1. Wau vo mu mpw’a Nzambi twavangilwa, nkia ngangu tuna zau?

 “UNA win’o Se, i win’o mwana.” E mvovo miami wantu ayingi bevovanga mio kwa wana bafwanana yo mase mau. Vana ntandu, wana awonso besambukilanga e fu ya mase mau. O Yave wa S’eto ezulu, yandi i Mvani a moyo. (Nku. 36:9) Wau vo tu wan’andi, twafwanana yo yandi muna maka mambu. Wau vo mu mpw’andi twavangilwa, tuna ye ngangu za yindula, za bak’e nzengo yo vanga kikundi.—Etu. 1:26.

2. E kikundi kieto yo Yave mu nki kitukanga?

² Yave olenda kala Nkundi eto. E kikundi kiaki kitukanga muna zola kena kwau o Nzambi muna yeto ye muna lukwikilu lweto muna yandi yo Mwan’andi. Yesu wavova vo: “Muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” (Yoa. 3:16) Vena ye nona yayingi ya wantu ana bakala ye ngwizani ambote yo Yave. Yambula twabadika nona yole.

3, 4. Nki kiaswaswanesanga kikundi kia Abarayama yo Yave ye kina kia Aneyisaele yo Yave?

³ Yave wayikila se dia Aneyisaele vo ‘Abarayama wa nkundi ame.’ (Yes. 41:8) Muna wanzole wa Tusansu 20:7, Abarayama  oyikilwanga mpe vo nkundi a Nzambi. Nki kiasadisa Abarayama mu kala ye kikundi kia mpila yayi yo Mvangi andi? I lukwikilu lwasikila kakala lwau.—Etu. 15:6; tanga Yakobo 2:21-23.

⁴ O Yave wakala mpe Se ye Nkundi kwa mbongo a Abarayama ina yakituka se zula kia Isaele. Kansi, diankenda kikilu vo bavidisa kikundi kiau yo Nzambi. Ekuma? E kuma kadi bayambula songa lukwikilu muna nsilu mia Yave.

5, 6. (a) Aweyi Yave kakitukila se Nkundi aku? (b) Nkia yuvu tufwete kiyuvula?

⁵ Avo olongokele mayingi mu kuma kia Yave, o lukwikilu lwaku lusikila, o zola kwaku mpe muna yandi kuwokela. Yindula e lumbu yavioka, vava wazaya vo Nzambi muntu kikilu ye olenda kala ye ngwizani ambote yo yandi. Walongoka mpe vo yeto awonso mun’esumu tuwutukilanga mu kuma kia ukolami wa Adami. Wabakula mpe vo wantu awonso bavambuka yo Nzambi. (Kol. 1:21) I bosi, wabakula vo S’eto anzodi katuvavukidi ko yo lembi kutuvwa o mfunu. Vava twalongoka mu kuma kia nkubika kavanga ya kimenga kia Yesu kia lukûlu yo songa lukwikilu muna nkubika yayi, twayantika e kikundi yo Nzambi.

⁶ Avo tuyindwidi una twazayila Yave, tulenda kiyuvula: ‘Nga e kikundi kiame yo Nzambi mu nungunuka kina? Nga e vuvu kiame muna Yave yo zola kwame muna yandi mu wokela kwina lumbu ke lumbu?’ O Ngidone i muntu akaka wakala nkundi a Nzambi. Yambula twabadika e mbandu ambote kasonga ye una tulenda kuntanginina.

7-9. (a) Nkia diambu diasivi Ngidone kawanana diau? Nkia nluta diatwasa (Tala fwaniswa kuna lubantiku lwa longi.) (b) Aweyi tulenda wokesela ngwizani eto yo Yave?

⁷ O Ngidone wa mfundisi, wasadila Yave muna ntangw’a mpasi, vava Aneyisaele bakota muna Nsi a Nsilu. E kapu kia 6 kia nkand’a Afundisi kisonganga vo mbasi a Yave wayenda kwa Ngidone kuna Ofera. Muna ntangwa yayina, esi Midiani bavumisanga Isaele. Muna kuma kiaki, Ngidone wabundanga e masa, ke vana fulu kiasenzama ko, kansi mun’ekaminu dia vinyu, muna kalenda swekela masa mu nzaki zawonso. Wasivika kikilu vava mbasi kamoneka kwa yandi yo kunyikila vo “ekesa dingi.” Ngidone wakatikisa kana vo Yave, ona wavuluza Aneyisaele kuna Engipito, okubasadisa mpe muna ntangwa yayina. Wau vo Yave wantuma, mbasi wavovesa Ngidone ye ziku kiawonso vo Nzambi okunsadisa.

