Una Usinga Fwasilwa e nza Yayi
Una Usinga Fwasilwa e nza Yayi
“Ke nuna ku tombe ko, ovo nuluakilwa kwa lumbu kina nze mwivi.”—1 TES. 5:4.
NGA OLENDA SASILA?
Nkia mambu mebwa kusentu meyikwanga muna sono eyi:
1. Adieyi dilenda kutusadisa mu kwamanana yingila yo zizidila mpasi?
KE KOLO ko mambu masivi mebwa ova nza. E ndungan’a ungunza wa Nkand’a Nzambi, itoma songanga e ziku kia diambu diadi. Muna kuma kiaki, tufwete yingilanga. Adieyi dilenda kutusadisa mu yingila? Paulu wa ntumwa okutuwondelelanga ‘twasia meso muna. . . lekwa ina ilembi moneka.’ Elo, tufwete sianga sungididi muna nsendo a moyo a mvu ya mvu, diakala vo kun’ezulu tuvwila wo yovo va ntoto. Paulu wasoneka e mvovo miami muna kasakesa mpangi zandi z’Akristu basia e sungididi muna nsendo bevwa mu kuma kia kwikizi kiau. O sia sungididi muna nsendo, diadi kubasadisa mpe mu zizidila mpasi yo lubangamu.—2 Kor. 4:8, 9, 16-18; 5:7.
2. (a) Adieyi tufwete vanga muna kala ye vuvu kiasikila? (b) Nkia mambu tulongoka mun’elongi diadi ye dina dilanda?
2 Lulukisu lwa Paulu diambu diamfunu lukutulonganga: Muna kala ye vuvu kiasikila, ka tufwete sianga kaka sungididi ko muna mambu tulenda mona owau. Tufwete sianga e sungididi muna mambu mamfunu mebwa kuna sentu oma ke tulendi mona ko owau. (Ayib. 11:1; 12:1, 2) Owau, yambula twabadika mambu kumi mebwa kuna sentu. Mambu mama ngwizani mena ye vuvu kieto kia moyo a mvu ya mvu. *
NKIA MAMBU MEBWA VITILA MBANINU?
3. (a) Nkia diambu dibwa kuna sentu diyikwanga muna 1 Tesalonika 5:2, 3? (b) Nkia diambu bevanga ayadi a nza ye nani okubayikama?
3 Paulu muna nkand’andi kasonekena esi Tesalonika, wayika dimosi muna mambu mama. (Tanga 1 Tesalonika 5:2, 3.) Paulu “lumbu kia Mfunu” kayika. E ‘lumbu kia Yave’ kiyantikila muna lufwasu lwa nsambil’aluvunu yo fokokela muna vita Armangedo. Kansi, una lumbu kia Yave ke kialweke ko ayadi a nza bevova vo “Ngemba yo luvuvamu!” Nanga esivi dimosi yovo masivi mayingi mebwa. Ayadi a nza nanga beyindula vo se besingika mambu mayingi metwasanga mpasi. Adieyi tuvova mu kuma kia mfumu za mabundu? Wau vo beluta kuyisianga muna mambu ma nza, ka lukatikisu ko, besinga yikama ayadi a nza. (Lus. 17:1, 2) E mfumu za mabundu besinga tanginina ngunza zaluvunu z’Ayuda kuna nz’ankulu. Yave wavova mu kuma kiau vo: ‘[Bevovanga vo] luvuvamu, luvuvamu; kansi luvuvamu nkatu.’—Yer. 6:14; 23:16, 17.
4. Nswaswani yo wantu a nza, oyeto nkia mambu tubakulanga?
4 Diakala ayadi a nza yovo mfumu za mabundu bevova vo “Ngemba yo luvuvamu,” e diambu diadi disonga vo e lumbu kia Yave kiyantikidi. Muna kuma kiaki, Paulu wavova vo: “Vo i yeno, abunzi, ke nuna ku tombe ko, ovo nuluakilwa kwa lumbu kina nze mwivi: yeno awonso nu wan’a ntemo.” (1 Tes. 5:4, 5) Nswaswani yo wantu a nza, yeto tubakulanga dina Nkand’a Nzambi kevovanga mu kuma kia mambu mebwanga owau. O ungunza uyikanga “Ngemba yo luvuvamu” aweyi ulunganena? Muna zaya mpila ulunganena, tufwete vingila. Muna kuma kiaki, yambula twakala y’ekani dia ‘yingila yo lungalala.’—1 Tes. 5:6; Sef. 3:8.
