma sivika yo yangalela Eyingidilu diantete dia longoka. E mpila yakiá diatoma sasila eludi kia Nkand’a Nzambi, yatoma simba e ntim’ame. Ntondele kikilu muna nkubika yayi yampa.” Mpangi akaka wasoneka vo: “Isianga sungididi kia vaula ntangwa yafwana muna longoka Eyingidilu diadi. Yitoma sadilanga mpe Bíblia com Referências.” Tuna ye ziku vo ngeye mpe otoma dio yangalelanga.

Nze una ozeye, Eyingidilu divaikanga lembi ningama tuka muna mvu a 1879. Ediadi disonganga vo mu nsambu ye ngolo za Yave divaikilanga. (Zak. 4:6) Muna mvu 133 miviokele kala, e fukwa kia Eyingidilu nkumbu miayingi kisobele kala. Muna kuma kiaki, vana fukwa ki’Eyingidilu dia longoka dia mvu a 2012, vekala ye foto dia wantu besalanga e salu kia umbangi. E foto diadi dikala kutusungamesa e salu kia samuna nsangu za Kintinu kia Yave twavewa. (Mav. 28:23) Muna lukaya lwa 2, osinga mona diaka foto diodio ye sono vana ndambu isonganga fulu ye diambu divangamanga. Omu mvu wau, e foto diodio disungamesa yeto awonso vo nkangu a Yave i yau besamunanga nsangu zambote “muna nza yawonso.”—Mat. 24:14.

Ameyi diaka masobele? E babu kia lufimpu kikatwilu kuna mfoko a konso elongi yo siwa kuna lubantiku lw’elongi. Ediadi disonganga mambu masina fwete sila sungididi vava okala tanga yo longoka konso elongi. Kansi, awana befilanga elongi di’Eyingidilu muna nkutakani, bekwamanana sadila yuvu yayi ya lufimpu kuna mfoko elongi. Osinga mona vo ndambu zalembi sonekwa zisanzwilu. E nomba za tini ye za makaya zivongeso.

Nze una usasilu mun’Eyingidilu diadi, vekala vaika mpe elongi diampa dina yo ntu a diambu vo: “Muna Malundilu Meto.” Elongi diadi dikudikilu muna songa lunungunuku lwa lusansu lwa Mbangi za Yave mu tandu kiaki. Ezak’e ntangwa, mukala vaika mpe elongi dina yo ntu a diambu vo: “Bakivana kuna Mvevo.” Elongi diadi dikala songa lusansu lwa wantu. Lusansu lwalu lusonga kiese ye luyangalalu lwa ampangi bekivananga kuna mvevo mu kwenda sadila muna zunga ivavanga ateleki ayingi a Kintinu.

Vaulanga e ntangwa kimana wayangalela longoka Nkand’a Nzambi muna lusadisu lw’Eyingidilu diadi.

Amwangi