1. Ekuma tufwete bundila e vuvu muna Diambu dia Nzambi?

VAVA akuluntu bemokenanga yo nlongoki a Nkand’a Nzambi mu zaya kana vo ukifwanisi mu kituka se nteleki, bekuyiyuvulanga: ‘Nga e mvovo miandi ­misonganga vo okwikilanga vo Nkand’a Nzambi i Diambu dia Nzambi diavumunwinwa? * Kwa konso muntu ozolele kituka se nteleki a Kintinu, i sia vo, kwa selo yawonso ya Yave, e mvutu zifwete kala, elo. Ekuma? Vava tubundanga e vuvu muna Nkand’a Nzambi yo toma wo sadila muna salu kia umbangi, tulenda sadisa akaka mu zaya Yave yo kala ye vuvu kia moyo a mvu ya mvu.

2. Ekuma tufwete ‘kadila kaka muna mana twalongoka’?

² Paulu wa ntumwa wasonga o mfunu a Diambu dia Nzambi vava kasonekena Timoteo vo: “Kala kaka muna mana walongwa yo kwikidiswa.” O mvovo “mana” kayika o Paulu i ludi kia Nkand’a Nzambi kina kiafila Timoteo mu kwikila muna nsangu zambote. E ludi kiaki diau adimosi mpe kivanganga kwa yeto o unu, kikwamanananga kutusadisa mu vwa “ngangu yamuna luvuluku.” (2 Tim. 3:14, 15) Nkumbu miayingi tusadilanga mvovo mia Paulu muna tini kilende muna songa kw’akaka vo Nkand’a Nzambi kwa Nzambi watuka. Kansi, tulenda mpe vwa nluta muna mvovo miami mina muna 2 Timoteo 3:16. (Tanga.) Yambula twabadika e mvovo mia tini kiaki. Ediadi dikumika e vuvu kieto vo malongi mawonso ma Yave “mansongi.”—Nku. 119:128.

3-5. (a) Adieyi diavangama muna lumbu kia Pentikosti vava Petelo kafokola fila elongi kwa wantu ayingi? Ekuma? (b) Ekuma wantu ayingi kuna Tesalonika batambulwila e ludi? (c) Adieyi disivikisanga wantu ayingi o unu mu kuma kia salu kieto kia umbangi?

³ Yesu wavovesa zula kia Isaele vo: ‘Ikunutumina ngunza, ye nganga, y’alongi.’ (Mat. 23:34) Yesu alongoki andi kavovela, ana kalonga o sadila Diambu dia Nzambi muna salu kia umbangi. Kina kia Pentikosti ya mvu a 33 wa Tandu Kieto, Petelo wa ntumwa una vo mosi muna ‘alongi,’ wafila elongi vana vakala wantu ayingi muna Yerusaleme, wasadila tini yayingi ya Sono ya Kiyibere. Vava nkangu bawa e mpila Petelo kasasila e sono yayi, ndonga bakendalala mu kuma kia mambu mambi bavanganga. Baviluka ntima yo lomba ndoloki kwa Nzambi. Muna lumbu kiakina, tezo kia mafunda matatu ma wantu baviluka ntima yo kituka se Akristu.—Mav. 2:37-41.

⁴ Paulu wa ntumwa i nlongi wakaka wasamuna e nsangu zambote muna zunga yakaka ya Yerusaleme. Kasikil’owu, kuna mbanza Makedonia kuna Tesalonika, wamokena y’awana basambilanga mun’esambilu. Muna lumbu tatu ya vundu Paulu “ubamokesène muna sono obakwidi, yo songa vo o Kristu ofwete mona mpasi, yo fuluka muna mafwa.” Nkia nluta diatwasa? ‘Akaka vana bena [Ayuda] bakwikidi’ nze una wavanga ‘Mingerekia miayingi.’—Mav. 17:1-4.

⁵ O unu, wantu ayingi besivikanga e mpila selo ya Nzambi besadilanga Nkand’a Nzambi. Mpangi mosi ankento kuna Suíça, vava katangila muntu mosi e sono kia Nkand’a Nzambi muna salu kia umbangi, muntu ndioyo wanyuvula kana nkia dibundu kesambilanga. Mpangi ankento wavutula vo: “O mono yo nkw’ame tu Mbangi za Yave.” Muntu ndioyo wavutula vo: “Yazaya wo kwame, kadi avo ke Mbangi za Yave ko, nani diaka olenda kwiza oku nzo ame yo tanga Nkand’a Nzambi?”