“NTINU A NKENTO” OLEMBELE ZAYA DINA DIKUMBWILA
5. (a) E ‘mpasi zayingi’ aweyi ziyantikila? (b) Nani i “ntinu a nkento” okuyibadikila vo kalendi ‘kala nkutu ye dilu ko’?
5 Nkia diambu dibwa diaka? Paulu wavova vo: “Una se bevovanga vo, ‘Ngemba yo luvuvamu’ o lubukumuku luakinsunzumukina lubaluàkidi.” O lufwasu lwa kintwadi kia nsambila zawonso za luvunu ova nza i diambu diantete divangama muna “lubukumuku luakinsunzumukina.” Muna Nkand’a Nzambi e kintwadi kia nsambila zaluvunu ova nza kiyikilwanga mpe vo “Babele Anene” yovo “nkembi.” (Lus. 17:5, 6, 15) Lufwasu lwa nsambila zawonso zaluvunu kumosi ye Kikristu kia kimpangila i lubantiku lwa ‘mpasi zayingi.’ (Mat. 24:21; 2 Tes. 2:8) Kuna kwa wantu ayingi e lumbu kiaki, kukinsalukisa kilwakila. Ekuma? Kadi o nkembi, okuyibadikila nze “ntinu a nkento” ona kalendi ‘kala nkutu ye dilu ko.’ Kansi, o nkembi osinga bakula vo ke zayanga ko dina dikumbwila. Nzaki kefwaswa, i sia vo “muna lumbu kimosi.”—Lus. 18:7, 8.
6. Nani osinga fwasa e nsambil’a luvunu?
6 O Nkand’a Nzambi uvovanga vo e “bulu” kina ye “mpaka kumi” kisinga fwasa nkembi. O nkanda Revelação uvovanga vo e bulu kiaki, Nações Unidas kisunzulanga. “E mpaka kumi” i tuyalu twawonso tuyikamanga “bulu kiambwaki.” * (Lus. 17:3, 5, 11, 12) Aweyi kesinga fwasilwa nkembi ndioyo? Tuyalu twa Nações Unidas tusanza mavwa ma nkembi, senzeka umpuki wandi, kumvempola yo ‘kumbomona.’ Nkembi osinga fwaswa emvimba.—Tanga Lusengomono 17:16.
7. Aweyi “bulu” kisinga fwasila nkembi?
7 Ungunza wa Nkand’a Nzambi usonganga mpe una uyantikila vita yayi. Yave muna “vanga lukanu luandi” osinga sia ekani dia fwasa nkembi ndioyo muna ntima mia ayadi. (Lus. 17:17) Wau vo mabundu meyikamanga e vita yo twasa mpasi zayingi mu nza, ayadi a nza beyindula vo lufwasu lwa nkembi nluta lutwasa kwa zula yau. Muna kuma kiaki, vava ayadi befwasa nkembi, beyindula vo mu “lukanu” lwa yau kibeni bevangila wo. Kansi, Nzambi osinga kubasadila muna fwasa e nsambila zawonso za luvunu. Kuna kinsalukisa, e nkubika zakaka za nza ya Satana zinwanisa ezaka nkubika zandi, Satana ke lenda vengomona lufwasu lwalu ko.—Mat. 12:25, 26.
NKANGU A NZAMBI UNWANISWA
8. Aki nani benwaniswa kwa “Ngonge, mwisi nsi a Mangonge”?
8 Vava nsambila za luvunu zifwaswa, kana una vo selo ya Nzambi ‘bakondwa yaka,’ bekala kaka ‘muna luvuvamu.’ (Yez. 38:11, 14) Adieyi disinga bwila asambidi a Yave ana bekala nze bakondwa ntanini? Benwaniswa kwa “nkangu miayingi.” O Nkand’a Nzambi uvovanga vo e vita yayi isinga filwa kwa “Ngonge, mwisi nsi a Mangonge.” (Tanga Yezekele 38:2, 15, 16.) Aweyi tufwete badikilanga e vita yayi?
9. (a) Adieyi diluta tokanesanga Nkristu? (b) Adieyi tufwete vanga owau muna kumika lukwikilu lweto?
