1, 2. Ekuma luvunu luwokelele mu lumbu yeto? Nkia lekwa besadilanga? (Tala fwaniswa kina va ntandu)

O LUVUNU mu sayana kaka lwina mu nza yayi tuzingilanga. Ediadi ka difwete kutusivikisa ko. Nkand’a Nzambi uvovanga vo Satana wa Nkadi Ampemba ovwidi ndekwa zayingi za vunginika wantu, yandi oyalanga e nza yayi. (1 Tim. 2:14; 1 Yoa. 5:19) Ekolo e mbaninu a nza yayi yambi ifinamanga, Satana owokesanga makasi mandi, kadi “kolo kiandwelo kaka” kasidi kiau. (Lus. 12:12) Muna kuma kiaki, ke diasivi ko vo awana befilwanga kwa Nkadi Ampemba bewokesanga e fu kia vava vunginika wantu, musungula awana besadilanga Yave.

² Amwangi a nsangu vava beyikanga selo ya Yave ye mana bekwikilanga, ezak’e ntangwa mawonso bevovanga maluvunu yovo makete kaka mekalanga maludi. Besadilanga zulunalu, televizau ye Internete mu mwanganesa nsangu zaluvunu. Muna kuma kiaki, wantu akaka befunganga makasi kadi bekwikilanga muna nsangu zazi zaluvunu lembi vava teka zaya e ziku kia diambu.

3. Nki kilenda kutusadisa mu lembi vunginikwa?

³ Tuvutulanga matondo wau vo tulenda kuyitanina muna luvunu lwa Satana. Tuna ye Nkand’a Nzambi owu ulenda kutusadisa mu lembi vukumunwa, kadi una yo “mfunu . . . muna ludika.” (2 Tim. 3:16) Mana Paulu wa ntumwa kasoneka mesonganga vo Akristu akaka kuna Tesalonika bavunginikwa. Wabalukisa vo ‘ke banikunwa nzaki ko muna nyindu miau.’ (2 Tes. 2:1, 2) Adieyi tulenda longoka muna lulukisu lwa Paulu? Aweyi tulenda lo sadila?

4. Akristu kuna Tesalonika nkia lulukisu bavewa mu kuma kia ngiz’a “lumbu kia Yave”? Aweyi tulukisilwanga o unu?

⁴ Muna nkand’andi antete kw’Akristu kuna Tesalonika, Paulu wabalukisa mu kuma kia ngiz’a “lumbu kia Yave.” Kazola ko vo mpangi zandi bakala muna tombe yo lembi kala wakubama. Muna kuma kiaki, wabavovesa vo nze “wan’a ntemo,” bafwete kwamanana ‘yingila yo lembi kolwa.’ (Tanga 1 Tesalonika 5:1-6.) O unu, tuvingilanga lufwasu lwa Babele Anene, i sia vo, kintwadi kia nsambila zawonso za luvunu ova nza. Lufwasu lwalu i lubantiku lwa lumbu kianene kia Yave. Tuvutulanga matondo wau tuzeye una ulunganena ekani dia Yave. Muna nkutakani, ntangwa zawonso tutambulanga malongi mekutusadisanga mu kala twakubama mu kuma kia lumbu kia Yave. Avo tulemvokele malongi mama, tulenda siamisa etima dieto dia sadila Nzambi yo sikidisa ngindu zeto.—Roma 12:1.

5, 6. (a) Muna nkand’andi wanzole kwa esi Tesalonika, nkia mambu Paulu kasoneka? (b) Adieyi o Yesu kevanga ke kolo ko? Nkia yuvu tufwete kiyuvula?

