Funda dia mvu dia Luvuvamu Yakuna Sentu
Funda dia mvu dia Luvuvamu Yakuna Sentu
“O Nzambi kakala wonso muna wonso.”—1 KOR. 15:28.
NGA OLENDA SASILA?
․․․․․
Ndungan’a sono yayi nkia nsasa ina kwa ngeye?
1. Nkia nsambu besinga vwa “ndong’ayingi”?
YINDULA mambu mawonso mambote kesinga vanga o nyadi wa nkwa nkuma ye nkenda kuna kwa nkangu andi muna funda dia mvu! E “ndong’ayingi” ivuluka muna ‘mpasi zayingi’ za mbaninu a nza yayi yambi, bevwa nsambu zazi.—Lus. 7:9, 14.
2. Nkia mpasi bemonanga wantu muna kolo kia 6.000 ma mvu mia lusansu lwa luyalu lwa wantu?
2 Muna 6.000 ma mvu mia lusansu lwa luyalu lwa wantu, o nkangu mpasi zayingi bemonanga mu kuma kia vava kimpwanza ye kuyitumina. Tuka kolo, Nkand’a Nzambi uvovanga vo: “O muntu okala ye wisa muna nkw’andi kamwesa mpasi.’ (Kim. 8:9) Nga ke tumonanga e ziku kia diambu diadi ko o unu? Kieleka, tumonanga vita, ukolami, usukami, yimbevo, lufwasu lwa ekalu kia wantu, nsobani za nsungi ye makaka mpe. Ayadi bevovanga vo avo ke tusoba ngindu ko yo yambula fwasa e nza vonza kiampwena kibwa kuna sentu.
3. Nkia mambu mevangama muna Luyalu lwa Funda dia Mvu?
3 Muna wisa kia Yesu Kristu wa Masia ye 144.000 ana keyala yau, Kintinu kia Nzambi malembe-malembe kisinga fokola mpasi zawonso bemonanga wantu ye nzo au ina vo i ntoto. Muna Luyalu lwa Funda dia Mvu, Yave wa Nzambi osinga lungisa nsilu una kasia: “Nsem’ezulu diampa ye nz’ampa: oma mantete ke meyindulwa ko, ngatu kota muna ntima.” (Yes. 65:17) Nkia mambu masivi mebwa kuna sentu? Ungunza wa Nkand’a Nzambi ulenda kutusadisa mu bakula mambu masivi mana mebwa kuna sentu.—2 Kor. 4:18.
‘BETUNGA NZO YO KUNA MPATU ZA VINYO’
4. Nkia mpila nzo bezingilanga wantu ayingi o unu?
4 Dialudi, konso muntu mu yeto oyangalelanga tunga nzo a yandi kibeni ina kalenda zingila muna luvuvamu y’esi nzo andi. Kansi, o unu diampasi dikalanga mu solola fulu kiambote kia zingila. O wantu bazele muna mbanza zampwena. Ndonga muna yau besololanga fulu kia zingila muna zunga y’asukami yamuna nzo za nkulu. O tunga nzo ya yau kibeni dina nze ndozi.
5, 6. (a) E sono kia Yesaya 65:21 ye Mika 4:4, aweyi kilunganena? (b) Aweyi tulenda vwila nsambu zazi?
5 Muna Kintinu kia Nzambi, luzolo lwa konso muntu lwa tunga nzo a yandi kibeni lusinga lungana. E kuma kadi Yesaya wasakula vo: “Betunga nzo yo kala mo; bekuna mpatu za vinyo, yo dia bundu yau.” (Yes. 65:21) Kansi, o tunga nzo za yau kibeni ke zau kaka ko i nsambu bevwa wantu. O unu vena ye wantu bezingilanga muna nzo za yau kibeni, akaka nkutu mu nzo zampwena bezingilanga. Kansi, betokananga kadi balenda vidisa nzo zau mu kuma kia mpasi za zingu yovo kotelwa kwa mivi. Muna Kintinu kia Nzambi, wantu ke betokanena diaka mambu mama ko. Mika wa ngunza wavova vo: “Bekala konso muntu kunansi a nsing’andi a vinyo yo kunansi a nsand’andi; ke vekal’on’okubazakamesa ko.”—Mika 4:4.
