Tufwete Songanga vo tu “Minduti a Nzila”
Tufwete Songanga vo tu “Minduti a Nzila”
“Inuwondelele nze anangi, ye minduti a nzila, nwakenga maketo ma nitu.”—1 PET. 2:11.
NKIA MVUTU OVANA?
Ekuma akuswa balenda yikilwa vo minduti a nzila?
Aweyi “mameme makaka” benena nze minduti a nzila?
Adieyi olakukilwang’o moyo mu kuma kia kusentu?
1, 2. Vava Petelo kasadila o mvovo “asolwa,” aki nani kayika? Ekuma kabayikila vo “minduti a nzila”?
VAVA vavioka mvu 30 tuka Yesu katombokela kun’ezulu, Petelo wa ntumwa wasonekena awana bakala nze ‘minduti a nzila ana bamwangana muna Ponto ye Ngalatia ye Kapadokia ye Asia ye Bitunia.’ (1 Pet. 1:1) Muna sadila o mvovo “asolwa,” Petelo wayika awana bakuswa muna mwand’avelela nze yandi yo ‘wutulwilwa muna vuvu kiamoyo’ mu kwenda yala yo Kristu kun’ezulu. (Tanga 1 Petelo 1:3, 4.) Kansi, ekuma kayikila awana basolwa vo ‘anangi ye minduti a nzila’? (1 Pet. 2:11) Nkia nsasa dina kwa yeto o unu wau vo vana vena 650 za Mbangi za Yave mu nz’amvimba, 1 kaka okuyibadikilanga vo wakuswa muna mwanda?
2 Akuswa a tandu kiantete bafwana kikilu yikilwa vo “mintundi a nzila.” Nze nsadisw’a buka kia akuswa ana bakinu yo moyo o unu, Akristu a tandu kiantete ke bakala ye vuvu kia zingila yakwele mvu ko ova ntoto. O Paulu wa ntumwa, una vo mosi muna “fikambi-kambi” fi’akuswa, wasasila vo: “Vo i kisi nsi eto, kun’ezulu kina; kuna tuvingil’o mvuluzi, wa Mfumu Yesu Kristu.” (Luka 12:32; Fili. 3:20) Wau vo ‘kisi nsi kiau, kun’ezulu kina,’ vava befwanga Akristu akuswa besisanga o ntoto yo vwa zingu kisundidi o wete, i sia vo, moyo ulembi fwa kun’ezulu. (Tanga Filipi 1:21-23.) Muna kuma kiaki, balenda yikilwa vo “minduti a nzila” mu nza yayi iyalwanga kwa Satana.
3. Nkia kiuvu kiyuvulwanga mu kuma kia “mameme makaka”?
3 Adieyi tuvova mu kuma kia “mameme makaka”? (Yoa. 10:16) Nga ke vuvu kiasikila ko bena kiau kia zingila ova ntoto yakwele mvu? Kieleka, o ntoto usinga kala se kalu kiau yakwele mvu. Kansi mu kolo kiaki, oyau mpe balenda yikilwa vo minduti a nzila. Muna nkia mpila?
‘O NSEMA WAWONSO UBUMANGA’
4. Ayadi a nza nki ke belendanga sukisa ko?
4 Ekolo e nza yayi yambi iyalwanga kwa Satana ke yafwasilu ko, wantu awonso kumosi y’Akristu, bekwamanana mona mpasi zatwasa Satana muna kolamena Yave. Muna Roma 8:22 tutanganga vo: “Tuzeye wo vo o nsema wawonso ubuminanga yo kala yo nsongo kumosi yamu wau.” Kana una vo bekalanga ye makani mambote, ayadi a nza, akwa ngangu kumosi y’awana bezolanga sadisa wantu ke belendanga sukisa mpasi zazi ko.
5. Nkia nzengo zibakanga wantu ayingi tuka muna mvu wa 1914? Ekuma?
5 Tuka muna mvu wa 1914, mazunda ye mazunda ma wantu besolanga kala amosi muna nkangu uyalwa kwa Kristu Yesu una vo Ntinu wayadikwa kwa Nzambi. Ke bazolele kala esi nza ya Satana ko. Ke beyikamanga nza ya Satana ko. Kansi, besadilanga zingu kiau ye mavwa mau muna yikama yo nungununa oma ma Kintinu kia Nzambi.—Roma 14:7, 8.