⁵ Vava Paulu katwika nkand’andi antete kw’Akristu kuna Tesalonika, ke vavioka kolo ko wabatwikila diaka nkanda wanzole. Muna nkanda wau, wasoneka mu kuma kia mpasi zikwiza vava Yesu ketwasa e mfundis’a Nzambi kwa ‘awana balembi lemvokel’e nsangu zambote.’ (2 Tes. 1:6-8) Muna kapu kia 2, Paulu wasoneka vo akaka muna nkutakani ‘batelamwang’e mioyo” mu kuma kia lumbu kia Yave kina babanzanga vo lukufi kiakala. (Tanga 2 Tesalonika 2:1, 2.) Akristu a tandu kiantete ke bazaya mayingi ko mu kuma kia ndungana ekani dia Yave. Paulu wasong’e ziku kia diambu diadi vava kasoneka mu kuma kia ungunza vo: “E nzay’eto ya ndambu, e nsakul’eto ya ndambu: kansi owu walunga, ovo wizidi, owu wa ndambu suka usuka.” (1 Kor. 13:9, 10) Kansi, o lemvokela tuludiku twa Yave tuna Paulu, Petelo wa ntumwa ye mpangi zakaka zakuswa akwa kwikizi basoneka diadi kubasadisa mu sikila ye kwikizi.

⁶ Muna singika e ngindu zau, Nzambi wavumunwina Paulu mu sasila vo vitila e lumbu kia Yave kiza, vekala ye umpengomoki wayingi, o “muntu ­esumu” ­osengomoka. * I bosi, muna ntangwa yasikidiswa, o Mfumu Yesu ‘otumbwila’ yovo fwasa awonso ana bevunginikwa. Paulu wayika e kuma befundisilwa. Wavova vo: ‘Ke batambula zola kwa ludi ko.’ (2 Tes. 2:3, 8-10) Diambote twakiyuvula: ‘Yamu nkia tezo izolelanga e ludi? Nga ilongokanga Eyingidilu ye nkanda miakaka mivaikiswanga muna wete dia nkangu a Nzambi mu nza yawonso, kimana yazaya mambu mesingikwanga muna umbakuzi weto wa malongi ma Nkand’a Nzambi?’

7, 8. (a) Mu nkia vonza bakala Akristu a tandu kiantete? (b) Nkia diambu dilenda kala se vonza kiampwena kw’Akristu akieleka o unu?

⁷ E malongi m’abendomoki ke mau kaka ko makala se vonza kwa Akristu. Paulu wasonekena Timoteo vo: “O zola nzimbu i’sina dia mayi mawonso.” Wavova mpe vo: “Akaka wau balowelanga zo, bavwidi tungiana muna lukwikilu, yo kusomeka muna mbidi a mpasi.” (1 Tim. 6:10) “O mavangu ma nitu” makala mpe se vonza kiampwena.—Ngal. 5:19-21.

⁸ Paulu wavana lulukisu lwasikididi kwa esi Tesalonika mu kuma ki’awana kayikila vo “ntumwa zaluvunu.” Akaka muna yau bavovanga “mambu mabendomoka, bavol’alongoki bend’abalandi.” (2 Kor. 11:4, 13; Mav. 20:30) Kuna kwalanda, Yesu wasanisina e nkutakani a Efeso wau balembi tonda “wantu ambi” muna nkutakani. Esi Efeso ‘batonta’ awana bakituka ntumwa zaluvunu ye mvuni. (Lus. 2:2) Muna nkand’andi wanzole kwa esi Tesalonika, Paulu wabavana luludiku vo: “Tunukanikini, abunzi, muna nkumbu a mfumu eto Yesu Kristu, nwavavuka muna konso mbunzi okangadilanga kuna umpumbulu.” I bosi, wayika Akristu ana ‘ke bazolanga sala ko.’ (2 Tes. 3:6, 10) Muna kuma kiaki, avo Akristu bakanikinwa vo bavenga ndiona una vo molo ye ke zolanga sala ko, disongele vo diamfunu kikilu mu venga ndiona oyantikidi bendomoka. O vanga kikundi yo wantu a mpila yayi muna tandu kiakina dia vonza diakala. Wantu awaya tinwa batinwanga. Ediadi mpe dialudi mu lumbu yeto.—Nga. 13:20.

9. Ekuma tufwete kuyikengela mu kuma ki’awana bezolanga mokena mambu ke mena ngwizani ko yo Nkand’a Nzambi yovo katikisa e nkubik’a Yave?

