Basamuna Diambu dia Nzambi Kuna Unkabu!

Luzindalalu yo unkabu uvavwanga muna zizidila kitantu. Akristu akieleka besonganga fu yayi, nze una tutanganga muna nkanda “Dê Testemunho Cabal Sobre o Reino de Deus” ye Testemunhas de Jeová—“Proclamadores do Reino de Deus.” Nze mpangi zeto zakwikizi muna tandu kiantete, tulombanga kwa Yave katuvana mwand’andi kimana watusadisa twasamunanga Diambu diandi kuna unkabu.—Mav. 4:23-31.

Muna kuma kia salu kieto kia samuna nsangu zambote muna ntangw’a vit’antete a nz’amvimba, mpangi mosi wasoneka vo: “E selo ya Nzambi bakivana emvimba muna kaya volume ya nsambwadi ya Estudos das Escrituras yayikilwanga vo O Mistério Consumado. I nkanda waluta kaywa muna ntangwa yayina. Muna mvu a 1918 vavaikiswa e Nsangu za Kintinu No. 1. I bosi, vavaikiswa Nsangu za Kintinu No. 2 zasonga ekuma ayadi basimina o nkanda O Mistério Consumado. Kuna kwalanda, vavaikiswa Nsangu za Kintinu No. 3. Akristu akuswa akwikizi bakaya nkanda miami mu nza yawonso. Lukwikilu ye unkabu wavavwanga muna kaya Nsangu za Kintinu.”

O unu, ateleki ampa a Kintinu belongwanga una bafwete sadila salu kia umbangi, kansi muna mvu miavioka ke diavangamanga ko. Mpangi mosi wa mwisi Polônia ozingilanga kuna Estados Unidos vava kasungamena nkumbu antete kavaika mu salu kia umbangi muna mvu a 1922, wasoneka vo: “Kana una vo kiatoma vovanga Kingelezo ko yo lembi zaya nsunzula ndenda sadila muna kaya nkanda, yavaika mono mosi yo kwenda dodela mwelo a vula diasadilanga dotolo dimosi. O nwuki waziula e kielo. Kilendi vilakana dina diabwa ko, kadi yayantika zakama yo wonga. Vava yaziula nkutu ame, nkanda miawonso miabwa vana malu ma nwuki. Kisungamenanga ko dina yavova, kansi yamvana nkanda umosi. Vava yavaika, yavwa unkabu ye nsambu za Yave. Muna lumbu kiakina yakaya nkanda miayingi muna mavula ma tekela lekwa.”

Mpangi mosi wavova vo: “Muna mvu a 1933, mpangi zayingi muna samuna nsangu za Kintinu makalu masiwanga makina mewisanga e ndinga basadilanga.” Lumbu kimosi, wavaika yo mpangi eyakala yo nkaz’andi, bayenda sila umbangi muna zunga ya miongo mia Califórnia, Estados Unidos. Wavova vo: “Mpangi eyakala wamanta vana mongo y’ekalu diandi dia makina mewisanga ndinga, oyeto twasala muna mbanza. Vava kaziula e nsangu za bandulwa muna kassete, e zú diakala nze kun’ezulu diatukanga. Wantu muna mbanza bavava zaya fulu kiakala e mpangi, kansi kabamona ko. Vava kafokola, twayantika kingula wantu yo kubasila umbangi. I bosi, yasala diaka y’ampangi wole bakala ye kalu diadi. Kansi, ndenda vova ye ziku vo ndonga ke bazolanga wá nsangu zambote ko. Kansi ke bafwana kaka matu ko kadi e zú dia nsangu zambote diakotanga  muna nzo zau. Twamona vo Yave wasengomonanga ndekwa zambote muna ntangw’andi. Unkabu wavavwanga muna sila umbangi mu mpila yayi, kansi yalungisa ekani diandi yo twasa nkembo muna nkumbu a Yave.”

Muna mvu a 1930 yamuna lubantiku lwa mvu a 1940, twayantika sadila fonógrafos ye malongi ma Nkand’a Nzambi mabandulwa muna salu kia umbangi. Mpangi mosi ankento wavova vo: “Mpangi mosi wadumbelele wasadilanga fonógrafo muna nzo ye nzo. Vava kaziula yo vana mwelo a nzo mosi, mfumu a nzo wavaika yo lulendo lwawonso yo diata e fukwa kia fonógrafo. Kansi, ke yabanguka ko. Akala atatu badilanga vana fulu kia ningamena makalu vava bamona dina diabwa, babokela dumbelele kasika fonógrafo kimana bawá, i bosi batambula nkanda kakala miau. Ediadi diamfiaulwisa yo kunsadisa kavilakana lutiangu lwa eyakala diodio.” Unkabu wavavwanga muna zizidila ntonta zazina.

Mpangi ankento ndioyo wavova diaka vo: “Isungamenanga lubantiku lwa salu kia kaya yinkanda-nkanda muna mpambu za nzila muna mvu a 1940. Mpangi z’akala y’akento batelamanga muna nlonga ye babu yau yasonama vo ‘E Dibundu Nekwa ye Nzimb’a Mivi,’ ‘Nusadila Nzambi ye Kristu wa Ntinu.’ Vana vau, twakayanga yinkanda-nkanda yangovo. Unkabu wavavwanga muna sila umbangi mu mpila yayi, kansi yalungisa ekani diandi, i sia vo nkumbu a Yave ye nkangu andi wazayakana kw’awonso.”

Mpangi akaka ankento wavova vo: “Diampasi kikilu diakala mu kaya yinkanda-nkanda muna mbanza zakete. Musungula vava Mbangi za Yave basiwanga kitantu. . . . Unkabu wavavwanga mu telama vana mpambu a nzila mu kaya yinkanda-nkanda yo yika nsunzula twasadilanga. Kansi, diampasi diakala mu viokesa lumbu kia Sabala lembi vaika mu salu kia umbangi. Ezak’e ntangwa wantu basonganga ngemba. Nkumbu miayingi yimpumbulu yakutakananga muna kutubangika, muna venga ntatani twakatukanga muna mbanza yayina.”

Kana una vo muna kolo kia Vit’Anzole ya Nz’Amvimba babangikwanga, Mbangi za Yave kuna unkabu wawonso basalanga e salu kiau una ufwene. Tuka kina kia 1 kia ngonde a Desemba ya mvu a 1940, yakuna kia 12 kia ngonde a Yanuali ya mvu 1941, tezo kia 50.000 m’ateleki kuna Estados Unidos basala e salu kia vaika mu buka mu lumbu 43. Vioka yazi nana ya mazunda ma yinkanda-nkanda bakaya. E salu kiaki kiayikilwa vo Nsungi a sila Umbangi kuna “Unkabu.”

Mpangi zayingi z’anunu mu nkubik’a Nzambi besungamenanga lumbu yayina yampasi yavavanga vo bakala yo unkabu. Akaka vava besungamenanga unkabu una basonga, bevutukilanga kingana eki: Vutula vita van’evitu. Una mbaninu a nza yayi ke yalweke ko, ka tuzeye ko diambu disoba muna salu kia samuna nsangu zambote katuvana o Nzambi. Kansi, muna lusadisu lwa Nzambi, tukwamanana songa kwikizi yo samuna diambu dia Yave kuna unkabu.

[Mvovo mia Sina muna lukaya lwa 9]

Unkabu uvavwanga muna samuna e nsangu za Kintinu