6, 7. (a) Awana belonganga muna nkutakani aweyi balenda sadila Nkand’a Nzambi mu mpila yambote? (b) Ekuma dinina diamfunu mu sadilanga Nkand’a Nzambi vava tulongokanga yo wantu?

⁶ Aweyi tulenda sadila Nkand’a Nzambi muna mpila yambote vava tulonganga akaka? Avo elau dia fila elongi muna nkutakani una diau, sadilanga e sono yasikididi. Vana fulu kia vova kaka mambu masina mena muna sono yovo bandula yo yovo sadila komputador mu tanga e sono yayi, ziula Nkand’a Nzambi yo tanga wo yo kasakesa nkangu bavanga diau adimosi. Vaulanga mpe e ntangwa mu sasila e sono mu mpila ilenda sadisila nkangu mu finama Yave. Vana fulu kia sadila e nona yampasi yovo savu isevesa wantu, sadilanga e ntangwa mu sasila e Diambu dia Nzambi.

⁷ Adieyi tufwete sungamenanga vava tulongokanga yo muntu? Ekolo tulongokanga yo muntu, katufwete viokanga e sono ko ina muna nkanda. Tufwete kasakesa nlongoki katanga e sono ina muna nkanda yo kunsadisa mu bakula e nsasa. Mu nkia mpila? Ke mu vovanga kwayingi ko, kansi muna kasakesanga o nlongoki mu songa e ngindu zandi. Vana fulu kia kunzayisa mana kafwete kwikila yovo vanga, tulenda kunyuvula yuvu yamfunu ikunsadisa mu bakula mana kelongokanga. *

8. Nkia mpasi Paulu kanwananga zau?

⁸ Akuluntu muna nkutakani bena ye mbebe ya tumba yovo singika awana basumukini. (1 Tim. 5:20; Tito 1:13) Kansi, okuyitumba yeto kibeni mfunu mpe kwina. O Paulu i mbandu ambote ya Nkristu ona wakala ye ntona zavelela. (2 Tim. 1:3) Kana una vo i wau, wasoneka vo: “Mbwene nsiku akaka muna yîkwa yame, unwananga yo nsiku a nyindu ame, yo  kumbundunwisanga muna nsiku esumu.” Tubadika dina Paulu kavanga mu sunda lutovoko lwandi.—Tanga Roma 7:21-25.

9, 10. (a) Nkia lutovoko Paulu kanwananga lwau? (b) Aweyi Paulu kasundila lutovoko lwalu?

⁹ Nkia lutovoko Paulu kanwananga lwau? Kana una vo kayika mpila lutovoko ko, wasonekena Timoteo vo “ntiakididi” kakala. (1 Tim. 1:13) Una kakitukidi Nkristu ko, Paulu makasi mayingi kakala mau mu kuma kia Akristu. Wavova mu kuma kia alandi a Kristu vo: “Yabaluakila kikilu (yovo yabafungila kikilu makasi).” (Mav. 26:11) O makasi ma Paulu mayantika kuluka, kansi kolo kiayingi kiavioka muna lunga-lunga e ngindu ye mvovo miandi. (Mav. 15:36-39) Adieyi diansadisa mu sunda fu kiaki?

¹⁰ Vava kasonekena Akristu esi Korinto, Paulu wasasila e ndekwa kasadilanga muna kuyitumba. (Tanga 1 Korinto 9:26, 27.) Wabaka nzengo mu kuma kia lutovoko lwandi. Nanga wavava luludiku muna Diambu dia Nzambi yo lomba lusadisu kwa Yave kimana kasadila luludiku lwandi yo vanga mawonso mu kunlemvokela. * Tulenda vwa nluta muna mbandu andi kadi yeto mpe tunwananga ye kiwuntu kieto kialembi lunga.

11. Aweyi tulenda ‘kuyitontela’ mu zaya kana vo mu nzil’a ludi tukangadilanga?

¹¹ Ke tufwete zinga moko ko mu kuma kia nsambil’eto. Kansi, ‘tuyitontanga’ mu kala ye ziku kana vo mu nzil’a ludi tukangadilanga. (2 Kor. 13:5) Vava tutanganga e sono nze kia Kolose 3:5-10, tufwete kukiyuvulanga: ‘Nga ivanganga ngolo mu nwanisa zolela yame y’esumu? Yovo iyangalelanga vanga mana Yave kemenganga? Vava isadilanga Internete, avo vavaikidi fwaniswa isonganga mavangu ma zumba kukinsalukisa, nga ikanganga yo vana vau yovo ikwamanananga vavulula muna nzila zazi?’ Avo tusadidi luludiku lwa Diambu dia Nzambi muna zingu kieto, dilenda kutusadisa mu ‘yingila yo lembi kolwa.’ (1 Tes. 5:6-8)

12, 13. (a) Adieyi difwete kala i kani dieto vava ‘tusingikanga mambu’? Aweyi tulenda landila mbandu a Yesu muna wo vanga? (b) Nkia mpila mvovo tufwete venga vava ‘tusingikanga mambu’ y’akaka?

