Nga Omwesanga Nkembo a Yave?
Nga Omwesanga Nkembo a Yave?
“Vo i yeto . . . tumwesa nkembo a [Yave] nze pelo.”—2 KOR. 3:18.
NKIA MVUTU OVANA?
Aweyi tulenda kembelela Yave kana una vo tu wantu alembi lunga?
E sambu yeto yo kalanga muna tukutakanu twa Kikristu aweyi dilenda kutusadisila mu mwesa nkembo a Nzambi?
Adieyi dilenda kutusadisa mu kwamanana kembelela Yave?
1, 2. Ekuma tulenda vovela vo tulenda tanginina nkal’a Yave?
YETO awonso twafwanana yo mase meto diakala muna mpwa yovo muna fu yeto. Muna kuma kiaki, ke tusivikanga ko kele vo tuwidi muntu ovovese mwan’etoko vo: ‘Ongeye wafwanana kikilu yo s’aku!’ E dumbelele vo: ‘Ngeye otoma kunsungamesanga ngw’aku!’ Nkumbu miayingi o wana betangininanga mavangu ma mase mau. Kansi, adieyi tuvova mu kuma kieto? Nga tulenda tanginina Yave wa S’eto ezulu? Kana una vo ka tulendi kumona ko, muna longokanga Nkand’a Nzambi, muna tala nsema, badika mana tutanganga, musungula mavangu ye mvovo mia Yesu Kristu wa Mwan’a Nzambi, tulenda bakula nkal’andi. (Yoa. 1:18; Roma 1:20) Dialudi, tulenda mwesa nkembo a Yave.
2 Una kasemene Adami yo Eva ko, Nzambi wakala ye ziku vo wantu badi vanga luzolo lwandi yo tanginina nkal’andi yo kunkembelela. (Tanga Etuku 1:26, 27.) Muna songa vo tuvuminanga Nzambi, tufwete tanginina nkal’a Mvangi eto. Avo tuvangidi wo, tukala y’elau dia mwesa nkembo a Nzambi, kana una vo twaswaswana muna fu ya kisi nsi, makanda ye nsasuk’eto. Ekuma? Kadi “Nzambi ke nkwa mandangi ko: kansi muna zula yawonso, on’okumvumina yo vanga nsongi, wina y’edieng’oku kena.”—Mav. 10:34, 35.
3. Akristu aweyi balenda mona ekolo besadilanga Yave?
3 Akristu akuswa bemwesanga nkembo a Yave. Paulu wa ntumwa, mosi muna Akristu akuswa wavova vo: ‘Vo i yeto awonso, o tose tuvungumwinu, tumwesa nkembo a Yave nze pelo, tukitulwilu muna fwaniswa kiau akimosi, tuka muna nkembo yamuna nkembo.’ (2 Kor. 3:18) Vava Mose wa ngunza kamokena yo Yave kuna Mongo a Sinai yo twasa babu yasonama Nkanikinu Kumi, nkand’andi a lose wakezimanga. (Luv. 34:29, 30) Kana una vo nkanda a lose lw’Akristu ke ukezimanga ko vava besamunanga oma ma Yave, nkal’andi y’ekani diandi di’esivi, o wantu bemonanga kiese besonganga. Nze pelo kia nz’ankulu kiatoma lengoka, akuswa ye akw’au mameme makaka bena ye vuvu kia zingila ova ntoto, bemwesanga nkembo a Yave muna zingu kiau yamuna uselo wau. (2 Kor. 4:1) Nga omwesanga nkembo a Yave muna nkal’aku yo salanga ntangwa zawonso nze nteleki a Kintinu?
TUZOLELE MWESA NKEMBO A YAVE
4, 5. (a) Nze Paulu, nkia vita tunwananga? (b) Nkia mfwilu diatutwasila esumu?
4 Wau vo tu selo ya Yave, ka lukatikisu ko vo tuzolele zitisa yo kembelela Mvangi eto muna mawonso tuvanganga. Kansi, nkumbu miayingi dina tuzolanga ke diau ko tuvanganga. Paulu mpe wanwananga ye diambu diadi. (Tanga Roma 7:21-25.) Muna songa e kuma kia vita yayi Paulu wasoneka vo: “Awonso basumuka, yo funga muna nkembo a Nzambi.” (Roma 3:23) Kieleka, esumu dia Adami twasambukila, dibundunanga yo ‘yala’ wantu awonso.—Roma 5:12; 6:12.
