Venga yo Telamena Ntambu mia Satana!

“Nutelamena tumpeso twa Nkadi ampemba.”—EF. 6:11.

NKIA MVUTU OVANA?

E selo kia Yave aweyi kalenda vengela bwa muna ntambu a mavwa?

Adieyi dilenda sadisa Nkristu wasompa mu lembi bwa muna wumbu dia zumba?

Ekuma okwikidilanga vo ozizidila e ntonta za luzolo lwa vwama ye zumba nluta ditwasanga?

1, 2. (a) Ekuma Satana ke fwilanga akuswa ye “mameme makaka” nkenda ko? (b) Nkia ntambu mia Satana tubadika mun’elongi diadi?

NKADI AMPEMBA WA SATANA ke fwilanga wantu nkenda ko, musungula awana besadilanga Yave. Muna kuma kiaki, onwananga vita ye nsadiswa z’akuswa. (Lus. 12:17) Akristu awaya akwikizi, yau bevitanga o ntu muna salu kia samuna e nsangu za Kintinu kisalwanga o unu yo senzeka vo Satana i nyadi a nza yayi. Nkadi ampemba, osianga mpe kitantu kwa “mameme makaka” ana beyikamanga akuswa, ye vuvu kia vwa moyo a mvu ya mvu kina Satana kavidisa. (Yoa. 10:16) Muna kuma kiaki, Satana una yo makasi mayingi. Ozevo, diakala vo vuvu kia vwila moyo kun’ezulu tuna kiau yovo va ntoto, Satana i ntantu eto. Una y’ekani dia kutubaka.—1 Pet. 5:8.

² Muna lungisa ekani diandi, Satana ntambu mia mpila mu mpila kesadilanga. Minkondwa-lukwikilu ana kavonda meso, ke betambulwilanga nsangu zambote ko ye ke bemonanga ntambu miami ko. Kansi, Nkadi ampemba obakanga mpe awana betambulwilanga nsangu zambote za Kintinu. (2 Kor. 4:3, 4) Mun’elongi divitidi tumwene una tulenda kuyikengela muna ntambu tatu ketoma bakilanga wantu o Satana: (1) mvovo mia losola-losola, (2) wonga ye lubangamu ye (3) nkenda zasaka. Owau, yambula twabadika una tulenda vengela yo telamena ntambu miole miakaka kesadilanga Satana. Luzolo lwa vwama ye ntota za tá zumba.

LUZOLO LWA VWAMA LUNA NZE NTAMBU ULENDA FIONTONA

3, 4. O telama moyo mu kuma kia mambu ma tandu kiaki, aweyi dilenda fidila muntu mu kala yo luzolo lwa vwama?

³ Muna kingana kiandi, Yesu wayika mbongo yakunwa  vana nsende. Wavova vo muntu olenda wá e diambu kansi o “ntelameno a moyo mu mambu ma tandu kiaki, yo luvuki lua umvwama, lufinangese e diambu, yo lembi yima e mbongo.” (Mat. 13:22) Elo, luzolo lwa vwama, i ntambu kesadilanga Satana wa ntantu eto.

⁴ Vena ye mambu mole malenda fiontona e diambu. Diantete, “ntelameno a moyo mu mambu ma tandu kiaki.” Omu lumbu yayi yambaninu yazala ye mpasi tuzingilanga vena ye mambu mayingi malenda kutelamesa moyo. (2 Tim. 3:1) Muna kuma kia mpasi za zingu ziwokelanga yo kondwa salu, olenda mona vo diampasi mu lungisa e nsatu za esi nzo. Olenda tokana mu kuma kia kusentu yo kiyuvula: ‘Nga ikala ye nzimbu zafwana vava yiyambula sala mu kuma kia kimbuta?’ Muna telama moyo mu kuma kia mambu mama, akaka bekuyivananga emvimba muna vava mavwa yo yindula vo e nzimbu zisinga kubatanina.

5. O “luvuki lua umvwama” aweyi lulenda kutuvukumwina?

⁵ O “luvuki lua umvwama” i diambu diazole kayika Yesu. O luvuki lwa umvwama yo telama moyo kulenda fiontona diambu. O Nkand’a Nzambi uvovanga vo e “nzimbu i vevelo.” (Kim. 7:12) Kansi, ke diangangu ko muna kuyivan’emvimba muna vava mavwa. Ndonga bemonanga vo ekolo bekuyivananga emvimba muna vava mavwa, o luzolo lwa kala yo mavwa mayingi luwokelanga. Akaka bakituka se abundu a kimvwama.—Mat. 6:24.