¹² Vava Nkand’a Nzambi usadilanga o mvovo “ludika” disongele vo tomesa yovo singika e lekwa. Ezak’e ntangwa tufwete vanga diambu muna singika e mambu yo muntu ona kabakwidi ko dina tuvovele yovo tuvangidi. Kasikil’owu, afidi a nsambila za Ayuda batumbanga Yesu wau kasongang’e ngemba “kw’akwa mpaku y’asumuki.” Yesu wabavutula vo: “Avimpi ke bavwidi nganga mfunu ko, akwa mayela kaka. Nwenda w’e nsasa za, Nkenda i nzolele, ke yimenga ko.” (Mat. 9:11-13) Kuna luzindalalu ye ngemba wasasila e Diambu dia Nzambi kw’awonso. Muna kuma kiaki, alembami bazaya vo Yave i “Nzambi a nkenda ye nsambu, nkwa ntim’evundu, o mwingi muna walakazi ye ziku.” (Luv. 34:6) Muna kuma kia ngolo kavanga Mwan’a Nzambi za ‘singika o mambu,’ ayingi bakwikila muna nsangu zambote.

¹³ E nona kia Yesu kikutulonganga una tufwete sadisilanga akaka. O muntu una kuna makasi olenda vova kondwa kwa ndekwa vo ‘diambu nzolele singika yo ngeye.’ E mpila yayi ke ina ngwizani ko ye mana masonama muna 2 Timoteo 3:16. Nkand’a Nzambi ke ukutuvananga nswa ko wa vovesela akaka kondwa ndekwa. Avo tubamini o muntu, e mvovo mieto mikala nze “ntoba za nsosolo. Vana fulu kia kunsadisa, milenda kumvanga mpasi.—Nga. 12:18.

14-16. (a) Akuluntu aweyi balenda ‘singikila mambu’ mu sadisa akaka mu fokola ntantani zau? (b) Ekuma dinina diamfunu kwa mase mu sadila Nkand’a Nzambi mu singika mambu y’esi nzo zau?

 ¹⁴ Aweyi tulenda songela luzindalalu ye ngemba vava tusadilanga Nkand’a Nzambi mu ‘singika mambu’? Yindula vo nkento yo yakala bena vo Akristu belombanga lusadisu kwa nkuluntu mu fokola ntantani zau. O nkuluntu adieyi kafwete vanga? Lembi kuyisia ku sambu dia mosi, olenda mokena yau vamosi muna sadila nkanikinu mia Nkand’a Nzambi. Nanga olenda sadila nkanikinu una muna kapu kia 3 kia nkanda Mbumba ya Zingu kia Nzo ya Kiese. Ekolo bebadikanga nkanikinu wau, o yakala yo nkento bebakula kana nkia luludiku konso muntu kafwete lemvokela. Kuna kulanda, o nkuluntu olenda yuvula kw’akazi awaya kana vo mambu mu soba mena yo kubavana lusadisu avo dikala diamfunu.

 ¹⁵ Aweyi mase balenda singikila mambu mu mpila ilenda kumikina kimwanda kia wan’au? Yindula vo mwan’aku ankento zolele sadisa mu yambula yikundi yambi. Entete ofwete zaya mayingi mu kuma kia nkundi ndioyo. I bosi, avo vena ye diambu ditokanese, olenda dio mokena yandi. Nanga olenda sadila nkanikinu mia Nkand’a Nzambi mina muna nkanda Os Jovens Perguntam Respostas Práticas, Volume 2. Muna lumbu ilanda, olenda vaula ntangwa mu mokena yandi. Olenda sia e sungididi muna fu kesonganga vava kekalanga muna salu kia umbangi yovo vava kekalanga vamosi y’esi nzo. Avo osongele luzindalalu ye ngemba vava omokenanga yo mwan’aku ankento, obakula vo zola okunzolanga ye mfunu okumvwanga. Ediadi dikumfila mu lemvokela luludiku lwaku mu kuma kia yikundi yo venga baka nzengo zambi muna zingu kiandi.

¹⁶ Muna songanga luzindalalu ye ngemba tulenda kasakesa awana betokananga mu kuma kia vimpi wau, bekendalalanga mu kuma kia katulwa mu salu, yovo mu kuma ki’elongi dia Nkand’a Nzambi ke betoma bakulanga ko. O sadila Diambu  dia Nzambi mu ‘singika mambu,’ nluta miayingi ditwasanga kwa nkangu a Yave.

