O Ulolo wau Usadil’owu Bakondelo

MUNA mvu wa 49 wa Tandu Kieto, Petelo, Yakobo ye Yoane, “ana batundidi se malunzi,” bavana kiyekwa kwa Paulu wa ntumwa yo Banaba wa nkw’andi a salu. E kiyekwa kiaki kiavavanga vo bayindulanga Akristu asukami ekolo basilanga umbangi kwa esi zula. (Ngal. 2:9, 10) Aweyi balungisila kiyekwa kiaki?

E nkanda mia Paulu misonganga una kasilang’e diambu diadi e sungididi. Kasikil’owu, kuna kw’Akristu a esi Korinto wasoneka vo: “Vo i diambu dia ngonzekel’aveledi, wauna yakanikina mabundu ma Ngalatia, oyeno mpe i nuvanga una. Muna lumbu kiantete kia lumingu, yeno awonso, konso muntu wiyilundila, muna mbaku andi, ke vakala ngonzekela vava nkwiza. Vava nluaka, konso ana nutumbila muna nkanda, i yau yana ntuma banat’ewete dieno kuna Yerusaleme.”—1 Kor. 16:1-3.

Muna nkand’ezole kwa esi Korinto, Paulu wayika ekani dia ngonzekela. Mu kuma kia “mfwanani kaka; muna kiau kolo eki o ulolo weno usadil’owu bakondelo.”—2 Kor. 8:12-15.

Vava Paulu kasonekena Akristu esi Roma muna mvu wa 56 wa Tandu Kieto, fioti kaka fiasala mu fokola e ngonzekela. Wavova vo: “Kansi owau, kuna Yerusaleme nkwenda, aveledi nkwenda sadila. Kadi Makedonia ye Akaya bayizolele o kubikil’asukami mun’aveledi bena kuna Yerusaleme ekau.” (Roma 15:25, 26) Paulu walungisa e salu kiandi, i bosi ke vavioka kolo ko, wavutuka kuna Yerusaleme yo siwa muna pelezo. Wavovesa Feleka wa nguvulu a esi Roma vo: “Ngizidi atwasi tukau twankenda kwa zula kiame, yo tutambiku.”—Mav. 24:17.

E fu kina basonga Akristu a tandu kiantete, kiatoma moneka muna mvovo mia Paulu kwa esi Masedonia. Wabavovesa vo: ‘Batudodokèle ndodokela zayingi kimana bavwa elau dia vanina kuna mvevo.’ O ntumwa wavovesa esi Korinto vo balanda e mbandu yayi. Wavova vo: “Yambula konso muntu kavanga una kakanini muna ntim’andi; ke ku ntantu ko, ngatu ku nkomena: kadi Nzambi ozolele mvani amvevo.” Nki kiafila nkutakani mu songa e fu kia vanina kuna mvevo? Ke bakala kaka y’ekani dia ‘lungisa owu ukondelo kw’aveledi ko, kansi ilunguka mpe muna matondo mayingi kwa Nzambi.’ (2 Kor. 8:4; 9:7, 12) Yeto mpe tulenda kala y’ekani diau dimosi vava tuvananga tukau twa mvevo. Yave wa Nzambi osambula e fu kiaki kiambote. Elo, e nsambu zandi zau zivwamisanga muntu.—Nga. 10:22.

 [Mvovo mia Fwaniswa mina muna lukaya lwa 9]

Vava Ntim’eto Ukutufilanga Mu Vana Kina Tulenda

Akete kaka muna Mbangi za Yave bena ye mavwa mayingi, kansi ulolo bemonanga e mpasi za kondwa e nzimbu. Muna kuma kiaki, avo se vana lukau lwamvevo mu nungununa salu kia Kintinu, kana nkutu lwakete, kufwete banza ko vo ka luna mfunu ko. Vava Yesu kamona nkento ansona wa nsukami watuba mbiya zole muna lundilwa kia nzimbu muna tempelo, kamveza ko. Kansi, wavova vo: “Kieleka inusamunwini vo, o nkento ndioyu anson’ansukami otubidi ntuba iviokele awonso; kadi awowo muna nsavu au i batubìdi muna mwina tukau: vo i yandi, muna usukami wandi i katubìdi vumu kiandi kiawonso.” (Luka 21:1-4) Kanele vo lukau lwandi lwakete lwakala, wavana kina kalenda.

Muna lenda vana lukau, konso muntu, konso nzo yovo konso nkutakani, divavanga vo bateka kubama. Vava Akristu a esi Korinto bazola sadisa mpangi zau bakala mu mpasi kuna Yuda, Paulu wa ntumwa wabavana luludiku lwamfunu luna bafwete landa. Wasoneka vo: ‘Vo i diambu dia ngonzekel’aveledi, wauna yakanikina mabundu ma Ngalatia, oyeno mpe i nuvanga una. Muna lumbu kiantete kia lumingu, konso muntu muna nzo andi, kafwete kilundila, muna mbaku andi, ke vakala ngonzekela vava ikwiza.’—1 Kor. 16:1, 2.

Nze una muntu kelundilanga nzimbu mu kuma kia diambu dilenda bwa ku kinsalukisa, i una mpe konso Mbangi a Yave yovo konso nzo yovo nkutakani balenda lundila konso kina balenda mu vana lukau mu nungununa nsambil’aludi. Muna kuma kiaki, e nkutakani zawonso zivananga tukau konso ntangwa mu nungununa salu kia Kintinu. Bevanganga wo muna teka kubama yo wizana una bafwete wo vangila. Akwa ntima miamvevo ana beyangalelanga nsangu zambote, bevananga mpe tukau twau mu yikama e salu kiaki kisalwanga mu nza yawonso. Tukau twatu twamvevo tuwokesanga luyangalalu ye kiese kiau mu zaya vo bevananga kina balenda.

Evula difilanga e nkand’a matondo mu zayisa vo lukau lwau lutambukidi.

Tukau twawonso tufilwanga kuna Vula, tuyangalelwanga yo sadilwa mu salu kia samun’e nsangu zambote za Kintinu kia Nzambi. Kasikil’owu, tukau twatu tusadilwanga mu kubika e nzo ye salu kia misionario muna nsi zayingi. Tusadilwanga mpe mu lunga-lunga yovo sumba sadilwa ya nietekena nkanda ye má yakaka. Tukau twatu tusadisanga mpe akengi a zunga ye a mvivu mu kingula nkutakani z’Akristu mu nza yawonso yo kubakasakesa muna mwanda. (Roma 1:11, 12) Akaka mpe bena mu salu kia ntangwa ke ntangwa bebakanga filusadisu mu tukau twatu. Akristu antete ana bayikama nsambil’aludi batambula nsambu, kadi bakembelela Yave muna mavwa mau. Ekwe nsambu bakala zau! Yeto mpe nsambu zayingi tuvwa avo tuyikama e salu kia Kintinu mu mpila yayi. Muna kuma kiaki, yambula twakala yo nyindu ambote vava ntim’eto ukutufilanga mu vana konso kina tulenda.

[Mvovo mia Fwaniswa mina muna lukaya lwa 9]

Konso muntu, konso nzo yovo konso nkutakani izolele vana lukau, lenda lo fila kuna:

Associação das Testemunhas de Jeová

Rua Talatona No. 1—Luanda Sul

Caixa Postal 6877

Luanda—Angola