6, 7. (a) Nkia diambu dilenda bwa kuna salu dilenda kufila mu yima luzolo lwa vwama? (b) Nkia salu o Nkristu kafwete sungamena vava kelombwanga vo kasala ola zayingi kuna salu?

⁶ Lembi wo zaya o muntu olenda yima luzolo lwa vwama. Kasikil’owu, badika e nona eki. O mfumu aku a salu olenda kuvovesa vo: “Nsangu zambote ngina zau! Tuveno diaka salu kiayingi, vava tuyantika kio muna ngonde ilanda, divava vo twasalanga kwayingi yamuna ola zakaka zina vo ke za salu ko. Muna kuma kiaki, avo vangidi ngolo, nzimbu zayingi ofutwa.” Adieyi olenda vanga muna elau diadi? Dialudi, diamfunu muna lunga-lunga esi nzo aku, kansi mbebe yakaka mpe una yau. (1 Tim. 5:8) Una ye salu yakaka ofwete sungamena. Ola kwa okala sala? Nga e salu kiaki kilenda vunza salu yaku ya mwanda nze lungana muna tukutakanu ye fuku wa Nsambila ya Esi Nzo aku?

⁷ Muna baka nzengo, fwete zaya dina disundidi o mfunu kwa ngeye. Nga nzimbu zisundidi o mfunu ovo ngwizani aku yo Yave? Nga ekani dia baka nzimbu  zayingi dikufila mu yambula sia salu kia Kintinu va fulu kiantete? Nga olenda bakula una luzolo lwa vwama lulenda kufidila mu sia kimwanda kiaku ye kia esi nzo aku mu vonza? Avo diadi dibwididi, aweyi olenda zindalela yo venga luzolo lwa vwama lulenda kufiontona?—Tanga 1 Timoteo 6:9, 10.

8. Nkia nona ya Nkand’a Nzambi ilenda kutusadisa mu fimpa e mpila zingu kieto?

⁸ Muna venga luzolo lwa vwama lulenda kufiontona, ofwete fimpanga e mpila zingu kiaku ntangwa ke ntangwa. Kukadi nze Esau ko ona waveza mambu ma mwanda muna mavangu mandi. (Etu. 25:34; Ayib. 12:16) Kukadi ko nze mvwama ona Yesu kavovesa vo muna kala se nlandi andi, kateka mavwa mandi yo kayila asukami. Vana fulu kia tambulwila, o mvwama “okatukìdi kuna ntantu: kadi nkwa mavwa mayingi.” (Mat. 19:21, 22) Wau vo wabakama muna ntambu a mavwa, wavidisa elau diampwena diakituka se nlandi a muntu ona sundidi nene muna wantu bazinga kala ova ntoto! Uyikenga muna lembi vidisa elau dia kala se nlongoki a Yesu Kristu.

9, 10. Mun’owu wa Nkand’a Nzambi, aweyi ofwete badikilanga mavwa?

⁹ Muna lembi bwa mu ntambu wa luzolo lwa vwama tufwete lemvokelanga luludiku lwa Yesu: “Ke nutelamw’e mioyo ko, nwavova vo, ‘nki tudia’? ovo, ‘nki tunua’? ovo, ‘nkia mpwata tuvwata’? Kadi e lekwa yiyi itombwanga kwa zula; o S’eno wina kun’ezulu, ozeye wo vo lekwa yayi yawonsono nuvwidi yo o mfunu.”—Mat. 6:31, 32; Luka 21:34, 35.

¹⁰ Avo ka tuzolele bwa muna ntambu a luvuki lwa umvwama ko tufwete kala yo nyindu a Angu wa nsoneki a Nkand’a Nzambi ona wavova vo: “O sukama yo vwama, kumpani mo ko; Ungyundula yo madia mamfwene.” (Nga. 30:8) Angu watoma bakula o mfunu a nzimbu yo luvuki lwa umvwama. Wazaya wo vo ntelamu a moyo yo luvuki lwa umvwama lulenda sia kimwanda kia muntu mu vonza. Otokana kwasaka mu kuma kia mavwa kulenda kuyiya e ntangwa, kuyoyesa yo kulula etima diaku dia sia salu kia Kintinu va fulu kiantete. Muna kuma kiaki, kala y’ekani dia lembi bwa muna ntambu wa luzolo lwakala yo mavwa mayingi!—Tanga Ayibere 13:5.

E ZUMBA KINA NZE WUMBU

11, 12. Aweyi Nkristu kalenda bwila mu zumba kuna salu?

