Yave Okutuyingilanga Muna Luvuluku
Yave Okutuyingilanga Muna Luvuluku
“Yeno nuyingidilwanga muna nkum’a Nzambi, muna lukwikilu muna luvuluku luakubama, muna sengomonwa muna ntangw’ambaninu.”—1 PET. 1:5.
NKIA MVUTU OVANA?
․․․․․
Aweyi Yave kekututuntilanga mu nsambil’aludi?
․․․․․
Aweyi tulenda yambulwila vo Yave katufila muna malongi mandi?
․․․․․
Aweyi Yave kekutukasakeselanga?
1, 2. (a) Aweyi tuzayidi wo vo Nzambi osinga kutusadisa muna zindalala ye kwikizi? (b) Aweyi Yave katomene zayila konso muntu mu yeto?
‘NDIONA ozindalala yakuna mbaninu, i yun’ovuluzwa.’ (Mat. 24:13) Muna mvovo miami, Yesu watoma songa vo vava Nzambi kefwasa nza ya Satana, muna vuluzwa tufwete zindalala yakuna mbaninu. Kansi, Yave ke vavanga ko vo twazindalala muna ngolo za yeto kibeni. Nkand’a Nzambi usianga nsilu vo: “O Nzambi i nkwa kwikizi, ona kekunuyambula nwatontwa ntontwa iviokele ina nulenda ko; kumosi ye ntontwa, oteta nzil’a nkutiswa, kimana nwalenda yo zizidila.” (1 Kor. 10:13) Adieyi tulenda longoka muna mvovo miami?
2 Wau vo Yave ozeye mawonso mu kuma kieto kumosi ye mpasi tunwananga zau, kiwuntu kieto ye mana tulenda zizidila, ozayanga e ntonta zina tulenda zizidila. Nga Nzambi otomene kutuzaya? Elo. Nkand’a Nzambi usonganga vo Yave otomene zaya konso muntu mu yeto. Otomene zaya fu yeto ye mana tuvanganga lumbu yawonso. Olenda bakula nkutu e ngindu ye makani ma ntim’eto.—Tanga Nkunga 139:1-6.
3, 4. (a) E nona kia Davidi aweyi kitoma songelanga vo Yave ovwanga mfunu konso muntu? (b) Nkia salu kiamfunu kesalanga Yave o unu?
3 Nga Nzambi mpasi wantu kieleka kevwang’o mfunu? Vava Davidi wa ntozi a nkunga kabadika e kiuvu kiaki wavova kwa Yave vo: “Ovo mbwene ezulu diaku, e salu kia nlembo miaku, o ngonde ye ntetembwa zin’osikidisi; o muntu se nki, wanyindulwila?” (Nku. 8:3, 4) Nanga Davidi wayuvula kiuvu kiaki mu kuma kia dina diambwila. Yave wamona vo Davidi wa nsakil’a Yisai, i “muntu ona uzolele o ntim’andi.” Muna kuma kiaki, wankatula muna salu kia ‘vungula mameme, kimana kakala ntu’ a nkangu a Isaele. (1 Sam. 13:14; 2 Sam. 7:8) Nze nleke yo mvungudi a mameme, yindula una Davidi kamona vava kazaya vo o Mvangi a nsema wabakula ngindu ye makani mandi!
4 O unu, ditoma kutusivikisanga mpe mu zaya una Yave kekutuvwilanga o mfunu. O tuntanga “eyi itombwanga kwa zula yawonso” muna nsambil’aludi yo sadisa selo yandi bazindalala ye kwikizi. (Kan. 2:7) Muna bakula una Yave kekutusadisilanga twazindalala ye kwikizi, yambula twateka fimpa una ketuntilanga wantu muna nsambil’aludi.
NZAMBI OKUTUTUTANGA
5. Yave aweyi ketuntilanga wantu muna Mwan’andi? Yika nona.
5 Yesu wavova vo: “Ke ven’on’olend’o kwiz’oku ngina ko, ovo o Se, ona wantuma, kekuntunta ko.” (Yoa. 6:44) E mvovo miami misonganga vo muna kituka nlongoki a Kristu, Nzambi kafwete kutusadisa. Aweyi Yave ketuntilanga awana bena nze mameme muna Mwan’andi? Mwand’avelela ye salu kia samuna nsangu zambote kesadilanga. Kasikil’owu, vava Paulu y’akw’andi misionario bakala muna Filipi, bawanana yo nkento wayikilwanga mu nkumbu a Ludia yo kunsamunwina e nsangu zambote. Nkand’a Nzambi uvovanga vo: “Watendolw’o ntima kwa Nzambi, kasia mo muna matu, mana mavovwa kwa Paulu.” Elo, Nzambi wasadila mwand’andi avelela kimana wasadisa Ludia katoma bakula nsangu zambote. I bosi, Ludia wavubwa y’esi nzo andi.—Mav. 16:13-15.