9 Kana una vo Satana ovanga wawonso muna nwanisa nkangu a Nzambi, ke difwete kutuvumisa ko. Kadi ke luvuluzu lwa yeto kibeni ko tutokanenanga, kansi nkumbu a Yave ye kimfumu kiandi. Yave nkumbu 60 kavova vo: “Nuzaya wo vo i Yave kwame.” (Yez. 6:7) Ekolo tuvingilanga ye kiese kiawonso e ndungan’a ungunza wa Yezekele, tubundanga vuvu vo ‘Yave ozeye e mpuluza kevuluz’awana bekumvumina muna umpukumuni.’ (2 Pet. 2:9) Muna kuma kiaki, tufwete sadilanga konso elau muna kumika lukwikilu lweto kimana twalenda zindalala ye kwikizi muna Yave yo zizidila konso lubangamu lulenda kutulwakila. Adieyi tufwete vanga? Tufwete sambanga, longoka Nkand’a Nzambi yo badika mana tutanganga yo samuna e nsangu za Kintinu kw’akaka. Muna vanga mawonso mama, e vuvu kieto kia vwa moyo a mvu ya mvu kisikila nze “mbw’a nzaza.”—Ayib. 6:19; Nku. 25:21.
E ZULA ISINGA ZAYA YAVE
10, 11. E vita y’Armangedo aweyi iyantikila? Adieyi divangama muna kolo kiakina?
10 Nkia diambu dia sivi disinga bwa vava kinwaniswa nkangu a Yave? Yave osadila Yesu ye vu kiandi ki’ezulu muna tanina nkangu andi. (Lus. 19:11-16) Ediadi ditwasa “vit’a lumbu kianene kia Nzambi wa Mpungu-ngolo” i sia vo Armangedo.—Lus. 16:14, 16.
11 Muna kuma kia vita yayi, Yave wavova muna Yezekele vo: “Mbokelesa nsosolo kwa miongo miame miawonso muna yandi [Ngonge], i kavovele o Mfumu Yave: o nsosolo a konso muntu ukala muna mpangi andi.” Mavwanga mekala kw’awana bena kuna sambu dia Satana yo yantika vondaziana. Mavwanga mama Satana otwasa mo. Yave wavova vo: “O tiya y’elengo, muna mvengo miandi [Ngonge] yo muna nkangu miayingi mina yandi.” (Yez. 38:21, 22) Adieyi dibwa vava Nzambi kevanga diambu diadi?
12. Adieyi besinga vanga esi zula?
12 Esi zula besinga bakula vo Yave otwasa lufwasu lwau. I bosi, awana bekala kun’esambu dia Satana besinga vova nze una wavova Angipito ana banwanisanga Aneyisaele kuna nz’ankulu vo: “O Yave okubanwanisina.” (Luv. 14:25) Esi zula besinga zaya Yave. (Tanga Yezekele 38:23.) Nga kolo kiyantika mambu mama kifinamene?
KE VEVAIKA LUYALU LWAKAKA KO LWANGOLO
13. Adieyi tuzeye mu kuma kia ndambu a tanu ya teke kayika Daniele?
13 Ungunza umosi muna nkand’a Daniele ukutusadisanga mu bakula e kolo se tuna. Daniele wayika e teke kia muntu kiavangilwa mu salanganu yaswaswana. (Dan. 2:28, 31-33) E teke kiaki yintinu ya ngolo ya nz’amvimba kisunzulanga. Tuka kuna nz’ankulu yamu wau, yintinu yayi diambu ivanganga kwa nkangu a Nzambi. Yintinu yayi i Babele, Madai-Parasi, Ngerekia ye Roma. E kintinu kiansuka, mu lumbu yeto kiyalanga. O lufimpu lwa ungunza wa Daniele lusonganga vo e tambi ye nlembo mia teke kiaki i kintinu kiaki kia nsuka. Muna Vit’Antete ya Nz’Amvimba, Estados Unidos ye Grã-Bretanha bakanga ekangu dia kintinu. Elo, e ndambu a tanu muna teke kia Daniele i kintinu kia ngolo kia nz’amvimba kia Anglo-Americana. E tambi ina vo i ndambu a nsuka ya teke,isonganga vo ke vemoneka diaka luyalu lwakaka ko lwa ngolo ova nza. E tambi ye nlembo miasangwa tadi ye tûma, misonganga vo Luyalu lwa ngolo lwa Nz’amvimba lwa Anglo-Americana lwatovoka.
14. Nkia kintinu kia Nz’amvimba kikala ye wisa vava Armangedo ilwaka?
14 Ungunza wau usonganga vo Kintinu kia Nzambi i tadi dianene, diadungunwa muna mongo a kimfumu kia Yave muna mvu a 1914. Owau etadi diadi difinamene kosomona tambi ya teke. Muna Armangedo, e teke kiaki kikosomonwa emvimba yamuna tambi. (Tanga Daniele 2:44, 45.) Kintinu kia Nz’amvimba kia Anglo-Americana kaka kikala ye wisa vava vita y’Armangedo iyantika. Ekwe kiese ditwasa mu mona e ndungan’a ungunza wau! * Kansi, adieyi Yave kesinga vanga kwa Satana?