⁹ E mpasi zayingi ye mbaninu a nza yayi yambi mu finama ina. Tulukisu kavana o Yave muna tandu kiantete mfunu twina mu lumbu yeto. Ke tuzolele ‘tambula nsambu za Nzambi e ngofwila ko.’ Ediadi avo divangamene, tulenda vidisa elau dia zinga yakwele mvu. (2 Kor. 6:1) Avo muntu olungananga muna tukutakanu ovavanga kutuvukumuna mu mokena mambu ke mena ngwizani ko yo Nkand’a Nzambi yovo kumba akuluntu ye selo yakaka ya Nzambi, tufwete kuyikenga kikilu yo muntu a mpila yayi.—2 Tes. 3:13-15.

10. Akristu esi Tesalonika, nkia tusansu bakanikinwa vo balanda?

¹⁰ Paulu walukisa mpangi zandi esi Tesalonika vo ‘basikila’ yo kwamanana sadila mana balongoka (Tanga 2 Tesalonika 2:15.) Nkia “tusansu” balongwa? I malongi ma Yesu ye mana Nzambi kavumunwina Paulu ye akaka mu soneka, ke malongi ma nsambila za luvunu ko. Paulu wasanisina mpangi zandi muna nkutakani a Korinto vava kasoneka vo: “Nunsungamenanga muna mambu mawonso, nutatidilang’ak’o tusansu, wauna yanusansìdi to.” (1 Kor. 11:2) E malongi mama mu nto ya ziku matuka ye mafwana bundw’e vuvu.

11. Adieyi divangamanga kw’akaka vava bevunginikwanga?

¹¹ Vava Paulu kasonekena Ayibere, wayika mpila zole zina Nkristu kalenda vidisila lukwikilu lwandi yo lembi sikila ye kwikizi muna Yave. (Tanga Ayibere 2:1; 3:12.) Wasoneka mu kuma kia “kukumunwa” ye ‘vunzaniswa.’ Dilenda kala diampasi mu bakula vo e nzaza mu vauka ina y’ekumu. Ediadi dilenda vangama malembe-malembe. Kuna diak’esambu o muntu olenda fila e nzaz’andi muna maza yandi kibeni. E nona yole yayi isonganga dina dilenda vangama avo muntu ovunginikinu yo yambula vo e vuvu kiandi muna ludi kiayoya.

12. Nkia mambu malenda fwasa ngwizani eto yo Yave?

¹² Akaka muna esi Tesalonika nanga bayambula vo bavunginikwa. Adieyi tuvova mu lumbu yeto? Vena ye salu yayingi ilenda kutudia ntangwa. Yindula e ntangwa tuviokesanga mu nsaka, sadila Internete, tanga yo soneka mensagem yovo wá e nsangu za nsaka za somba. E mambu mama malenda fwisa Nkristu e diya yo kulula vema kwandi muna Yave. Adieyi dilenda vangama? O muntu olenda yambula samba ye nsi a ntima, yambula longoka Diambu dia Nzambi yo samuna nsangu zambote. Adieyi tulenda vanga muna lembi nikunwa nzaki muna nyindu mieto?

13. Nze una wasakulwa muna Nkand’a Nzambi, nkia fu bena kiau wantu ayingi? Nki kilenda kutusadisa mu tanina lukwikilu lweto?

¹³ Tufwete sungamenanga vo e mbaninu a nza ya Satana ifinamene. Muna kuma kiaki, o viokesa e ntangwa y’awana ke bekwikilanga ko vo mu “lumbu yambaninu” tuzingilanga, dilenda kala dia vonza. Petelo wa ntumwa wasoneka mu kuma kia lumbu tuzingilanga vo: “Muna lumbu yambaninu mukwiz’akwa nsokela ye nsokela, ana belandang’omau maketo, yo vova vo, o nsilu a ngiz’andi aweyi? kadi tuka muna lumbu kiawondoka mase o tulu, lekwa yawonso ina una, tuka kuna lubantiku lu’esemo.” (2 Pe. 3:3, 4) O tanga yo longoka Diambu dia Nzambi lumbu yawonso, dikutusadisa mu sungamena vo mu “lumbu yambaninu” tuzingilanga. Umpengomoki wasakulwa muna Nkand’a Nzambi wayantika sengomoka tuka kolo ye ukwamanananga yamu lumbu yeto. O “muntu esumu” wakinu yamu wau, osianga selo ya Nzambi kitantu. Muna kuma kiaki, ka tufwete vilakana ko vo e lumbu kia Yave kifinamene.—Sef. 1:7.

