Longoka Muna Nlandu a Mambu a Yave yo Yesu
Longoka Muna Nlandu a Mambu a Yave yo Yesu
“Nubadika mpe vo o nlandu a mambu a Mfumu eto i luvuluku.”—2 PET. 3:15.
NKIA MVUTU OVANA?
Aweyi Yave kesongelanga vo olandulanga mambu?
Ekuma Yesu kesongelanga luzindalalu tuka kolo?
Adieyi tufwete vanga muna tanginina fu kia Nzambi kia landula mambu?
1. Nkia diambu betokanenanga e selo yakaka yakwikizi?
M PANGI mosi a nkento wa nkwa kwikizi wazizidila mpasi za mpila mu mpila mu mvu miayingi, wavova kuna lulembamu lwawonso vo: “Nga isinga mona mbaninu una kia fwidi ko?” Akaka mpe besadilanga Yave tuka mvu miayingi, betokanenanga diambu diadi. Tulakukilanga o moyo e lumbu Nzambi kevanga lekwa yawonso se yampa yo fokola mpasi zawonso tumonanga owau. (Lus. 21:5) Kana una vo tuvwidi kuma yayingi mu kwikila vo e mbaninu a nza yayi ya Satana ifinamene, dilenda kala diampasi mu zindalala vingila lumbu kiaki.
2. Nkia yuvu tubadika mu kuma kia nlandu a mambu a Nzambi?
2 Elo, o Nkand’a Nzambi uvovanga vo tufwete kala yo luzindalalu. Nze una bavanga selo ya Nzambi kuna nz’ankulu, avo tukala ye lukwikilu lwasikila yo zindalala, tuvwa nsambu zawonso zina Nzambi kasila nsilu. (Tanga Ayibere 6:11, 12.) Yandi kibeni Yave ozeye landula mambu. Olenda fokola mbi konso ntangwa, kansi ovingilanga ntangw’andi ina kasikidisa. (Roma 9:20-24) Ekuma Yave kesongelanga nlandu a mambu? Aweyi Yesu katanginina fu kia Nzambi kia landula mambu? Nkia nsambu tuvwa avo tutanginina fu kia Nzambi kia landula mambu? E mvutu za yuvu yayi zilenda kutusadisa mu kala yo luzindalalu yo kumika lukwikilu lweto, musungula vava tuyindulanga vo Yave nkwa womboka.
EKUMA YAVE KELANDULWILANGA MAMBU?
3, 4. (a) Ekuma Yave kesongelanga nlandu a mambu muna lungisa ekani diandi mu kuma kia ntoto? (b) Adieyi Yave kavanga vava Adami yo Eva bakolama muna mpatu a Edene?
3 Dialudi, ka vena muntu ko osundidi Nzambi e wisa muna nsema wawonso. Muna kuma kiaki, ke dina mfunu ko kwa Nzambi mu vingila ntangwa muna fokola mpasi zawonso. Kansi, Yave ovwidi kuma kiasikila muna landula mambu. O ukolami muna mpatu a Edene yuvu yamfunu wavaikisa. Yave olandulanga mambu, kadi wazaya wo vo ntangwa yavavwanga mu vana mvutu za yuvu yayina. Wau vo ozeye mavangu ye ngindu za vangwa yandi yawonso ya ngangu tuka kun’ezulu yo va ntoto, tulenda kala ye ziku vo ovangilanga mawonso muna wete dieto.—Ayib. 4:13.
4 Yave wakala y’ekani vo Adami yo Eva bawuta wana yo zadisa nza. Kana una vo Satana wavukumuna Adami yo Eva, ekani dia Nzambi ke diasoba ko. Ka dimbula vuvu ko yovo baka nzengo mu nzaki yo bembola ekanda dia wantu. Kansi, waziula nzila muna lungisa ekani diandi mu kuma kia wantu yo ntoto. (Yes. 55:11) Muna lungisa ekani diandi yo tundidika kimfumu kiandi, Yave osonganga volo yo nlandu a mambu. Ovingilanga nkutu mafunda ma mvu muna toma lungisa mambu makaka muna ekani diandi.
5. Nkia nluta kilenda kututwasila e fu kia Yave kia landulu mambu?
5 Yave osonganga mpe nlandu a mambu kimana wantu ayingi balenda vwa moyo a mvu ya mvu. Owau, okubikanga nzila muna vuluza “ndong’ayingi.” (Lus. 7:9, 14; 14:6) Muna salu kia samuna nsangu zambote, Yave obokelanga wantu kimana balongoka oma ma Kintinu ye nkanikinu miandi miansongi. Nsangu za Kintinu, i ‘nsangu zambote’ kuna kwa wantu. (Mat. 24:14) Konso muntu ketuntanga Yave, okotanga mu nkutakani andi mu nza yawonso yazala y’akundi akieleka ana bezolanga unsongi. (Yoa. 6:44-47) Nzambi eto a nzodi okubasadisanga mu vwa edienga diandi. Osolanga mpe wantu akaka mu yala muna Kintinu kiandi ki’ezulu. Vava beyala kun’ezulu, besadisa alembami mu kituka se alunga yo vwa moyo a mvu ya mvu. Dialudi, kana una vo ovingilanga yo landula mambu, Yave osalanga muna lungisa nsilu miandi muna wete dieto.