5 Nki i sumu? Esumu i mawonso ka mena ngwizani ko ye nkal’a Yave, nkanikinu miandi, nzila zandi ye luzolo lwandi. Esumu ngwizani a muntu difwasanga yo Nzambi. Nze una nti yovo etadi dilenda kakidila e nkongo mu nonga e bulu, esumu dilenda kutukakidila mu mwesa nkembo a Nzambi. Tulenda sumuka kuna lukanu yovo mu kuma kia vilwa. (Nta. 15:27-31) Esumu diatoma yala wantu yo kubavambula yo Mvangi au. (Nku. 51:5; Yes. 59:2; Kol. 1:21) Muna kuma kiaki, wantu awonso bavidisa ngwizani au yo Yave y’elau diampwena dia mwesa nkembo a Nzambi. Ka lukatikisu ko, esumu i diambu dilutidi twasa mpasi muna zingu kia wantu.
6. Ekuma tulenda mwesa nkembo a Nzambi kana una vo tu asumuki?
6 Kanele vo tu asumuki, Yave “i Nzambi a vuvu.” (Roma 15:13) Wavana Yesu Kristu se kimenga kia lukûlu muna sukisa esumu. Muna kuma kia lukwikilu lweto muna kimenga kiaki, twavevolwa muna ‘ubundu w’esumu’ ye tulenda mwesa nkembo a Yave. (Roma 5:19; 6:6; Yoa. 3:16) O tatidila e ngwizani yayi yambote yo Nzambi, dikutuvana elau dia vwa nsambu za Yave tuka owau ye vuvu kia moyo a mvu ya mvu kuna sentu. Kana una vo tu asumuki, tuvwidi elau diampwena dia badikilwa kwa Nzambi vo twafwana mwesa nkembo andi.
MWESA NKEMBO A NZAMBI
7. Adieyi tufwete zaya muna mwesa nkembo a Nzambi una ufwene?
7 Muna mwesa nkembo a Nzambi una ufwene, tufwete zaya usumuki weto. (2 Tus. 6:36) Tufwete zayanga yo sia ngolo za venga usumuki weto kimana twamwesa nkembo a Nzambi una ufwene. Kasikil’owu, avo tubwidi mun’esumu dia tala mavangu ma zumba, tufwete zaya e vonza kia vangu diadi yo vava lusadisu lw’akuluntu. I bosi, tufwete sia ngolo muna yambula dio. (Yak. 5:14, 15) Diadi i diambu diantete tufwete vanga avo tuzolele kembelela Nzambi una ufwene. Wau vo tu asambidi a Yave, tufwete toma kuyifimpanga mu zaya kana vo tulemvokelanga nkanikinu miandi miansongi. (Nga. 28:18; 1 Kor. 10:12) Tufwete vanganga wawonso mu sunda konso lutovoko tuna lwau kimana twamwesa nkembo a Nzambi.
8. Adieyi tufwete vanga kana una vo tu wantu alembi lunga?
8 Vana vena wantu awonso bazinga kala ova ntoto, Yesu kaka wayangidika Nzambi yo mwesa nkembo andi muna mawonso. Kana una vo ke twalunga ko nze Yesu, tulenda tanginina mbandu andi. (1 Pet. 2:21) Yave omonanga yo sambula e ngolo tuvanganga muna nungunuka muna mwanda yo kunkembelela.
9. O Nkand’a Nzambi aweyi ulenda sadisila Akristu ana bazolele mwesa nkembo a Nzambi?
9 Nkand’a Nzambi ulenda kutusadisa muna mwesa nkembo a Nzambi una ufwene. Tufwete longokanga Nkand’a Nzambi yo toma badika mana tulongokanga. (Nku. 1:1-3) Otanganga Nkand’a Nzambi lumbu yawonso yo sadila mana tutanganga, dikutusadisa mu nungunuka muna mwanda. (Tanga Yakobo 1:22-25.) O zayi wa Nkand’a Nzambi ukumikanga lukwikilu lweto ye kutusadisa mu venga esumu yo yangidika Yave.—Nku. 119:11, 47, 48.
