“Nga Lenda Kutukatula e Foto?”

Kuna mfoko a lumbu kiazole kia lukutakanu lwa mvivu, Josué osadilanga kuna Betele ya México, wayenda kangala muna mbanz’a Querétaro. Javier yo Maru wa nkaz’andi esi Colômbia bakala mu nkangalu muna mbanz’a Querétaro, balomba kwa Josué kimana kabakatula e foto. Wau vo Josué ye nkundi andi wa Mbangi a Yave batoma kuyikubika bakala yo vwata lapela za lukutakanu lwa mvivu, Javier yo Maru wa nkaz’andi babayuvula kana vo ku lukutakanu lwamfunu lwa sikola batukidi. Josué wabazayisa vo mu lukutakanu lwa mvivu lwa Mbangi za Yave bakala yo kubabokela kimana benda kina kia Lumingu.

Javier yo Maru wa nkaz’andi bavova vo dilenda kubafusulwisa nsoni kadi ke bakala ye mvwatu miambote ko muna kwendela kuna lukutakanu. Kansi, Josué wakisunzula yo kubavana nomba ya telefone ya vula dina kesadilanga.

Vioka ngonde yá Josué wasivika vava kawá nsangu za Javier. Bayenda kuna lukutakanu lwa mvivu yo songa luzolo lwa kingulwa kwa Mbangi za Yave muna Mbanz’a Mexico bezingilanga owau. Vana vau Javier yo Maru bayantika longoka Nkand’a Nzambi yo kwenda muna tukutakanu. Vioka ngonde kumi bakituka s’ateleki alembi vubwa. Kana una vo bayaluka yo kwenda kuna Toronto, Cánada bakwamanana nungunuka muna mwanda yo vubwa.

I bosi, Javier wasonekena Josué muna kunsonga dina diamfila mu tambulwila ludi. “Vitila twenda kuna lukutakanu lwa mvivu, yamokena yo nkaz’ame muna kunsonga vo luludiku lwa mwanda twavwang’o mfunu. Vava twamona mpila lwatoma vwatila ye kuyikubika, twayindula vo nanga ku lukutakanu lwamfunu nwatuka. Vava twayenda muna lukutakanu lwa mvivu, twasivika kikilu mu mpila batutambulwila muna kutusonga fulu kia vwanda yo kutusadisa mu solola e sono ya Nkand’a Nzambi ye nkal’ambote yasonga nkangu wawonso. E mvwatu mia nkangalu twakala miau ke miatokanesa muntu ko.”

E mvovo mia Solomo wa Ntinu a ngangu mia lungana kikilu muna Josué. Solomo wasoneka vo: “E menemene kuna mbongo, o masika kuvweni ko: kadi kuzeye wo ko eyi ivangama, yovo yayi yovo yayina, yovo yau ayole yavangama kumosi.” (Kim. 11:6) Nga olenda kuna mbongo muna sadila konso elau mu bokela akaka kimana benda kuna lukutakanu lwa mvivu yovo benda wá elongi dia nkangu awonso? Yave lenda kusadila muna solola awana bevavanga luludiku lwa mwanda nze Javier ye Maru.—Yes. 55:1.

[Foto ina muna lukaya lwa 32]

Tuka kuna koko kwalumonso yaku lunene: Alejandro Voeguelin, Maru Pineda, Alejandro Pineda, Javier Pineda, ye Josué Ramírez kuna vula dia México