6. (a) Aweyi Yave kasongela nlandu a mambu muna lumbu ya Noa? (b) Aweyi Yave kesongelanga nlandu a mambu mu lumbu yeto?
6 Yave o landulanga mambu kana nkutu vava akaka bevanganga mambu mambi muna kuntonta. Kasikil’owu, badika dina kavanga mu kuma kia umpumbulu vitila Kizalu. E nza yazala yo mavangu ma zumba ye nsoki, Yave wamona “mpasi za ntima” mu kuma kia bi wa wantu wawokela. (Etu. 6:2-8) Kafwana yambula mavangu mama ko yakwele mvu, muna kuma kiaki, wabaka nzengo zatwasa kizalu muna fwasa yimpumbulu. “E kolo kiavingil’o nlandu a mambu a Nzambi muna lumbu ya Noa,” Yave wavanga nkubika muna vuluza Noa ye esi nzo andi. (1 Pet. 3:20) Muna ntangwa kasikidisa, Yave wazayisa nzengo zandi kwa Noa yo kumvana salu kia tunga nzaza. (Etu. 6:14-22) Vana ntandu, wau vo Noa “nteleki a ndungidi” kakala walukisa akaka mu kuma kia lufwasu lwafinamanga. (2 Pet. 2:5) Yesu wavova vo e lumbu yeto yafwanana ye lumbu ya Noa. Yave wasikidisa lumbu kesinga fwasa e nza yayi yambi. Ke vena muntu ko ozeye e “lumbu kiakina ye ola” ketwasa lufwasu lwa nza yayi. (Mat. 24:36) O unu, Nzambi watuvana salu kia lukisa wantu yo kubasonga una balenda vuluzilwa.
7. Nga Yave womboka ke wombokanga muna lungisa nsilu miandi? Sasila.
7 Dialudi, e fu kia Yave kia landula mambu ke kisongele ko vo ntangwa a nkatu keviokesanga. Ekolo Yave kelandulanga mambu ka tufwete yindula ko vo ke kutuvwanga mfunu ko. Kieleka, dilenda kala diampasi mu sungamena diambu diadi ekolo tununanga yo mona mpasi mu nza yayi yambi. E mpasi za tandu kiaki zilenda kutuyoyesa yo badikila Nzambi vo womboka kewombokanga muna lungisa nsilu miandi. (Ayib. 10:36) Kuvilakani ko vo Nzambi ovwidi kuma kiasikila muna landula mambu. Oviokesanga ntangwa yayi muna wete dia selo yandi yakwikizi. (2 Pet. 2:3; 3:9) Yambula twabadika mpe una Yesu katanginina nlandu a mambu a Nzambi.
AWEYI YESU KASONGELA MBANDU AMBOTE YA LANDULA MAMBU?
8. Mu nkia mambu Yesu kasongela luzindalalu?
8 Tuka kuna lubantiku lwa nsema, Yesu ovanganga luzolo lwa Nzambi ye kiese kiawonso. Vava Satana kakolama, Yave wabaka nzengo za tuma Mwan’andi a mosi ova ntoto nze Masia. Yindula luzindalalu kasonga Yesu muna vingila yavana ntangwa yayina yafwana. (Tanga Ngalatia 4:4.) Kavingilanga kaka e lumbu kiakina ko lembi vanga diambu; kansi, wasalanga e salu ina kavewanga kwa S’andi. Vava kayiza ova ntoto, wazaya wo vo ovondwa kwa Satana nze una wasakulwa. (Etu. 3:15; Mat. 16:21) Kana una vo wazaya mpasi dikuntwasila, kuna luzindalalu lwawonso wakisakidika muna luzolo lwa Nzambi. Wasonga kwikizi muna zingu kiandi kiawonso. Kasia zingu ye tunda diandi va fulu kiantete ko, muna kuma kiaki, tufwete kuntanginina.—Ayib. 5:8, 9.
9, 10. (a) Adieyi Yesu kevanganga ekolo kevingilanga kuna luzindalalu lwawonso yavana Yave kesinga vanga diambu? (b) Aweyi tufwete badikila e ntangwa Yave kasikidisa?