¹¹ Muna baka bulu kiangolo, ezak’e ntangwa e nkongo ewulu yovo wumbu betimanga muna nkuka uviokelanga e bulu yo sia titi vana ntandu yo fukila dio ye ntoto. Umosi muna ntambu ketoma bakilanga wantu o Satana wafwanana ye wumbu. O ntambu wau i zumba. (Nga. 22:14; 23:27) Akristu ayingi muna kuyisia muna mambu malenda kubafila mu tá zumba, bebwanga muna ntambu wau mu sazu. Akristu akaka ana bakazala, bebwanga muna zumba mu kuma kia songa nzola kimakangu kwa wantu akaka.

¹² Diasazu mu yantika lengokela muntu akaka o moyo kuna salu. Lufimpu lumosi lwavangwa lusonganga vo akala ye akento ayingi betanga zumba ye akw’au a salu. Nga kuna salu kiaku fulu kimosi nusadilanga ye akento ye akala? Avo i wau, nkia mpila ngwizani una yau yo wantu awaya? Nga okalanga ye tezo kimana e ngwizani eno yakala kaka ya salu yo lembi kituka se kimakangu? Kasikil’owu, mpangi ankento una vo Nkristu, ntangwa zawonso omokenanga yo nkw’andi a salu w’eyakala. I bosi bakitukidi se akundi akola yo yantika kunzayisa mawonso ma zingu  kiandi kumosi ye mambu ma longo lwandi. Mun’e nona kiakaka, mpangi una vo Nkristu ovangidi kikundi yo nkento mosi kuna salu, i bosi yantikidi vova vo: “O nkento ndioyo otoma zitisanga ngindu zame yo wunikina vava tumokenanga. Otoma kunzitisanga. Kiese yadi kala kiau kele vo nkaz’ame kanzitisilanga mpila yayi.” Nga kukwikidi ko vo Akristu awaya balenda bwa mu sazu muna zumba?

13. E fu kia nzol’a kimakangu yo nkaz’angani aweyi kilenda vangamena mu nkutakani?

¹³ Diasazu mu yantika songa nzol’a kimakangu kwa muntu akaka mu nkutakani. Badika dina diabwila mpangi mosi yo nkaz’andi. Daniele yo nkaz’andi Sara, * aviti a nzila a ngonde ke ngonde bakala. Daniele nkuluntu mpe kakala, watambulwilanga salu yawonso kavewanga muna nkutakani. Walongokanga Nkand’a Nzambi ye matoko tanu, ntatu muna yau bavubwa. Ampangi awaya bavubwa, lusadisu bavavanga. Wau vo Daniele salu yayingi kakalanga yau muna nkutakani, nkumbu miayingi Sara wabasadisanga. Vana vau diakituka se fu: Alongoki a Daniele vava bavavanga lusadisu, Sara wabasadisanga. Vava Sara mpe kavavanga lusadisu, alongoki a Daniele bansadisanga. Diakituka se vonza kiampwena. Daniele wavova vo: “Ekolo nkaz’ame kasianga ngolo mu sadisa akaka, yandi kibeni mpe lusadisu lwa mwanda ye lwa nitu kavwanga mfunu. Wau vo kiatoma kunlunga-lunganga ko, diatwasa vonza kiampwena. Nkaz’ame wata zumba yo nlongoki ame mosi. Nkaz’ame wayoya muna kimwanda vana ntandu a nzunu ame. Wau vo yaluta tokanenanga salu ya nkutakani, kia bakula vonza kiaki ko.” Aweyi olenda vengela vonza kiaki?

14, 15. Nkia mambu malenda sadisa akazi Akristu mu lembi bwa muna wumbu dia zumba?

¹⁴ Muna lembi bwa muna wumbu dia zumba, sungamenanga ndofi wadia vava wakazala. Yesu wavova vo: “Kina kiayikakeswa kwa Nzambi, o muntu kavambanisa ko.” (Mat. 19:6) Kuyindula ko vo e salu ya nkutakani isundidi o mfunu ke mu nkaz’aku ko. Vana ntandu, zaya wo vo olembi kalanga ye ntangwa yayingi yo nkaz’aku mu kuma kia salu yakondwa mfunu, dilenda yoyesa longo lwaku yo kutwasila vonza kiampwena.

¹⁵ Kansi, avo u nkuluntu, nga otoma lunga-lunganga ekambi? Petelo wa ntumwa wasoneka vo: “Nuvungul’ekambi dia Nzambi dina vovo nwina, nukenga dio, ke mu kwikwa ko, kuna zolela kaka.” (1 Pet. 5:2) Kufwete vezanga kiyekwa kiaku ko kia lunga-lunga ampangi muna nkutakani. Kansi, e kiyekwa kiaku kia vungula ekambi, ke kuma ko muna lembi lungisa nsatu za nkaz’aku. Ke diambote ko mu sadisa ampangi muna nkutakani yo lembi lunga-lunga nkaz’aku. Daniele wavova vo: “Kufwete kivananga kaka ko mu lunga-lunga e nkutakani yo vilakana lunga-lunga esi nzo aku.”

