Uyikenga Muna Ntambu Mia Nkadi Ampemba

“Bakatuka mun’esokolo dia Satana.”—2 TIM. 2:26.

NKIA MVUTU OVANA?

Adieyi ofwete vanga kele vo fu kia kumba akaka una kiau?

Adieyi olongokele muna mbandu a Pilato ye Petelo dilenda kusadisa mu lembi bwa muna wonga yo lubangamu?

Aweyi olenda vengela nkenda zasaka?

1, 2. Nkia ntambu mia Nkadi ampemba tubadika mun’elongi diadi?

NKADI AMPEMBA okondanga selo ya Yave. Nswaswani ye nkongo ona vondanga e bulu kebakanga, Satana ke kondanga selo ya Yave ko y’ekani dia kubavonda. Kansi, Nkadi ampemba olekanga e ntambu muna baka selo ya Nzambi e kimoyo kimana kabakitula se abundu andi.—Tanga 2 Timoteo 2:24-26.

² O muntu muna baka bulu kiamoyo, olenda sadila ntambu mia mpila mu mpila. Olenda leka esokolo muna nkûka yo kubasusula vana fulu baswamini. Olenda sadila ntambu waswekama muna baka e bulu kuna kinsalukisa. Nkadi ampemba ntambu mia mpila yayi mpe kesadilanga muna baka selo ya Nzambi e kimoyo. Avo ka tuzolele bakama ko, tufwete lungalala yo zaya sinsu ilenda kutusadisa mu bakula ntambu mia Satana. Mun’elongi diadi tubadika una tulenda kuyikengela muna ntambu tatu ketoma bakilanga wantu o Nkadi ampemba. (1) Mvovo mia losola-losola, (2) wonga ye lubangamu ye (3) nkenda zasaka. Mun’elongi dilanda tubadika diaka ntambu miole kesadilanga Satana.

UYIKENGA MUNA MVOVO MIA LOSOLA-LOSOLA MINA NZE TIYA

3, 4. Adieyi dilenda bwa avo ka tutomene kenga mpova zeto ko? Yika nona.

³ Muna vaikisa yo vonda e bulu ya futa, e nkongo zakaka futa beyokanga. Diau adimosi mpe, Nkadi ampemba ovavanga sia tiya muna nkutakani muna vaikisa ampangi. I bosi, vava kemona vo ke bena diaka y’etininu ko, ovavanga kubabaka muna ntambu miandi. Aweyi tulenda vanina Satana e nzila lembi wo zaya?

 ⁴ Yakobo wa nlongoki watezanesa lubini ye tiya. (Tanga Yakobo 3:6-8.) Avo ka tutomene kenga mpova zeto ko, tulenda kwika tiya muna nkutakani. Aweyi dilenda vangamena? Badika e nona eki: Luzayisu luveno muna nkutakani vo mpangi mosi wankento okitukidi se mviti a nzila a ngonde ke ngonde. Kuna mfoko a lukutakanu, mpangi zole z’akento bayantikidi mokena mu kuma kia luzayisu lwalu. Mosi ovovele vo otomene yangalala wau mpangi kakitukidi se mviti a nzila. Wakaka ovovele vo kakitukidi mviti a nzila y’ekani diambote ko, kansi etunda kevavanga muna nkutakani. Vana vena ampangi zole zazi z’akento, nkia mpangi osola kakala nkundi aku? Ke diampasi ko mu bakula ona zolele kwika tiya muna nkutakani.

5. Adieyi tufwete vanga muna venga mvovo mia losola-losola mina nze tiya?

⁵ Aweyi tulenda vengela mvovo mia losola-losola mina nze tiya? Yesu wavova vo: “Muna ulolo wa ntima i uvovelang’o nua.” (Mat. 12:34) E diambu diantete tufwete vanga i fimpa ntim’eto. Nga tuvenganga ngindu zambi zilenda kutufila mu vova diambu dilenda kendeleka akaka? Kasikil’owu, avo tuwidi mpangi ovavanga kuyifwanisa mu tambula kiyekwa kia salu muna nkutakani, nga tukwikila vo kani diambote kena diau ovo tulenda yindula vo wete dia yandi kibeni kevavanga? Avo fu kia yindula makani mambi tuna kiau, diambote mu sungamena vo Nkadi ampemba wakatikisa ekani dia Yobi wa selo kia kwikizi kia Nzambi. (Yobi 1:9-11) Vana fulu kia kala ye ngindu zambi mu kuma kia mpangi eto, tufwete vava zaya e kuma tukunkumbilanga. Nga kuma kiasikila tuna kiau muna yindula e mpila yayi? Nga fu kia kondwa zola eki kiwokelanga mu lumbu yayi yambaninu kikutufilanga?—2 Tim. 3:1-4.

