Muna nkunga kayimbidila kwa Mvangi, Davidi wa Ntinu a Isaele yankulu wavova vo: “O vanga luzolo luaku, e Nzambi ame, kwau nyangalelele; o nsiku aku wina muna nsi ame a ntima.” (Nku. 40:8) Kana una vo wawanana ye mambu mayingi mampasi muna zingu kiandi, Davidi wakala ye kiese kia vanga luzolo lwa Nzambi. Kansi, Davidi ke yandi kaka ko i selo kia Yave wakala ye kiese kia sadila Nzambi aludi.

Paulu wa ntumwa wasadila e mvovo mina muna Nkunga 40:8 mu kuma kia Masia yovo Kristu. Wasoneka vo: ‘Ova [Yesu] se kekwiz’ova nza, ovovele vo, kimenga yo lukau, ke luau ozolele ko, kansi kadi, e to i wankubikila; o tukau twamfutumuki y’eyanga dia masumu, ke diau wayangalela ko: I bosi yavova vo, ndweke kwame; (muna nkanda diasonekwa mu kuma kiame) yavanga luzolo luaku, e Nzambi.’—Ayib. 10:5-7.

Vava kakala ova ntoto, Yesu wazolanga tala o nsema, kala y’akundi yo dia yau vamosi. (Mat. 6:26-29; Yoa. 2:1, 2; 12:1, 2) Kansi, o vanga luzolo lwa S’andi ezulu i diambu katoma yangalelanga. Muna kuma kiaki, Yesu wavova vo: “Okwame dia yavanga luzolo lua ndiona wantuma, yamanesa mpe salu kiandi.” (Yoa. 4:34; 6:38) Alongoki a Yesu, balongoka kwa Mfumu au e mbumba muna kala ye kiese kiakieleka. Kuna kiese yo vema kwawonso, basamunanga e nsangu zambote kw’akaka.—Luka 10:1, 8, 9, 17.

Yesu wakanikina alandi andi vo: “Nwenda, nwakitula wantu a zula yawonso s’alongoki, nwabavubila muna nkumbu a Se, yo Mwana, yo mwand’avelela: Nwabalonga vo balunda mambu mawonso inukanikini: tala, ngina yeno e lumbu yawonso, yakuna nsuk’a tandu.” (Mat. 28:19, 20) Muna lungisa o nkanikinu wau una ufwene, divavanga vo twasila umbangi kwa wantu vana konso fulu balenda wanuka, vutukila kingula awana besonganga luzolo  lwambote yo longoka yau o Nkand’a Nzambi. O sala e salu kiaki dilenda kututwasila kiese kiayingi.

Wantu batonda yovo lembi tonda e nsangu tusamunanga, e mpila tubadikilanga e salu kia umbangi, ilenda kutusadisa mu kala ye kiese. Ekuma tukwamanenanga samuna e nsangu zambote kana nkutu vava tuwanananga yo wantu ke betambulwilanga zo ko? E kuma kadi vava tusamunanga e nsangu za Kintinu yo kitula wantu s’alongoki, tusonganga zola kweto muna Nzambi ye mfinangani zeto. E mioyo mia wantu ye mia yeto kibeni mu vonza mina. (Yez. 3:17-21; 1 Tim. 4:16) Yambula twabadika maka mambu mesadisanga akw’eto Akristu mu kwamanana wokesa o vema kwau muna salu kia umbangi kana una vo besadilanga mu zunga yampasi.

O sadila e yuvu yambote muna salu kia umbangi nkumbu miayingi nluta ditwasanga. Lumbu kimosi, Amalia wamona yakala dimosi watanganga e zulunalu. Wamfinama yo kunyuvula kana vo nsangu zambote zakala mo. Vava kavutula vo ve, Amalia wavova vo: “Nsangu zambote za Kintinu kia Nzambi itwasidi.” Ediadi diatunta sungididi kia yakala diadina yo kumfila mu tambulwila elongi dia Nkand’a Nzambi. Muna kuma kiaki, Amalia wayantika longoka Nkand’a Nzambi yo wantu tatu vana fulu kiakina.

Janice wakitula e fulu kia salu se zunga kiandi kia samunwina e nsangu zambote. Vava nyingidi mosi yo nkundi andi a salu bayangalela elongi dimosi dia Eyingidilu, Janice wavanga nkubika ya kubanatinanga yinkanda-nkanda. I diau mpe kavanga kwa nkw’andi a salu ona wasivika mu kuma kia ntu mia mambu mia mpila mu mpila mivaikiswanga mun’Eyingidilu ye Despertai! Ediadi diafila nsadi ankaka mu lomba Eyingidilu ye Despertai! Janice wavova vo: “Ekw’e nsambu itambulanga kwa Yave!” Owau wantu 11 kenatinanga Eyingidilu ye Despertai! kuna salu.

Nkengi a zunga mosi, wavovesa ateleki vo vava besilanga umbangi mu nzo ye nzo, ke bafwete fokola moko ko yo muntu muna kumvovesa kaka vo bevutuka kunkingula lumbu kiankaka. Kansi, balenda kunyuvula vo: “Nga ndenda kusonga una tulongokelanga o Nkand’a Nzambi yo wantu?” yovo “Nkia lumbu ye ola ozolele vo yavutuka muna kwamanana e moko kieto?” O nkengi a zunga wavova vo mpangi zamakala ye zamakento za nkutakani mosi, bayantika longoka Nkand’a Nzambi yo wantu 44 muna lumingu lumosi.

O vutuka kubakingula lembi viokesa lumbu yayingi dilenda twasa nluta. Ekuma? Kadi ediadi disonganga vo tuna y’etima dia sadisa akwa luzolo lwambote babakula o Nkand’a Nzambi. Vava  nkento mosi kayuvulwa e kuma katambulwila longoka Nkand’a Nzambi ye Mbangi za Yave, wavutula vo: “Yatambulwila longoka kadi bansonga ngemba yo zola.”

Vava Madaí kafokola e Sikola ya Salu kia Kimviti a Nzila, ke vavioka kolo ko wayantika longoka yo wantu 15. Wavana nkutu alongoki 5 kwa ateleki ankaka. Ndonga muna alongoki andi belungananga muna tukutakanu ntangwa zawonso. Nki kiasadisa Madaí mu yantika longoka yo wantu awaya awonso? E sikola ya salu kia kimviti a nzila yanlonga o mfunu wa vutukilanga o wantu yavana kesololanga awana bena ye luzolo lwambote. Mpangi ankaka ona wasadisa wantu ayingi mu longoka e ludi kia Nkand’a Nzambi wavova vo: “Yalongoka vo songa luzindalalu muna vutukilanga wantu, i nsabi muna sadisa wantu ana bazolele zaya Yave.”

Ngolo divavanga muna vutukila kingula o wantu yo longoka yau o Nkand’a Nzambi. Kansi, e nluta tubakanga misundanga e ngolo tuvanganga. Avo tukivene muna salu kia samuna e nsangu za Kintinu, tulenda sadisa akaka ‘baluaka muna visa kia zay’e ludi’ eki kilenda kubavuluza. (1 Tim. 2:3, 4) Ediadi dilenda kututwasila kiese yo luyangalalu lulembi tezakana.