“Ndozi Ame Yilungane”

Mvu kumi ye tanu miviokele kala tuka Emilia kayambulwila e salu kia mviti a nzila a ngonde ke ngonde. Kansi, muna mvu miami oyindulanga nsambu kavwa muna zingu kiandi vava kasalanga e salu kia ntangwa ke ntangwa. Muna kuma kiaki, ozolele wokesa diaka e salu kiandi.

Wau vo salu kiandi ntangwa yayingi kiayiyanga, Emilia kakala diaka ye kiese ko. Lumbu kimosi, wavova vana vakala akw’andi a salu vo: “Nzolele vo yasalanga kaka ola zakete!” Mfidi andi a salu wanwa yo kunyuvula kana vo dina kavova dialudi. Emilia watambulwila. Wau vo kuna salu kiandi lumbu kiamvimba besalanga, muna vewa nswa wa sala ola zakete diavava vo Emilia kenda mokena yo mfumu a salu. Mpangi eto wakubama mu kwenda mokena yo mfumu a salu, wavuvika ntima yo lomba unkabu muna sambu.

Ekolo bamokenanga, Emilia wasadila ndekwa yo unkabu yo kunlomba vo kankulula ola za salu. Wazayisa mfumu a salu vo osinga sadila ntangwa yoyo muna sadisa akaka. Wavova vo: “I Mbangi a Yave, wantu isadisanga muna mwanda. Owau e fu yambi mu wokela kaka ina. Wantu bafwete zaya nkanikinu mia nkal’ambote ye ngangu za Nkand’a Nzambi tulonganga. E fululu kiame muna salu ke kikuluka ko, kansi nzolele kala ye ntangwa yafwana muna sadisa wantu. Kiaki i kuma nzolele vo yasalanga kaka ola zakete.”

Mfumu a salu watoma kunwunikina yo lomba ntangwa kimana katoma badika diambu diadi. I bosi, wavova vo: “Muna kuma kina oyikidi, mbwene vo mfwete tambulwila ndomba aku. Kansi, nga ozeye wo vo mfutu aku mpe usinga kuluka?” Emilia watambulwila yo vova vo avo divwilu mfunu, osinga vevola mpe zingu kiandi. Wakudikila vo: “O sadisa wantu i diambu disundidi mfunu mu zingu kiame.” Mfumu a salu wamvovesa vo: “Itoma sivikanga ana besadilanga e ntangw’au muna sadisa akaka.”

Emilia i muntu antete wavewa nswa wasala ola zakete muna salu kiakina. Owau Emilia lumbu yá kaka kesalanga muna lumingu. Watoma sivika kadi vana fulu kia kululwa mfutu andi, wakudikilwa mfutu. Wavova vo: “Ndozi ame yilungane, ndenda vutuka sala se mviti a nzila a ngonde ke ngonde.”

Nga olenda singika e mpila zingu kiaku kimana wakota yovo vutukila e salu kia mviti a nzila?

[Mvovo mia Sina muna lukaya lwa 32]

Mfumu a salu wamvovesa vo: “Itoma sivikanga ana besadilanga e ntangw’au muna sadisa akaka”