Aweyi Lenda Vanina Elongi kwa Muntu?

Nga balomba kala elongi kw’akaka? Kasikil’owu, nanga bayuvula kala vo: ‘Adieyi mfwete vanga? Nga mfwete kwenda kuna nkinzi wau? Nga mfwete sala e salu kiaki? Nga mfwete banda kimakangu ye muntu ndioyo?’

Akaka ye ziku kiawonso balenda kulomba lusadisu muna baka nzengo mu diambu dilenda fwasa yovo wokesa ngwizani au ye yitu yau, akundi au yovo yo Yave. Nki olenda sadila muna kubavana e mvutu? Aweyi ovaninanga elongi kw’akaka? Kele vo muntu ulombele elongi muna konso diambu, diambote mu sadila luludiku tutanganga muna Ngana 15:28: “O ntim’a nsongi ubadika mvutwilu.” Badika nkanikinu tanu mia Nkand’a Nzambi milenda sadisa muntu mu vana elongi kw’akaka.

1 Bakula Kuma kia Diambu.

“On’ovana mvutwilu ke mu teka wa ko, dia uzowa yo luvungu kwa yandi.”—NGA. 18:13.

Muna vana elongi diambote, tufwete bakula kuma kia diambu ye ngindu za muntu on’ovavanga lusadisu. Muna bong’e nona: Avo muntu ubokele muna telefone yo kuyuvula una kalenda lwakila kuna nzo aku, adieyi ofwete zaya muna kunsadisa? Nga olenda kunsonga nzila yambote avo kuzeye fulu kena ko? Ke dilendakana ko muna kunsonga nzila yambote! Diau adimosi, muna vana elongi diambote kwa muntu ovavanga lusadisu, ofwete zaya “fulu” kena, i sia vo ofwete zaya kuma kia diambu ye ngindu zandi. Nga vena ye diambu kuzeye ko dilenda yivisa elongi diaku? Avo katuzeye kuma kia diambu ko, elongi dieto dilenda fila muntu mu lembi zaya dina kevanga.—Luka 6:39.

Teka Zaya Lusadisu Kaveno Kala. Diambote mpe mu yuvula muntu ovavanga elongi yuvu eyi: “Nkia nkanikinu mia Nkand’a Nzambi omwena vo milenda kusadisa?” “E nzengo ozolele baka, nkia nluta ye mfwilu zilenda twasa?” “Nkia lufimpu ovangidi kala mu kuma kia diambu diadi?” “Nkia lusadisu otambwidi kala kw’akuluntu muna nkutakani, mase maku yovo kwa nlongi aku a Nkand’a Nzambi?”

E mvutu zandi zilenda kutusadisa mu zaya e ngolo kevanganga muna baka nzengo. Muna kumvana elongi tufwete badika mpe dina bamvovese kala akaka. Tulenda bakula mpe kana vo muntu kaka kevavanga kimana ‘kasia mfisi muna matu mandi,’ i sia vo muntu olenda kunzayisa dina kazolele vanga.—2 Tim. 4:3.

  2 Venga Fu kia Vana Mvutu mu Nzaki.

“Konso muntu, mbula kawa-wa-wa; o vova, malembe.”—YAK. 1:19.

Ezak’e ntangwa, tulenda yindula vo ovana muntu mvutu mu nzaki dilenda kunsadisa. Kansi, nga dia ngangu mu vana e mvutu muna diambu ke tutomene zaya e ziku ko e? Ngana 29:20, ivovanga vo: “Vo umweni muntu wena nzaki zavovela, nkwa buzengi lutiti yandi mu vuvu.” (Masonukwa Manlongo)

Vanga mawonso kimana elongi diaku diakala ngwizani ye Diambu dia Nzambi. Ukiyuvula: ‘Nga ngindu zame ngwizani zina ye “mwand’a nza”?’ (1 Kor. 2:12, 13) Sungamena dio vo okala y’ekani diasadisa muntu ke diau kaka ko divavwanga. Petelo wa ntumwa vava kazaya mpasi kadi mweswa o Yesu muna salu kiandi, wamvovesa vo: “Sabisabi, e Mfumu: e diambu diadi ke dikubwila ko.” Adieyi tulenda longoka muna mvutu za Petelo? Kanele vo muntu una y’ekani diambote, avo kayikebele ko olenda nungununa ‘ngindu za wantu ke mu ngindu za Nzambi ko.’ (Mat. 16:21-23) Diambote mu toma yindulanga una ka tuvovele ko. Vana ntandu, nga tulenda yindula vo e ngangu zeto zisundidi ngangu za Nzambi?—Yobi 38:1-4; Nga. 11:2.

3 Sadila Nkand’a Nzambi kuna Lulembamu.

“Omono mpe kikuvangila diambu ko, wauna yalongwa kaka kwa Se, i nsamuna mama.”—YOA. 8:28.

Nga olenda vova vo, “kele vo mono, nga . . . ”? Kanele vo diambu bayuvwidi diasazu muna vanina dio mvutu, diambote watanginina lulembamu yo lusakalalu lwa Yesu. Kana una vo wasunda wantu awonso mu ngangu ye umbakuzi, wavova vo: “Kiyivovèle ko; Se kaka, ona . . . wampan’o nkanikinu una mvova, yo una ngika.” (Yoa. 12:49, 50) Ntangwa zawonso, Yesu luzolo lwa S’andi kasianga va fulu kiantete muna malongi mandi.

