Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

Nkia ntangwa o Yesu ‘kasila umbangi kwa mianda muna pelezo’? (1 Pet. 3:19)

Nanga kolo kiakete kaka kiavioka vava Yesu kafuluka, i bosi kazayisa kwa mbasi zazi zambi e tumbu kina bevewa.—15/6, lukaya lwa 23.

Nkia mambu tatu mampasi kafwete sunda o muntu muna tomesa longo lwandi lwanzole?

Diantete: vilakana longo lwandi lwantete yo yantika sia sungididi muna longo lwandi lwampa; diazole: kala y’akundi andi ankulu ana bena vo ke akundi a nkaz’andi ampa ko; diatatu: bund’e vuvu muna nkaz’andi ampa kana una vo nkaz’andi antete kasonga kwikizi ko.—1/7, lukaya lwa 9-10.

Nkia ntangwa o Yesu kefundisa wantu nze mameme yovo nkombo? (Mat. 25:32)

Ediadi divangama vava Yesu kekwiza fundisa wantu muna kolo kia mpasi zayingi, vava kifwaswa e nsambil’aluvunu.—15/7, lukaya lwa 6.

Nkia ntangwa avangi a umpumbulu beyikwanga muna kingana kia masa ye mbongo ambi besinga dila yo kwetesa meno? (Mat. 13:36, 41, 42)

Bevanga wo muna kolo kia mpasi zayingi vava bebakula vo ke bena y’etininu ko.—15/7, lukaya lwa 13.

E mvovo mia Yesu mu kuma kia ntaudi akwikizi yo lulungalalu nkia ntangwa miayantika lungana? (Mat. 24:45-47)

E mvovo miami ke miayantika lungana kina kia Pentikosti ya mvu a 33 wa Tandu Kieto ko, kansi kunim’a mvu wa 1914. Muna mvu wa 1919, o ntaudi akwikizi wasiwa kiyekwa muna esi nzo, i sia vo, Akristu awonso ana bedikilwanga muna mwanda.—15/7, lukaya lwa 21-23.

O Yesu nkia ntangwa kesia ntaudi akwikizi e kiyekwa muna salanganu yandi yawonso?

Ediadi kuna sentu divangama, muna kolo kia mpasi zayingi vava ntaudi akwikizi ketambula nsendo kuna zulu.—15/7, lukaya lwa 25.

E nkumbu za wantu akaka ke zasonama ko muna Nkand’a Nzambi. Nga disongele vo wantu ambi bakala yovo minkondwa mfunu?

Ve. Vena ye nkumbu zayingi za wantu ambote ye za wantu ambi ke zasonama ko muna Nkand’a Nzambi. (Rutu 4:1-3; Mat. 26:18) Vana ntandu, Nkand’a Nzambi uyikanga kaka nkumbu za mbasi zole zakwikizi.—1/8, lukaya lwa 10.

Vana ntandu a nkuma utukanga kwa Nzambi, nki kiasadisa 230 ma Mbangi za Yave mu zizidila nkangalu wandá tuka kuna pelezo ya Sachsenhausen?

Kana una vo batovoka mu kuma kia nzala ye mayela, mpangi zazi bakwamanana kasakesa muntu yo nkw’andi mu zindalala.—15/8, lukaya lwa 18.

Lusansu lwa Aneyisaele vava basauka Nkoko a Yodani yo kota muna Nsi a Nsilu, ekuma lwinina lwa lukasakeso kwa yeto?

Kana una vo nkoko wazala yo maza mu kuma kia mvula zangolo, Yave waningamesa maza kimana nkangu andi wasauka. Ediadi diakumika lukwikilu ye vuvu kiau muna yandi. Lusansu lwalu lulenda mpe kutukasakesa.—15/9, lukaya lwa 16.

Nkand’a Nzambi utoma vovelanga se ya lekwa. Ediadi aweyi disonganga?

Nkand’a Nzambi utoma yikanga se ya lekwa mu songa vo Nzambi otomene zaya dina e se kilenda vanga muna ngindu za wantu. Ozeye wo mpe vo e se kilenda kutusadisa mu sungamena mambu.—10/1, lukaya lwa 14-15.

O ungunza wasonama muna Mika 5:5 mu kuma kia mbuta ye mvungudi aweyi ulunganenanga mu lumbu yeto?

Tuzeye wo vo e ‘mvungudi nsambwadi ye mbuta nana’ beyikwanga muna Mika 5:5, akuluntu muna nkutakani besunzulanga, ana bekasakesanga nkangu a Nzambi mu kala wakubama vava usinga nwaniswa kwa Satana.—15/11, lukaya lwa 20.

Ekuma tuvwilanga Nzambi o mfunu?

Nzambi kaka olenda kutuvana luludiku lwambote luna tuvwidi o mfunu yo kutuzayisa e kuma kia mpasi zeto. Okutusadisanga mu zaya una tulenda vwila zingu kiambote ye kiakiese. Ke kolo ko olungisa e nsilu mina muna Diambu diambu kimana mawonso mama malungana.—1/12, lukaya lwa 4-6.