NKAND’A NZAMBI uyikanga nkumbu miayingi mina wantu batiazuna mvwatu miau. Kuna kw’atangi ayingi o unu, evangu diadi dilenda moneka vo dianzenza, kansi kuna kwa Ayuda diakala se sinsu kia lukendalalu, nsoni, ntantu yovo dilu.

Kasikil’owu, Rubeni ‘watiazuna mvwatu miandi’ vava kazaya vo ekani diandi dia tanina Yosefe wa mbunzi andi diafunga, kadi Yosefe watekwa se mbundu. O Yakobo wa se diandi mpe ‘watiazuna mvwatu miandi’ vava kawá vo Yosefe wadiwa kwa bulu. (Etu. 37:18-35) O Yobi ‘watiazuna mvwatu miandi’ vava kawá vo wan’andi awonso bavondelo. (Yobi 1:18-20) Nati a nsangu mosi wayenda kwa Ele wa ngang’ambuta ye ‘mvwatu miandi miatiazuka’ mu zayisa nsangu vo Aneyisaele basundilu kwa Afelesetia, o wana nwole a Ele bavondwa, e nkel’a kangu yakutumunwa. (1 Sam. 4:12-17) Vava Yosiya kawá mambu ma nsiku una bantangila yo bakula ukolami wa nkangu, ‘watiazuna mvwatu miandi.’—2 Nti. 22:8-13.

Vava Yesu kafundiswanga, Kayafa wa ngang’ambuta ‘watiazuna mvwatu miandi’ vava kawá e mvovo mina kabadikila vo mia lutiangu. (Mat. 26:59-66) Mun’owu wa nsiku a kirabi, konso muntu owilu e nkumbu a Nzambi itiangunwanga, kafwete tiazuna e mvwatu miandi. Kansi kuna kwalanda, nsiku wakaka wa kirabi wavewa ku nim’a lufwasu lwa tempelo a Yerusaleme wasonga vo “konso muntu owilu e Nkumbu a Nzambi itiangunwanga kafwete diaka tiazuna mvwatu miandi ko, kadi avo ke wau ko e mvwatu miawonso mikituka se mataya.”

Kieleka, evangu dia tiazuna e mvwatu diakala kaka o mfunu vana meso ma Nzambi vava muntu kasonganga luviluku lwakieleka lwa ntima. Muna kuma kiaki, Yave wavovesa nkangu andi vo ‘batend’e ntima, ke mvwatu ko, yo viluka kwa Yave wa Nzambi au.’—Yoe. 2:13.