‘Muna nua mia Yingyana-ngyana’ Mutuka Lukasakeso

Muna ngonde a Desemba a mvu wa 2009 Afundisi a mbazi a nkanu a nene a Rússia babaka e nzengo za sukisa nkubika ya Mbangi za Yave kuna mbanza Taganrog, Rússia. Bakutumuna Eseka diau dia Kintinu yo vova vo 34 ma nkanda miau mivovelanga mabundu makaka e mbi. E nzengo zazi zasiwa muna nzila ya Mbangi za Yave muna Internete ye mafoto m’awana babakama kumosi ye yingyana-ngyana.

Vioka ngonde zakete, Evula dia Mbangi za Yave kuna Rússia diatambula caixa yo nkanda watuka kwa esi nzo mosi bena vo Mbangi za Yave kuna mbanza Queensland, Austrália ana bamona muna Internete e nzengo zabakwa kuna Mbazi a nkanu mu kuma kia Mbangi za Yave. Basoneka vo: “Ampangi azolwa, o wan’eto Cody yo Larissa batoma kasakeswa muna lukwikilu ye mpasi nwamona. Wan’eto basoneka nkanda, oyeto mpe tukubikidi tukau tuzolele twika kw’aleke bena kuna Taganrog, kana una vo kwa ndá bena. Tuna ye ziku vo vena mpe yo wana akaka besadilanga Yave ye kwikizi kiawonso nze yau. O wan’eto babatwikidi mavimpi yo kubasikidisa vo betoma kubazolanga.”

Vava batambula tukau twatu, o wana kuna mbanz‘a Taganrog basoneka o nkanda mu vutula matondo kwa esi nzo yayina kuna Austrália. Muna songa luyangalalu mu kuma kia mvovo mialukasakeso mitukanga ‘muna nua mia yingyana-ngyana,’ mpangi mosi osadilanga kuna vula dia Russia wasonekena Cody yo Larissa vo: “Yindula e nkenda bamona e yingyana-ngyana yayi kumosi y’ambuta vava batumbwa mu kuma kia diambu dina ke bavanga ko! E mpangi zeto z’akala ye z’akento kuna Taganrog ke bavanga diambu diambi ko, kansi Eseka diau dia Kintinu diakutumunwa. Ediadi diabakendeleka kikilu. Kansi, dialukasakeso mu zaya vo vena ye wantu akaka omu nza betokananga mu kuma kiau. Ntondele kikilu muna nzol’eno yo ntima mvevo nwasongele.”—Nku. 8:2.

Kieleka, tuna muna kintwadi kia wan’angudi omu nza yawonso, o zola tusonganga kwa muntu yo kw’andi kukutusadisanga mu zizidila e mpasi yo lubangamu. Ekolo afundisi a mbazi a nkanu befilaziananga e mpaka vo nkanda mia Mbangi za Yave mikasakesanga o wantu mu menga akaka, o wana Mbangi za Yave betokanenanga ewete dia mpangi zau a nsi zakaka. Ediadi disonganga e ziku kia mvovo mia Yesu vo: “Muna wau i bezayil’o wantu awonso vo nu alongoki ame, ovo nzolani nuna yau.”—Yoa. 13:35.

[Mafoto zina muna lukaya lwa 32]

Yingyana-ngyana kuna Rússia (ku koko kwalumonso) ana batambula tukau twatuka kwa yingyana-ngyana kuna Austrália (ku koko kwalunene)