6 Adieyi tufwete vanga muna vwa nsambu zazi za Kintinu? Dialudi, yeto awonso nzo yambote tuvwidi mfunu. Kansi, vana fulu kiatokananga kwayingi mu kuma kia kondwa nzo yo dia mfuka zampwena, diambote twakala ye vuvu muna nsilu a Yave. Yesu wavova mu kuma kia yandi kibeni vo: “Amfwenge bena ye nduzu, e nuni z’ezulu zina ye leko; kansi o Mwan’a muntu ken’oku kafil’o ntu ko.” (Luka 9:58) Yesu vava kakala ova ntoto wafwana tunga nzo isundidi owete. Kansi, ekuma kalembi yo tungila? Yesu kazola kuyivana ko muna konso salu kiadi kunkakidila mu sia Kintinu va fulu kiantete. Nga tulenda tanginina mbandu andi yo kala ye disu dia kumosi, i sia vo venga luzolo lwakala ye mavwa yo ntelamw’o moyo?—Mat. 6:33, 34.
“E DIEVWA YO MWAN’EMEME . . . BEDILA KUMOSI”
7. Nkia nswa kavana Yave kwa wantu mu kuma kia bulu kuna lubantiku?
7 O wantu i vangwa kiansuka kasema Yave ova ntoto. Yave wasonga ekani diandi kwa Mwan’andi antete wa Mbuta Mbangu vava kamvovesa vo: “Tuvangila muntu muna mpw’eto, muna fwaniswa kieto: bayala mbizi za kalunga, ye nuni z’ezulu, ye mbizi, ye nza yawonso, ye ma yawonso iyatatang’ova ntoto.” (Etu. 1:26) Ozevo, Adami yo Eva, i sia vo wantu awonso bavewa nswa wayala bulu yawonso.
8. Nkia fu besonganga e bulu?
8 Nga vekala ye ntangwa ina wantu beyala e bulu yawonso yo zingila vamosi mu luvuvamu? Wantu ayingi betoma zolanga bulu yau nze mbwa ye mbumba. Adieyi tuvova mu kuma kia bulu ya futa? Mwangi mosi a nsangu wavova vo: “Akwa ngangu za nza ana bezingilanga lukufi ye bulu ya futa yo longoka kadilu kiau babakula vo bulu yawonso iyemekanga ivwdi nzola.” Kansi, vava bulu yayi ivumiswanga wonga imonanga yovo funga makasi, ke ilendanga diaka songa zola ko. Mwangi a nsangu ndioyo wavova diaka vo: “E bulu yawonso iyemekanga itoma songanga o zola vava besansanga wan’au.”
9. Nkia diambu disoba muna bulu kuna sentu?
9 Muna kuma kiaki, ka tufwete sivika ko vava tutanganga muna Nkand’a Nzambi vo wantu besinga kala mu luvuvamu ye bulu. (Tanga Yesaya 11:6-9; 65:25.) Ekuma? Sungamena dio vo vava Noa y’esi nzo andi bavaika muna nzaza kuna mfoko a Kizalu, Yave wabavovesa vo: “O wonga wa yeno ye mbubu a yeno ikala muna bulu yawonso ya ntoto.” Kiaki i kuma e bulu itininanga wantu. (Etu. 9:2, 3) Nga Yave kalendi katula wonga wau ko ye mbubu muna lungisa ekani diandi kayika kuna lubantiku? (Os. 2:18) Ekwe ntangwa kiese ikala kwa awonso besinga vuluzwa yo zinga yakwele mvu va ntoto!
‘NZAMBI OKUNGUNA MANSANGA MAWONSO’
10. Ekuma wantu bedidilanga?
10 Vava Solomo kamona “oma mawonso ma lubangamu,” wavova yo lukendalalu lwawonso vo: “Mbwene mansanga m’abangami, ke bakedi ya mfiaulwisi ko.” (Kim. 4:1) Mavangu mama metoma monekanga o unu, ke mu tandu yavioka ko. Yeto awonso, nani walembi dila kala mu kuma kiampasi? Dialudi, ezak’e ntangwa tulenda dila mu kuma kia kiese. Kansi, nkumbu miayingi tudilanga mu kuma kia nkenda yovo ntantu.