6. Mu nkia mpila Mbangi za Yave balenda yikilwa vo anangi?
6 Dialudi vo muna vioka 200 za nsi bezingilanga, Mbangi za Yave bazayakene vo nsiku bezitisanga. Kansi, kiakala nkia nsi bezingilanga, bekuyibadikilanga nze anangi yovo anzenza. Bevenganga kuyisia muna mambu ma tuyalu yovo ma nza yayi. Kana nkutu owau, bekuyibadikilanga nze nkangu a nz’ampa ina Nzambi kesikidisa. Bevingilanga ye kiese kiawonso e kolo kina ke bekala diaka minduti a nzila ko mu nza yayi yambi eyi ifwaswa ke kolo ko.
7. Nkia ntangwa selo ya Nzambi beyambula kala minduti a nzila? Akweyi bezingila yakwele mvu?
7 Ke kolo ko, o Kristu osadila wisa kiandi mu fwasa nza yambi ya Satana. Luyalu lwalunga lwa Kristu lusukisa masumu ye ntantu ova nza. Lukatula mpasi zawonso zatwasa awana bakolamena kimfumu kia Yave. Selo yakwikizi ya Nzambi besinga zinga yakwele mvu ova ntoto ukituka se Paradiso. (Tanga Lusengomono 21:1-5.) Muna kolo kiakina, o nsema wawonso ‘uvevolwa muna kibundu kia uwolezia, yamuna vevoka kwa nkembo a wan’a Nzambi.’—Roma 8:21.
ADIEYI DIVAVWANGA KWA AKRISTU AKIELEKA?
8, 9. Adieyi Petelo kazola vova muna mvovo “nwakenga maketo ma nitu”?
8 Petelo wayika dina divavwanga kw’Akristu vava kavova vo: “Azolwa, inuwondelele nze anangi, ye minduti a nzila, nwakenga maketo ma nitu, mana menwananga yo mwanda.” (1 Pet. 2:11) Entete luludiku lwalu kw’Akristu akuswa lwavewa. Kansi, luvewanga mpe kwa mameme makaka ma Yesu.
9 Ke diambi ko kele vo muntu olungisi emaka maketo yovo zolela muna mpila ina kasikidisa o Mvangi. Zolela yayi kiese ikudikilanga muna zingu kia muntu. Kasikil’owu, tukalanga y’etima dia dia madia mambote, nua, sakana yo kala vamosi y’akundi. Kana nkutu e nsatu za vukana kw’awana bakazala ke zambi ko, zina ye fulu kiandi. (1 Kor. 7:3-5) Kansi, e “maketo ma nitu” kayika o Petelo i mana “menwananga yo mwanda.” Muna songa e nsas’a mvovo miami, nsekola zakaka za Nkand’a Nzambi zisadilanga mvovo “zolela yambi” (Versão Rei Jaime) yovo “zolela y’esumu” (Nova Versão International). Elo, tufwete venga konso zolela ya nitu ke ina ngwizani ko y’ekani dia Yave yovo ilenda fwasa kikundi kieto yo Nzambi. Avo ke wau ko, e vuvu kena kiau o Nkristu kia vuluza moyo andi ke kilungana ko.
10. Nkia ntambu kesadilanga o Satana mu fila Akristu bakituka se esi nza eyi keyalanga?
10 Ekani dia Satana i yoyesa etima dia Akristu akieleka dia kuyibadikila nze “minduti a nzila” ova nza yayi. Vana vena ntambu mia Satana, tulenda yika luzolo lwa kala ye mavwa mayingi, umpukumuni wa tá zumba, etima dia kala y’etunda, luzolo lwa sunda akaka yo badikila nsi eto vo isundidi e nsi zakaka. Avo tusidi ngolo za venga zolela yayi yambi ya nitu, tusonga vo ke tuzolele kala esi nza ya Satana ko. Tusonga vo tu minduti a nzila mu nza yayi. Edi tuvavanga yo lakukilw’o moyo vo dialungana, i zinga yakwele mvu muna nz’ampa ya Nzambi muna mukala unsongi.
NKAL’AMBOTE
11, 12. Ezak’e ntangwa anzenza aweyi bebadikilwanga? Adieyi tuvova mu kuma kia Mbangi za Yave?
