Venga fu kia Sadila Nkand’a Nzambi nze Mpandu

“E DIAMBU dia Nzambi diamoyo ye nkuma.” (Ayib. 4:​12) Muna mvovo miami, Paulu wa ntumwa wasonga o nkuma uvwidi diambu dia Nzambi wa simba ntima yo soba e zingu kia wantu.

Kansi, vava o umpengomoki wasakulwa wayantika kuna nima lufwa lwa antumwa, e mpila yabadikila o nkum’a nsangu za Nkand’a Nzambi yasoba. (2 Pet. 2:​1-3) Kuna kwalanda, afidi a mabundu bayantika badikila Diambu dia Nzambi nze mpandu. Harry Y. Gamble wa nlongi a sikola zandá wasoneka mu kuma kia ‘mpila ina wantu basadilanga Nkand’a Nzambi nze mpandu.’ Wasoneka vo muna tandu kietatu, Orígenes wa mfumu a dibundu wavova vo “o wá kwa nkatu e mvovo miavauka nluta ditwasanga. Avo e mvovo mivwidi nkuma muna mpandu za esi zula, tulenda vova vo nkuma wa mvovo mia Nkand’a Nzambi usundidi.” Muna tandu kiayá, John Chrysostom wasoneka vo: “Nkadi ampemba kalendi finama mu nzo zina ye Nkand’a Nzambi ko.” Wavova mpe vo akaka bazenganga e tini ya Nkand’a Nzambi yo vwata yo muna nsingu zau nze nkisi milenda kubatanina. Kuna kwalanda, Gamble wa nlongi a sikola zandá wavova vo: Agostinho de Hipona wa nlongi a dibundu dia Katolika, “wabadikilanga dio diambote kele vo muntu omonanga ntu e mpasi, osidi nkand’a Yoane vana mfika vitila kaleka.” E sono ya Nkand’a Nzambi yasadilwanga nze mpandu. Nga obadikilanga Nkand’a Nzambi nze mpandu zilenda kutanina muna mbi?

Nanga mpila yatoma sadilwanga Nkand’a Nzambi mu mpila yambi, i fu kia ziula Nkand’a Nzambi kuna kinsalukisa yo tanga e tini kiantete kiele betela ye meso ye vuvu vo e mvovo mia tini kiaki mikuvana luludiku ovwidi o mfunu. Kasikil’owu, Gamble wavova vo, lumbu kimosi Agostinho de Hipona wawá nding’a mwana muna nzo a mfinangani andi yavovanga vo: “bonga watanga, bonga watanga,” Agostinho de Hipona wabadikila wo nze nkanikinu utukidi kwa Nzambi wa ziula o Nkand’a Nzambi yo tanga e tini kiantete kamona.

Nga wawá kala vo wantu ayingi vava bena mu mu mpasi, besambanga kwa Nzambi yo ziula Nkand’a Nzambi kuna kinsalukisi ye vuvu vo e tini kiantete betanga kikubasadisa mu sunda e mpasi zau? Kana una vo balenda kala y’ekani diambote, eyayi ke mpila yambote ko Akristu bafwete vavilanga luludiku lwa Nkand’a Nzambi.

Yesu wavovesa alongoki andi vo okubafidila “nsadisi, wa mwand’avelela.” Wakudika vo: “Yandi okunulonga mawonsono, yo kunususwila mawonso mana inuvovese.” (Yoa. 14:​26) Ediadi diaswaswana ye mpila yambi ya sadila Nkand’a Nzambi iyikilu ova ntandu, ina vo, ke dina mfunu ko vo muntu kateka vwa o zayi wa Nkand’a Nzambi.

E mpila yayi ye mpila zakaka zambi za sadila Nkand’a Nzambi zitoma monekanga. Muna kuma kiaki, o Nkand’a Nzambi utumbang’e fu kia ta mpandu. (Fuka 19:26; Nsi. 18:​9-12; Mav. 19:​19) “E diambu dia Nzambi diamoyo ye nkuma,” kansi tufwete kala ye ngangu za sadila dio. O zayi wa nkand’a Nzambi wau utomesanga zingu kia wantu, kansi ke sadila Nkand’a Nzambi nze mpandu ko. O vwa zayi wau disadisanga wantu ayingi mu kala ye fu yambote yo yambula mavangu mambi. O zayi wau usiamisanga mpe e nzola muna zingu kia esi nzo, yo sadisa wantu mu kala ye ngwizani ambote yo Nzambi wa Nsonekesi a Nkand’a Nzambi.