Kasikil’owu, muna Luka 22:49 tutanganga vo vava Yesu kakangama, alandi andi balomba kana vo bafwana nwana. Nlongoki mosi wabonga nsosolo yo nwana. Tala lusansu lwalu muna Matai 26:52-54. Kana nkutu muna ntangw’ampasi, Yesu wasadisa nlongoki ndiona kimana kabakula owu wina luzolo lwa Yave. Wau vo wazaya nkanikinu una mun’Etuku 9:6 ye ungunza wa Nkunga 22 ye Yesaya 53, Yesu wabavana luludiku luna lwa vuluza mioyo yo yangidika Yave.

  4 Vavulula Muna Nkanda Mieto.

“Nani i ntaudi akwikizi yo lulungalalu, ina isiwa kwa mfumu andi e kiyekwa kia nzo andi, kabavana madia muna ntangw’andi?”—MAT. 24:45.

Yesu wasola ntaudi akwikizi yo lulungalalu muna vana madia ma mwanda. Vava ovananga elongi yo luludiku kwa muntu muna diambu diamfunu, nga ovaulanga ntangwa muna vavulula muna nkanda misasilanga Nkand’a Nzambi?

Tulenda solola mambu mamfunu muna Índice das Publicações da Torre de Vigia ye Biblioteca da Torre de Vigia. * Dia uzowa mu vilakana e sadilwa yayi yamfunu. Yivwidi ntu mia mambu ye malongi mayingi malenda sadisa muntu ovavanga luludiku. Nga lenda sadisa akaka kimana basadilanga sadilwa yayi muna solola nkanikinu mia Nkand’a Nzambi milenda kubasadisa mu baka nzengo zambote? Nze una nkanda usongang’e nenga kia nza (mapa) ulenda sadisila muntu mu zaya fulu kena ye nzila kafwete landa, ovavulula muna nkanda mieto, dilenda sadisa muntu mu zaya nzila kena yo bakula una kalenda sikidila muna nzil’a moyo.

Akuluntu ayingi betoma longanga ateleki una balenda vavulula malongi muna Índice yovo muna Biblioteca da Torre de Vigia. Ediadi disadisanga ateleki mu sadila luludiku lwa Nkand’a Nzambi vava bebakanga e nzengo. Dikubasadisanga mpe mu singika mambu mau, yo yima fu kia vavulula yo bunda e vuvu muna nkubika za mwanda za Yave. Muna vanga diadi, “i benena ye ngangu zau zasinswa bazaya mpambula za wete yo bi.”—Ayib. 5:14.

5 Venga Fu kia Bakila Akaka Nzengo.

“Konso muntu ediandi’zitu onata dio.”—NGAL. 6:5.

Ozevo, konso muntu ovwidi nswa wa sola elongi ye luludiku kafwete sadila. Yave wavana nswa kwa yeto awonso mu sola lemvokela nkanikinu miandi yovo ve. (Nsi. 30:19, 20) Muna baka e nzengo muna mambu makaka ma zingu, divavanga vo twasadila ntona zeto ye nkanikinu miaswaswana mia Nkand’a Nzambi. Avo tuzeye e ziku kia diambu kevavilanga luludiku o muntu ye ntel’andi, tufwete kiyuvula mpe vo: ‘Nga ngina ye wisa kia tala e diambu diadi?’ Mambu makaka akuluntu muna nkutakani bena ye wisa kia tala mo. Avo nleke ovavanga lusadisu, mase mandi bafwete kunsadisa.

[Mvovo Vana Yand’a lukaya]

[Babu/​Foto ina muna lukaya lwa 8]

Nkubika ya Nsambila ya esi Nzo

Vava okubikanga nsambila ya esi nzo, ekuma olembi vavulula e mvutu za diambu bayuvwidi? Nki’elongi ye nkanikinu mia Nkand’a Nzambi olenda sadila muna sadisa muntu uyuvwidi diambu diodio? Kasikil’owu, dilenda kala vo mpangi eyakala yovo ankento uyuvwidi diambu mu kuma kia muntu kazolele banda yandi kimakangu y’ekani dia kazala. Sadila Índice yovo Biblioteca da Torre de Vigia muna fimpa diambu diadi. Kasikil’owu, muna Índice olenda fimpa vana ntu a diambu vo “Namoro” yovo “Casamento.” I bosi, vavulula diaka ntu mia mambu miakete mina betela ye diambu diodio. Avo solwele ntu a diambu, sia mpe sungididi vana ntu a diambu uyikanga vo “Veja também,” kadi ulenda kusadisa mu solola mambu mayingi ovavanga.

[Foto ina muna lukaya lwa 9]

Tuvutulanga matondo mun’elau diambote tuvwidi mu nkubik’a Yave. E nkubika yayi ikutusadisanga mu tambula yo vana malongi kw’akaka. Muna Kimpovi 12:11 tutanganga vo: “E mvovo mi’akwa ngangu mina nze mpalu, yovo nsonso zatoma komwa kwa mfumu za [buka ki’akuluntu a] nkutakani, mikayilwa kwa mvungudi mosi.” Nze “mpalu” zisadilwanga mu fila ngombe, malongi mambote malenda sadisa akwa ziku mu kangalela mu nzila ansongi. Nze “nsonso zatoma komwa” zitoma simbanga e nzo, elongi diambote nluta miasikididi ditwasanga kw’akaka. Akwa ngangu yovo “buka kia akuluntu muna nkutakani” beyangalelanga kubika mvovo misonganga ngangu za Yave wa “mvungudi” au.

Konso muntu mu nkubik’a Yave, Mvungudi ketangininanga muna vana malongi. Ekw’elau tuvwidi dia tambula yo vana malongi mambote kw’akaka! Avo tusidi sungididi kia sadila nkanikinu mia Nkand’a Nzambi, malongi meto masikila mekala yo twasa nluta miakwele mvu kw’awana bewá mo.