11 Petelo wayika diambu diakaka divavwanga kw’Akristu bena vo “minduti a nzila” vava kavova muna tini kia 12 vo: “Nwakala nkal’ambote vana vena zula; mun’owu bekunukùmbila, nze nu mimpanga-mayi, muna mavangu meno mambote betalanga, bakembelela Nzambi muna lumbu kiankingulwa.” Anzenza ana bezingilanga muna nsi ina vo ke nsi au ko, ezak’e ntangwa vezwa bevezwanga. Wau vo baswaswana ye mfinangani zau, balenda badikilwa nze yimpumbulu. E ndinga, fu yau, mpila ya vwatila ye mpw’au ilenda kala yaswaswana. Kansi, avo mavangu mau mambote, i sia vo, vava besonganga nkal’ambote, e mbi bevovelwanga mu kuma kia sia vo baswaswana ke ikala ye kuma kiasikila ko.
12 Diau adimosi, Akristu akieleka baswaswana ye mfinangani zau mu mambu mayingi, nze mana bemokenanga yovo muna nsaka besolanga. Nkumbu miayingi, e mpil’au ya vwatila yo kuyikubika ikubaswaswanesanga ye wantu ayingi muna zunga kiau. E nswaswani zazi zifilanga wantu ana ke batomene kubazaya ko mu kubabadikila vo yimpubulu. Kansi, akaka balenda kubasanisina mu kuma kia nkal’au ambote.
13, 14. Mu nkia mpila e ngangu ‘zilungisilwanga muna mavangu mandi’? Yika nona.
13 Elo, e nkal’ambote ilenda vunisa awana bekutuvovelanga e mbi. Kana nkutu Yesu, una vo yandi kaka wasikila ye kwikizi muna Nzambi mu mpila yalunga, wavovelwanga mpe e mbi. Akaka nkutu banyikila vo “diayuma, nduvu a vinyo, nkundi akwa mpaku y’asumuki.” Kansi, e ngangu kasonganga muna sadila Nzambi zavunisanga awana bambadikilanga vo kimpumbulu. Yesu wavova vo: “O ngangu olungisilu muna mavangu mandi.” (Mat. 11:19) I diau mpe divangamanga o unu. Kasikil’owu, ayingi mun’awana bezingilanga lukufi ye Betele kuna mbanza Selters, Alemanha, bebadikilanga e zingu ki’Akristu ana besadilanga kuna Betele vo kiaswaswana. Kansi, o mfumu a mbanza wavova mu kuma kiau vo: “E zingu kia Mbangi za Yave besadilanga kuna Betele kiaswaswana ye kia wantu ayingi, kansi ke besianga zingu kia esi mbanza mu vonza ko.”
14 I wau mpe bebadikilwanga Mbangi za Yave bezingilanga kuna mbanza Moscou, Rússia. Mambu mayingi mambi bevuninwanga. Muna ngonde a Yuni, 2010, afundisi a Buka Kitalanga Oma ma Zitu wa Wantu kuna Europa, muna mbanza Strasbourg, França, babak’e nzengo ezi: “Afundisi a mbazi a nkanu yayi bamwene vo e nkaku misianga luyalu lwa Moscou mu kuma kia nswa bena wau Mbangi za Yave wa sambila ke una ye kuma kiasikila ko. Afundisi a Moscou ke bavene kuma yasikila ko mu songa vo esi dibundu diadi” esi nzo bevambulanga, fila wantu mu kuyivonda yovo ke betambulwilanga mawuku ko. Afundisi a Buka Kitalanga Oma ma Zitu wa Wantu kuna Europa bamona vo, e tumbu kiavana afundisi a mbazi a nkanu yayi kiabala kikilu, kadi nsiku miangolo mia mbanza Moscou basadila mu vava e ngyelele muna Mbangi za Yave.
LUSAKALALU
15. Nkia nkanikinu a Nkand’a Nzambi belemvokelanga Akristu akieleka mu nz’amvimba?
15 Mbangi za Yave kuna Moscou ye mu nz’amvimba belungisanga nkanikinu wavewa kw’Akristu una Petelo kayika. Wasoneka vo: “Nusakalela konso eki kitumbwa kwa wantu, muna diambu dia Mfumu: kana ntinu, nze mpungu; kana nyazi.” (1 Pet. 2:13, 14) Kana una vo ke bekuyisianga mu mambu ma nza yayi yambi ko, Akristu akieleka besakalelanga ayadi muna ‘tezo kia wisa bavewa,’ nze una Paulu kabakanikina. —Tanga Roma 13:1, 5-7.