⁸ Ngidone watokananga mu kuma kia una kadi ‘vuluzila Isaele vana koko kwa Midiani.’ Yave wamvana e mvutu zatoma kia: “Kala nkala yaku, watufakesa Anemidiani nga muntu mosi.” (Afu. 6:11-16) Wau vo lukatikisu kakala lwau mu mpila diadi vangamena, Ngidone walomba sinsu kwa Yave. Zaya dio vo muna mbokena zazi, Ngidone kasala katikisa ko vo Yave una kikilu.

⁹ Dina diavangama kuna kwalanda diakumika lukwikilu lwa Ngidone yo kumfila mu finama Nzambi. Ngidone walamba madia yo vana kwa mbasi. Muna mpil’esivi, o mbasi wazinisa o madia muna nsuk’a nkawu andi. Vava Ngidone kabakula vo Nzambi kikilu watuma e mbasi yayi, wamona wonga yo vova vo: “Ekwe, e Mfumu Yave! kadi mbwene mbasi a Yave o mantalani.” (Afu. 6:17-22) Nga diambu diadi diafwasa e ngwizani a Ngidone yo Nzambi? Ve. E diambu diadi diasadisa Ngidone mu toma zaya Yave yo kala yo luvuvamu yo Nzambi. Tuna ye ziku kiaki mu kuma ki’eziku katunga o Ngidone yo yikila dio vo “Yave-salome.” E nkumbu yayi ina ye nsasa vo  “Yave i Luvuvamu.” (Tanga Afundisi 6:23, 24.) Avo tubadikidi mana o Yave kevanganga e lumbu yawonso mu kuma kieto, tubakula vo Nkundi akieleka kikilu. O sambanga kwa Yave kuwokesanga luvuvamu lweto lwa ntima yo siamisa e ngwizani eto yo yandi.

10. Mun’owu wa Nkunga 15:3, 5, nkia mambu Yave kekutulombanga muna kala akundi andi?

¹⁰ Vena ye mambu tufwete lungisa muna kala akundi a Yave. Nze una wasonama muna Nkunga 15, Davidi wayimbila nkunga usonganga mana mevavwanga kwa yeto muna ‘nangina muna saba kia Yave,’ i sia vo, kala akundi a Nzambi. (Nku. 15:1) Yambula twabadika mamole muna mambu mama—venga fu kia kumba yo kala nkal’ambote muna mambu mawonso. Muna kuma kia ndiona ketondanga o Yave mu kala nkundi andi, Davidi wavova vo: “Ona kekumbila muna lubini ko, . . . ngatu tambula mbabu muna munkondwa-kuma.”—Nku. 15:3, 5.

11. Ekuma tufwete vengela e fu kia kumba?

¹¹ Muna nkunga wakaka, Davidi walukisa vo: “Kengesa lubini luaku muna mbi.” (Nku. 34:13) Avo ke tulemvokele luludiku lwalu ko, tulenda fwasa kikundi kieto yo S’eto ezulu. Kieleka, o kumba i fu kia Satana wa ntantu a Yave. O mvovo wa Kingerekia wasekolwa vo Nkadi ampemba, una ye nsasa vo “nkumbi.” Avo tuyikebele mu mana tuvovanga kw’akaka, dikutusadisa mu finama Yave. Tufwete kikilu kuyikenga mu mpila tukadilanga y’akaka, musungula awana besolwanga kwa Yave mu vit’o ntu muna nkutakani.—Tanga Ayibere 13:17; Yuda 8.

12, 13. (a) Ekuma tufwete kadila ye nkal’ambote muna mambu mawonso? (b) E nkal’ambote nkia nluta itwasanga?