6, 7. (a) Ekuma tufwete vengela fu kia kumba akaka? (b) Adieyi tufwete vanga kele vo muntu utuvangidi mbi?

⁶ Badika e kuma yakaka ilenda kutufila mu kumba akaka. Dilenda kala vo tuzolele sivikisa akaka muna mavangu meto. Nanga tuvavanga songa vo yeto tuviokele akaka. Dilenda kala vo kuma tuvavanga muna sweka vilwa weto. Diakala vo lulendo, kimpala yovo dimbula e vuvu kukutufilanga mu kumba akaka, tuzaya wo vo e fu kiaki mfwilu kaka kitwasanga.

⁷ Ezak’e ntangwa, tulenda yindula vo kuma kiasikila tuna kiau mu kumba muntu. Dilenda kala vo diambu diambi kavovele mu kuma kieto. Kana una vo i wau, ke diambote ko mu vutula mbi muna mbi. Ovanga ediadi i kudikila  nkuni vana tiya yo lungisa ekani dia Nkadi ampemba, ke kani dia Nzambi ko. (2 Tim. 2:26) Tufwete tanginina mbandu a Yesu muna diambu diadi. Vava kalevolwanga, “kavutwidi malevo ko.” Kansi, “wiyiyekwele kaka kwa ndion’ofundisang’e mfundis’ansongi.” (1 Pet. 2:21-23) Yesu wakala ye vuvu vo Yave muna ntangw’andi ofundisa awana banlevolanga. Yeto mpe tufwete bundanga vuvu muna Nzambi. Avo tusadidi lubini lweto muna kasakesa akaka, tutatidila “kangwa kia ungudi” muna nkutakani eto.—Tanga Efeso 4:1-3.

VENGA WONGA YE NTOTA Z’AKUNDI ZINA NZE ESOKOLO

8, 9. Ekuma Pilato kazengela Yesu tumbu kia lufwa?

⁸ E bulu avo kibakamene muna ntambu, ke kilendanga diaka tina ko. Diau adimosi mpe, avo muntu obwidi muna ntota z’akundi, ke kalanga diaka ye wisa ko muna zingu kiandi. (Tanga Ngana 29:25.) Yambula twabadika wantu wole baswaswana babwa muna ntota za lubangamu ye wonga ye dina tulenda longoka muna mana mababwila.

⁹ Pontio Pilato wa Nyadi a Roma wazaya wo vo Yesu munkondwa kuma ye wazola kumvevola. Kieleka, Pilato wavova vo Yesu kavanga diambu ko ‘kafwana fwila.’ Kana una vo i wau, Pilato wanzengela tumbu kia lufwa. Ekuma? E kuma kadi Pilato wabwa muna umpukumuni wa nkangu. (Luka 23:15, 21-25) Muna lungisa ekani diau, atantu awaya bavova vo: “Andioyo, ovo okunyambula, ku nkundi a Kaisa ko.” (Yoa. 19:12) Muna lembi vuluza Kristu, Pilato nanga wonga wavidisa fulu kiandi yovo moyo andi kamona. Muna kuma kiaki, wavukumunwa kwa Nkadi ampemba yo lungisa luzolo lwandi.

10. Adieyi diafila Petelo mu vakulwila Kristu nkalu?

¹⁰ Petelo wa ntumwa mosi muna akundi a Yesu. Wasamunanga kw’awonso vo Yesu i Masia. (Mat. 16:16) Petelo wakwamanana ye kwikizi vava alongoki akaka ke babakula nsas’a longi dia Yesu ko yo kumbembola. (Yoa. 6:66-69) Vava atantu bakanga Yesu, Petelo wasadila nsosolo muna tanina Mfumu andi. (Yoa. 18:10, 11) Kansi, kuna kwalanda, Petelo wavakulwila Yesu Kristu nkalu mu kuma kia wonga. Ntumwa ndioyo wabwa mu fikolo muna ntambu a wonga wa wantu, ediadi diamfila mu lembi songa unkabu.—Mat. 26:74, 75.

11. Nkia umpukumuni tufwete zizidila?

¹¹ Wau vo tu Akristu, tufwete zizidila umpukumuni wavanga diambu dilenda kendeleka Nzambi. Mfumu za salu yovo wantu akaka balenda kutukomekena twalembi songa e ziku yovo tá zumba. Wan’a sikola balenda vukumunwa kw’akwau kimana bavuna muna lufimpu lwa sikola, tala mavangu ma zumba, nua fomo ye ndua zakaka za nkolwa, kolwa malavu yovo tá zumba. Adieyi dilenda kutusadisa mu lembi bwa muna ntambu a wonga wa wantu yo umpukumuni wavanga diambu dilenda kendeleka Yave?