9 Vava kafuluka, Yesu watambula wisa ki’ezulu ye nza. (Mat. 28:18) Osadilanga e wisa kiaki muna lungisa ekani dia Yave mun’owu wa ntangwa Nzambi kasikidisa. Yesu wavingila kuna koko kwalunene kwa Nzambi yamuna mvu wa 1914 vava mbeni zandi zasiwa se nsikinw’a tambi yandi. (Nku. 110:1, 2; Ayib. 10:12, 13) Ke kolo ko osinga fwasa nza ya Satana. Ekolo kevingilanga, Yesu osadisanga wantu mu vwa edienga dia Nzambi yo kubafila kuna “maza ma moyo.”—Lus. 7:17.
10 Nga omwene muna mbandu a Yesu e mpila ofwete badikila ntangwa kasikidisa Yave? Ka lukatikisu ko, Yesu wakala y’etima dia sala konso salu kina S’andi kantumanga, kansi wavingila yavana yafwana e ntangwa ina kasikidisa Nzambi. Ekolo tuvingilanga lufwasu lwa nza yayi ya Satana, tufwete kala yo luzindalalu, ka tufwete bembola Nzambi ko mu kuma kia lukendalalu. Adieyi tufwete vanga muna kwamanana songa luzindalalu?
AWEYI NDENDA TANGININA NLANDU A MAMBU A NZAMBI?
11. (a) Luzindalalu aweyi lwinina ngwizani ye lukwikilu? (b) Nkia kuma tuvwidi muna kumika lukwikilu lweto?
11 Una Yesu kayizidi ko ova ntoto, angunza ye selo yakaka yakwikizi basonga vo kana nkutu wantu alembi lunga balenda zindalala. Luzindalalu lwau ngwizani lwakala ye lukwikilu lwau. (Tanga Yakobo 5:10, 11.) Kele vo ke bakwikila ko mana Yave kabavovesa, nga badi zindalala yo vingila ndungan’a nsilu miandi? Ntangwa zawonso bawanananga ye ntonta za lukwikilu, bakala ye vuvu vo Nzambi wadi lungisa nsilu miandi. (Ayib. 11:13, 35-40) Tuvwidi kuma yayingi muna kala yo lukwikilu lwasikila, kadi owau Yesu osalanga nze “Etuku yo nzikudi a lukwikilu lueto.” (Ayib. 12:2) Yesu walungisa ungunza yo sengomona makani ma Nzambi mekutusadisanga mu kala yo lukwikilu.
12. Adieyi tulenda vanga muna kumika lukwikilu lweto?
12 Adieyi tufwete vanga muna kumika lukwikilu lweto yo kwamanana songa luzindalalu? Tufwete sadilanga luludiku lwa Nzambi. Kasikil’owu, badika e kuma osilanga salu kia Kintinu va fulu kiantete muna zingu kiaku. Nga olenda sia ngolo za sadila luludiku luna muna Matai 6:33? Nanga divavanga vo wavevola zingu kiaku kimana wasalanga ola zayingi muna salu kia umbangi. Yave osambulanga ngolo ovanganga muna lemvokela nkanikinu miandi. Olenda kusadisa mu solola muntu ampa muna yantika longoka yandi Nkand’a Nzambi yo kuvana “luvuvamu lua Nzambi, luna luviokele nyindu wawonso.” (Tanga Filipi 4:7.) Osungamena nsambu otambulanga muna lemvokela luludiku lwa Yave, dilenda kusadisa mu bakula mfunu wasonga luzindalalu.—Nku. 34:8.
13. Nkia salu tulenda tezanesa luzindalalu yo kumika lukwikilu?
13 E salu kia mvati a nsengo kilenda kutusadisa mu zaya una lukwikilu lulenda kutusadisila mu songa luzindalalu. Konso ntangwa o mvati a nsengo kevwanga mbongo yayingi, okalanga ye vuvu vo muna nsungi ilanda osinga vwa diaka mbongo ayingi. Kansi, ekolo kevingila yo luzindalalu lwawonso e nsungi a nsâlu, ke yambula kuna mbongo ko, nanga ovata nkutu mpatu ampwena ke mu nsungi iviokele ko. Okala ye vuvu vo mbongo ayingi kesâla. Diau adimosi mpe, vava tulongokanga yo sadila luludiku lwa Yave yo vwa nluta miayingi, e vuvu yo lukwikilu lweto muna Yave luwokelanga. Dikutusadisa mpe mu songa luzindalalu yo vingila nsambu tusinga tambula.—Tanga Yakobo 5:7, 8.
14, 15. Aweyi tufwete badikilanga e mpasi tumonanga?
