Vava aviti a nzila wole babokelwa mu nzo mosi kuna Quênia, basivika kikilu vava bamona muntu mosi wankufi waleka vana mfulu. Tulu kiakete yo moko mankufi kakala mau. Ekolo banzayisanga o nsilu a Nzambi vo “o nkw’evola olemoka nze mvudi,” o muntu ndioyu waseva.—Yes. 35:6.

Aviti a nzila awaya bawá vo Onesmus, owau una ye kimbuta kia mvu 30, kimbevo kia visi (osteogenesis imperfeita) kawutuka kiau. Wau vo e visi yandi ke yakalanga ngolo ko, diasazu diakalanga mu toloka avo ovangidi salu kiangolo. E kimbevo kiaki ke kina ye nlongo ko. Muna kuma kiaki, Onesmus wayindulanga vo e zingu kiandi kiawonso kiampasi kaka kiadi kala yo nangina mun’ekalu di’avanguki.

Onesmus watambulwila longoka Nkand’a Nzambi. Kansi, o ngudi andi katambulwila ko vo kendanga muna tukutakanu tw’Akristu, wayindulanga vo veza bekumveza. Ediadi dikudikila e mpasi zandi. Muna kuma kiaki, ampangi babandulanga malongi ma tukutakanu kimana Onesmus kawilanga mo kuna nzo. Vava balongoka mu kolo kia ngonde tanu, Onesmus wabaka nzengo za kwenda kuna tukutakanu, kana nkutu nkia diambu dilenda kumbwila.

Nga o lungana muna tukutakanu tw’Akristu diakudikila mpasi za Onesmus? Ve kikilu! Vana fulu kia kunkudikila e mpasi, Onesmus wavova vo: “E mpasi zame zakulukanga ekolo yakalanga muna tukutakanu.” Wakwikilanga vo e vuvu kiandi kiampa i kiansadisanga mu lembi mona e mpasi zayingi. Vava ngudi a Onesmus kamona e kiese kia mwan’andi, yandi mpe watambulwila longoka Nkand’a Nzambi. Wavova vo: “O sadila Nzambi i nlongo mia mwan’ame.”

Ke vavioka kolo ko, Onesmus wakituka nteleki alembi vubwa. Kuna kwalanda wavubwa, owau osalanga se selo kia salu. Kana una vo kalendi sadila malu ye moko mandi ko, Onesmus, una y’etima dia vanga mawonso kalenda muna salu kia Yave. Wakala ye luzolo lwa sala se mviti a nzila a nsadisi, kansi lukatikisu kakala lwau. Ekuma? E kuma kadi wazaya wo vo muntu akaka ke vwa o mfunu muna nunguna ekalu diandi di’avanguki. Vava kazayisa e diambu diadi kwa mpangi zandi Akristu, bansia nsilu wa kunsadisa. I diau bavanga, basadisa Onesmus mu sala se mviti a nzil’a nsadisi.

Onesmus wakala mpe ye lukatikisu lwa sala se mviti a nzil’a ngonde ke ngonde. Kansi, lumbu kimosi watambula lukasakeso muna sono kia lumbu ke lumbu kiabongelwa muna Nkunga 34:8 kiyikanga vo: “Numika, nwatala wo vo Yave wambote.” Vava kabadika e sono kiaki, Onesmus wabaka e nzengo za sala se mviti a nzil’a ngonde ke ngonde. Owau lumbu yá kevaikanga muna salu kia umbangi konso lumingu yo longoka Nkand’a Nzambi yo wantu ayingi. Akaka mu nungunuka bena muna mwanda. Muna mvu wa 2010, wakota Sikola ya Salu kia Kimviti a Nzila. Ekwe kiese kamona Onesmus wau vo nlongi a sikola yayi mosi muna mpangi zole bayenda kunkingula muna lumbu kiantete!

Mase ma Onesmus bafwa, kansi ampangi muna nkutakani belunga-lunganga e nsatu zandi za lumbu ke lumbu. Ovutulanga matondo muna nsambu zawonso kevwanga owau yo vingila e lumbu kina kikala vo: “O ntungi kevova ko vo, Yela nyela.”—Yes. 33:24.