17. Ekuma tufwete tambulwilanga elongi?

¹⁷ “Elongi ele diawonso, kiau kolo eki, ke dia kiese ko, dia ntantu kaka: kansi kadi, oku kukwiziwa diyiminang’awana basinsìsu dio, e mbongo aluvuvamu a ndungidi.” (Ayib. 12:11) Akristu ayingi bena vo se ambuta bekwikilanga vo elongi bavewa kwa mase mau m’Akristu diabasadisa kikilu. O tambulwila elongi kekutuvananga Yave mun’akuluntu dilenda kutusadisa mu sikila muna nzil’a moyo.—Nga. 4:13.

18, 19. (a) Elongi dina muna Ngana 18:13 ekuma dinina diamfunu muna ‘longela muna unsongi?’ (b) Vava akuluntu besonganga lulembamu yo zola ekolo besadisanga muntu osumukini, nkia nluta dilenda twasa?

¹⁸ Aweyi akuluntu ye mase balenda vanina elongi diambote? Yave ovovesanga Akristu vo balongela ‘muna unsongi.’ (2 Tim. 3:16) Muna kuma kiaki, tufwete sadilanga nkanikinu mia Nkand’a Nzambi vava tuvananga elongi kw’akaka. Umosi muna nkanikinu miami i una ubongelo muna Ngana 18:13 uvovanga vo: “On’ovana mvutwilu ke mu teka wá ko, dia uzowa yo luvungu kwa yandi.” Muna kuma kiaki, avo muntu ovovese akuluntu vo mpangi ovolele esumu diampwena, vitila bamvana elongi, akuluntu bafwete kala ye ziku vo bazeye mambu mawonso. (Nsi. 13:14) Muna mpila yayi balenda longela ‘muna unsongi.’

¹⁹ Vana ntandu, Nkand’a Nzambi uvovesanga akuluntu vo balongelanga akaka “kuna malembe.” (Tanga 2 Timoteo 2:24-26.) Dialudi vo esumu dia muntu dilenda fila akaka mu vovela Yave mbi yovo fungisa akaka makasi. Kansi, avo nkuluntu ofungidi makasi ekolo kevananga elongi kwa muntu, o nkuluntu ndioyo kafwana ko mu vana lusadisu. Muna kuma kiaki, vava akuluntu betangininanga “o walakazi wa Nzambi” balenda fila o nsumuki mu viluk’o ntima.—Roma 2:4.

20. Nkia nkanikinu bafwete sadilanga mase vava belonganga wan’au?

²⁰ Mase bafwete sadilanga nkanikinu mia Nkand’a Nzambi muna longa wan’au. (Ef. 6:4) Kasikil’owu, adieyi o se kafwete vanga avo muntu umvovese vo mwan’andi diambu diambi kavangidi? O se kafwete kala ye ziku vo ozeye mambu mawonso vitila kavana e tumbu kwa mwan’andi. Kavena muntu ko muna nzo z’Akristu ofwete funga makasi yamu tezo kia vanga evangu diansoki. “Yave nkwa walakazi wingi, ye nkenda,” amase bafwete kuntanginina vava belonganga wan’au.—Yak. 5:11.

21, 22. Nkia mvovo mia Nkunga 119:97-104 misonganga una omonanga mu kuma kia Diambu dia Yave?

²¹ Selo kimosi kia Nzambi wayika e kuma kazolelanga nsiku mia Yave. (Tanga Nkunga 119:97-104.) Wavwa ngangu, zayi yo umbakuzi muna longokanga Nkand’a Nzambi. O sadila mana kalongokanga, diansadisa mu venga mambu mambi mana bavanganga wantu ayangi. Wakalanga ye kiese kia longoka Nkand’a Nzambi. Wabaka e nzengo za lemvokela nsiku mia Nzambi emi miantwasilanga nluta miayingi muna zingu kiandi.

²² Nga obadikilanga Nkand’a Nzambi vo wa ntalu? O vanga wo dikumika lukwikilu lwaku vo Nzambi olungisa ekani diandi. E malongi ma Nkand’a Nzambi mekututaninanga mu lembi kuyivana mun’esumu dilenda kutufila muna lufwa. Muna sasilanga dio muna mpila yakiá, olenda sadisa akaka bazaya nzil’a moyo yo kangadila mo. Yambula twakwamanana sadila Nkand’a Nzambi ekolo tusadilanga Yave wa Nzambi eto wa nkwa zola ye ngangu.