6. O Nzambi aweyi katuntila yeto awonso mu nsambil’aludi?
6 Nga Nzambi Ludia kaka kasadisa mu kituka se Nkristu? Ve kikilu. Avo u Nkristu wakiyekola, zaya wo vo ngeye mpe Nzambi watunta muna nsambil’aludi. Wau vo S’eto ezulu wasolola edi diambote muna ntim’a Ludia, zaya wo vo diambu diambote mpe kasolola muna ntim’aku. Vava wawá nsangu zambote mu nkumbu antete, Yave wafila mwand’avelela kimana wasadisa mu toma zo bakula. (1 Kor. 2:11, 12) Vava wayantika vanga ngolo za sadila mana walongokanga, wasambula yo kuvana nkuma kimana wavanga luzolo lwandi. Ekolo wayekola zingu kiaku kwa yandi, diatoma yangidika o ntim’andi. Kieleka, tuka muna lumbu kina wayantika kangalela mu nzil’a moyo, Yave okalanga yaku muna singika e ntambi zaku.
7. Aweyi tuzayidi wo vo Nzambi osinga kutusadisa twazindalala ye kwikizi?
7 Nze una katusadisila vava twayantika kunsadila, Yave okwamanananga kutusadisa kimana twazindalala ye kwikizi. Wau kazeye wo vo ke mu ngolo za yeto kibeni ko twazayila ludi, ozeye wo mpe vo ka tulendi zindalala muna ngolo za yeto kibeni ko. Petelo wa ntumwa wasonekena Akristu akuswa vo: “Yeno nuyingidilwanga muna nkum’a Nzambi, muna lukwikilu muna luvuluku luakubama, muna sengomonwa muna ntangw’ambaninu.” (1 Pet. 1:5) E mvovo miami miasonama mu kuma ki’Akristu awonso. Aweyi Yave kekutuyingilanga o unu? Tufwete zaya mvutu za kiuvu kiaki kadi yeto awonso lusadisu lwa Nzambi tuvwidi o mfunu muna sikila ye kwikizi muna yandi.
NZAMBI OLENDA KUTUTANINA TWALEMBI BWA MUNA KUZUKA
8. Ekuma tufwete kuyikengela mu lembi bwa mun’ekuzuka?
8 Lembi wo zaya, e mpasi za zingu ye usumuki weto ulenda kutuyoyesa muna mwanda yo kutusia mu vonza kilenda kutubwisa mun’ekuzuka. (Tanga Ngalatia 6:1.) Tulenda mona e ziku kia diambu diadi mu dina diabwa muna zingu kia Davidi.
9, 10. Yave aweyi kasadisila Davidi mu lembi bwa mun’ekuzuka? O Yave adieyi kevanganga kwa yeto o unu?
9 Kuna lubantiku, Davidi wasonga volo muna lembi vutula mbi muna mbi ekolo Saulu wa ntinu kankondanga mu kuma kia kimpala. (1 Sam. 24:2-7) Kansi, muna kuma kia usumuki, Davidi wayambula songa volo. Vava kakala mu nzala ye ntaudi zandi, walomba lusadisu kwa Nabale wa nkw’andi Nsaele. Vava Nabale kamvutula matingu, Davidi wafunga makasi yo baka nzengo za kwenda vonda Nabale ye nzo andi yawonso. Wavilakana vo minkondwa kuma kadi vonda yo nata nkanu a menga vana ndose a Nzambi. Luludiku lwa Abingaile wa nkaza Nabale, lwasadisa Davidi mu lembi bwa mun’ekuzuka diampwena. Vava kabakula vo Nzambi wasadila Abingaile muna kuntanina mu lembi bwa mun’ekuzuka, Davidi wavova vo: “Matondo kwa Yave wa Nzambi a Isaele ona utumini kwa mono o unu wawanana yame: Usambwilu o zayi waku, osambwilu ongeye unsimbidi o unu mun’esumu dia menga yo yambula vava mpe luvuluzu muna koko kwame.”—1 Sam. 25:9-13, 21, 22, 32, 33, NW.
10 Adieyi tulenda longoka muna lusansu lwalu? Yave wasadila Abingaile kasadisa Davidi mu lembi bwa mun’ekuzuka. Diau adimosi mpe kevanganga kwa yeto o unu. Kansi, avo ntonta za vanga edi diambi zitulwakidi, katufwete vingila ko vo Nzambi katuma muntu kimana katusima. Vava vebwanga diambu, ke tuzayanga ko dina kevanga Nzambi yovo dina kalenda yambula muna lungisa ekani diandi. (Kim. 11:5) Kana una vo i wau, tulenda kala ye ziku vo Yave ozayanga mawonso mekutubwilanga ye osinga kutusadisa twasikila ye kwikizi muna yandi. Watusila nsilu vo: “Ikulonga yo kusonga nzil’okwenda: Ikulongesela, yo kusia meso.” (Nku. 32:8) Aweyi Yave kekutulongelanga? Aweyi tulenda vwila nluta muna malongi mandi? Ekuma tulenda kadila ye ziku vo Yave ofilanga nkangu andi o unu? Tala una yuvu yayi yavaninwa mvutu muna nkand’a Lusengomono.