11. Nkia lusansu lwa Nkand’a Nzambi lusimbidi ntim’aku?
11 Badika wantu ayingi ana badila tutanganga muna Nkand’a Nzambi. Vava Sara kafwa ye kimbuta kia mvu 127, “Abarayama wizidi didila Sara, kakumbokomokena.” (Etu. 23:1, 2) Vava Naomi kasindika wan’andi a longo wole ana bafwila akazi, “batumbwidi ndinga, badididi.” (Rutu 1:9, 14) Vava Kizekeya wa Ntinu kabakama kimbevo kiangolo yo yindula vo fwa ke fwa, wasamba kwa Nzambi yo ‘bokomoka ye dilu.’ (2 Nti. 20:1-5) Nani olembi bakula nkenda kamona Petelo wa ntumwa vava kavakulwila Yesu nkalu? Vava nsusu kakokola, Petelo “ovaikidi kwandi, obokomokene ye dilu.”—Mat. 26:75.
12. Kintinu kia Nzambi aweyi kitwasila luvevoko kwa wantu?
12 Muna kuma kia sumbula yibwanga mu nza yawonso, yeto awonso lufiaulwisu yo luvevoko tuvwidi o mfunu. Luyalu lwa Funda dia Mvu lusinga twasa nsambu ezi kwa nkangu: “[Nzambi] kakunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi.” (Lus. 21:4) Ekwe kiese tukala kiau vava kazu, dilu ye mpasi ke zikala diaka ko! Nzambi olungisa nsilu andi wasukisa lufwa luna vo i mbeni a nsuk’a wantu. Nkia mpila ulunganena?
“AWONSO BENA MUNA NKALA . . . BEVAIKA”
13. O lufwa adieyi luvanganga kwa wantu tuka Adami kasumukina?
13 Tuka Adami kasumukina, o lufwa luyalanga wantu awonso nze ntinu. Wantu asumuka ke balendi venga ko yovo sunda mbeni ndioyo otwasanga mpasi ye ntantu zayingi. (Roma 5:12, 14) Muna kuma kiaki, “wonga wa fwa” ‘ubundunanga mvimba e zingu’ kia wantu ayingi.—Ayib. 2:15.
14. Aweyi tumona vava lufwa lufokoka?
14 Nkand’a Nzambi uvovanga vo: “O ntantu osukinin’o tumbulwa i fwa.” (1 Kor. 15:26) Buka yole ivwa nluta vava ntantu ndioyo kesukiswa. “Ndong’ayingi” yizinganga owau, balenda vuluka yo kota muna nz’ampa ye vuvu kia vwa moyo a mvu ya mvu. Wantu ayingi ana bafwa besinga futumuka. Nga olenda yindula kiese besinga mona ndong’ayingi vava betambula awana befutumuka? Avo tutangidi lusansu lwa lufuluku luyikwanga muna Nkand’a Nzambi, tulenda bakula kiese tusinga mona vava wantu befuluka kuna sentu.—Tanga Maku 5:38-42; Luka 7:11-17.
15. Aweyi olenda mona kele vo nzolw’aku ofulukidi?
15 Yindula e mvovo emi: “Bayizengenekene nzengenekʼayingi,” “bakembele Nzambi.” Kele vo vana wakala vava wantu awaya bafuluka, nanga ngeye mpe mpila yayi wadi mona. Kieleka, tutoma sivika yo yangalala vava tumona lufuluku lwa azolw’eto afwa. Yesu wavova vo: “E ntangwa ikwiza, ina ikala vo awonso bena muna nkala bewa nding’andi, bevaika.” (Yoa. 5:28, 29) Kavena muntu ko mu yeto wamona kala e diambu diadi; o lufuluku i dimosi muna mambu mayingi mambote mevangama kuna sentu.
NZAMBI OKALA “WONSO MUNA WONSO”
16. (a) Ekuma tufwete mokenenanga ye kiese kiawonso e nsambu tuvwa kuna sentu? (b) Adieyi kavanga Paulu muna kasakesa Akristu muna nkutakani ya Korinto?
