YESU wasakula vo e tempelo a Yave ifwaswa. Ungunza wau walungana muna mvu wa 70 a Tandu Kieto vava makesa ma Roma muna lutumu lwa Tito bafwasa e Yerusaleme. (Mat. 24:⁠2) I bosi, o Juliano wa Ntinu a Roma wavanga e nkubika mu tungulula e tempelo.

Juliano ozayakene nze ntinu ansuka a esi zula muna Roma. Mwan’ankazi a Constantino o Grande kakala ye walongwa kw’awana bakiyilanga vo Akristu muna lumbu yandi. Kansi, vava kakituka se ntinu muna mvu wa 361 a Tandu Kieto, wabembola mana kalongwa. E nkanda mia lusansu miyikilanga Juliano vo mvengomoki kadi wabembola dibundu.

Juliano wamenganga awana bayibadikilanga vo Akristu. Nanga mu kuma kia sia vo, yau bavonda o s’andi ye yitu yandi vava kakala ye kimbuta kia mvu sambanu. Asoneki a lusansu lwa dibundu bevovanga vo Juliano wakasakesa Ayuda mu tungulula e tempelo au mu songa e ziku vo Yesu ngunz’a luvunu kakala. *

Ka lukatikisu ko vo Juliano luzolo lwa tungulula tempelo kakala lwau. Kansi, asoneki a lusansu befidisanga e mpaka kana vo kayantika e salu kia tungulula. Avo kayantika kio, e kuma kafokolwela kio ko. Edi kaka dizayakene mu kuma kia juliano vo wavondwa vitila kalungisa mvu miole tuka katumbikilwa se ntinu, etima dia tungulula tempelo wafwa diau.