MALONGI MALENDA KUTUTANINA
11. Aweyi Yave kazayidi mawonso mevangamanga muna nkutakani za nkangu andi?
11 E mona meso tutanganga muna Lusengomono kapu kia 2 ye 3, yisonganga vo Yesu Kristu ona wakembeswa wafimpa nkutakani nsambwadi z’Ásia Menor. Kristu wafimpa dimosi dimosi muna mawonso mavangamanga muna nkutakani zazina. Kasikil’owu, wayika mavangu ma wantu, akaka wabasanisina, akaka wabavana malongi. Adieyi tulenda longoka muna mona meso yayi? E nkutakani nsambwadi muna mona-meso yayi, i Akristu akuswa bezinganga tuka muna mvu a 1914. E malongi bavewa mesadilwanga muna nkutakani zawonso za nkangu a Nzambi mu nza yawonso. Muna kuma kiaki, tulenda vova ye ziku kiawonso vo Yave muna Mwan’andi wakinu fila nkangu andi. Aweyi tulenda vwila nluta muna mpila Yave kekutufidilanga?
12. Aweyi tulenda yambulwila vo Yave kafila ntambi zeto?
12 Okalanga y’elongi dia yeto kibeni i mpila yambote tulenda vwila nluta muna luludiku lwa Yave. Muna nkanda mia buka kia ntaudi akwikizi yo lulungalalu, Yave okutuvananga malongi mavimpi ma Nkand’a Nzambi. (Mat. 24:45) Muna vwa nluta muna nkanda miami, tufwete vaulanga e ntangwa muna tanga yo sadila mana tulongokanga. Elongi dia yeto kibeni i mpila Yave kalenda ‘kutulunga-lunga twalembi t’esakuba.’ (Yuda 24) Nga walongoka kala diambu muna nkanda mieto yo mona vo mu kuma kiaku diasonamena? Tambulwila dio nze luludiku lutukidi kwa Yave. Nze nkundi usimbidi vana vembo muna kulukisa wavenga e vonza, Yave olenda sadila mwand’andi muna kuvana luludiku yovo kulukisa mu kuma kia fu ofwete singika. Muna lemvokela luludiku lwa mwanda tuyambulanga vo Yave katufila. (Tanga Nkunga 139:23, 24.) Muna kuma kiaki, diamfunu twafimpanga e fu kieto kia longoka.
13. Ekuma dinina diamfunu vo twatoma fimpanga fu kieto kia longoka?
13 Oviokesa ntangwa yayingi muna nsaka dilenda kutuyiya e ntangwa ivavwanga muna kala y’elongi dia yeto kibeni. Mpangi mosi wavova vo: “Diasazu mu vilakana elongi dia yeto kibeni. Owau e nkubika za nsaka zitomene wokela ke mu mvu miavioka ko, ke zifutilwanga diaka nzimbu zayingi ko. Zitoma songwanga muna televizau, muna computador ye muna telefone. E sadilwa yayi yitomene sayana mwawonso.” Avo ke tuyikebele ko, malembe-malembe tulenda vilakana emvimba e ntangwa yo mfunu wakalanga y’elongi dia yeto kibeni. (Ef. 5:15-17) Konso muntu mu yeto kafwete kiyuvula vo: ‘Nga yivaulanga e ntangwa muna longoka Nkand’a Nzambi una ufwene? Nga ntangw’a kubika malongi ma lukutakanu kaka ivaulanga?’ Avo i wau, nanga diambote twatoma sadilanga fuku wa nsambila ya esi nzo yovo ntangwa twavaula mu kuma ki’elongi dia yeto kibeni mu toma satulula tusalu twa mwanda katuvana Yave muna kututanina muna luvuluku.—Nga. 2:1-5.
LUKASAKESO LULENDA KUTUSADISA MU ZINDALALA
14. O Nkand’a nzambi aweyi usongelanga vo Yave ozeye ntantu zeto?
14 Davidi mpasi zayingi kawanana zau muna zingu kiandi. (1 Sam. 30:3-6) E mvovo miandi miavumunwinwa misonganga vo Yave wazaya mpasi zandi. (Tanga Nkunga 34:18; 56:8.) Yave otomene zaya mpasi zeto. Vava ‘tubudikanga ntima’ yovo “kendalala,” okutufinamanga. Ediadi dilenda kutufiaulwisa nze una diafiaulwisa Davidi ona wayimbila vo: “Mun’ekembo ye kiese muna walakazi waku: Kadi wamona mpasi zame; wazaya ntantu zame za moyo.” (Nku. 31:7) Kansi, Yave mayingi kevanganga ke bakula kaka mpasi zeto ko. Okutukumikanga yo kutufiaulwisa. O tukutakanu twa Kikristu i mpila yambote kevangilanga wo.