10. E sambu aweyi kilenda kutusadisila mu sadila Yave una ufwene?
10 Muna mwesa nkembo a Nzambi, tufwete “kwaminina muna sambu.” (Roma 12:12) Tufwete lombanga kwa Yave muna sambu kimana katusadisa twansadila mu mpila ina keyangalelanga. Tufwete lombanga mwand’andi avelela yo lukwikilu lwasikila lulenda kutusadisa mu zizidila ntota ye ndekwa zatoma “sansang’e diambu dia ludi.” (2 Tim. 2:15; Mat. 6:13; Luka 11:13; 17:5) Nze una mwana kebundilang’e vuvu kwa s’andi, oyeto mpe tufwete bundanga e vuvu kwa Yave wa S’eto ezulu. Avo tulombele lusadisu lwa Yave kimana twansadila una ufwene, tulenda kala ye vuvu vo osinga kutusadisa. Vana fulu kia yindula vo e sambu yeto tokanesa yikuntokanesanga, tufwete sambanga muna kunkembelela, kuntonda, lomba lusadisu lwandi, musungula muna ntangw’ampasi yo kunsadila mu mpila ilenda twasa nkembo muna nkumbu andi.—Nku. 86:12; Yak. 1:5-7.
11. Aweyi tukutakanu tulenda kutusadisila mu mwesa nkembo a Nzambi?
11 Nzambi wavana kiyekwa kia dikila mameme mandi kwa “ntaudi akwikizi yo lulungalalu.” (Mat. 24:45-47; Nku. 100:3) Buka kia ntaudi a kwikizi yo lulungalalu bevanganga mawonso kimana mpangi zau zakwikizi bamwesa nkembo a Nzambi. Nze una tukwendanga kwa ntungi a nlele kimana kasingika mvwatu mieto, okwenda muna tukutakanu twa Kikristu dikutusadisa mu singika nkal’eto. (Ayib. 10:24, 25) Muna kuma kiaki, avo fu kia sukinina tuna kiau, tufwete sia ngolo twalwakanga mu ola yambote kimana twavwa nluta mia malongi mawonso mevewanga muna tukutakanu.
TUTANGININA NZAMBI
12. Aweyi tulenda tanginina Nzambi?
12 Avo tuzolele mwesa nkembo a Yave tufwete ‘tanginina Nzambi.’ (Ef. 5:1) E mpila ambote tulenda tanginina Yave i badikila mambu nze una kebadikilanga mo. Osia ngindu zeto va fulu kiantete ke mu ngindu za Nzambi ko, dilenda kunkendeleka yo kututwasila mpasi. Wau vo wantu a nza batuzungidi mu wisa kia Nkadi Ampemba wa Satana bena, tufwete sia ngolo za menga mawonso kemenganga Yave yo zola mana kezolanga. (Nku. 97:10; 1 Yoa. 5:19) Tufwete kala ye ziku vo tusalanga una ufwene yo vangila mawonso muna nkembo andi.—Tanga 1 Korinto 10:31.
13. Ekuma tufwete mengena esumu? Nkia mambu tuvenga avo tumengen’esumu?
13 Wau vo Yave omenganga esumu, yeto mpe tufwete dio menganga. Ediadi dikutufila mu vanga mawonso muna venga mavangu malenda kutufila mun’esumu. Kasikil’owu, tufwete kuyikenga muna umpukumuni w’abendomoki, kadi ulenda kutukakidila mu kembelela Nzambi. (Nsi. 13:6-9) Tufwete vanganga wawonso mu lembi kala entwadi y’abendomoki yovo konso muntu oyikilwanga vo mpangi, kansi osafulanga nkumbu a Nzambi. Kana nkutu yitu kieto, ke tufwete kalanga yandi entwadi ko. (1 Kor. 5:11) Ofilana mpaka y’abendomoki yovo awana bevezanga nkubik’a Yave ke dikututwasila nluta ko. Dialudi, otanganga nsangu zau muna nkanda yovo muna Internet dilenda sia lukwikilu lweto mu vonza.—Tanga Yesaya 5:20; Matai 7:6.
14. Nkia mpila yambote tulenda tanginina Yave? Ekuma?
14 O songa zola i mpila yambote tulenda tanginina S’eto ezulu. (1 Yoa. 4:16-19) O zola tusonganga kwa muntu yo nkw’andi i sinsu tuzayilwanga vo tu alongoki a Yesu ye selo ya Yave. (Yoa. 13:34, 35) Kana una vo diampasi dikalanga muna songa zola muna kuma kia usumuki weto, tufwete sianga ngolo mu songa zola ntangwa zawonso. O songa zola ye fu yakaka ya Kikristu dilenda kutusadisa mu venga esumu ye mavangu makaka mambi.—2 Pet. 1:5-7.