12. Adieyi tulenda longoka muna mbandu a Pilato ye Petelo?

¹² Yambula twabadika dina tulenda longoka muna mbandu a Pilato ye Petelo. Pilato kazaya mayingi ko mu kuma kia Kristu. Kana una vo i wau, wazaya wo vo Yesu munkondwa kuma ye ke mpasi muntu ko. Kansi, Pilato kakala ye lulembamu ko ngatu zola muna Nzambi aludi. Muna kuma kiaki, Nkadi ampemba wambaka e kimoyo. Petelo wakala yo zayi waludi yo zola muna Nzambi. Kansi, ezak’e ntangwa Petelo kakalanga ye lusakalalu lwa ntima ko, wabwa muna  ntambu a wonga yo umpukumuni. Una Yesu kabakamene ko, Petelo wakisana vo: “Kana nkutu awonso bekut’esakuba, vo i mono ke wau ko.” (Maku 14:29) Kele vo Petelo wa ntumwa kabunda vuvu muna Nzambi nze ntozi a nkunga, diadi kunsadisa mu toma kubama mu kuma kia lubangamu lwabwa kuntwala. Ntozi a nkunga wavova vo: “O Yave wina yame, kimona wonga ko: O muntu aweyi kekumpangila?” (Nku. 118:6) Muna fuku wansuka kakala ova ntoto, Yesu wanata Petelo ye ntumwa zole zakaka muna mpatu ya Ngetesemane. Vana fulu kia lungalala, Petelo ye akw’andi baleka kwau. Yesu wabasikamesa yo kubavovesa vo: “Nuyingila yo samba, ke nwakota mu umpukumuni.” (Maku 14:38) Kansi, Petelo waleka diaka; i bosi, wabwa muna ntambu a wonga yo umpukumuni.

13. Aweyi tulenda zizidila umpukumuni wa vanga diambu diambi?

¹³ Tulenda longoka diaka elongi edi diamfunu muna mbandu a Pilato ye Petelo: Muna zizidila umpukumuni, tufwete kala yo zayi waludi, lulembamu, lusakalalu lwa ntima, zola muna Nzambi yo vumina Yave, ke wantu ko. Avo tuna ye lukwikilu yo zayi waludi, tusamuna oma ma lukwikilu lweto yo unkabu wawonso. Ediadi dikutusadisa mu zizidila umpukumuni ye wonga wa wantu. Ka tufwete bundanga vuvu kiasaka muna ngolo za yeto kibeni ko. Kansi, tufwete kalanga yo lusakalalu lwa ntima yo zaya vo nkum’a Nzambi tuvwidi o mfunu muna zizidila umpukumuni. Tufwete lombanga mwand’a Yave muna sambu yo yambula vo zola kweto muna yandi kwatufila mu zitisa nkumbu ye nkanikinu miandi. Vana ntandu, tufwete teka kubamanga mu kuma kia ntonta zilenda kutulwakila kuna sentu. Kasikil’owu, oteka kubama yo samba dilenda sadisa wan’eto mu zizidila ntonta z’akw’au bevavanga kubavukumuna muna mavangu mambi.—2 Kor. 13:7. *

VENGA NKENDA ZASAKA ZINA NZE NTAMBU ULENDA KOSOMONA

14. Adieyi Nkadi ampemba kezolanga twakwikila mu kuma kia masumu twavanga?

¹⁴ Umosi muna ntambu usiwanga vana velutilanga e bulu i kiemba kina kitensekwanga etadi dianene. Konso bulu kilutila vo, e kiemba kinkumbwilanga. E nkenda zasaka zilenda kituka nze kiemba kikosomonanga. Vava tusungamenanga masumu twavanga tulenda “fungumuka.” (Tanga Nkunga 38:3-5, 8.) Satana ozolanga twakwikila vo ke twafwana ko mu fwilwa nkenda kwa Yave yo lemvokela nkanikinu miandi.

15, 16. Aweyi lenda vengela nkenda zasaka zina nze ntambu ulenda kosomona?