15. Adieyi tulenda longoka mu dina diabwila Asafi?
15 Dina diabwila Asafi wa ntozi a nkunga ditoma songanga nluta mia kala muna tukutakanu. Vava kamona e mpasi z’ansongi ekolo yimpumbulu bakala ye zingu kiambote, Asafi wakendalala yo yantika katikisa o mfunu wa sadila Nzambi. Muna kuma kia lukendalalu lwandi wavova vo: ‘Ntim’ame ubisukidi, mbwene mpasi muna ngudi a mbundu.’ Ediadi dianyoyesa muna sadila Yave. Adieyi diakasakesa Asafi mu vutukila e kiese kiandi? Wavova vo: “Yavana ngyele kuna nzo avauk’a Nzambi.” Vava kakala vamosi y’akw’andi asambidi a Yave, Asafi wasingika ngindu zandi. Wabakula vo e zingu kiambote bakala kiau yimpumbulu kia kolo kiandwelo kwandi, Yave osinga kubafwasa. (Nku. 73:2, 13-22) Ediadi dilenda kutubwila mpe. O vilwa tumonanga mu nza yayi ya Satana ulenda kutukendeleka yo kutuyoyesa. O kutakana ye mpangi zeto dilenda kutukumika yo kutusadisa mu kwamanana sadila Yave ye kiese kiawonso.
16. Aweyi tulenda bakila nluta muna nona kia Kana?
16 Adieyi olenda vanga kele vo diambu dibwidi muna nkutakani dikuludi etima diaku dia kwenda muna tukutakanu? Dilenda kala vo nsoni omonanga mu kuma ki’elau dia salu wayambula yovo ntatani una zau ye mpangi mosi muna nkutakani. Avo i wau, e nona kia Kana kilenda kusadisa. (Tanga 1 Samuele 1:4-8.) Sungamena vo Kana wakendalala yo telamwa moyo mu kuma kia Penina wa mpal’andi. E ntantu zandi zawokelanga konso mvu vava bayendanga kuna Silo mu kelela Yave kimenga. Vava lukendalalu lwandi lwasaka, Kana ‘wadila yo lembi dia.’ Kansi, kayambula kwenda kuna saba ko kuna kafwana sambila Yave. Yave wamona lukwikilu lwandi yo kunsambula.—1 Sam. 1:11, 20.
17, 18. (a) Nkia mpila tutambulwilanga lukasakeso muna tukutakanu? (b) Aweyi omonanga mu mpila ina Yave kekutusadisilanga kimana twazindalala yakuna mbaninu?
17 O unu Akristu bafwete tanginina mbandu a Kana ya kwendanga muna tukutakanu ntangwa zawonso. Yeto awonso tuzeye wo vo tukutakanu nkuma yo lukasakeso tuvananga. (Ayib. 10:24, 25) O zola besonganga mpangi zeto kutoma kutufialwisanga. Kasikil’owu, avo tuwidi diambu diambote mun’elongi yovo muna mvutu za mpangi zeto ditoma simbanga ntima mieto. Vava tumokenanga kuna lubantiku yovo kuna mfoko a lukutakanu, mpangi mosi olenda kutusia sungididi yo kutuvovesa diambu dia lukasakeso. (Nga. 15:23; 17:17) Vava tuyikakesanga e ndinga zeto muna yimbidila Yave, ntim’eto utoma yangalalanga. Musungula vava tukalanga ye diambu dikututokanesanga, i ntangwa tuvwang’o mfunu a lufiaulwisu tutambulanga muna tukutakanu. Yave okutulunga-lunganga muna ‘fiauzi wandi’ yo kutusadisa twazindalala ye kwikizi.—Nku. 94:18, 19.
18 Ekolo tubundanga e vuvu muna walakazi wa Nzambi eto, tumonanga nze Asafi wa ntozi a nkunga vava kayimbidila Yave vo: “Osimbinini koko kwame kwalunene. Okumfidila muna luludiku luaku.” (Nku. 73:23, 24) Tutoma vutulanga matondo wau vo Yave okutuyingilanga muna luvuluku!
[Yuvu ya Longoka]
[Foto ina muna lukaya lwa 28]
Ngeye mpe, Yave watunta
[Foto ina muna lukaya lwa 30]
Tuyingilwanga muna sadila malongi ma Nzambi
[Foto ina muna lukaya lwa 31]
Tutaninwanga muna lukasakeso tuvewanga
