Yuvu Y’atangi

Nga Nkristu wakituka se mbundu a tala mavangu ma zumba lenda vaikiswa mu nkutakani ya Kikristu?

▪ Elo, lenda vaikiswa. Muna kuma kiaki, tufwete venga tala yo tanganga mavangu mawonso ma zumba muna nkanda, filme, video ye muna Internet.

Mavangu ma zumba metoma songwanga mu nza yawonso. Internet itomene wokesa mavangu ma zumba ke mu mvu miavioka ko, muna kuma kiaki, ndonga bebwanga mu sazu muna ntambu wau. Ambuta akaka y’aleke, lembi dio kana bekotanga muna fulu ya Internet isonganga mavangu ma zumba. Akaka bekotanga muna fulu yoyo kuna lukanu, ke betokananga ko mu tala mavangu mama kuna sweki muna nzo yovo kuna salu. Ekuma dinina dia vonza kuna kw’Akristu?

O lulukisu lwa Yesu lutoma songanga e kuma dinina dia vonza: “Konso on’otungununa nkento, kanlengokelw’o moyo, zumba kia nsi a ntima katele yandi.” (Mat. 5:28) Dialudi, o vukana kwavaninwa nswa kw’awana bakazala, ezak’e ntangwa kiese kiayingi dikubatwasilanga. (Nga. 5:15-19; 1 Kor. 7:2-5) Kansi, awana betalanga mavangu ma zumba ke bekalanga y’ekani diadi ko. Ngindu za zumba zina katumba Yesu beyimanga.  Muna kuma kiaki, o muntu una ye fu kia tanga yovo tala mavangu ma zumba ke lemvokelanga ko luludiku lwa Nzambi luvovanga vo: “Nufwasa yîkwa yeno ina ya nza; zumba, nsafu, vengenene, eketo diambi, y’eloko, dina vo, i sambu ya teke.”—Kol. 3:5.

Adieyi tuvova kele vo Nkristu nkumbu mosi yovo nkumbu miole kaka katadidi mavangu ma zumba? E zingu kiandi mu vonza kina nze una kiakala e zingu kia Asafi wa ntozi a nkunga ona wavova vo: “Vo i mono, o malu mame, fiakete fisidi nga mavengele; e tambi yame se yadi sielomoka.” O Nkristu aweyi kalenda kadila ye ntona zambote yo luvuvamu yo Nzambi kele vo otadidi mafoto ma yakala yovo ma nkento una kimpene yovo yakala yo nkento betanga e zumba? Olenda mona nze una Asafi ona wavova vo: “Lumbu ke lumbu mbwilwanga kwa vuku, yo sembwa mene ke mene.”—Nku. 73:2, 14.

O Nkristu obwidi mu vonza kiaki kafwete sikama yo vava lusadisu lwa mwanda. Olenda solola lusadisu lwalu kw’akuluntu muna nkutakani: “Ovo muntu obakamene mu’kuzuka, una kazeye wo ko, oyeno nuna yo umwanda nunludikila ndiona wina wau, muna mwand’alembama; ukitala unkwa kala vo ongeye mpe ovukumuka.” (Ngal. 6:1 NW) Nkuluntu mosi yovo awole balenda kumvana lusadisu kavwidi o mfunu yo kunsia muna ‘sambu kia lukwikilu kilenda vuluz’on’oyela yo yambulwilwa esumu diandi.’ (Yak. 5:13-15) Nze nluta mina kavwa Asafi, awana bevewanga lusadisu muna yambula tala mavangu ma zumba bevwanga nluta muna finama Nzambi.—Nku. 73:28.

Kansi, Paulu wa ntumwa wavova vo akaka basumuka yo lembi vilukw’e ntima “muna nsafu, ye zumba, ye yingalu ina bavanga.” * (2 Kor. 12:21) Marvin R. Vincent wa Nlongi watoma songa vo e mvovo a Kingerekia kasadila Paulu vo “nsafu” una ye nsasa vo: “Lekwa kia funzuka ye kia yiva.” Mavangu makaka ma zumba masundidi yiva ke mu tala wantu bena kimpene ko y’awana betanga e zumba. Makaka muna mavangu mama, i akala belekanga y’akw’au akala, akento y’akw’au akento, leka ankento mu ngolo, leka ye bulu, leka ye wan’akete, buka ki’akala yovo ankento belekanga yo muntu mosi. Muna lumbu ya Paulu akaka “bavwa bwitalala muna nyindu miau” “bayiyekola muna yingalu, bavangilanga mambu mawonso mansafu kun’ebiki.”—Ef. 4:18, 19.

Paulu wayika mpe “nsafu” muna Ngalatia 5:19. Nlongi mosi kuna Grã-Bretanha wavova vo: “Usafu uyikwanga mu sono kiaki, i maketo mawonso mangemi.” Akristu awonso bekwikilanga vo mavangu mawonso ma zumba mayikilu va ntandu, mangemi kikilu ye wantu mefilanga muna “maketo mambi.” Kuna mfoko a sono kia Ngalatia 5:19-21 Paulu wavova vo: ‘Awana bevanganga’ mavangu mama ma nsafu “e kintinu kia Nzambi ke bevwila kio ko.” Muna kuma kiaki, kele vo muntu okitukidi se mbundu a tala mavangu mangemi ma zumba yo lembi vilukw’e ntima, kalendi kwamanana muna Nkutakani ya Akristu ko. Muna tatidila ovelela ye mwand’a nkutakani kafwete vaikiswa mu nkutakani.—1 Kor. 5:5, 11.

Diakiese mu zaya vo akaka babwa muna fu kia tala yovo tanga mavangu mangemi ma zumba, bavava akuluntu yo tambula lusadisu lwa mwanda bavwang’o mfunu mu soba e zingu kiau. Yesu wawondelela Akristu muna nkutakani ya Sadi kuna nz’ankulu vo: ‘Nusikidis’oma masidi, oma se mefwa: . . . nuyindul’owu nutambwidi yo wa; nwalunda wo, nwavilukw’o ntima. Ovo ke nuyingila ko . . . Ke nuzaya yo ko kana nkia ola ikunuyizila.’ (Lus. 3:2, 3) Muntu wabwa muna mavangu mama olenda kwandi viluka ntima yo zavunwa vana tiya, i sia vo olenda vuluzwa.—Yuda 22, 23.

Diambote konso muntu mu yeto kasianga sungididi kialembi bwa mu ntambu wa tala yo tanganga mavangu ma zumba. Elo, tufwete kala y’ekani dia venga e fu kia tala yovo tanga mpila zawonso za mavangu ma zumba.

[Mvovo Vana Yand’a lukaya]

[Babu ina muna lukaya lwa 30]

O Nkristu obwidi mu vonza kiaki kafwete sikama yo vava lusadisu lwa mwanda