¹² E selo ya Yave bazayakene vo akwa nkal’ambote. Paulu wa ntumwa wasoneka vo: “Nutusambila: kadi tutomene wo zaya vo tuna ye ntona zambote, tuzolele kala nkal’ambote muna mambu mawonso.” (Ayib. 13:18) Wau vo tuzolele kala “nkal’ambote muna mambu mawonso,” tufwete venga e fu kia vunginika mpangi zeto Akristu. Kasikil’owu, avo kwa yeto besadilanga, tufwete kadilanga yau mu mpila yambote yo kubafuta e nzimbu zina twawizana. Wau vo tu Akristu, tukadilanga kuna unsongi ye asadi eto ye akaka. Kuna diak’e sambu, avo kwa mpangi eto Ankristu tusadilanga, ke tufwete vavanga ko vo katuvana malau makaka wau vo tu ampangi.

¹³ Nkumbu miayingi, wantu a nza besanisinanga Mbangi za Yave mu kuma kia nkal’au ambote. Kasikil’owu, mfumu a kompani dimosi wabakula vo Mbangi za Yave belungisanga e nsilu miau. Wavova vo: “Oyeno nulungisanga konso dina nuvovele.” (Nku. 15:4) E nkala yayi yambote ikutusadisanga mu kwamanana kala akundi a Yave yo twasa nkembo kwa S’eto ezulu.

14, 15. Aweyi tulenda sadisila wantu muna salu kia umbangi mu kituka se akundi a Yave?

¹⁴ Kana una vo wantu ayingi tuwanananga yau muna salu kia umbangi bekwikilanga vo Nzambi una, ke bekumbadikilanga ko vo Nkundi au. Aweyi tulenda kubasadisila? Badika luludiku kavana o Yesu kw’alongoki andi 70, vava kabatuma nwole-nwole muna salu kia umbangi. Wavova vo: “Konso nzo nukota, nuteka vova vo, Luvuvamu omu nzo yayi. O mwan’a luvuvamu ovo wina mo, o luvuvamu lueno lusala yandi: ovo ke wau ko, vutukila lukunuvutukila.” (Luka 10:5, 6) Tulenda fila wantu ayingi mu  longoka e ludi vava tukubavoveselanga kuna ngemba zawonso. Avo tusongele e ngemba kw’awana bekutusianga kitantu, dilenda kubasadisa mu kulula o makasi yo yangalela wá e ludi muna lumbu ilanda.

¹⁵ Avo tuwananene yo wantu bayivana muna nsambil’a luvunu yovo ana belandanga e fu ya kisi nsi ke ina ngwizani ko ye Nkand’a Nzambi, tufwete kwamanana kubasonga e ngemba yo kadila yau muna luvuvamu. Tufwete kayisanga awonso bekwizanga muna tukutakanu tweto, musungula awana bena bakendalala mu kuma kia mambu mebwanga omu nza, bazolele longoka mu kuma kia Nzambi tusambilanga. E malongi mena ye ntu a diambu vo “Nkand’a Nzambi Zingu kia Wantu Usobanga,” mesonganga nona yayingi ya wantu a mpila yayi.

16. Aweyi tulenda kadila akundi a Yave ye ‘akw’andi a salu’?

¹⁶ Awana besalanga kumosi ntangwa zawonso, bekitukanga se akundi ambote. Awonso bakiyekola kwa Yave bena y’elau dia kala akundi andi ye ‘akw’andi a salu.’ (Tanga 1 Korinto 3:9) Ekolo tusamunanga e nsangu zambote yo kitula wantu se alongoki, tulongokanga mayingi mu kuma kia fu ya S’eto ezulu. Tumonanga una o mwand’andi avelela ukutusadisilanga mu lungisa e salu twavewa kia samuna e nsangu zambote.

