E mambu mampasi mekutubwilanga malenda kutukendeleka. Malenda tokanesa ngindu zeto, kutuyoyesa yo soba e mpila tubadikilanga e zingu. O Davidi wa Ntinu kuna Isaele yankulu mpasi zayingi kawanana zau. Aweyi kasundila zo? Muna nkunga kayimbila, Davidi wavova vo: “Muna nding’ame nkazìdi Yave; Muna nding’ame ndodokele Yave. Mpongola ntantal’ame vana kena; yo kunsonga mpasi zame. O mwand’ame ovo uyoyele mu mono, onge ozeye ngyend’ame.” Elo, Davidi wasamba kwa Nzambi kuna lulembamu lwawonso mu lomba lusadisu.—Nku. 142:1-3.

Muna nkunga wakaka Davidi wayimbila vo: “Dimosi ndombele kwa Yave, dina mvava; yakala kuna nzo a Yave e lumbu yawonso ya zingu kiame, yatala wete wa Yave wa Nzambi yo yandala muna tempelo andi.” (Nku. 27:4) Davidi kakala Nlevi ko, kansi yindula vo watelama kena vana yanzala kiavauka, vana ndambu a saba kina vana fulu kia nsambil’aludi. O ntim’a Davidi uzele ye kiese, ozolele vo kakala vana fulu kiakina e zingu kiandi kiawonso yo “tala o wete wa Yave.”

O mvovo “wete” ngwizani wina ye fu kia kala ye “luyangalalu lwa ntima ye ngindu.” E lumbu yawonso Davidi wayangalelanga e nkubik’a Nzambi mu kuma kia nsambila. Diambote twakiyuvulanga: ‘Nga imonanga nze una Davidi kamona?’

O unu, e nkubik’a Yave eyi ikutusadisanga muna kumfinama ke yina mu lekwa tumonanga ko. Kansi, muna tempelo a kimwanda ya Nzambi, i sia vo, nkubika yavauka ya nsambil’aludi. * Avo tuyangalela e nkubika yayi, yeto mpe ‘tumona o wete wa Yave.’

Yindula eziku dia nsongo dia lukau luamfutumuki diakala vana mwelo a saba. (Luv. 38:1, 2; 40:6) Eziku diadi diasunzulanga luzolo lwa Nzambi lwa tambula o moyo a Yesu nze kimenga. (Ayib. 10:5-10) Yindula e nsasa dina kwa yeto! Paulu wa ntumwa wasoneka vo: “Wau twakal’atantu, twabakaniswa kwa Nzambi muna mfw’a Mwan’andi.” (Roma 5:10) Avo tukedi yo lukwikilu muna menga ma Yesu mabunguka, tulenda vwa edienga dia Nzambi ye vuvu kitukanga muna kala akundi a Nzambi. Muna mpila yayi, tukala ye ngwizani ambote yo Yave.—Nku. 25:14.

Wau vo masumu meto “mavunzunwa,” tukalanga ye ‘nsungi ya mvutulu a moyo itukanga kwa Yave.’ (Mav. 3:19) E zingu kieto kina nze muntu una mu pelezo ona ovilukidi o ntima mu kuma kia mavangu mandi ekolo kevingilanga e tumbu kiandi kia lufwa. Vava o mfundisi una vo nkw’a walakazi kamwene luviluku lwandi lwa ntima, ovunzwini o bi wandi, i sia vo, okatwidi e tumbu kiandi kia lufwa. Ekwe luvevoko ye kiese kemona muntu ndioyo! Nze mfundisi ndioyo, Yave osonganga edienga kw’awana bevilukanga o ntima yo katula e tumbu kia lufwa.

E maka muna mambu ma nsambil’aludi kamona o Davidi muna nzo a Yave i ulolo wa akw’andi Aneyisaele bakutakana mu tanga yo sasila  e Nsiku, yoka e ndumbu ye salu kiavauka kina anganga ye Anelevi basalanga. (Luv. 30:34-38; Nta. 3:5-8; Nsi. 31:9-12) O unu, vena ye mambu mafwananene ye mana mavangamanga muna nsambil’aludi kuna Isaele yankulu.

Nze muna tandu yavioka, o unu mpe tulenda vova vo: “Kuna kwa wete, kuna kwa kiese kwa mpangi bakadila vamosi!” (Nku. 133:1) Omu nza yawonso, e ‘kintwadi kia wana-ngudi’ mu wokela kaka kina. (1 Pet. 2:17) E Diambu dia Nzambi ditangwanga yo sasilwa muna nkanda ye muna tukutakanu tweto. Muna nkubik’andi, Yave ovanganga nkubika muna kutulonga. Vena mpe ye ulolo wa nkanda minietekwanga muna kutusadisa muna longi dia yeto kibeni ye dia esi nzo. Mpangi mosi muna Buka kia Selo Yambuta wavova vo: “O badika e Diambu dia Yave, toma fimpa e nsas’andi yo vava e ngangu yo umbakuzi, dikuntwasilanga mavwa mayingi ma mwanda ye kiese.” Elo, ‘o zayi ulenda kala wabiza mu mioyo mieto.’—Nga. 2:10.

Mu lumbu yeto, selo ya Yave besambanga kwa yandi e lumbu yawonso. Kuna kwa Yave, e sambu yayi ina nze ndumbu za nsunga. (Nku. 141:2) Ekwe kiese tumonanga muna ntima wau tuzeye vo Yave wa Nzambi otoma yangalalanga vava tukumfinamanga muna sambu!

Mose wasamba vo: “Yambula wete wa Yave wa Nzambi eto wakala yeto: Utusikidisila salu kia moko meto.” (Nku. 90:17) Ekolo tusalanga e salu kia umbangi y’etima diawonso, Yave osambulanga e salu kieto. (Nga. 10:22) Nanga twasadisa kala ayingi mu zaya e ludi. Dilenda kala vo tuzindalalanga mu salu kia umbangi mu mvu miayingi kanele vo luvezo, kimbevo, lukendalalu yovo lubangamu. (1 Tes. 2:2) Kana una vo i wau, tumonanga o “wete wa Yave” yo zaya vo S’eto ezulu otoma yangalelanga e ngolo tuvanganga.

Davidi wayimbila vo: “Yave i kunku kiame ye mbungwa: Nge osikidis’ekau diame. E mbambi zandwakila muna mwambote.” (Nku. 16:5, 6) Davidi wavutulanga matondo mu kuma kia “kunku” kiandi, i sia vo, mu kuma kia ngwizani andi ambote yo Yave y’elau dia kunsadila. Nze Davidi, tulenda wanana ye mpasi, kansi tuvwanga nsambu zayingi za mwanda. Muna kuma kiaki, yambula twakwamanana mwena e nsambil’aludi e kiese yo yangalela e tempelo a kimwanda ya Yave.