14 E mpila yakaka tulenda songela luzindalalu i sungamenanga una tufwete badikila e nza ye mambu ma zingu kieto. Tufwete badikilanga mambu nze una Yave kebadikilanga mo. Kasikil’owu, yindula una Yave kebadikilanga mpasi za wantu. Tuka kolo omonanga ntantu mu kuma kia mpasi bemonanga wantu, kansi e ntantu zazi ke zikunkakidilanga ko mu lembi vanga edi diambote. Wafila Mwan’andi amosi kimana “kafwasa mavangu ma Nkadi ampemba” ye mpasi zawonso Satana kemwesanga wantu. (1 Yoa. 3:8) Dialudi, ke kolo ko Nzambi ofokola emvimba mpasi zawonso. Diau adimosi mpe, vana fulu kiayambula vo e mpasi za nza yayi yiyalwanga kwa Satana zatuyoyesa, ngatu yambula songa luzindalalu mu kuma kia mbaninu, tufwete kala yo lukwikilu lwasikila muna ndungan’a nsilu mia Nzambi. Dialudi, Yave osukisa o bi wawonso muna ntangwa ina kasikidisa.—Yes. 46:13; Nak. 1:9.
15 Mu lumbu yambaninu a nza yayi tuzingilanga, tulenda bwilwa mambu malenda tonta lukwikilu lweto. Kele vo muntu utukotele nsoki yovo kw’azolw’eto, vana fulu kia kendalala kwasaka, tufwete bunda emvimba e vuvu kwa Yave. Wau vo tu asumuki, ediadi dilenda kala diampasi. Sungamena dina Yesu kavanga muna Matai 26:39.—Tanga.
16. Nkia fu tufwete venga ekolo tuvingilanga mbaninu?
16 Muntu okatikisanga mu kuma kia mbaninu, olenda yima ngindu zabendomoka. Muna nkubika zandi, ke sianga sungididi mun’ekani dia Yave ko. Muna mvovo miakaka, olenda yindula vo: ‘Yisinga kwikila vava yimona ndungan’a nsilu mia Yave.’ Vana fulu kia sia Kintinu kia Nzambi va fulu kiantete, oyantika vava nzimbu zayingi yovo tanga sikola zandá kimana kakala ye nkumbu ambote mu nza yayi. Muntu oyindulanga e mpila yayi osonganga vo kena yo lukwikilu ko. Sungamena vo Paulu okutukasakesanga kimana twatanginina akwikizi ana batambula nsilu mia Yave “muna lukwikilu yo luzindalalu.” (Ayib. 6:12) Mun’owu wa ekani diandi, Yave wasikidisa e ntangwa kefwasa nza yayi yambi, ke vekama ko. (Kab. 2:3) Muna kuma kiaki, ka tufwete sadila Yave muna yenge-yenge ko. Kansi, tufwete lungalala yo samunanga e nsangu zambote yo vema kwawonso. E kiaki i salu kilutidi twasa e kiese owau.—Luka 21:36.
O LUZINDALALU NKIA NSAMBU LUTWASANGA?
17, 18. (a) Nki’elau tuvewanga muna songa luzindalalu? (b) Nkia nsambu tuvwa avo tuzindalele?
17 Diakala vo kolo kiakete yovo kolo kiayingi tusadilanga Nzambi, tuzolele kunsadila yakwele mvu. Luzindalalu lukutusadisa mu vuluzwa, diakala vo nkia kolo tufwete vingila. Owau Yave okutuvananga elau dia songa vo tubundang’e vuvu muna nzengo zandi yo sikila ye kwikizi muna yandi, musungula muna ntangw’ampasi. (1 Pet. 4:13, 14) Nzambi okutulonganga mpe una tulenda kadila yo luzindalalu lusinga kutusadisa mu vuluzwa.—1 Pet. 5:10.
18 Yesu una ye wisa kiawonso kun’ezulu yo va ntoto, kavena diambu ko dilenda kukatula muna etininu diandi avo ka ngeye kibeni ko. (Yoa. 10:28, 29) Kufwete mona wonga wa kusentu ko ngatu lufwa. Awana bezindalala yakuna mbaninu bevuluzwa. Muna kuma kiaki, ka tufwete yambula ko vo nza yatuvukumuna yo kutufila mu lembi bunda Yave e vuvu. Elo, tufwete kala y’ekani dia nungunuka muna lukwikilu yo toma sadila e ntangwa eyi Nzambi kesonganga nlandu a mambu.—Mat. 24:13; tanga 2 Petelo 3:17, 18.
[Yuvu ya Longoka]
[Mafoto zina muna lukaya lwa 21]
E fu kia Nzambi kia landula mambu kikusadisa mu sia salu kia Kintinu va fulu kiantete yo vwa nsambu!