16, 17. (a) Adieyi disonganga vo ke tutelamenanga ayadi ko? (b) Adieyi afidi akaka a luyalu bavova?
16 Vava Mbangi za Yave bezinganga nze minduti a nzila mu nza yayi, ekani diau ke dia telamena luyalu ko. Vana ntandu, ke besimanga akaka ko vava bebakang’e nzengo muna mambu ma tuyalu yovo ma nkangu. Nswaswani ye mabundu makaka, Mbangi za Yave ke bekuyisianga mu mambu ma tuyalu ko. Bevenganga o zayisa kw’ayadi e nzengo bafwete baka mu kuma kia zingu kia nkangu. E ngindu za kuyisia mu ntantani za nkangu yovo za telamena luyalu ke zikubalwakilanga nkutu ko.
17 Vava belemvokelanga ayadi mun’owu wa luludiku lwa Petelo lwa ‘zitisa ntinu,’ Akristu besonganga zitu una betela ye wisa kia ayadi awaya. (1 Pet. 2:17) Ezak’e ntangwa, ayadi bebakulanga vo ke vena ye kuma kiasikila ko kifwete kubafila mu mwena Mbangi za Yave wonga. Kasikil’owu, Steffen Reiche wa nyadi mosi kuna Alemanha, wavova vo: “E nkal’ambote yasonga Mbangi za Yave muna fulu ya salu yangolo ye muna pelezo i fu ivavwanga o unu nze una wakala kuna nz’ankulu muna kwamanana kala ye luyalu luzitisanga luzolo lwa nkangu, musungula o unkabu basonga muna luyalu lwa Hitler ye nkenda basonganga kw’awana bakala yau entwadi muna pelezo. Muna kuma kia wokela kwa fu kia bangika anzenza y’awana betelamenanga ayadi, e fu yayi ya nkal’ambote mfunu kikilu ina kwa nkangu a nsi eto.”
ZOLAZIANA
18. (a) Ekuma tusongelanga zola kwa mpangi zeto zawonso? (b) Adieyi wantu akaka bevovanga mu kuma kia Mbangi za Yave?
18 Petelo wa ntumwa wasoneka vo: “Nuzola wana-ngudi. nuvumina Nzambi.” (1 Pet. 2:17) Mbangi za Yave bekalanga yo vumi wa lembi kendeleka Nzambi, ediadi dikubafilanga mu vanga luzolo lwandi. Bena ye kiese kia sadila Yave nze wana-ngudi ana bena y’ekani dimosi. Muna kuma kiaki, diamfunu kwa yau mu songa ‘nzola wana-ngudi.’ E nzol’a mpila yayi ke yitoma monekanga ko kwa wantu a tandu kiaki akw’eloko, ezak’e ntangwa awana bena vo ke Mbangi za Yave ko besivikanga. Kasikil’owu, nkento mosi wasadilanga kuna kompani dimosi dia tambula nzenza dia esi América, wasivika mu mona e mpila Mbangi za Yave basongelanga zola yo sadisa awana bayenda kuna lukutakanu lwa nsi zayingi kuna Alemanha muna mvu wa 2009. Wavova vo muna mvu miawonso kasadidi kala mu tambula e nzenza, kasidi mona diambu dia mpila yayi ko. I bosi, mpangi mosi wavova vo: “Mawonso kavovanga mu kuma kieto, wavovanga mo kuna ngemba ye kiese.” Nga wawá kala e mvovo mia mpila yayi mu kuma kia Mbangi za Yave muna lukutakanu lwa mvivu?
19. Nki’ekani tufwete kala diau? Ekuma?
19 Muna mambu mama mawonso ye makaka, Mbangi za Yave besonganga vo “minduti a nzila” mu nza yayi ya Satana. Bena ye kiese kia kwamanana kala nze “minduti a nzila.” Bena ye vuvu kiasikila vo ke kolo ko bezinga yakwele mvu muna nz’ampa ya Nzambi muna mukala unsongi. Nga una ye vuvu kiaki?
[Yuvu ya Longoka]
[Foto ina muna lukaya lwa 20]
Ke tuvavanga vuluza nza ya Satana ko
[Foto ina muna lukaya lwa 20]
Tuzayisanga kwa wantu oma ma nz’ampa ya Nzambi
[Foto ina muna lukaya lwa 22]
E ludi kia Nkand’a Nzambi kiayikakesa esi nzo yayi kuna Russia