14. O kuyivana muna salu kia Nzambi ekuma dinina dia lutaninu?

¹⁴ E mpila yakaka tulenda vengela nikunwa muna nyindu mieto i samunanga e nsangu zambote. Vava Kristu Yesu una vo i Ntu a nkutakani kakanikina alandi andi vo bakitula wantu a zula yawonso s’alongoki yo kubalonga vo balunda mawonso kabalonga, o nkanikinu wau wadi tanina alandi andi. (Mat. 28:19, 20) Muna lemvokela nkanikinu wau, tufwete kala yo vema muna salu kia umbangi. Nga obenze vo ampangi kuna Tesalonika basilanga umbangi yo longa wantu mu kuma kia sia kaka vo bafwete wo vanga? Sungamena dina Paulu kabasonekena: “Ke nuzimi o mwanda ko; ke nuvezi malongi ma ngunza ko.” (1 Tes. 5:19, 20) O ungunza tulongokanga yo samuna kw’akaka wakiese kikilu!

15. Nkia mambu mamfunu tulenda badika muna nsambila ya esi nzo?

¹⁵ Yeto awonso tuzolele sadisa esi nzo zeto mu kala ateleki azikuka a nsangu zambote. Muna wo vanga, mpangi zayingi bevaulanga e ntangwa muna nsambila ya esi nzo mu vanga nsongesela balenda sadila muna salu kia umbangi. Nulenda kubika una nulenda vutukila kingula wantu. Nkia mambu nuvovela muna nkingula ilanda? Nkia mambu malenda fila awana nukingulanga mu kwamanana songa luzolo lwa longoka? Ayeyi i ntangwa yambote nulenda kubakingula? Ndonga mpe bevaulanga e ntangwa muna nsambila ya esi nzo mu kubika malongi ma tukutakanu kimana bazaya mana mevovelwa muna tukutakanu. Nga nulenda wo vanga y’esi nzo zeno? E mvutu zeno muna tukutakanu zikumika lukwikilu lweno yo kunusadisa mu lembi nikunwa e nzaki muna nyindu mieno. (Nku. 35:18) Kieleka, e nsambila ya esi nzo ikututaninanga mu lembi mokena mambu ke mena ngwizani ko yo Nkand’a Nzambi yo venga lukatikisu.

16. Nki kifilanga Akristu akuswa mu venga nikunwa muna nyindu miau?

¹⁶ Tuka mvu miayingi, Yave osambulanga nkangu andi muna kubasadisa mu bakula ungunza wa Nkand’a Nzambi. Ediadi dikutuvananga e vuvu vo nsambu zayingi tuvwa kuna sentu. Akuswa bena ye vuvu kia kwenda zingila kun’ezulu yo Kristu. E vuvu kiaki kikubafilanga mu venga nikunwa muna nyindu miau. Mana Paulu kasonekena esi Tesalonika malenda mpe sadilwa mu kuma ki’akuswa o unu. Wasoneka vo: “Edi ditufwene, twanufiaukilang’aka Nzambi, yeno abunzi nuzolelo kwa Mfumu, e kuma kadi, o Nzambi wanusola . . . muna luveleleso lua mwanda, yo muna kwikil’e ludi.”—2 Tes. 2:13.

17. Nkia lukasakeso otambwidi mu mvovo mina muna 2 Tesalonika 3:1-5?

¹⁷ Awana bevwila moyo a mvu ya mvu ova ntoto bafwete vanga mawonso mu ­venga nikunwa e nzaki muna nyindu miau. Avo vuvu kia zingila ova ntoto yakwele mvu una kiau, lemvokelanga elongi dia lukasakeso kavana o Paulu kw’akwandi akuswa kuna Tesalonika. (Tanga 2 Tesalonika 3:1-5.) Tufwete yangalelanga e mvovo miami mia lukasakeso. Kieleka, e nkanda kasoneka Paulu kwa esi Tesalonika mivwidi tuludiku twamfunu mu kuma kia mokena mambu ke mena ngwizani ko yo Nkand’a Nzambi yovo kala yo lukatikisu. Wau vo mu lumbu yambaninu tuzingilanga, tufwete yangalelanga kikilu tulukisu twatu.