ADIEYI DIBWILA MBENI ANTETE A NZAMBI?
15. Adieyi disinga bwila Satana ye nkwiya miandi kuna mfoko a Armangedo?
15 Diantete, Satana osinga mona mawonso vava kifwaswa nkubik’andi yawonso ova nza. I bosi, Nzambi osia sungididi kwa yandi kibeni Satana. Yoane wa ntumwa osonganga dina disinga bwila Satana. (Tanga Lusengomono 20:1-3.) Yesu Kristu una vo i “mbasi . . . wina ye nsabi a mbilu,” osinga kanga Satana ye nkwiya miandi yo kubatuba muna mbilu yo kubakanga mu funda dia mvu. (Luka 8:30, 31; 1 Yoa. 3:8) O lwalu i lubantiku lwa bosola ntu a nioka. *—Etu. 3:15.
16. Adieyi dibwila Satana vava ketubwa muna “mbilu”?
16 Nki i “mbilu” muna Satana ye nkwiya miandi besinga tubwa? Mvovo a Kingerekia a’bys·sos kasadila Yoane wasekolwa vo “mbilu” usonganga vo “wulu dia kondwa batu,” “fulu kia sina kikilu” ye “ke kilwakwanga ko.” Ka vena muntu ko olenda lwaka va fulu kiokio, nanga Nzambi kaka ye mbasi andi una “ye nsabi za mbilu.” Muna kuma kiaki, Satana ke kala diaka ye wisa ko kia ‘tungianisa e zula.’ O “nkosi ankwinti” osinga butikwa.—1 Pet. 5:8.
MAMBU MEBWA VITILA KOLO KIA LUVUVAMU
17, 18. (a) Nkia mambu tubadikidi mebwa kuna sentu? (b) Kuna mfoko a mambu mama nkia ntangwa tuzingila?
17 Ke kolo ko vebwa mambu ma mfunu ye masivi. Tusutilanga mona una nsilu a “Ngemba yo luvuvamu!” ulunganena. I bosi, tumona lufwasu lwa Babele Anene, vita ya Ngonge a Mangonge, vita y’Armangedo ye vava Satana ye nkwiya miandi betubwa muna mbilu. Kuna mfoko a mambu mama vava yimpumbulu yawonso ivempolwa, e zingu kieto kisoba muna kolo kia Luyalu lwa Kristu lwa Funda dia Mvu. Muna ntangwa yayina, tuvwa “mawete mayingi.”—Nku. 37:10, 11.
18 Vana ntandu a mambu tanu tubadikidi, vena ye ‘mambu makaka malembi monekanga’ tufwete “sia meso.” Tubadika mambu mama mun’elongi dilanda.
[Mvovo Vana Yand’a lukaya]
^ tini. 2 Tulongoka mambu kumi mama mun’elongi diadi ye dina dilanda.
^ tini. 6 Tala nkanda Revelação — Seu Grandioso Clímax Está Próximo lukaya lwa 251-258.
^ tini. 14 Muna Daniele 2:44 tutanganga vo ‘yintinu yayi yawonso isukiswa.’ E yitinu yayi i tuyalu twa ngolo twa nz’amvimba tusunzulwanga kwa teke. Kansi, ungunza wakaka wa Nkand’a Nzambi usonganga vo e “ntinu mia nza yawonso” besinga kutikwa muna nwanisa Yave muna “lumbu kianene kia Nzambi wa Mpungu-ngolo.” (Lus. 16:14; 19:19-21) Muna kuma kiaki, ke tuyalu kaka tuzunzulwanga kwa teke ko tusinga fwaswa muna Armangedo, kansi tuyalu twawonso twa nza.
^ tini. 15 O ntu a nioka ubosolwa emvimba kuna mfoko a funda dia mvu vava Satana ye nkwiya miandi betubwa “van’eyanga dia tiya y’elengo.”—Lus. 20:7-10; Mat. 25:41.
[Yuvu ya Longoka]
[Babu/Mafoto zina muna lukaya lwa 4]
MAMBU TANU MESINGA BWA:
1 Ayadi a nza bevova vo “Ngemba yo luvuvamu!”
2 E zula yifwasa “Babele Anene”
3 Nkangu a Yave unwaniswa
4 Vita ya Armangedo
5 Satana ye nkwiya miandi betubwa muna mbilu