¹⁵ Aweyi lenda vengela ntambu ulenda kosomona? Avo sumu diampwena osumukini, vang’e ngolo mu vutukila ngwizani aku ambote yo Yave. Vava akuluntu yo lomba lusadisu lwau. (Yak. 5:14-16) Sia e ngolo waviluka ntima yo singika dina divavwa singikwa. (2 Kor. 7:11) Kele vo longi oveno, kukendalala kwayingi ko. Elongi i sinsu kisonganga vo Yave okuzolanga. (Ayib. 12:6) Vanga ngolo mu lembi vutukila esumu diodio yo venga mambu malenda kufila mu sumuka diaka. Avo ovilukidi ntima yo venga sumuka diaka, kala ye lukwikilu vo kimenga kia Yesu Kristu kilenda fuka masumu maku.—1 Yoa. 4:9, 14.

¹⁶ Akaka bekendalalanga kwayingi mu kuma ki’esumu dina vo dialolokwa kala kwa Yave. Avo i wau oyindulanga, sungamena vo Yave waloloka Petelo ye  ntumwa zakaka vava babembola Mwan’andi anzolwa muna ntangwa ina kavavanga vo bakala yandi. Yave waloloka muntu ona wavaikiswa muna nkutakani ya Korinto vava kaviluka ntima. (1 Kor. 5:1-5; 2 Kor. 2:6-8) Nkand’a Nzambi uyikanga wantu basumuka masumu mampwena ana balolokwa kwa Nzambi vava baviluka ntima.—2 Tus. 33:2, 10-13; 1 Kor. 6:9-11.

17. O lukûlu adieyi lulenda vanga kwa yeto?

¹⁷ Yave osinga loloka yo vilakana masumu wavanga kele vo ovilukidi ntima yo tonda nkenda zandi. Kuyindula ko vo kimenga kia lukûlu lwa Yesu ka kilendi fuka masumu maku ko. Avo oyindwidi mpila yayi, olenda bwa muna ntambu mia Satana. Diakala nkia diambu Nkadi ampemba kazolele vo wakwikila, kimenga kia lukûlu kilenda fuka masumu mawonso bevilukanga ntima. (Nga. 24:16) Okwikila muna lukûlu, dilenda kusadisa mu vevoka muna zitu dia nkenda zasaka yo kukasakesa mu sadila Nzambi ye nsi a ntim’aku yawonso, fulumwinu kiaku kiawonso yo nyindu aku wawonso.—Mat. 22:37.

TUZEYE E NTAMBU MIA SATANA

18. Aweyi tulenda vengela ntambu mia Nkadi ampemba?

¹⁸ Satana ovavanga vo twabakama muna konso ntambu katulekele. Wau vo katulembele zaya ntambu mia Satana ko tulenda vanga wawonso muna lembi bakama kwa Nkadi ampemba. (2 Kor. 2:10, 11) Avo tulombele ngangu muna sambu kimana twazizidila ntonta, ke tubakama muna ntambu miandi ko. Yakobo wasoneka vo: “Ovo muntu vovo nwina wakondwa ngangu, mbula kalomba kwa Nzambi, on’ovevolanga kw’awonso, yo lembi semba; zivewa kwa yandi.” (Yak. 1:5) Tufwete zingila ngwizani ye sambu yeto muna kuyivananga mun’elongi dia yeto kibeni yo sadila mana tulongokanga muna Nkand’a Nzambi. Elongi dia Nkand’a Nzambi ye nkanda mivaikiswanga kwa ntaudi akwikizi yo lulungalalu, dikutusadisanga mu zaya yo venga ntambu mia Nkadi ampemba.

19, 20. Ekuma tufwete mengena edi diambi?

¹⁹ E sambu y’elongi dia Nkand’a Nzambi, dilenda kutusadisa mu zola edi diambote. Kansi, diamfunu mpe twamenganga edi diambi. (Nku. 97:10) Obadika mfwilu tulenda baka muna lungisa zolela yeto dilenda kutusadisa mu vanga wo. (Yak. 1:14, 15) Avo tumenganga edi diambi yo zola edi diambote, ke tusinga bwa muna ntambu mia Satana ko.

²⁰ Tuvutulanga matondo wau vo Nzambi okutusadisanga mu lembi sundwa kwa Satana. Muna mwand’andi, Diambu diandi ye nkubik’andi, Yave okutuvuluzanga ‘muna ndiona wambi.’ (Mat. 6:13) Mun’elongi dilanda, tulongoka ntambu miole miakaka ketoma sadilanga Nkadi ampemba muna baka selo ya Nzambi e kimoyo.

[Mvovo Vana Yand’a lukaya]

[Yuvu ya Longoka]

[Foto ina muna lukaya lwa 21]

E mvovo mia losola-losola, milenda kwika tiya muna nkutakani

[Foto ina muna lukaya lwa 24]

Olenda vevoka muna nkenda zasaka zilenda kosomona