16 Kieleka, awonso betatidilanga kwikizi kiau muna Yave mu ntangwa yayi yampasi, nsambu zayingi besinga vwa. Kana una vo ketwamwene nsambu zazi zawonso ko, oyindulanga zo dilenda kutusadisa mu sia sungididi kieto muna mambu masundidi o mfunu yo lembi vukumunwa mu mambu ma nza yayi. (Luka 21:34; 1 Tim. 6:17-19) Tufwete longokanga mambu mama muna Nsambil’eto ya esi nzo, mokenenanga mo ye mpangi zeto ya alongoki eto a Nkand’a Nzambi yo samuna mo kw’akwa luzolo lwambote. Ediadi dilenda kutusadisa mu lembi vilakana nsambu zazi. O Paulu i diau kavanga muna kasakesa mpangi zandi z’Akristu. E mvovo miandi miabasadisa mu bakula mambu mebwa kuna mfoko a Luyalu lwa Kristu lwa Funda dia Mvu. Yindula nsas’a mvovo mia Paulu muna 1 Korinto 15:24, 25, 28.—Tanga.
17, 18. (a) Aweyi Yave kakadila “wonso muna wonso” kuna lubantiku lwa lusansu lwa wantu? (b) Adieyi kesinga vanga Yesu muna vutula kintwadi ye ngwizani?
17 ‘Nzambi okala wonso muna wonso,’ yayi i mpila yambote ilenda sasilwa una ukala e zingu kuna mfoko a Luyalu lwa Funda dia Mvu. E mvovo miami adieyi misonganga? Yindula una kiakala zingu muna mpatu Edene vava Adami yo Eva bakala wantu alunga muna kanda dia Yave dia luvuvamu. Yave wa Mfumu a Nz’amvimba wayalanga vangwa yandi yawonso, tuka kun’ezulu yo va ntoto. Bamokenanga yandi, kunsambila yo vwa nsambu zandi. Nzambi wakala “wonso muna wonso.”
18 E ngwizani yayi yafokoka vava wantu bavukumunwa kwa Satana yo kolamena kimfumu kia Yave. Kansi, tuka mvu a 1914, Kintinu kia Masia malembe-malembe kivanganga mawonso mu vutula kintwadi ye ngwizani yayi. (Ef. 1:9, 10) Mambu mayingi mambote ‘ke tumonanga ko’ o unu, melungana muna Luyalu lwa Funda dia Mvu. I bosi, Luyalu lwa Kristu lwa Funda dia Mvu lufokoka. Adieyi divangama? Kana una vo, wavewa “wisa kiawonso ki’ezulu ye nza” Yesu ke nkw’eloko ko. Kena y’ekani dia kutumuna fulu kia Yave ko. ‘O vutula kintinu kwa Nzambi w’Ese’ yo lusakalalu lwawonso. Osadila kiyekwa ye wisa kiandi “muna nkembo a Nzambi.”—Mat. 28:18; Fili. 2:9-11.
19, 20. (a) Awonso bevwa Kintinu aweyi besongela vo batambulwidi kimfumu kia Yave? (b) Nkia mambu m’esivi tusinga yangalela kuna sentu?
19 I bosi, awonso besakalelanga Kintinu ova ntoto, bekituka se wantu alunga. Belanda mbandu a Yesu yo sakalela kimfumu kia Yave. Bekala y’elau dia songa vo bazolele sunda muna lutonto lwansuka. (Lus. 20:7-10) I bosi, akolami awonso, diakala wantu ye vangwa ya mianda besinga fwaswa emvimba. Ekwe ntangwa kiese isinga kala! Kanda diawonso dia Yave kun’ezulu yo va ntoto besinga kembelela Nzambi ona okala “wonso muna wonso.”—Tanga Nkunga 99:1-3.
20 E nsambu zikala muna Kintinu kia Nzambi, nga zilenda kufila mu vanga luzolo lwa Nzambi una ufwene? Nga olenda venga umpukumuni wa vuvu yo lufiaulwisu lwa luvunu lwa nza ya Satana? Nga osinga kumika ekani diaku dia yikama yo tatidila kimfumu kia Yave? Songa muna mavangu maku vo una y’ekani dia vanga wo yakwele mvu. Ediadi disinga kuvan’elau dia vwa mawete yo luvuvamu muna Luyalu lwa Funda dia Mvu yakuna ntwala.
[Yuvu ya Longoka]
[Mafoto zina muna lukaya lwa 11]
Kuna mfoko a Luyalu lwandi, Yesu yo lusakalalu lwawonso otambika Kintinu kwa S’andi