16, 17. (a) Akristu basompa adieyi balenda vanga kuna salu mu songa vo ke balendi songa nzol’a kimakangu kwa muntu akaka ko? (b) Yika elongi diavaika mu nkanda mieto dilenda sadisa Akristu mu venga zumba.

¹⁶ Mun’Eyingidilu ye Despertai! mu toma vaikanga malongi mambote malenda sadisa Akristu basompa mu lembi bwa muna ntambu wa zumba. Kasikil’owu, Eyingidilu dia 15 kia ngonde Setemba ya mvu a 2006, divananga luludiku olu: “Keba mambu malenda kufila mu banda kimakangu kuna salu yovo va fulu kiakaka. E fu kia zolanga o sala yo  nkento yovo yakala una vo ke nkaz’aku ko ekolo akaka bamene vaika, kilenda kufila mu lutonto. Wau vo u yakala yovo nkento asompa, ofwete kiesesa diambu diadi mu mvovo ye mavangu maku vo, kusonga nzol’a kimakangu kwa muntu akaka ko avo ke nkaz’aku ko. Wau vo u selo kia Nzambi, venga e fu kia sikamesa e nzola kwa muntu una vo ke nkaz’aku ko, yovo vwata mu mpila ina ilenda vukumuna akaka.  . . O sia foto dia nkaz’aku ye dia wana vana osadilanga disungamesa akaka yo ngeye kibeni vo ovwanga esi nzo aku o mfunu. Kala ye kani dialembi vukumuna akaka ngatu yambula vo wavukumunwa mu vava kimakangu kuna mbazi a longo.”

¹⁷ Muna Despertai! ya Abidi 2009 muna y’elongi dina yo ntu a diambu vo “Fidelidade conjugal—o que realmente significa?” (Songa Kwikizi Muna Longo Aweyi Disongele?). Elongi diadi divananga lulukisu mu kuma kia yima e ngindu za vukana yo muntu una vo ke nkaz’aku ko. Elongi diadi disonganga vo e ngindu zazi avo ziwokele zilenda kufila muna tá zumba mu sazu. (Yak. 1:14, 15) Avo wasompa, ezak’e ntangwa diambote watanganga lulukisu lwalu yo nkaz’aku. O longo lwavauka kadi yandi kibeni Yave wakubika lo. Ovaulanga e ntangwa mu mokena yo nkaz’aku mu kuma kia longo lweno i mpila yambote nulenda songela vo nutoma zitisanga mambu mavauka.—Etu. 2:21-24.

18, 19. (a) E vangu dia zumba nkia mfwilu ditwasanga? (b) Nkia nluta bevwanga awana besonganga kwikizi muna longo?

¹⁸ Avo lwakidi e ntonta za songa nzola kimakangu kwa muntu akaka, badika mfwilu mia vangu dia ngyambila ye zumba. (Nga. 7:22, 23; Ngal. 6:7) Awana betanga zumba, Yave bekendelekanga. Mu mpasi bekuyisianga kumosi ye akazi au. (Tanga Malaki 2:13, 14.) Kuna diak’esambu, sungamena nluta bevwanga awana besonganga nkal’ambote. Wantu awaya, ke bena kaka ye vuvu kia zinga yakwele mvu ko kansi bena mpe ye zingu kiambote tuka wau ye ntona zavelela.—Tanga Ngana 3:1, 2.

¹⁹ Ntozi a ngunga wayimbila vo: “Azodi a nsiku aku [Nzambi] bena yo luvuvamu luayingi; Ke beteswa sakuba ko.” (Nku. 119:165) Elo, tufwete zolang’e ludi mu ntangwa yayi yampasi yo ‘toma tala nkangala tukangala, ke nze minkondwa-ngangu ko, nze akwa ngangu kaka.’ (Ef. 5:15, 16) O unu, Satana ntambu miayingi kesadilanga muna baka asambidi aludi. Kansi, tuvwidi nwaninwa ilenda kutusadisa muna kuyitanina. Yave okutuvananga nwaninwa yawonso tuvwidi o mfunu muna ‘telamena’ yo “zimina maswanga mawonso matiya ma mbi.”—Ef. 6:11, 16.

[Mvovo Vana Yand’a lukaya]

[Yuvu ya Longoka]

[Foto ina muna lukaya lwa 26]

Luzolo lwa vwama lulenda fiontona muntu muna mwanda. Kuyambula ko vo e diadi diabwila

[Foto ina muna lukaya lwa 29]

O sikamesa nzol’a kimakangu yovo tonda yo dilenda fila muntu mu tá zumba