Yuvu Y’atangi

O lufwa lwa minkwikizi aweyi lwinina ‘luantalu vana meso ma Yave’?

▪ Ntozi a nkunga wavumunwinwa mu yimbila vo: “Luantalu muna meso ma Yave, i lufwa lua minkwikizi.” (Nku. 116:15) E mioyo mia asambidi awonso akieleka a Yave miantalu vana meso mandi. Kansi, e sono kia Nkunga 116 ke kiyikanga lufwa lwa muntu mosi kaka ko.

Kele vo elongi dia lufwa lwa Nkristu ofilanga, ke diambote ko mu sadila e sono kia Nkunga 116:15 mu kuma kia mvumbi, kana nkutu vo ofwidi ye kwikizi muna Yave. Ekuma? E kuma kadi e mvovo mia ntozi a nkunga diambu diakaka misonganga. E mvovo miami misonganga vo nze buka o lufwa lwa minkwikizi miawonso luantalu vana meso ma Nzambi, ke yambula ko vo awonso bafwa.—Tala Nkunga 72:14; 116:8.

E sono kia Nkunga 116:15 kitoma sikidisanga vo Yave ke yambula ko vo selo yandi nze buka bafukiswa emvimba ova ntoto. O lubangamu ye mpasi tuzizidilanga mu tandu kiaki i ziku kisonganga vo Nzambi ke yambula ko vo twafukiswa emvimba.

Muna kuma kia nkum’andi wakondwa tezo y’ekani diandi ke dilendi funga ko, Yave ke yambula ko vo yeto awonso twafwaswa nze buka. Kele vo Nzambi oyambwidi vo yeto awonso twafwaswa, dilenda songa vo mbeni zandi basundidi o nkuma. Ediadi diadi kakidila e ndungana ekani dia Yave dia sia vo wantu ana bekunlemvokelanga bavwa nza yo zingila vo. (Yes. 45:18; 55:10, 11) Avo asambidi awonso bafukiswa emvimba, ke vadi kala wantu ko ana balenda sadila Yave e salu kiavauka vana yanzala kia tempelo andi ya mwanda ova ntoto. Ke vadi kala nkubilw’a “nz’ampa” ko i sia vo kintwadi kia wantu ansongi bezingila ova ntoto muna wisa ‘ki’ezulu diampa.’ (Lus. 21:1) Vana ntandu, kele vo minkwikizi miawonso bafukiswa mvimba ova ntoto, ekani dia Luyalu lwa Kristu Lw’ezunda dia Mvu ke diadi lungana ko.—Lus. 20:4, 5.

Avo mbeni bafukisi emvimba minkwikizi miawonso ova ntoto, e nkal’a Nzambi, nkumbu andi ambote ye Kimfumu kiandi kia Nz’amvimba kiadi safulwa yo fidiswa mpaka. Vana ntandu, muna kuma kia zitu wa nkumbu andi avauka, Yave kesinga yambula ko vo nze buka e selo yandi yakwikizi yawonso bafwa. Badika edi: Wau vo Nzambi ‘wakondw’o vilwa,’ kalendi funga ko muna vuluza awonso ana bekunsadilanga ye kwikizi. (Nsi. 32:4; Etu. 18:25) Vana ntandu, kele vo yambwidi vo selo yandi yawonso yafukiswa, ke dikala ngwizani ko ye Nkand’a Nzambi uvovanga vo: “Yave kesisa nkangu andi ko mu kuma kia nkumbu andi anene.” (1 Sam. 12:22) Kieleka, “Yave kesisa nkangu andi ko, ngatu bembola vwa kwandi.”—Nku. 94:14.

Dia lufiaulwisu kikilu mu zaya vo nkangu a Yave ke ufukiswa emvimba ko ova ntoto! Muna kuma kiaki, yambula yeto awonso twakala ye kwikizi muna Nzambi yo bunda e vuvu muna nsilu andi uvovanga vo: “Ke vena nwaninwa kiavangilw’omo ngeye kisikila ko; o tubini twawonso tukutelamena muna mfundu yeles’oyelesa to. Okwaku i vwa kwa ntaudi za Yave, o unsongi wau wa mono.”—Yes. 54:17.

[Mvovo mia Sina muna lukaya lwa 22]

Nzambi ke yambula ko vo nkangu andi wafukiswa emvimba