15. Avo tuzolanga akaka, aweyi tukadila yau?
15 O zola kulenda kutufila mu vanga edi diambote kw’akaka. (Roma 13:8-10) Kasikil’owu, o songanga o zola kw’akazi eto dilenda kutusadisa mu lembi safula longo lweto. O songanga o zola kw’akuluntu yo kubazitisa mu kuma kia salu kiau, dilenda kutufila muna kubasakalela yo lemvokela luludiku lwau. O wana bezolanga, zitisa yo lemvokela mase mau, ke balendi kubakumba ko. Avo tuzolanga akaka, ke tuyindula ko vo yeto tubasundidi ngatu kubaveza. (Yak. 3:9) Akuluntu ana bezolanga ekambi dia Nzambi, bekadilanga yau kuna zola yo walakazi.—Mav. 20:28, 29.
16. O songanga zola aweyi dilenda kutusadisila muna salu kieto kia umbangi?
16 Tufwete songanga mpe zola muna salu kia umbangi. Muna kuma kia zola kweto muna Yave, ke tuyambula ko vo luvezo y’akaka ke betambulwilanga nsangu zambote ko, batuyoyesa. Vana fulu kia yoya, tufwete kwamanana samuna nsangu zambote. Zola kukutufila mu toma kubama yo sianga ngolo za sala e salu kia umbangi una ufwene. Avo tuzolanga kieleka Nzambi ye wantu, ke tubadikila salu kia samuna nsangu za Kintinu ko nze zitu yovo salu kiampasi. Kansi, tubadikila kio s’elau diampwena yo sala kio ye kiese kiawonso.—Mat. 10:7.
KWAMANANA KEMBELELA YAVE
17. Adieyi tufwete vanga wau tuzeye vo usumuki weto ulenda kutukakidila mu lembi mwesa nkembo a Nzambi?
17 Ndonga mu nza yawonso ke bazeye vonza ki’esumu ko, kansi yeto tutomene kio zaya. Muna kuma kiaki, tusianga ngolo za venga esumu. Wau tuzeye vo tu asumuki, tufwete longanga ntona zeto kimana zatusadisa mu venga yo sunda ngindu, zolela ye makani mambi tulenda yima muna ntima mieto. (Roma 7:22, 23) Kana una vo tu wantu alembi lunga, o Nzambi lenda kutukumika mu vanga edi diambote.—2 Kor. 12:10.
18, 19. (a) Adieyi dilenda kutusadisa mu sunda vita tunwananga ye mianda miambi? (b) Nki’ekani tufwete kala diau?
18 Avo tuzolele kembelela Yave, tufwete nwana mpe vita ye mianda miambi. E nwaninwa ya mwanda katuvana Nzambi ilenda kutusadisa mu sunda e vita yayi. (Ef. 6:11-13) Satana ovanganga mawonso muna tambula nkembo una ufwene vewa kaka kwa Yave. Nkadi ampemba osianga ngolo muna fwasa ngwizani eto ambote yo Yave. Kansi, ndonga muna yeto wantu alembi lunga, tuka ambuta ye aleke vava tuzindalalanga ye kwikizi muna kembelela Nzambi, dikalanga kuna kwa Satana nze yandi owend’o mbata. Muna kuma kiaki, yambula twakwamanana sanisina Yave nze vangwa ya mianda kun’ezulu ana bevovanga vo: “Ofweno, e Yave, wa Nzambi eto, o tambula nkembo, yo zitu, ye ngolo: e kuma kadi, i nge wasemena lekwa yawonso, muna luzolo luaku mpe i inina, yo semwa.”—Lus. 4:11.
19 Diakala nkia diambu dilenda kutubwila, yambula twakala y’ekani dia kwamanana kembelela Yave. Nzambi otoma yangalalanga wau kemonanga ndonga bevanganga wawonso muna kuntanginina yo mwesa nkembo andi. (Nga. 27:11) Yambula e ngindu zeto zakala nze za Davidi ona wayimbila vo: ‘E Yave wa Nzambi ame, ikuvana matondo yo ntim’ame wawonso; yo kembelela nkumbu aku yakwele mvu.’ (Nku. 86:12) Ekwe mpila tulakukilang’o moyo e lumbu tumwesa nkembo a Yave mu mpila yalunga yo kunkembelela yakwele mvu! E lumbu kiaki kikala se ntangw’a kiese kwa wantu awonso alemvoka. Nga omwesa nkembo a Yave wa Nzambi tuka wau yakwele mvu?
[Yuvu ya Longoka]
[Mafoto zina muna lukaya lwa 27]
Nga omwesanga nkembo a Yave mu mpila zazi?