17. Aweyi tukutakanu tweto twa mvivu ye twakaka tusongelanga vo Yave Nkundi eto?

¹⁷ Vava tukuyivananga muna salu kia samuna e nsangu zambote, e kikundi kieto yo Yave kiwokelanga. Kasikil’owu, tumonanga una Yave kevunzanesenanga makani m’atantu bevavanga ningamesa e salu kia samuna e nsangu zambote. Yindula mana mavangamene mu mvu miviokele. Nga ke tumonanga ko e mpila ina Yave kekutufidilanga? Tusivikanga kikilu mu mpila kekwamanenanga kutuvana madia ma mwanda. Muna tukutakanu twa mvivu ye twakaka, tumonanga una Yave kebakulwilanga e mpasi ye nsatu zeto. Kuna mfoko a lukutakanu lumosi lwa mvivu, esi nzo mosi basoneka vo: “O lukutakanu lwalu lusimbidi kikilu e ntima mieto. Tumwene una Yave kezolelanga konso muntu mu yeto, ozolele vo twakala ye zingu kiakiese.” Akazi mosi a esi Alemanha vava balungana muna lukutakanu lwa mvivu kuna Irlanda, bavutula matondo mu mpila ina ampangi babatambulwila yo kubalunga-lunga. Bavova mpe vo: “Kansi, tuvutwidi matondo mayingi kwa Yave ye kwa Yesu Kristu wa Ntinu kasola wau batubokele mu kala vamosi ye nkangu andi una mu kintwadi. Ke tuvovelanga kaka kintwadi kieto ko, kansi tuyangalelanga kio konso  lumbu. Mana tumwene kuna lukutakanu lwa mvivu kuna Dublin mekwamanana kutusungamesa elau tuna diau dia sadila Nzambi eto entwadi yo yeno awonso.”

18. Adieyi tufwete kiyuvula mu kuma kia mokena yo Yave?

¹⁸ Akundi befinamanga muntu yo nkw’andi vava bekalanga ye mbokena zambote. O unu, o wantu betoma sadilanga Internete yo twikana mensagem. Kansi nga ediadi dilenda tezaneswa yo mokena yo Yave wa Nkundi eto? Kieleka, yandi “owanga sambu.” (Nku. 65:2) Kansi, nga tuvaulanga e ntangwa ya mokena yo Yave?

19. Avo diampasi dikalanga mu ziula ntima kwa Yave muna sambu, adieyi dilenda kutusadisa?

¹⁹ Kuna kwa selo yakaka ya Nzambi, diampasi dikalanga mu vova mana mena muna ntima miau. Kansi, Yave ozolele vo twavanganga wo vava tusambanga. (Nku. 119:145; Man. 3:41) Avo diampasi dikalanga mu vova mana mena muna ntima, tuna ye lusadisu. Paulu wasonekena Akristu kuna Roma vo: ‘Kadi e nsamba tufwete samba, ke tuzeye yo ko; o mwanda, yandi kibeni, okutudodokelelanga ye bumu ilembi tatukana; ndion’osatanga ntima, ozeye nyindu a mwanda, e kuma kadi, ododokelelang’aveledi muna luzolo lua Nzambi.’ (Roma 8:26, 27) Vava tutanganga e nkanda mina muna Nkand’a Nzambi, nze Yobi, Nkunga ye Ngana, tulenda bakula una tulenda ziulwila ntima mieto kwa Yave.

20, 21. E mvovo mia Paulu kwa esi Filipi nkia lufiaulwisu mikutuvananga?

²⁰ Avo tuwananene ye mambu mampasi, tusungamena mana Paulu kasoneka kwa esi Filipi vo: “Ke nutelamenwa uma moyo ko; kansi muna mambu mawonso, muna sambu yo ludodokelo yo matondo, e ndomba zeno, mbula zazayiswa kwa Nzambi.” Avo tusambidi kwa Yave, olenda kutufiaulwisa. Paulu wasoneka vo: “O luvuvamu lua Nzambi, luna luviokele nyindu wawonso, luyingila ntima mieno, yo makani meno muna Kristu Yesu.” (Fili. 4:6, 7) Tufwete vutulanga matondo mu kuma kia “luvuvamu lwa Nzambi” olu luyingilanga e ntima ye makani meto.

²¹ E sambu kikutusadisanga mu kala ye ngwizani ambote yo Yave. Muna kuma kiaki, yambula ‘twakwamanan’o samba.’ (1 Tes. 5:17) Tufwete kwamanana siamisa e kikundi kieto yo Nzambi yo vanga mana kekutulombanga. Yambula twavaulanga e ntangwa ya badika e nsambu tuvwanga wau vo Yave i Se dieto, Nzambi eto ye Nkundi eto.